නව සංශෝධනයේ බලාපොරොත්තු

වත්මන් රජය ප්‍රමුඛ කාර්යයක් සේ සලකන විසි වැනි ආණ්ඩුක්‍රම ව්‍යවස්ථා සංශෝධනයට අදාළ පනත් කෙටුම්පතට කැබිනට් අනුමැතිය ලැබී ඇති අතර එය පසුගිය බ්‍රහස්පතින්දා (03) රාත්‍රියේ ගැසට් කරනු ලැබීය. අධිකරණ ඇමැති අලි සබ්‍රි මහතා විසින් කැබිනට් මණ්ඩලයට ඉදිරිපත් කරන ලද ව්‍යවස්ථා සංශෝධන පනත් කෙටුම්පත තව සති දෙකකින් පාර්ලිමේන්තුවට ඉදිරිපත් කෙරෙනු ඇත. එය පාර්ලිමේන්තුවට ඉදිරිපත් කර සම්මත කර ගැනීමෙන් පසුව පසුගිය වසර 05ක කාලය තුළ ක්‍රියාත්මක වූ 19 වැනි සංශෝධනය බල රහිත වී 20 වැනි සංශෝධනය බලාත්මක වනු ඇත.

19 වැනි සංශෝධනය මගින් රට අස්ථාවර වූ බව වත්මන් ආණ්ඩුව බලයට පත්වීමට පෙර සිටම දැරූ මතය විය. එම මතය පූර්ව මැතිවරණ සමයේදී ශ්‍රී ලංකා පොදු ජන පෙරමුණ සහ එයට සම්බන්ධ වූ සෙසු දේශපාලන පක්ෂ මගින් ශක්තිමත් ලෙස ජනගත කිරීමට සමත් විය. යහපාලන ආණ්ඩුව සමයේදී 19 සංශෝධනය යටතේ පිහිටුවන ලද ස්වාධීන කොමිෂන් සභාවල ඇතැම් ක්‍රියාවන් ද, පාස්කු ප්‍රහාරය ද, රටේ ජනතාවට පමණක් නොව ජාත්‍යන්තරයට පවා ඇසෙන, දැනෙන පරිදි රටේ දේශපාලන ස්ථාවරභාවය දුර්වල වීමද ජනාධිපතිවරයා සහ අග්‍රාමාත්‍යවරයා අතර ඒකමතික බවක් තොතිබීම ද ඇතුළු විවිධ හේතු නිසා එය ජනතාවගේ පිළිගැනීමට ලක් වූ පොදුජන පෙරමුණේ ප්‍රබල සටන් පාඨයක් විය. ජනතාව විසින් මහ මැතිවරණයේදී තුනෙන් දෙකක බලයක් ලබාදෙමින් රටට සහ ජනතාවට බාධා පමුණුවන අණපනත් ඉවත් කිරීමට වත්මන් ආණ්ඩුවට බලය ලබාදීමට එම සටන් පාඨයද හේතුවිය. ආණ්ඩුව ඉක්මනින්ම ක්‍රියා කොට 20 වැනි සංශෝධනය ගෙන ඒමට ක්‍රියා කළේ ඒ නිසා විය යුතුය.
ව්‍යවස්ථා සංශෝධනය සිදු කිරීමේදී 19ට ඇතුළත්ව තිබූ සාධනීය ලක්ෂණ එලෙසම රැකගැනීමට පියවර ගන්නා බව ජනාධිපතිවරයා නව පාර්ලිමේන්තුවේ ප්‍රතිපත්ති ප්‍රකාශය ඉදිරිපත් කරමින් සඳහන් කර තිබිණි. ඒ අනුව ජනාධිපතිවරයාගේ ධූර කාලය වසර 05කට සීමා වීම, ජනාධිපතිවරයාට ධූරයෙන් දැරිය හැකි වාර ගණන දෙකකට සීමා කිරීම, පාර්ලිමේන්තුවේ නිල කාලය වසර 05කට සීමා වීම ඒ ආකාරයේම ඉදිරියට පවත්වාගෙන යාමට 20 වැනි සංශෝධනයේ ඉඩ සලසා තිබෙන බවද සඳහන් වෙයි. එසේම මැතිවරණ, රාජ්‍ය සේවා, ජාතික පොලිස්, මානව හිමිකම්, අල්ලස් දූෂණ විමර්ශනය කිරීමේ, කොමිෂන් සභාද මුදල් සහ සීමා නිර්ණ කොමිෂන් සභාද තවදුරටත් ක්‍රියාත්මක වන බවද ප්‍රකාශ වෙයි. ඒ අනුව විගණන කොමිෂන් සභාව තවදුරටත් නොපවතිනු ඇත. තොරතුරැ දැනගැනීමේ පනත ද ක්‍රියාත්මකව පවතිනු ඇත.

මේ දැක්වූයේ නව 20 වැනි සංශෝධනය බලාත්මක කිරීමේදී 19 වැනි සංශෝධනයෙන් වෙනස් වන සහ වෙනස් නොවන අංශ කිහිපයක් පමණි. සංශෝධනයේ පනත් කෙටුම්පත අධ්‍යයනය කිරීමෙන් පසුව වැඩිදුරටත් තොරතුරු සොයාගත හැකිවනු ඇත. අවශ්‍ය වන්නේ රටේ පොදු මහජනතාවගේ අභිලාෂයන්ට ගැලපෙන සහ අනාගත දැක්මක් සහිත ව්‍යවස්ථාමය කරුණු එහි අඩංගු වීමය. තව වසර දෙකක පමණ කාලයකදී සම්පූර්ණ ව්‍යවස්ථාවම සංශෝධනය කිරීම රජයේ බලාපොරොත්තුව බවට ප්‍රකාශ වී තිබේ. 20 වැනි සංශෝධනය එයට පෙරහුරුවක් වශයෙන් ජනතාව විසින් සලකනු ඇති බවද පෙන්වාදිය යුතුය.

20 වැනි සංශෝධනය ගැසට් කිරීමෙන් පසුව එහි සඳහන් කරුණු සම්බන්ධයෙන් ගැටලුවක් ඇත්නම් ඕනෑම පුරවැසියකුට අධිකරණය ඉදිරියට ගොස් ඒ ගැන නඩු පැවරීමට අයිතියක් තිබේ. එහෙත් වඩාත් වැදගත් වනු ඇත්තේ සති දෙකකට පසුව පාර්ලිමේන්තුවට කෙටුම්පත ඉදිරිපත් කිරීමෙන් පසුව පැවැත්වෙන විවාදයයි. මෙහිදී ආණ්ඩුව තම සංශෝධනයේ සාධනීය බව සහ රටට ඇති වැදගත්කම වෙනුවෙන් පෙනී සිටීමේදී ජනතාවගේ බලාපොරොත්තු පිළිබඳව සංවේදීව කරුණු දැක්වීම අවශ්‍යය. එහිදී විපක්ෂයට ද විශාල වගකීමක් පැවරෙයි. මේ දෙපාර්ශ්වයම තේරුම් ගත යුත්තේ 20 වැනි සංශෝධනයේ හොඳ හෝ නරක පෙන්වා දිය යුත්තේ තම තමන්ගේ පාක්ෂිකයන්ට උවමනා පරිදි නොව සමස්තයක් වශයෙන් රටේ සියලුම ජනතාවගේ උවමනාවන් ඉටු වන ආකාරයට බවය. එකිනෙකාට මඩ ප්‍රහාර එල්ල කරගනිමින් විවාදය මඩ වළක් කරගැනීමෙන් වැළැකී හේතු සාධක සහිතව ඉදිරිපත් කෙරෙන අර්ථවත් අදහස් දැක්වීම් වඩාත් වැදගත් වනු ඇත.

19 වැනි ව්‍යවස්ථාවේ පැවැති රටට අහිතකර වගන්ති ඉවත් කිරීමේදී නිතැතින්ම ජනාධිපතිවරයාට වඩාත් බලතල හිමිවීම සිදුවනු ඇත. එම බලතල ක්‍රියාත්මක කිරීමේදී ගන්නා සියලු තීන්දු තීරණ ජනතා හිතවාදී වීම අවශ්‍යය. එසේම රටේ ස්ථාවරභාවය ආරක්ෂා කිරීමත් ජාතික ආරක්ෂාවට ඉහළ ප්‍රමුඛත්වයක් ලබාදීමත් සිදුවිය යුතුය. ඒ සමඟ නව සංශෝධනය ක්‍රියාත්මක වීමේදී ජනතාවගේ අයිතිවාසිකම්වලට හානියක් සිදුවීමට ඉඩක් නොතිබිය යුතුය. විරුද්ධ පක්ෂයේ පුද්ගලයන්ට එක් නීතියක් සහ ආණ්ඩු පක්ෂයේ පුද්ගලයන්ට තව නීතියක් ක්‍රියාත්මක නොවිය යුතුය. රටේ සියලු දේශපාලන පක්ෂවලට ඔවුන්ගේ අභිමතය පරිදි දේශපාලනය කිරීමේ නිදහස ද ආරක්ෂා වීමද අවශ්‍යය. එහෙත් චෝදනා ලබන පොලිස්පතිවරයකු ඉවත් කිරීමට නොහැකි එසේම ජාතික ආරක්ෂාව සම්බන්ධයෙන් සෘජු තීන්දු තීරණ නොගත හැකි තරම් දුර්වල විධායක ජනාධිපති පදවියකින්ද වැඩක් නැත. ජනතාවගේ ද නිදහස රුකෙන ස්ථාවර රජයක් පවත්වාගැනීමේ අරමුණු 20 සංශෝධනයෙන් ඉටු වන්නේ නම් එය ප්‍රමාණවත්ය.