එජාපය නැවත ගොඩගන්න වැඩේ මට අභියෝගයක්

 

 

නෑ මම පවුල් උරුමයක් ලෙස නෙමේ මේ පක්ෂය දිහා බලන්නෙ. මට පක්ෂයේ නායකයන් පස්දෙනෙක් එක්ක ඥාති සබඳකම් තියෙන බව ඇත්ත. ඒත් මම පක්ෂය දිහා බලන්නෙ නෑකම් තහවුරු කරගන්න නෙමේ. එක්සත් ජාතික පක්ෂය කියන්නෙ මේ රටේ තියෙන දැවැන්තම පක්ෂය. ඒ වාගේම රටට විශාල වැඩ කොටසක් කරපු පක්ෂයක්. එවැනි පක්ෂයක් මෙලෙස පිරිහීමට පත්වීම ගැන මට තියෙන්නෙ කලකිරීමක්, වේදනාවක්. ඒක මහා අපරාධයක් හැටියටයි මම දකින්නෙ. ඒ කනගාටුදායක තත්ත්වයෙන් පක්ෂය නැවත නගා සිටුවන්න තමයි මම නායකත්වය සඳහා ඉදිරිපත් වුණේ. ප්‍රමුඛ පෙළේ බෞද්ධ නායක ස්වාමින් වහන්සේලා ඇතුළු අන්‍යාගමික නායක ප්‍රසාදීන්, පක්ෂයේ සංවිධායකවරු, අපගේ පාක්ෂිකයො බොහෝ දෙනෙක් මගෙන් ඉල්ලීම් කළා මට ඉදිරිපත් වෙන්න කියලා. කෘත්‍යාධිකාරී මණ්ඩලයෙන් යෝජනාව ආවා. මම ඉදිරිපත් වුණා. එහිදී ඡන්දෙකට ගිහිල්ල බහුතර ඡන්ද ප්‍රමාණයකින් මම දින්නා. ඒ මං කෙරෙහි තියෙන විශ්වාසය නිසා.
 

 

මට නායකත්ව පුටුවට යන්න කෑදරකමක් නැහැ. මට කෑදරකමක් තියෙන්නෙ මේ පක්ෂය ආරක්ෂා කර නැවත පෙර තිබූ තත්ත්වයට ගොඩගන්න. ඒ වෙනුවෙන් මම ඉදිරිපත් වෙනවා. ඒ සඳහා මම කැපවෙලා වැඩ කරනවා.

 

 

ඒකට හේතු ගණනාවක් තියෙනවා කියලයි මට හිතෙන්නෙ. අපගේ පාලන කාලය තුළදී සිදුවිනැයි කියන යම් යම් අක්‍රමිකතාවයන් සම්බන්ධයෙන් ජනතාවගේ අප්‍රසාදයක් තිබුණා. යහපාලන ආණ්ඩුවේ ජනාධිපතිතුමා සහ එජාප නායකයන් අතර වූ පරස්පරතාවයන්, 2015 අප බලයට පත්වීමේදී ජනතාවට ලබාදුන් ඇතැම් පොරොන්දු ඉටුකරලීමට නොහැකිවීම, බෞද්ධාගමින් පක්ෂය ඈත්වී ඇති බවට ජනතාව අතර පැතිරගිය කනගාටුදායක ආරංචි, අවාසනාවන්ත ලෙස මහ මැතිවරණය අභිමුඛයේ පක්ෂය තුළ වූ බෙදීම ඒ සඳහා විශේෂයෙන් බලපා තියෙනවා. ඒ නිසාම පාක්ෂිකයො පක්ෂයෙන් ඈත්වුණා. අන්න ඒ වැරදි අඩුපාඩු නිවැරදි කරගෙන සුබවාදී ගමනක් යන්න අභියෝගාත්මක අවස්ථාවක් ලෙසයි මේ අවස්ථාව මම දකින්නෙ. මං පිළිගන්නවා මේක මට විශාල අභියෝගයක්.

 

 

මගේ ඇත්තම අරමුණ සහ එකම බලාපොරොත්තුව මේ පක්ෂය නැවත පෙර තිබූ අන්දමට ගොඩනගන එක. විශේෂයෙන්ම පක්ෂයේ නායකතුමා කිව්වා එතුමා නායකත්වයට එන්නෙ නැහැ. අලුත් කෙනෙක්ට නායකත්වය ලබා දෙනවා කියලා. ඒ අනුව පක්ෂෙ කිහිප දෙනෙක් ඉදිරිපත් වුණා. ඒ වෙලාවෙ මමත් ඉදිරිපත් වුණේ පාක්ෂිකයන් බොහෝ දෙනෙක්ගේ ඉල්ලීම මත. ඉතින් පාක්ෂිකයො කියනවා නම් නායකත්වය බාරගන්න කියල මම ඕනෑ වෙලාවක සූදානම් නායකත්වය වෙනුවෙන් කැපවෙන්න.

 

 

ඔව් මගේ අදහස එහෙම තමයි. හැබැයි මම ලෑස්තියි නියෝජ්‍ය නායකයා හැටියට ඉඳලත් පක්ෂයේ අභිවෘද්ධිය වෙනුවෙන් කටයුතු කරන්න. මට තනතුරට වඩා පක්ෂය ගොඩනැගීමයි අවශ්‍ය. ඒ සඳහා මම රට වටේම යනවා. නායකත්වයට මම සුදුසුද නැත්ද කියන එක අනාගතය විසින් තීරණය කරයි.

 

 

එතුමාල පරිණත දේශපාලනඥයො. අවුරුදු ගණනාවක් තිස්සෙ විශාල වශයෙන් පක්ෂය වෙනුවෙන් කැපවුණු අය. දයා ගමගේ මහත්තයා අපි විපක්ෂෙ ඉන්නකොට පෞද්ගලික ධනය පවා පක්ෂය වෙනුවෙන් කැප කළා. රවි කරුණානායක මහත්තයත් කාර්යශූර නායකයෙක්. වජිර අබේවර්ධන මහත්තයා ජේ.ආර්. ජයවර්ධන මහත්තයගෙ කාලයෙ ඉඳන්ම අපේ පක්ෂයෙ නායකයො සමඟ එකට හිටිය කෙනෙක්. මේ කවුරැත් පක්ෂය දාල ගියෙ නැහැ. හැමදෙනාම පක්ෂය ආරක්ෂා කළා. ඒ නිසා පක්ෂය ඉදිරියට ගෙනියන්න මේ සියලු දෙනාගේම සහයෝගය අවශ්‍යයි.

 

 

සමහර අයට එහෙම කියන්න පුළුවන්. නමුත් නායකතුමා කියලා තියෙනවා දෙසැම්බර් වෙනකොට නායකත්වය ඊළඟ නායකයට බාරදෙනවා කියලා. ඒ සඳහා ටික කාලයක් අවශ්‍ය බවයි එතුමා කිව්වෙ. කොහොම වුණත් මේ තනතුර අල්ලන් ඉන්න එතුමට වුවමනාවක් නෑ. එතුමා ඉන්නෙ පක්ෂය විනාශ නොකර සියලු දෙනා එකමුතුවෙන් ජයග්‍රහණය කරා යන අරමුණක. 

 

 

අපේ සැලැස්මක් ඉදිරිපත් කළා 2018 දි. ඒ සැලැස්ම දැන් වෙනස් කරන්න අවශ්‍යයි පවතින තත්ත්වයත් එක්ක. හැමෝගෙම උපදෙස් ගන්න ඕනෙ. කොහොම වුණත් මම උත්සාහ කරනවා ඉක්මනින්ම පක්ෂයෙ ප්‍රතිසංවිධාන කටයුතු ආරම්භ කරන්න. 

 

 

මම හිතන්නෙ නායකතුමා කිසිම ප්‍රශ්නයක් නෑ. වෙනම පක්ෂයක් හදාගෙන ගියාට ඒ කට්ටියත් එක්සත් ජාතික පක්ෂයෙ අය. ඒ නිසා ඒ අයත් එක්ක වැඩ කරන්න කිසි ප්‍රශ්නයක් නෑ. පක්ෂයේ වෙනස්කම් ගැන හිතන්නෙ නැතුව දැන් රට වෙනුවෙන් එකතු වෙන්න ඕනෙ අවස්ථාවක්. රට යන විදිහට සන්සුන්ව ඉන්න ඕන අවස්ථාවක් නෙමෙයි. ඒ නිසා එජාපය විතරක් නෙමේ සියලු පක්ෂ එකට එකතු වෙන්න ඕනෙ අවස්ථාවක්. 

 

 

මම සූදානම් ඒ වෙනුවෙන්. අපි සාකච්ඡා කරනවා. මොන දේ කරන්නත් හරි එක්සත් ජාතික පාක්ෂිකයා ක්‍රියාකාරී කරලා ඉන්න ඕනෙ. 

 

 

ඔව් ඒ ප්‍රශ්නෙ ඉක්මනින් විසඳගන්න ඕනෙ. දැනට පස් දෙනෙක් ඉන්නවා ඒ තනතුරට සුදුසුකම් ලබලා. ඒ ගැන සතියකින් දෙකකින් වගේ තීන්දුවකට එන්න පුළුවන්. 

 

 

ඔව් හොඳ අය ගොඩක් ඉන්නවා. කොහොම වුණත් සුදුසු පුද්ගලයෙක් තමයි පාර්ලිමේන්තු යවන්න ඕනෙ. ඒක සාකච්ඡා කරලා තීන්දු කරන්න අවශ්‍යයි. 

 

 

ඔව්. 20 සම්බන්ධ සටන අපිට කරන්න වෙන්නෙ එළියෙ ඉඳන්. 

 

 

ඔව්. පාක්ෂිකයො දිරිමත් කිරීමට අවශ්‍යයි. බිම් මට්ටමට ගිහිල්ලා ජනතාවට 20 සම්බන්ධයෙන් දැනුම්වත් කිරීම අවශ්‍යයි. මම හිතනවා ඒ නායකත්වය අපිට දෙන්න පුළුවන් කියලා. 

 

 

19 ගෙනාවේ රටේ ප්‍රජාතන්ත්‍රවාදය ආරක්ෂා කරන්න. අපි 19න් ජනාධිපති විධායක බලතල ගලවලා පාර්ලිමේන්තුවට දුන්නා. හැබැයි මේ 20න් කරන්න හදන්නෙ සම්පූර්ණයෙන්ම යූ ටර්න් එකක්. දැනට මෙතුමලා අවුල ලිහාගන්න 20 හරහා විධායක බලතල විධායකය වෙත පවරන්න සූදානම් වුණාට එතුමා නැති කාලෙකට එදාට පත්වෙන කෙනා ගැන කවුද විශ්වාසයක් තියාගන්නෙ. ඒ නිසා මේ ගැන තවදුරටත් සොයා බැලිය යුතුයි කියන අදහස තියෙනවා. 

 

 

එක්සත් ජාතික පක්ෂය ඇතුළු සියලුම පක්ෂ ආණ්ඩුවට විරුද්ධව එකතු වෙන්න වෙනවා විපක්ෂයක් හැටියට. එක මේසයකට සියලු දෙනාම එන්න ඕනෙ. විශේෂයෙන් රාජපක්ෂවරැ බලයට ආපුවම විපක්ෂය දුර්වල කිරීමේ ක්‍රමවේදයක් ක්‍රියාත්මක කරනවා. ඒකෙ ප්‍රතිඵලයක් තමයි මේ අද වෙලා තියෙන්නෙ. ඒ නිසා මම හිතනවා අපි සියලු දෙනා එකතු වෙන්න ඕනෙ කියලා. පෞද්ගලික ප්‍රශ්න පැත්තකට තියලා රට වෙනුවෙන් එක මේසෙකට එන්න ඕනෙ. 

 

 

මම විශ්වාස කරනවා ඊට අවශ්‍ය පසුබිම තව අවුරුදු දෙක තුනකින් උදාවෙනවා කියලා. අන්න ඒ දවස එනකොට අපි පක්ෂයක් හැටියට ස්ථාවරයක ශක්තිමත්ව ඉන්නෙ. විශේෂයෙන් එක්සත් ජාතික පක්ෂයට ඡන්දය අහිමි වුණේ බහුතර පාක්ෂිකයො පක්ෂයේ බෙදීම සම්බන්ධයෙන් ඇතිවුණු කලකිරීම නිසා. ඒ නිසා අන්න ඒ ඡන්ද පදනම දිරිමත් කිරීමටයි අවශ්‍ය. 

 

 

කොරෝනා මර්දන වැඩපිළිවෙළ ආණ්ඩුව ඉතාම සාර්ථකව සිදු කළා කියන එක මම පිළිගන්නවා. ඒ ගෞරවය ජනාධිපතිතුමාට අයිති වෙන්නත් පුළුවන්. අවාසනාවකට ලංකාවෙ විතරක් නෙමෙයි මේ හරහා ලෝකයේම රටවල් ආර්ථික අර්බුදයකට හේතුවෙලා තියෙනවා. නමුත් ලංකාව දේශීය ආර්ථික සැලසුමකට පදනම්ව යනකොට ඉදිරියේදී යම් ආර්ථික ගැටලුවක් ඇතිවෙන්න පුළුවන්. ඒ නිසා රටේ ආර්ථිකය ගොඩනගන්න ජාත්‍යන්තර සහායත් අවශ්‍යයි. විශේෂයෙන් ආයෝජනය කිරීම් අවශ්‍ය මොහොතක තියෙන්නෙ. ඒ නිසා දේශීය ආර්ථිකයක් මත පදනම්ව ආර්ථිකය ජයගන්න පුළුවන් කියන අදහසක මම නෑ. මම පිළිගන්නවා යම්කිසි ආකාරයක නිෂ්පාදන ආර්ථිකයකුත් තිබිය යුතුයි කියලා. විශේෂයෙන් එක්සත් ජාතික පක්ෂයට ඉන්නවා විශේෂ ආර්ථික දැනුම තියෙන මිනිස්සු. ඒ නිසා අපි ඕන වෙලාවකට සූදානම් ආණ්ඩුවට පක්ෂ භේදයකින් සහාය දෙන්න.

 

 

අපි 20ට විරැද්ධයි. අපි කියන්නෙ 19 පවත්වාගෙන එහි අඩුපාඩු සකසලා ක්‍රියාත්මක කරන්න කියලා. ඒ වගේම ආණ්ඩුව යම් සංශෝධන කිහිපයකටත් යන්න අදහසක් තියෙනවා. අපි බලනවා ඒ දේවල් සම්බන්ධව. ඒ සියලු දේ බලලා අවසාන වශයෙන් එක්සත් ජාතික පක්ෂයේ තීන්දුව අපි දැනුම් දෙනවා.