අපි එකතුවුණේ දියවෙන පක්ෂයක් එක්ක නොවේ
දයාසිරි ජයසේකර - බතික්, අත්යන්ත්‍ර සහ දේශීය රෙදිපිළි රාජ්‍ය අමාත්‍ය
- ජනාධිපතිතුමා අවවාදයට වඩා ආදර්ශයෙන් වැඩ පෙන්වන කෙනෙක්
- පක්ෂයක් විදිහට අපට සාධාරණය ඉටුවුණා මදි
- ජයගත්තට පස්සේ සලකන විදිහේ වෙනස්කම් තිබෙනවා
- රණ්ඩු කර කර අපට දේශපාලනය කරන්න බෑ
- මෛත්‍රීපාල මහත්තයාට නි. අගමැතිකමක් අපි ඉල්ලුවේ නෑ
- 20 ගැන කමිටුවක් පත්කරලා තීන්දුවක් ගන්නවා
- කකුල් දෙපැත්තේ තියාගෙන ඉන්න අය තාමත් ඉන්නවා
ඇමැතිතුමා කොහොමද අලුත් ආණ්ඩුව ඇඟට එහෙම දැනෙන්නේ?
අලුත් ආණ්ඩුවේ හැටියට විශාල වැඩකොටසක් මේ වෙනකොට ආරම්භ කරලා තියෙනවා. විශේෂයෙන් කෝවිඩ් වසංගතයත් එක්ක රට ඊළඟට මුහුණ දෙන්න තිබුණ අභියෝග මූලික කරගනිමින් අපි මේ වැඩකටයුතු ආරම්භ කරලා තියෙනවා. විශේෂයෙන් දේශීය ආර්ථිකය නගා සිටුවන්නත් රැකියා බිහිකරන්නත් අපේ භාණ්ඩ අපනයනය කරන්නත් අරමුණු ඇතුවයි මේ ආණ්ඩුව දැන් ක්‍රියාත්මක වෙමින් යන්නේ. මට හිතෙන්නේ හොඳ ආරම්භයක් අරන් තියෙනවා.
ඔබ ආණ්ඩු ගණනාවක අමාත්‍ය ධූර දරපු කෙනෙක්. මේ ආණ්ඩුවේ ආරම්භය ගැන ඔබ ආණ්ඩුවේ ඉන්න කෙනෙක් ගැන සෑහීමකට පත්වෙනවද?
සෑහීමකට පත්වෙන්න පුළුවන්. විශේෂයෙන් අනවශ්‍ය වියදම් කපා ඉවත් කරලා ජනාධිපතිතුමා අරගෙන යන මේ ආදර්ශමත් ගමන ඇමැතිවරැන්ටත් රටේ දේශපාලනඥයන්ටත් හොඳ පූර්වාදර්ශයක්. ජනාධිපතිතුමා ඒ අතින් අවවාදයට වඩා ආදර්ශයෙන් තමන්ගේ වැඩ පෙන්නලා තියෙනවා.
ඔබලා ශ්‍රී ලංකා නිදහස් පක්ෂය හැටියට ශ්‍රී ලංකා පොදුජන පක්ෂයට සහාය දක්වන්න තීන්දු කළේ දෙපාර්ශවය අතර යම් යම් තීන්දු එකඟතා මත. ඒ දේවල් දැන් ඉෂ්ඨ කරගන්න හම්බවුණාද?
යම් යම් අසාධාරණකම් ගණනාවක් තියෙනවා. අපි එකතු වුණේ තනතුරු වරප්‍රසාදවලට වඩා රට ගැන හිතලා. ඒ නිසා ඒ ගැන හිතලා ඉවසීමෙන් අපිට ක්‍රියා කරන්න වෙනවා. ඒත් පක්ෂයක් විදිහට අපිට සිදුකරන අසාධාරණකම් අපිට බලාගෙන ඉන්න අමාරුයි. අපි බලමු අනාගතයේදීත් ඒ අඩුපාඩුකම් ගැටලු හදාගෙන ඉදිරියට යන්න.
ඔබ ඔය කතා කරන විදිහටනම් තේරෙන්නේ පක්ෂයේ මහ ලේකම්වරයා හැටියට ආණ්ඩුවේ ඇතැම් අයගේ සිදුවෙන කෙනහෙලිකම් නිසා කලකිරීමෙන් ඉන්නෙ වගේ?
කලකිරීම්නම් තියෙනවා ඉතින්. කවුරැත් එහෙම හැමෝම සතුටින් ඉන්නෙ නැහැනේ. හැමෝම සතුටින් වැඩ කරන්නෙත් නෑ. නමුත් මෙතන තියෙන්නේ පක්ෂයට සිදුකරන කෙනහෙළිකම් සහ අසාධාරණකම්. එහෙම නැතුව මම කතා කරන්නේ මගේ පෞද්ගලික අරමුණක් වෙනුවෙන් නෙවෙයි. විශේෂයෙන් පාක්ෂිකයන් ප්‍රාදේශීය සභා මන්ත්‍රීවරු, පළාත් සභා මන්ත්‍රීවරු ඇතුළු අය අනාගත ආණ්ඩුවක් ගොඩනැගීම සඳහා දායක වුණ විදිහට ඒ අයට සිදුවුණ සාධාරණය මදි කියලා මට හිතෙනවා.
හිටපු ජනාධිපති ඔබගේ පක්ෂයේ සභාපති. එතුමා අලුත් සන්ධානේ සභාපති. ඔබලගේ පක්ෂය නියෝජනය කරමින් පහළොස්දෙනකුත් ආණ්ඩු පක්ෂයේ වාඩි වෙලා ඉන්නවා. එහෙම වෙලත් තවම ඇයි කෙනහෙළිකම්?
ඒකට හේතුව එක එක පුද්ගලයාගේ තියෙන පෞද්ගලික ක්‍රියාකාරකම් තමයි. විශේෂයෙන් ඔබ අහලා ඇති කළගුණ සැලකීම කියලා. අන්න ඒ දේ තවම සමහර තැන්වලදී සිදුවෙලා නෑ. ඒ නිසා අපි අනාගතයේදී බලනවා කොහොමහරි සාකච්ඡා කරලා ඊට අවශ්‍ය පියවර ගන්න.
ඉතින් ඔබලට පුළුවන්නේ සෘජුවම ගිහිල්ලා ජනාධිපතිවරයා සහ අගමැතිවරයා සමඟ මේ ගැන සාකච්ඡා කරලා විසඳුමකට එන්න?
කතා කරන්න අවස්ථාවක් නැති එකයි මෙතන ප්‍රශ්නේ. බලමු අවස්ථාවක් හම්බුණොත් කතා කරන්න.
ඒ කියන්නේ ඔබලට අවස්ථාවක් දෙන්නෙ නැද්ද? නැත්නම් ඔබලා තවම ඉල්ලලා නැද්ද?
ඉල්ලලානම් තියෙනවා අවස්ථාවන් දෙනකල්ම. මෙහෙමයි. ජයග්‍රහණයට පෙර අවස්ථා දෙන එකයි ජයග්‍රහණයෙන් පසුව අවස්ථා දෙන එකයි අතර ප්‍රශ්නයක් තියෙනවා.
දැන් ශ්‍රී ලංකා නිදහස් පක්ෂය ආණ්ඩුව පිහිටුවන්න බර ඇදලත් අන්තිමේදී හම්බුණේ කැබිනට් අමාත්‍ය ධූර දෙකයි. මේ ඉල්ලපු ගාණද? නැත්නම් මේ දුන්න ගාණද?
මීට වඩානම් බලාපොරොත්තු වුණා ඇත්තටම. ලැබිලා තිබුණ පසුබෑමත් එක්ක ඊට අවශ්‍ය කටයුතු අපි සිදුකරනවා.
රටේ ජනතාව කතා වුණ දෙයක් තමයි හිටපු ජනාධිපති මෛත්‍රීපාල සිරිසේන මහත්මයට කැබිනට් අමාත්‍ය ධූරයක් නොලැබුණ එක ගැන. ඔහුට කැබිනට් අමාත්‍යධූරයක් දුන්නෙ නැද්ද? නැත්නම් ඔහු බලාපොරොත්තු වුණ කැබිනට් ධූරය ලැබුණේ නැද්ද?
එතුමා තනතුරක් ඉල්ලුවේ නෑ. එතුමා හැම මොහොතෙම ඉල්ලුවේ පක්ෂෙට සාධාරණයක් කරන්න කියලා. ඒක එතුමා පෞද්ගලිකව කතා කරලා කිව්වා. එතුමා පෞද්ගලිකව තනතුරැ බදාගන්න උත්සාහ කළේ නෑ.
මෛත්‍රීපාල මහත්මයට ආණ්ඩුවෙන් මොකක්හෝ ඉහළ තනතුරක් දෙනවා කියලා පොරොන්දු වුණේ නැද්ද?
අගමැතිතුමත් එක්ක පැවති සාකච්ඡාවලදී එතුමා කිව්වා අපේ සභාපතිතුමාට ගැලපෙන තනතුරක් සකස් කරලා දෙමුයි කියලා 20 වැනි සංශෝධනයෙන් පස්සේ. බලමු අනාගතයේදී ඒක මොන වගේ තත්ත්වයක් වෙයිද කියලා.
අපි අහලා තියෙන හැටියට නියෝජ්‍ය අගමැතිකමක් යෝජනා කළා කියලා ආරංචියක් තියෙනවා. හැබැයි 20 වැනි සංශෝධනය ඇතුළේ එහෙම තනතුරක් සඳහන් කරලා නෑ.
ඒක අතිශයින්ම බොරැ කතාවක්. ඒක ගොතපු කතාවක්. ඔය නියෝජ්‍ය අගමැති කියන කතාව මාධ්‍ය විසින් හදාගත්තු කතාවක්. අපි එහෙම දෙයක් කතා කරලත් නෑ. ඉල්ලලත් නෑ.
හරි එහෙනම් ඔබලා බලාපොරොත්තු වන තනතුර මොකද්ද ඔබේ සභාපතිට ආණ්ඩුවෙන්?
බලමු. ඒක සාකච්ඡා කරලා කරන්න ඕන දෙයක්. ඒක මාධ්‍යත් එක්ක කතා කරන්න ඕන දෙයක් නෙවෙයි. ඒක මම හිතන්නේ ආණ්ඩුවේ අභ්‍යන්තරය ඇතුළේ කතා කළ යුතු දෙයක්.
කැබිනට් අමාත්‍ය ධූර දෙක විතරක් අරගෙන නිශ්ශබ්ද වුණ ඔබලට ඔය වගේ ඉහළ තනතුරක් ලැබෙයිද?
අපි ඉල්ලපු ප්‍රමාණයකුත් තිබ්බා කැබිනට් අමාත්‍ය ධූර. පස්සෙ ඒ අයම කිව්වා තුනක් දෙනවා කියලා. අන්තිමේදි ඒක දෙක වුණා. අපි තමයි ප්‍රධාන පක්ෂය සන්ධානයට එකතු වුණ. ඒ නිසා මම හිතනවා මීට වඩා සාධාරණයක් කරන්න පුළුවන් වුණානම් හොඳයි කියලා.
ඇත්තටම ඔබලා කැබිනට් අමාත්‍ය ධූර කීයක් ආණ්ඩුවෙන් ඉල්ලලා තිබුණද?
අපි එහෙම ඉල්ලලා තිබුණේ නෑ. මුලින්ම අපිට තුනක් දෙනවා කියලා තිබුණා. පස්සේ ඒක දෙක වුණා. ඕක තමයි තත්ත්වය.
ඔබට හම්බුණ ආමාත්‍ය ධූරය සම්බන්ධයෙන් යම් යම් කතාබහ එළියේ වගේම පාර්ලිමේන්තුවෙත් ඇති වුණා. ඔබනම් කිව්වේ මේකෙන් වැඩක් කරන්න පුළුවන් කියලා. ඇත්තටම රාජ්‍ය ඇමැති ධූරයක් හම්බුණ ඔබ සෑහීමකට පත්වෙනවද?
මම සෑහීමකට පත්වෙනවද? අපිට රණ්ඩු කරලා දේශපාලනය කරන්න බෑ. ලද දෙයින් සතුටු වෙන දේශපාලනයක් තමයි කරන්නේ. නමුත් මේ ලබාදුන් තනතුරැ සම්බන්ධයෙන් ප්‍රශ්න ගණනාවක් ඇතිවෙලා තිබෙනවා. බලමු. ඒ දේවල් අනාගතයේදී විසඳගන්න පුළුවන් වෙයි කියලා මම විශ්වාස කරනවා.
සාමාන්‍යයෙන් ඇමැති ධූරයන් ගන්න කෙනෙක්ගේ බලාපොරොත්තුව තමයි තමන්ට ඡන්දෙ දුන්න පාක්ෂිකයට දෙයක් කරන්න පුළුවන් වෙයි කියන අදහස. ඊටපස්සේ තමයි රටේ ජනතාවට කරන්න අරමුණ තියෙන්නේ. ඔබේ ඇමැති ධූරයෙන් පාක්ෂිකයට දෙයක් කරන්න පුළුවන්ද?
ලැබුණ තනතුරත් එක්ක කළ හැකි දේ තමයි මම මේ කල්පනා කරන්නේ.
ඒ කියන්නේ තාම ඔලුවට එන්නෙ නැද්ද මේ තනතුරෙන් කරන්න පුළුවන් මොනවද කියලා?
සාකච්ඡා ගණනාවක් කරගෙන යනවා. තම මුකුත් මගේ ඔලුවට එන්නෙ නෑ. ඒ නිසා දැන්ම ඒ ගැන ප්‍රකාශයක් දෙන්න බෑ. බලමු අනාගතයේදී මේ සම්බන්ධයෙන් හොයලා බලලා කරන්න පුළුවන් දේවල් මොනවද කියලා.
ඔබ ඔය බතික් ඇඳුමක් එහෙම ඇඳගෙන පාර්ලිමේන්තු ගියේ අදහසක් නැතිව පේන්න විතරද?
ඔව්. මට දුන්න තනතුරෙන් මිනිස්සුන්ට ආදර්ශයක් දෙන්න තමයි මං ඒ දේ කළේ.
මේ වනවිට 20 වන ව්‍යවස්ථා සංශෝධනය එළියට ඇවිල්ලා තියෙනවා. ඔබ ඒක දකින්න ඇති. ශ්‍රී ලංකා නිදහස් පක්ෂය හැටියට ඔබලා ඒ ගැන දරණ මතය මොකද්ද?
තාම අපි ඒක දැකලා නෑ. අපි බලාපොරොත්තු වෙනවා ශ්‍රී ලංකා නිදහස් පක්ෂය හැටියට යම් කමිටුවක් පත් කරලා ඒ ගැන හොයලා බලලා තීරණේකට එන්න. ඒ සාකච්ඡාවෙන් පස්සේ දැනුම් දෙන්නම් ඒ තීන්දු තීරණය.
19 වැනි සංශෝධනය ඔබේ පක්ෂයේ සභාපති ජනාධිපතිවරයා ලෙස ඉන්න කාලේ ගෙනාවේ. ඒකට ඔබලත් අත ඉස්සුවා. ඔබලා හිතනවද 19 වැනි සංශෝධනයේ කොටස් 20 වැනි සංශෝධනයට ඇතුළත් විය යුතුයි කියලා?
ඒකේ හොඳත් තියෙනවා නරකත් තියෙනවා. නමුත් ආණ්ඩුවක් හැටියට අපි අවසානයේ ගත යුතු තීරණය කුමක්ද කියලයි තීන්දු කළ යුත්තේ. මට කොහොමත් මේ තියෙන කෙටුම්පත බලන්නෙ නැතුව මොනවත් කියන්න බෑ. මේක නීතිපතිවරයා තීන්දු කරලා කැබිනට් මණ්ඩලයෙන් අනුමැතිය දීලා ඊටපස්සේ ගැසට් කරන්න ඕන. අපි බලමු ඒ අතරතුරේදී මේ ගැන අදහසක් දෙන්න.
ඒ කියන්නේ ඔක්කොම ඉවර වෙනකල් ශ්‍රීලනිපය හරි අදහසක් දෙන්නෙ නෑ?
නෑ. අපි තාම ඒ සම්බන්ධයෙන් සාකච්ඡා කරලා නෑ.
ශ්‍රීලනිපයට දැන් ආසන 15ක්ම තියෙනවා පාර්ලිමේන්තුවේ. ඔබලා උත්සාහ කරනවා නැවත ශ්‍රීලනිපය ගොඩනගන්න. ආණ්ඩුවට හේත්තුවෙලා පක්ෂයක් ගොඩනගාගන්න පුළුවන් වෙයි කියලා හිතනවද?
ප්‍රශ්නයක් නෑ ඒක. පක්ෂ ගණනාවක් තියෙයි. අපි එකතු වෙලා තියෙන්නේ දියවෙන පක්ෂයක් එක්ක නෙවෙයිනේ. පක්ෂෙ දියවෙන්නේ එක්සත් ජාතික පක්ෂයත් එක්ක එකතු වුණාම. ඒ නිසා ඊටවඩා වැදගත් දේශපාලන තීන්දුවක් අපි දැන් අරන් තියෙනවා. ඒ නිසා පක්ෂයේ අනාගතය ශක්තිමත්ව ගොඩනැගේවි.
ඔබ කිව්වා එක පාරක් ශ්‍රිලනිපය විනාශ කරන කණ්ඩායමක් ඉන්නවා කියලා දෙපැත්තට කකුල තියාගෙන. ඒ අය තාම ඉන්නවද?
ඉන්නවා තාම. කකුල් දෙක දෙපැත්තෙ තියන් ඉන්න කට්ටිය තාමත් ඉන්නවා. ඒක හැම පක්ෂයකටම පොදු දෙයක්.
ඊළඟ පළාත් සභා ඡන්දෙට කොහොමද ඔබලා මුහුණ දෙන්න යන්නේ එකතු වෙලාද නැත්නම් වෙන වෙනමද?
අපේ අරමුණ තියෙන්නේ එකතු වෙලා ඉදිරියට යන්න. ඒ අතරේ තීන්දු තීරණ ටික අනාගතේදී ගන්නවා.
ඔබේ පක්ෂයේ සභාපතිතුමානම් කිව්වා පක්ෂය ඡන්දෙන් පස්සේ තරැණ නායකත්වයකට ලබාදෙනවා කියලා. කොහොමද දැන් ඒ ස්ථාවරය?
ඒ සම්බන්ධව අපි කතා කරලා නෑ තාම.
අවසාන වශයෙන් අහන්නේ ඔය 20 වැනි සංශෝධනය 2/ 3 බලයකින් ආණ්ඩුවට දිනන්න පුළුවන් වෙයිද?
ඒකනම් ප්‍රශ්නයක් වෙන එකක් නෑ. අනිවාර්යයෙන්ම ඒක ජයග්‍රහණය කරන්න පුළුවන්.
ගයාන් ගාල්ලගේ
