පාතාලය ඔලුවෙන් ගැලවීම
මේ දිනවල මාධ්‍ය හරහා එළියට ඇදෙන පාතාලයේ කුඩු, අවි ආයුධ සහ සංවිධානාත්මක අපරාධ පිළිබඳ ප්‍රවෘත්ති චිත්‍රපටයක් සේ අපි දැකගනිමින් සිටිමු. සැබෑවටම මේ දකිමින් සිටින්නේ බොලිවුඩ් හෝ හොලිවුඩ් හෝ ක්‍රියාදාම චිත්‍රපටයක් නම් එය විශ්වාස කළ නොහැකි බොරු කතාවක් හැටියට සලකා බැහැර කිරීමට වුවද ප්‍රේක්ෂකයන් නොපැකිළෙනු ඇතැයි පැවසුවොත් ඒ ගැන පුදුම විය යුතු නැත. දිනපතාම පාහේ එතරම් වැටලීම් සිදුවෙයි. කුඩු අසුවෙයි. ගිනි අවි සොයාගැනෙයි. ගුවන්තොටෙන් රට පැන ගැනීමට සූදානම් වූ පාතාලයෝ කොටුවෙති. ඒ අතරේ සමහර අපරාධකාරයෝ පොලිසිය සමඟ වෙඩි හුවමාරු කර ගැනීමේදී නැතහොත් සඟවා තිබූ අවි පෙන්වීමට යන මුවාවෙන් පැනයන්නට ගොස් හෝ වෙඩි කා මැරෙති.
මීට පෙරද පාතාලයෝ පොලීසියේ වෙඩි කා මියගියහ. කුඩු සහ ගිනි අවිද වැටලීම් වලදී සොයාගනු ලැබීය. එහෙත් මේ තරම් මහා පරිමාණයකින් එය සිදුවූයේ නැත. බොහෝවිට අත්අඩංගුවට පත්වූයේ හෝ වෙඩි කා මියගියේ පාතාලයේ ලොකු පොරවල් නොවේ. ඔවුන්ගේ ගෝල බාලයන්ය. එහෙත් මේ වනවිට ප්‍රධාන පාතාල කල්ලි මෙහෙයවන පිරිස්ද කොටු වී සිටිති. හිරේ සිටින පාතාල ගෝඩ් ෆාදර්ලාගේ අණට එළියේ සිටිමින් තම හතුරන්ට සහ පොලිසියට කොකා ගස්සන වැඩකාරයෝද ඝාතනය වූහ. මේ ප්‍රවණතාව දිගටම පවත්වාගෙන ගියහොත් ඉදිරි කාලය තුළදී පාතාල කල්ලිවලින් පීඩාවට පත් වී සිටින රටේ ඇතැම් ප්‍රදේශ ඒ පීඩනයෙන් ගලවාගෙන රට අපරාධවලින් මුදාගැනීමටද හැකිවනු ඇත. පසුගිය සතියේදී කටුනායක ගුවන්තොටුපොළේදී රට පැනගැනීමට ගත් උත්සාහයක් වැරදී කොටු වූ පාතාලයන් කිහිපදෙනාගෙන් පෙනී යන්නේ පොලීසියේ වැටලීම් පාතාලය තදින්ම බියගන්වා තිබෙන බවය.පොලීසියට අසුවීමෙන් පසුව ඔවුන් ප්‍රකාශ කර තිබුණේ අපරාධකරුවන් සොයා පොලීසිය මගින් සිදුකරන මෙහෙයුම්වලදී තමන් ඉලක්ක වන බව දැන සිටින නිසා පණ බේරාගැනීමට රට යාමට පැමිණි බවය. කතාව එසේ නම් වැටලීම් සාර්ථක වී ඇති බවට එය හොඳම සාක්ෂියකි.
පසුගිය බදාදා (26) මුල්ලේරියාව, අඹතලේ හන්දියේ පවත්වාගෙන ගිය රහසිගත නිවෙසක් වටලා රුපියල් කෝටි 40කට ආසන්න හෙරොයින් කිලෝ 42ක්ද ටී.56 ගිනි අවි 3ක්ද උණ්ඩ 170ක්, පිස්තෝලයක් සහ මැගසින් කිහිපයක් සොයාගත් බව කොළඹ අපරාධ කොට්ඨාසය මගින් හෙළිකර තිබිණි. අදාළ නිවෙස දැන් ටික කාලයක සිට පුවත් සිරස්තලවලට පණ පොවන ඉන්දියාවේදී වසදී මරාදමනු ලැබූ බව කියන අංගොඩ ලොක්කාගේ ආරක්ෂිත තිප්පොළක් බවද සඳහන්ය. ඔහුගේ කුඩු සහ ගිනි අවි ගබඩාවක් සොයාගත් ප්‍රථම අවස්ථාව මෙය බවද කියති. අංගොඩ ලොක්කා විසින් පාතාලයේ අණසක පතුරුවාගෙන සිටි ආකාරය පිළිබඳව ලැබෙන තොරතුරු අනුව මෙවැනි තිප්පොළ තව තිබෙන බවට සැකයක් නැත. ඒ සියල්ල ඉදිරි කාලයේදී සොයාගැනීමට පොලීසිය සමත්වනු ඇතැයි අපි විශ්වාස කරමු.
මේ රටේ නමගිය අපරාධකරුවන් ගණනාවක් බන්ධනාගාර ගතවී රජයේ ආරක්ෂාව යටතේ “බෝඩිං” වී සිටිමින් මත්කුඩු, මිනීමැරුම් ඇතුළු සංවිධාන්තමක අපරාධ මෙහෙයවන බවත් තවත් පිරිසක් ඉන්දියාවට සහ අරාබියේ ඩුබායි ඇතුළු රටවල් කිහිපයකට පැනගොස් ඒ රටවල රැඳී සිටිමින් අපරාධ මෙහෙයවන බවත් ප්‍රසිද්ධ රහසක් වී තිබිණි. කලකට පෙර ඔවුන්ට එරෙහිව දැල එලීමේදී විවිධ බලවත් පාර්ශ්වවලින් එල්ල වූ බව කියන බලපෑම් හේතුවෙන් ඔවුන් අත්අඩංගුවට ගැනීම වැළැක්වී ගිය බවද සඳහන්ය. අංගොඩ ලොක්කා ඉන්දියාවේදී වරක් අත්අඩංගුවට පත්වී මෙරටට එවීමට තිබූ අවස්ථාවක් වැළකී ගියේ එවැනි බලපෑමක් හේතුවෙන් බවට ප්‍රබල කතාවක් ඒ දිනවල පැවැති බවද අපට මතකය.
එවැනි ක්‍රියා යළි සිදුවීමට ඉඩ නොතැබිය යුතුය. පාතාල මර්දනයට රජය මගින් ගෙන ඇති දැඩි ග්‍රහණය තව තවත් දැඩි කළ යුතු අතර එය කිසිවිටෙක ලිහිල් කළ යුතු නැත. කුමන බලපෑම් පැමිණියත් පාතාලයේ අඬු කැඩීමට පොලිසිය මගින් ක්‍රියාත්මක කරන වැඩපිළිවෙළද අඛණ්ඩව ඉදිරියට ගෙන යා යුතුය. මේ ක්‍රියාවලියේදී ජනාධිපතිවරයාගේ සහ ආරක්ෂක ලේකම්වරයාගේ පූර්ණ අනුග්‍රහය තමන්ට බව පොලීසියේ සියලු නිලධාරීන් දැන සිටීම වැදගත්ය.
පාතාල මර්දනය සඳහා රජය ගෙනයන වැඩපිළිවෙළෙහි හැරවුම් ලක්ෂයක් වූයේ පොලීසියේ මත්ද්‍රව්‍ය නිවාරණ අංශයේ (නාකොටික්) නිලධාරීන්ගේත් කුඩු ජාලය මෙහෙයවන ජාවාරම්කරුවන්ගේත් ගජමිතුරු සම්බන්ධතාව හෙළිදරව් වීමය. නාකොටික් නිලධාරීන් විසින් සිදුකර තිබූ එම අපරාධකාරී ක්‍රියාවේ පිළිකුල් සහගත බව ප්‍රකාශ කිරීමට වචන ප්‍රමාණවත් නැති වුවද ඔවුන් විසින් දිගින් දිගටම ලබාදුන් තොරතුරු පාතාලයේ පිටකොන්ද කඩාදැමීමට තරම් ප්‍රබල බව අපගේ වැටැහීමය. මත්කුඩු, ගිනි අවි ඇතුළු පාතාලය මගින් ක්‍රියාත්මක කරන සංවිධානාත්මක අපරාධ මැඩපැවැත්වීමට නම් පොලීසියේ දූෂිත නිලධාරීන් සහ පාතාල ලොක්කන් අතර පවතින ගජමිතුරු සම්බන්ධතාව බිඳ හෙලීම අත්‍යාවශ්‍යය. මෙතෙක් කාලයක් පාතාල වැටලීම් සාර්ථක කර ගැනීමට තිබූ එම බාධාව දැන් ඉවත්කර තිබෙන බව අපි විශ්වාස කරමු. දැන් තිබෙන්නේ ගත්ත ගැම්ම දිගටම ගෙනයමින් පාතාලය ඉවරයක් වනතුරු වැඩේ කරගෙන යාමය.