බෞද්ධ නමින් අද ත්‍රස්ත බලවේගත් තිබෙනවා

- ආචාර්ය ඕමල්පේ සෝභිත හිමි

• තුනෙන් දෙකේ බලය සිහිකල්පනාවෙන් භාවිත කළ යුතුයි
• අධ්‍යාපනයේ පූර්ණ අයිතිය රජය අතට ගන්න
• බණ අහන්නෙ නැති වුණාට බණ මඩුනම් හදලා තියෙනවා
• එදා තිබුණු සැබෑ ජාතිකවාදී අරමුණ විනාශ වෙලා
• භික්ෂූන්ට දේශපාලනය තහනම් කළ යුතු නෑ
• නිවැරදි පාලනය තිබෙන්නේ ගෝඨාභය මහත්තයා අතේ
• පන්සල්වලට ප්‍රතිපාදන ලැබිය යුත්තේ මන්ත්‍රීන් හරහා නොවේ
• ඇතැම් භික්ෂූන් දැන් වෙළෙඳ භාණ්ඩ

 

 

දේශපාලන ඉතිහාසය ඇතුළත 78 ව්‍යවස්ථාවට අනුව ලංකාවේ පළවැනි වතාවට තමයි ආණ්ඩුවක් 2/3ක බලයක් ලබාගත්තෙ. මේ අසීමිත බලය ගැන සමාජයේ නොයෙක් කතාබහ තියෙනවා. බෞද්ධ හිමිනමක් ලෙස ඔබවහන්සේට මොනවගේ හැඟීමක්ද මේ බලය ගැන තියෙන්නෙ?

ආණ්ඩුවට 2/3 බලයක් ලැබීම හොඳ පැත්තට භාවිත කරන්නත් පුළුවන්. නරක පැත්තට භාවිත කරන්නත් පුළුවන්. පොදුජන පක්ෂයේ අය දිගින් දිගටම කිව්වෙ නව ව්‍යවස්ථාවක් සඳහා මේ 2/3 බලය අවශ්‍යයි කියලා. ඒක දැන් ලැබිලා තියෙනවා. ඒ නිසා ආණ්ඩුවේ ප්‍රධාන අරමුණ විය යුත්තේ ඒ බලය රටේ සංවර්ධනය සඳහා යොමු කරන එක. පසුගිය ආණ්ඩු සම්බන්ධයෙන් මහින්ද රාජපක්ෂ මහත්මයා පිළිගන්නවා යම් අඩුපාඩු සිද්ධවුණා කියලා. ඒ නිසා දැන් නිරන්තරයෙන් අවශ්‍යයි සතිසම්ප්‍රජන්‍යයය. ඒ කියන්නෙ සිහිකල්පනාවෙන් කටයුතු කිරීම. අතීතයේ වැරදි තේරුම් අරගෙන නිවැරදි තීන්දු අරගෙන නිවැරදි ලෙස පාලනය කිරීම තමයි දැන් අවශ්‍ය. විශේෂයෙන්ම මෙතැන තියෙන්නෙ ගෝඨාභය රාජපක්ෂ ජනාධිපතිතුමා සම්බන්ධයෙන් ඇතිවුණු විශ්වාසයක්. ඒ නිසා නිවැරදි පාලනය තියෙන්නෙ ගෝඨාභය රාජපක්ෂ මහත්තයා අතෙයි.

ඔබවහන්සේ ඇතුළු විශාල පිරිසක් යුද ජයග්‍රහණයෙන් පසුව ඉල්ලපු දේ තමයි විධායක ජනාධිපති ක්‍රමය අහෝසි කළ යුතුයි කියලා. ඔබවහන්සේ හිතනවද මෙවර නව ව්‍යවස්ථාවෙනුත් එම කාරණය ඇතුළත් විය යුතුයි කියලා?

නව ව්‍යවස්ථාවේ ප්‍රධාන කරැණු රුසක් සැකසිය යුතුයි. විශේෂයෙන් සෑම අංශයක් සම්බන්ධයෙන්ම සම සිතින් සම රිසින් කටයුතු කළ යුතුයි. රටටම එකම නීතියක් රටටම එකම පාලනයක් වශයෙන් ක්‍රමයක් නව ව්‍යවස්ථාව තුළින් අවශ්‍යයි. විශේෂයෙන් මගේ අදහසක් තියෙනවා අධ්‍යාපනය සම්බන්ධයෙන් පූර්ණ අයිතිය රජය සතු විය යුතුයි කියලා. පෞද්ගලික අංශය මගින් අධ්‍යාපන ආයතන පිහිටෙව්වත් ඒ ආයතනත් රජයේ අධීක්ෂණය යටතේ සිදුවිය යුතුයි කියන අදහසේ තමයි මම ඉන්නෙ. 

ඔබවහන්සේ කියන්නෙ නව ව්‍යවස්ථාව මගින් ජාතික ප්‍රතිපත්තියක් හඳුන්වා දිය යුතුයි කියලද?

විශේෂයෙන් කියන්න ඕනෙ මේ රටට අනිවාර්යෙන් ජාතික ප්‍රතිපත්තියක් අවශ්‍යයි. ලෝකයේ හැම රටකටම ජාතික ප්‍රතිපත්තියක් තියෙනවා. නමුත් ගෝත්‍රික රටවලට එවැනි ජාතික ප්‍රතිපත්තියක් නෑ. ඒ නිසා මෙහෙම ගියොත් අපේ රටත් කවදා හරි අයිති වෙන්නෙ ගෝත්‍රික රටවලට. අපේ රටේ තියෙන ප්‍රතිපත්තිය තමයි බලයට එන අයගේ ඕනෑ එපාකම් මත ප්‍රතිපත්ති වෙනස් වීම. විශේෂයෙන් තව දෙයක් තියෙනවා අධිකරණය සහ නීතිය සැමට එක සේ සමාන විය යුතුයි. එක එක අයට ඕන විදිහට එක එක ආගම්වලට අනුව නීති තියෙන්න බෑ රට ඇතුළේ. 

ඔය කියන කාරණා හැමදාම රජයකින් ඉල්ලන දේවල්. ඊට අමතරව ඔබවහන්සේලාගේ වෙන අලුත් යෝජනා තියෙනවද?

පැහැදිලිවම අපි රජයට කියනවා 2500 වැනි බුද්ධ ජයන්තිය වෙනුවෙන් පිහිටවනු ලැබූ කොමිෂන් සභාවේ වාර්තාවට අනුව එහි යෝජනා ක්‍රියාත්මක කළ යුතුයි කියලා. ඒ වගේම ඇතැම් කරැණු ව්‍යවස්ථාවට ඇතුළත් කළ යුතුයි කියලත් අපි කියනවා. 

ඒ වාර්තාව එතරම් සුවිශේෂී වෙලා ව්‍යවස්ථාවට කරුණු ඇතුළත් කරන්න තරම් විශේෂත්වය මොකක්ද?

විශේෂයෙන් මේ වාර්තාවෙ තියෙනවා ජනවාර්ගික ගැටලු, ආගම්වාදී ප්‍රශ්න ඇති නොවෙන්න සිදුකළ යුතු විසඳුම්. ඒ වාර්තාව සැකසුවේ ඉතාම දක්ෂ විද්වත් මණ්ඩලයක් විසින්. ඊළඟ ව්‍යවස්ථා සංශෝධනයේදි ඒ නිසා මේ වාර්තාව පිටුබලයක් කරගත යුතුයි. එතකොට ප්‍රශ්න ගොඩකට විසඳුම් තියෙනවා. 

පසුගිය මහ මැතිවරණයේදි බෞද්ධ ජනයා කේන්ද්‍ර කර ගනිමින් ආරම්භ කරන ලද පක්ෂයක ජාතික ලැයිස්තු ආසනයක් සම්බන්ධයෙන් රටේ විශාල කතාබහක් ඇතිවෙලා තියෙනවා. ඒ ස්වාමින් වහන්සේලාගේ හැසිරීම සම්බන්ධයෙන්. ඔබවහන්සේ කොහොමද ඒ ගැන දකින්නෙ?

භික්ෂූන් වහන්සේලාට දේශපාලනය තහනම් කළ යුතු නෑ. මොකද භික්ෂූන් වහන්සේලාට වගකීමක් තියෙනවා රට ගැන. ඒක ලංකා ඉතිහාසයේ ඉඳන් තියෙන දෙයක්. ඒක ලෝකේ තියෙන වෙනත් බෞද්ධ රටවලට වඩා වගකීමක් සහ බැඳීමක් අතපෙවීමක් භික්ෂූන් වහන්සේලාට දේශපාලනය තුළ තියෙනවා. රටේ විවිධ අවස්ථාවල නායකයන්ට හරි මග පෙන්වන්න මෙරට භික්ෂූන් වහන්සේලා මැදිහත් වුණු ආකාරය අපි දැකලා තියෙනවා. ඒකෙ වැරැද්දක් නෑ. පැරසිටමෝල් හිසේ කැක්කුමට ගන්නවා වගේම අධිමාත්‍රාවෙන් ගත්තාම ඒක විසක් වෙනවා. ඒ වගේ තමයි දේශපාලනය. අද ඒ නිසා මේක බරපතළ තත්ත්වයක් වෙලා තියෙනවා. 

මේක භික්ෂූන් වහන්සේලාගේ වරදක් හැටියටයි බහුතර ජනතාව පෙන්වා දෙන්නෙ?

මේක භික්ෂූන් වහන්සේලාගේ වරදක් නෙමෙයි. මේක ඇතැම් චරිතවල වරදක්. දැන් මේ ප්‍රශ්නෙ පේන්න තියෙන්නෙ අපේ ජනබලවේගය පක්ෂය ඇතුළෙනෙ. නමුත් ඒ පක්ෂයෙ විතරක් නෙමෙයි අනෙකුත් පක්ෂවලත් මේ තත්ත්වය තියෙනවා. දැන් බලන්නකො දැවැන්ත පක්ෂයක් වන එක්සත් ජාතික පක්ෂයට වෙලා තියෙන දේ. තාම මන්ත්‍රී කෙනෙක් පත් කරගන්න බෑ. එක්සත් ජාතික පක්ෂයෙ වැඩපිළිවෙළ නම් ඇත්තටම නින්දිතයි. 

නමුත් මෙතන තියෙන්නෙ අපේ හාමුදුරුවනෙ මේ පක්ෂයෙ ඉන්නෙ භික්ෂූන් වහන්සේලා නිසානෙ මේක කැපිල පේන්නෙ?

ඒක ඇත්ත. මොකද භික්ෂූන් වහන්සේලා ගිහියන්ටත් ආදර්ශයක් වෙන්න එපායැ. 

ඔබවහන්සේට හිතෙන්නෙ නැද්ද මේ ප්‍රශ්නෙ දුරදිග ගිහිල්ලා වැඩියි කියලා?

අතිශයින්ම වැඩියි. ඉතාම කනගාටු වෙනවා. අපේ ජනබල පක්ෂයට හැට හත්දාහක් ඡන්දය දීලා තියෙනවා. ඒ හැට හත්දාහම අමාරැවෙ දැමීමක් තමයි මේ කරන්නෙ. ඒ වගේම ඒ සියලු දෙනාම අවඥාවට ලක් කිරීමක්. 

ඔබවහන්සේ හිතන්නෙ මොකද්ද දැන් කළ යුත්තෙ?

ඔය ඔක්කොගෙන්ම අයින්වෙලා මේ ශාසනික වැඩපිළිවෙළට යොමුවෙන්න. මොකද ඔය වැඩේ අසාර්ථකයි. අපි දැක්ක විශිෂ්ටම මෙහෙවර කළේ පසුගිය කාලේ ජාතික හෙළ උරුමය. එදා ජාතික අවශ්‍යතාවයක් ඉටුකරගන්න පෙරමුණ අරගෙන ඒ අවශ්‍යතාවය 80%ක් ඉටුකරගෙන තමයි දේශපාලන භූමියේ කටයුතු කළේ. අන්න ඒ සිදුකළ භාරධූර්ය කර්තව්‍ය අද මේ සිද්ධියත් එක්ක හෑල්ලුවට ලක්වෙලා තියෙනවා. එදා හෙළ උරැමයේ භික්ෂූන් වහන්සේලා ඒ අදාළ අරමුණ අවසන් කරලා ඉවත් වුණා. නමුත් වර්තමානයේ ඒ දේ දකින්න හම්බවෙන්නෙ නෑ. මේ ප්‍රශ්නයෙදි පරිත්‍යාගශීලීන් නෑ.

ඔබවහන්සේ ඉල්ලුවාද මේ ආසනය ඉවත් කරන්න කියලා?

මම විතරක් නෙමෙයි භික්ෂු සංවිධාන, රාමඤ්ඤ නිකාය ඇතුළු සියලු දෙනාම මේ වන විට ඉල්ලීම් කරගෙන යනවා මේ ආසනය ඉවත් කරන්න කියලා. නමුත් පවතින නීතිය යටතේ එහෙම බැරැව ඇති. මෙතන මැතිවරණ කොමිසමේ වගකීමක් තියෙනවා රටේ පවතින නීතිය සහ මැතිවරණ නීතිය යටතේ කටයුතු කරන්න. මොකද මෙතන සාමයක් නැතිකොට එක්කෙනෙක්ට ඒ ආසනය දුන්නොත් මිනීමරාගන්න බැරි නෑ. 

ඔබවහන්සේ ජාතික හෙළ උරැමය ගැන කතා කළ නිසා මම මේ ප්‍රශ්නෙ අහන්නෙ. එදා තිබුණු ජාතිකවාදය අද ජාතිවාදය බවට පෙරළිලා කියලා ඔබවහන්සේට හිතෙන්නෙ නැද්ද?

ඔව්. අද වෙනකොට තියෙන්නෙ බරපතළ විකෘතියක්. එදා ඒ තිබ්බ අවංකභාවය නෑ. එදා ඒ තිබ්බ ජාතිකවාදී අරමුණු අද විවිධ කුමන්ත්‍රණ හරහා විනාශ වෙලා. පැහැදිලිවම අද වෙනකොට ජාතිකවාදයේ මුවාවෙන් අනෙකුත් අයට හිංසා පීඩා කරන තැනට පත්වෙලා. ඒක අපි අනුමත කරන්නෙ නෑ. ඒවාට බෞද්ධ බලවේග කියන්නෙ නෑ. ඒවාට කියන්නෙ ත්‍රස්තවාදී බලවේග. අද තියෙන්නෙ බෞද්ධ නමින් ත්‍රස්තවාදී බලවේග. ඒ නිසයි අනිත් ආගමිකයන්ට ගහන්න ගත්තෙ. මේක සිවුරු පෙරවාගත් හා සිවුරු පෙරවා නොගත්ත නූගත් කිහිප දෙනකු විසින් කරන අපරාධයක්. ඊට වඩා අපරාධය වුණේ මේවාට අත්පුඩි ගහලා හුරේ දාන නූගත් තුන්වැනි පන්තියේ පිරිසකුත් මේ වෙනකොට බෝවෙලා ඉවරයි. මේ නිසා බෞද්ධකමයි සිංහලකමයි ලෝකෙට බාල්දු වුණා. 

එදා ඔබවහන්සේලා වගේ උගත් බුද්ධිමත් ස්වාමින් වහන්සේලා ඒ අරගෙන ආපු ක්‍රියාදාමය මගදි අතහැරලා ගිය නිසා මේක වෙනත් අයගෙ අතට යොමුවීම හේතු වුණා කියලා හිතෙන්නෙ නැද්ද?

කතන්දරය නම් ඇත්ත. මොකද අපේ මූලික අරමුණ ආරණ්‍යවාසීව ඉඳලා වැඩකටයුතු කිරීම. ඒක තමයි වුණේ. දැන් ශාසනික කටයුතු ඉටුවෙනවා. 

දැන් මේ අලුත් කණ්ඩායම් මෙහෙයවන්නෙ පරිණත නායකහාමුදුරුවො නෙමෙයි. ඉතාමත් තරැණ ස්වාමින් වහන්සේලා. ඔබවහන්සේට හිතෙන්නෙ නැද්ද ඒ අත්දැකීම් අඩුකම නිසා මෙවැනි අවුල්සහගත තැන් වුණා කියලා?

ඔබ කියන කතාව හරියටම හරි. ඒක ඇත්ත කතාව. ඒවා නිවැරදි කිරීමේ වගකීම පැවරෙන්නෙ ශාසනික වශයෙන් මහානායක හිමිවරු ඇතුළු නිකාය නායක ස්වාමින් වහන්සේලාට. මේ දේ නිවැරදි කිරීමේ වගකීම ඒ නිසා අපි සියලු දෙනාගේම වගකීමක්. දැන් නම් ඇත්තටම අත්‍යවශ්‍යයි නිකායවල් ලෙසින් තමන්ගේ ස්වාමින් වහන්සේලාගේ විනය ආරක්ෂා කරන්න ප්‍රතිපත්තිමය ක්‍රමවේදයක්. 

ඇත්තටම භික්ෂූන් වහන්සේ නමක් පාර්ලිමේන්තුව නියෝජනය කළ යුතුමද?

අනිවාර්ය නම් නෑ. හෙළ උරුමය ඇතුළු වීමෙදි එදා භික්ෂූන් වහන්සේලාගේ මැදිහත් වීමක් අත්‍යවශ්‍ය වුණා. ඒකට හේතු වුණේ කිසිම ආණ්ඩුවක් කියන දේ ඇහුවේ නෑ. 

නමුත් අද වෙනකොට භික්ෂූන් වහන්සේලා පක්ෂවල ගොදුරු බවට පත්වෙලා තියෙනවා?

පැහැදිලිවම ගොදුරු බවට පත්වෙලා ඉවරයි. විශේෂයෙන් ආත්මාර්ථකාමී තත්ත්වයක් මුල්කොටගෙනයි මේ තත්ත්වය උදාවෙලා තියෙන්නෙ. අද ලෞකික නායකයා පක්ෂයේ නායකයා වෙලා ආධ්‍යාත්මික නායකයා බුදුන් වහන්සේ වෙලා. 

එහෙම වෙලා තියෙන්නෙ දේශපාලන හිතමිතුරුකම් සහ යම් යම් ආධාර නිසා නේද?

විශේෂයෙන්ම කියන්න ඕනෙ මන්ත්‍රීවරු පෞද්ගලිකවම ආධාර කරන දේ වහාම නවත්වන්න ඕනෙ. රජයේ ප්‍රතිපාදන සඳහා මහා භාරකාර මණ්ඩලයක් ඇතිකළ යුතුයි. ආණ්ඩුව විසින් ආගමික ආධාර දෙන්න ඕනෙ අනුපාතයක් අනුව. ඒ අනුව සෑම ආගමකටම ප්‍රතිපාදන වෙන්වෙන්න ඕනෙ. ඒ ප්‍රතිපාදන මන්ත්‍රීතුමා හරහා නෙමේ වෙන්න ඕනෙ. මේක අනිවාර්යෙන් ව්‍යවස්ථාවෙ කොටසක් හැටියට එන්නම ඕනෙ එකක්. මේ පෞද්ගලික ආධාර මත නිසා තමයි අද වෙනකොට රටේ විවිධ ආගමික ස්ථාන ගරාවැටෙන තැනට ගිහිල්ලා තියෙන්නෙ. සමහර පන්සල් පල්ලිවල වැසිකිළියක් හදාගන්න පුළුවන්කමක් නෑ මන්ත්‍රීතුමා අඳුරන්නෙ නෑ. සමහර තැන්වලට බල්ලෙක්වත් බණ අහන්න නෑ. හැබැයි කෝටි ගණන්වලින් බණ මඩු ගහලා. 

අපි දැකලා තියෙනවා ඇතැම් භික්ෂූන් වහන්සේලා ප්‍රසිද්ධියේ කියනවා රැපියල් 25000ටත් බණ කියනවා කියලා. ඒ නැතිබැරිකම නිසාද?

නෑ. අද භික්ෂූන් වහන්සේලා වෙළෙඳ භාණ්ඩ බවට පත්වෙලා තියෙන්නෙ. අද බෝධිපූජා සින්දු වගේ කියන්නෙ. පිරිත් එක එක තාලවලට කියනවා. ඒකෙන් වෙලා තියෙන්නෙ බුද්ධ ධර්මය විහිළුවක් බවට පත්වෙලා තියෙන්නෙ. සමහරක් පිරිවෙන් තියෙනවා භක්ති ගීත කියන මධ්‍යස්ථාන බවට පත් කරගෙන තියෙන. සමහර අය කියනවා බුදුන් ඉපදුණේ ලංකාවෙ කියලා. 

මෙවැනි දේවල් සිදු කරද්දී ගිහියන්ට ඒවා ප්‍රශ්න කිරීමේ හැකියාවක් නැද්ද?

ඒ අයම කියනවා එහෙම ප්‍රශ්න කරන්න හැකියාවක් නෑ කියලා. නමුත් ගිහියන්ට පූර්ණ අයිතියක් තියෙනවා අඩුපාඩුකම් වැරදි පෙන්වා දෙන්න. ඒක විනයානුකූලව තියෙනවා. 

දැන් මේ ඡන්දෙ දීලා ආසනයකට භික්ෂූන් වහන්සේලා රණ්ඩු වෙද්දි ඡන්දෙ දීපු මිනිස්සුන්ට හිතෙන්න පුළුවන් අපි සංඝ භේදය ඇති කළාද කියලා. ඒක ආනන්තරීය පාපකර්මයක්?

නෑ මේක සංඝ භේදය නෙමෙයි. මේකට කියන්නෙ ශාසන විනාශය කියලා. ඡන්දෙ දීපු මිනිස්සු මේකට සම්බන්ධ නෑ. ඒ අය දුන්නෙ යහපතක් අරමුණෙන්. 

ඇත්තටම දැන් මේ ප්‍රශ්නෙට මැදිහත්වෙලා ඉන්න ඔබවහන්සේත් දන්න භික්ෂූන් වහන්සේලාට දෙන්න පුළුවන් අවවාදය මොකක්ද?

කරැණාකරලා බල ලෝභීත්වයෙන් ඉවත් වෙන්න. තමන්ගේ පෞද්ගලිකත්වයට වඩා බුද්ධ ශාසනය ගැන හිතන්න. මේ මහා අවඥාවෙන් බුද්ධ ශාසනයටත් සිංහල ජාතියටත් වෙන හානිය නතර කරන්න. මේ සඳහා හොඳම දේ උගත් බුද්ධිමත් ගිහි කෙනෙක් මේ සඳහා යොමු කරන්න. 

ඔබවහන්සේ කියලා තියෙනවා පාතාලයට දෙන්න එපා කියලා මේ ආසනය?

පැහැදිලිවම. සිවුරු පොරවා ගත් පාතාලයන් අතට මේ ආසනය යවන්න එපා. ඒ වගේම කියනවා මහින්ද දේශප්‍රිය මහත්තයට එක එක්කෙනාගෙ මූණ බලන්නෙ නැතුව නිවැරදි තීන්දුව ගන්න කියලා.  

 ගයාන් ගාල්ලගේ