ජනවරමට බර තැබීම
සමානුපාතික මැතිවරණ ක්‍රමයක් යටතේ පැවති මැතිවරණයකින් පළමු වරට තුනෙන් දෙකක බලයක් සහිත ඓතිහාසික වූ ජයග්‍රහණයක් ශ්‍රී ලංකා පොදුජන පෙරමුණට ලබාදීම සම්බන්ධයෙන් දේශප්‍රේමී ජනතාවට ස්තූතිය පළ කරමින් ඇරඹූ ගෝඨාභය රාජපක්ෂ ජනාධිපතිවරයාගේ ප්‍රතිපත්ති ප්‍රකාශයේ පණිවුඩය ඉතාම පැහැදිලිය. නිරවුල්ය. ප්‍රබලය.
මහජනතාව විසින් තමන් කෙරෙහි තබන ලද විශ්වාසය කඩ නොකරන ආණ්ඩුවක් තමන්ගේ අපේක්ෂාව බව ජනාධිපතිවරයා තම ප්‍රකාශය ඔස්සේ පැහැදිලි පණිවුඩයක් ලබා දී තිබේ. ලොව ප්‍රබල රටවල් පවා කොවිඩ්-19 මර්දනය කිරීමට අපොහොසත් වූ තත්ත්වයක් තුළ ශ්‍රී ලංකාවට එය ජයගැනීමට හැකිවූ බව උදාහරණයක් වශයෙන් ගනිමින් ජනාධිපතිවරයා ප්‍රකාශ කළේ ජනතා නියෝජිතයන් ලෙස රටේ බහුතර ජනතාවගේ අපේක්ෂාවන්ට ගරු කළ යුතු බවය. එනම් හරියට වැඩ කරන ආණ්ඩුවක් තමන්ගේ අපේක්ෂාව බවය. එම අපේක්ෂාව මුදුන්පත් කර ගැනීමේ වගකීමට සියලු මැති ඇමැතිවරැන් විසින් සහාය දැක්වීම ඔහු දැඩිව ප්‍රබල ලෙස බලාපොරොත්තු වෙයි.
ප්‍රතිපත්ති ප්‍රකාශයේ එම කියවීම ආණ්ඩුවේ මැති ඇමැතිවරුන් විසින් තදින් වටහා ගත යුතුය. එසේ නොවුණොත් ජනාධිපති - අගමැති ප්‍රමුඛ ආණ්ඩුව සමඟ ඔවුන්ට ඉදිරි ගමනක් නැත. ජනතාවට සේවය කිරීම ජනතා නියෝජිතයන්ගේ වගකීම බවත් ජනතාව විශාල ජනවරමක් ආණ්ඩුවට ලබා දුන්නේ කුමන අපේක්ෂාවන් පෙරදැරි කරගෙනදැයි යන අවබෝධය තමා තුළ ඇති බවත් ජනාධිපතිවරයා ප්‍රකාශ කළේ එබැවිනි. සුර සැප විඳිමින් හිතුමතේ හරිහම්බ කර ගැනීමටත් රටට අවශ්‍ය නැති එහෙත් තමන්ගේ හොද්ද බොර කරගත හැකි කිසිදු වැඩකට නැති ව්‍යාපෘති වෙනුවට රටට වැඩක් ඇති හොඳම ව්‍යාපෘතිවල යෙදීමට හිත හදාගැනීමටත් මැති ඇමැතිවරුන්ට මේ අනුව බල කෙරෙනු ඇත.
මෙවර අමාත්‍යාංශ වෙන් කළේ රටේ බහුතර ජනතාවට බලපාන කෘෂි, ධීවර සහ පාරම්පරික කර්මාන්ත දියුණු කිරීම අරමුණු කර ගනිමින් බවද ගොවියාට ස්ථාවර මිලක් ලබාදීමට කටයුතු කරන බවද ජනාධිපතිවරයා තම ප්‍රකාශයේ සඳහන් කළේය. එම ක්ෂේත්‍ර භාරව සිටින කැබිනට් ඇමැතිවරුන්ට පමණක් නොව එහි අනුවිෂයන් පවරා තිබෙන රාජ්‍ය ඇමැතිවරුන්ටද විශාල වගකීමක් පැවරෙන බවට එය ප්‍රබල සංඥාවකි. තමන් අරමුණු කරගෙන සිටින ප්‍රතිඵල අදාළ විෂයන් භාර අමාත්‍යවරුන් සහ රාජ්‍ය ඇමැතිවරුන් විසින් ලබාගත යුතු බව එයින් කියැවෙයි. නිසැකවම මින් පෙර ආණ්ඩුවල දකින්නට නොතිබුණු “පසු විපරම” ඉදිරි කාලය තුළදී නිසැකවම සිදුවන බවට එය සාක්ෂියකි. ජනාධිපතිවරයා පසුගිය අන්තර්කාලීන ආණ්ඩු කාලය තුළදී පවා තමන් විවිධ ක්ෂේත්‍රවලට ලබාදුන් ඉලක්ක ජයගැනීමේ වැඩපිළිවෙළවල ප්‍රගතිය විමසා බැලූ බවද සඳහන් කළ යුතුය.
ආණ්ඩුවක මුල් අවුරුදු දෙක එම ආණ්ඩුවේ ගමන් මග පිළිබඳව කිසියම් අවබෝධයක් ලබාගැනීමට ප්‍රමාණවත්ය. වැඩ කරනවාද, බොරු කරනවාද, නැත්නම් හොරකම් කරනවාද යන්න පිළිබඳව එම කාලය තුළදී ඉවෙන් මෙන් දැනගැනීමට මහජනතාවට තිබෙන්නේ පුදුම හැකියාවකි. මේ නිසා ජනාධිපතිවරයාගේ ප්‍රතිපත්ති ප්‍රකාශය පිළිබඳව අවබෝධයකින් කටයුතු කිරීම මැති ඇමැතිවරුන්ගේ මූලිකම වගකීම වනු ඇත. එසේ නොවන විට ඒ බව අන් සියල්ලටමත් වඩා ඉක්මනින් ජනාධිපතිවරයා විසින් අවබෝධ කරගනු ඇත. නාස්තියට සහ දූෂණයට තමන්ගේ පාලනය තුළ කිසිදු ඉඩක් නොමැති බව ඔහු දැනුම් දුන්නේ ඒවාට සම්බන්ධ පුද්ගලයන්ට එරෙහිව තරාතිරම නොබලා පියවර ගන්නා බවට කළ ප්‍රකාශයෙනි. තම සෞභාග්‍යයේ දැක්මේ එක් අරමුණක් වන්නේ නාස්තිය සහ දූෂණය පිටුදැකීම බව ඔහුගේ කතාවේ පැහැදිලිව පෙන්වා දී තිබේ. එය ජනතාවගේ ද විශාල බලාපොරොත්තුවකි.
රට ඉදිරියට සංවර්ධනය කිරීමේදී ප්‍රධානම ගැටලුවක් වන්නේ අවශ්‍ය ප්‍රතිපාදන සලසා ගැනීමය. තමන්ට හිමිවූයේ කඩාවැටුණු ආර්ථිකයක් බව තම කතාව මුලදී ජනාධිපතිවරයා සඳහන් කළත් පසුව ප්‍රකාශ කළේ සංවර්ධන කටයුතු සඳහා අවශ්‍ය ප්‍රතිපාදන කෙළින්ම රාජ්‍ය ඇමැතිවරුන් වෙත ලබාදෙන බවය. සෑම රාජ්‍ය අමාත්‍යවරයකුටම විෂයන් බෙදා දී තිබීම හේතුවෙන් ප්‍රමුඛතාව දිය යුත්තේ කුමන ව්‍යාපෘතියට ද යන්න තෝරාගැනීම ඔවුන්ට ප්‍රශ්නයක් නොවනු ඇත. කැබිනට් අමාත්‍යවරුන් විසින් රාජ්‍ය ඇමැතිවරුන්ට වැඩ කළ නොහැකි ආකාරයට බාධා පමුණුවන්නේ නැතිව සහයෝගයෙන් කටයුතු කිරීම ද මෙහිදී වැදගත් වනු ඇත.
ජනාධිපතිවරයාගේ අරමුණ වන ඵලදායී පුරවැසියෙක්, ගුණගරුක සමාජයක් සහ සෞභාග්‍යයේ දේශයක් නිර්මාණය කිරීමට නව ආණ්ඩුවේ මැති ඇමැතිවරුන්ට විශාල කාර්යභාරයක් පැවරී තිබේ. සීතල කාමරවල සිට ව්‍යාපෘති මෙහෙයවූ ක්‍රමයට තිත තබා ජනාධිපතිවරයාගේ කැමැත්ත වන මහජනතාව කරා ගොස් සේවය කිරීමට අමාත්‍යවරැන් වගබලා ගත යුතු බවට ලබා දී ඇති පණිවුඩය නිසි පරිදි ග්‍රහණය කර ගත්තොත් රටට ගොඩ යා හැකිවනු ඇත.