ඒකාධිපති චෝදනාව විපක්ෂයේ තවත් විහිළුවක්
කාන්තා හා ළමා සංවර්ධන, පෙර පාසල් හා ප්‍රාථමික අධ්‍යාපන, පාසල් යටිතල පහසුකම් හා අධ්‍යාපන සේවා රාජ්‍ය අමාත්‍ය පියල් නිශාන්ත ද සිල්වා
- අපි ජනතාවට සහන දුන්නේ ඡන්ද බලාගෙන නොවේ
- කොන්ද කෙළින් තිබෙන ජනාධිපති කෙනෙක් අද අපට ඉන්නවා
- ගිය ආණ්ඩුවට තිබුණේ රාජපක්ෂලා එක්ක වෛරයක්
- ශක්තිමත් තියා හරිහමං විපක්ෂයක්වත් අද නෑ
- අමෙරිකාව එක්ක රට විකුණන ඩීල් දැම්මේ කවුද?
- කොවිඩ් වලින් අපි පැනලා යන්නෙ නෑ
මුළු රටම කොවිඩ් දෙවැනි රැල්ලට ගොදුරු වෙමින් සිටින බවක් පේන්න තිබෙනවා. ඇයි රට ලොක්ඩවුන් කළේ නැත්තේ?
අද ලෝකයේ දියුණු රටවල් පවා මේ කොවිඩ් වසංගතය නිසා බැටකනවා. නමුත් බොහෝ රටවල් ලොක්ඩවුන් කරලා නැහැ. එහෙම වුණොත් මුළුරටම අකර්මණ්‍ය වෙනවා අපිත් අපගේ සේවා කටයුතු පවත්වගෙන යන්න ඕන නිසා තමයි මුළු රටම එකවර ලොක් ඩවුන් නොකළේ. නමුත් අපි ඒ ඒ රෝගීන් හමුවන ප්‍රදේශ හුදෙකලා ප්‍රදේශ බවට පත්කරලා නිරෝධායන ඇඳිරිනීතිය පනවලා තිබෙනවා. අපි මේ කොවිඩ් නිසා පැනලා ගිහිං වැඩක් නැහැ. අපි එයට මුහුණදිය යුතුයි.
පසුගියවර කොවිඩ් රෝගය මෙරට ව්‍යාප්ත වීමට ඉඩ නොදී රජය එය හොඳින් පාලනය කර ලෝකයෙන්ම දෙවැනි තැන ඉන්නවා කියලා කිව්වා. ඇයි එහෙම කරපු ඔබතුමන්ලාට මේ දෙවැනි රුල්ල පාලනය කරන්න බැරිවුණේ?
රට පුරාවටම එකවර පොකුරු කිහිපයක් මතුවුණ නිසා තමයි අපිට එය මෙතරම් පාලනය කර ගැනීමට අසීරු වුණේ. නමුත් මේ මොහොතෙත් අපි හැකිතාක් උත්සාහ කරන්නේ ඉක්මනින්ම මේ තත්ත්වය පාලනය කරලා රට නැවත යථා තත්ත්වයට ගේන්න.
ඇත්තටම ජනතාව මේ කාරණයේදී නොසැලකිලිමත් ලෙස හැසිරුණාද?
මේ රටට කොවිඩ් පළමු රුල්ල ආපු කාලයේ තරම් පසුකාලයේදී ජනතාව පරිස්සම් වුණේ නැහැ. මුඛ ආවරණ, මීටරයේ පරතරය වැනි සියලු දේවල් මුල් අවධියේ රෝගය පාලනය කිරීමෙන් පසු ජනතාවගෙන් ගිලිහී ගොස් තිබුණා. එයත් එක කරුණක් තමයි මෙවර විශාල වශයෙන් රෝගීන් පැතිරෙන්න.
කොවිඩ් දෙවැනි රුල්ලත් එක්ක එදාවේල හොයාගෙන ජීවත්වුණ බොහෝ ජනතාවගේ දෛනික ආදායම කඩා වැටිලා තිබෙනවා. රජය මොකක්ද මේකට ගන්න ක්‍රියාමාර්ගය?
ඇත්තටම එය ඉතා බරපතළ කාරණයක්. ඒ පිළිබඳව රජය මේ වනවිට සාකච්ඡා කරමින් ඉන්නේ. ඒ වගේම මේ කොවිඩ් වසංගතය නිසා විවිධ ක්ෂේත්‍රවල අයගේ රුකියාවන් අවදානමටත් ලක්වෙලා තිබෙනවා. රජය නුදුරේදීම ඔවුන් වෙනුවෙන් යම් සහන වැඩපිළිවෙළක් සකසනවා.
පසුගිය කාලයේ රට ලොක්ඩවුන් කරපු වෙලාවේ ජනතාවට දුන්නන් 5000 සහනය මෙවර දෙන පාටක් පේන්න නැහැ නේද?
අපි දැනටමත් ගම්පහ දිස්ත්‍රික්කයේ ඒ වැඩ කටයුත්ත කරගෙන යමින් පවතිනවා.
දැනුත් රටේ පොලිස් බල ප්‍රදේශ ගණනාවක ඇඳිරිනීතිය පනවා තිබෙනවා ඒත් තවම 5000 දීමනාව නැහැ. ඇත්තටම පසුගියවර 5000 දුන්නේ ඡන්දය ඉලක්ක කරගෙන නේද?
කිසිසේත්ම අපි මැතිවරණය ඉලක්ක කරගෙන නෙවෙයි ඒ වැඩපිළිවෙළ සිදුකළේ. ඒ වෙලාවේ මුළුරටම වැහුවා. ජනතාවට ආදායමක් නැතිවුණා. ඒ නිසා ජනතාවට වගකියන රජයක් ලෙස අපි ඒ සහන ජනතාවට ලබා දුන්නා. නමුත් තවම රට ලොක්ඩවුන් කරලා නැහැ. දැනට ඇඳිරිනීතිය දාලා තිබෙන පොලිස් බල ප්‍රදේශවලටත් අපි ඉක්මනින් නැවත ඒ දීමනාව ලබාදෙන්න බලාපොරොත්තු වෙනවා.
මැතිවරණයට කලින් ජනතාවට සහන දෙන්න පාර්ලිමේන්තුව බලය ඉල්ලුවා. බලය ලැබුණට පස්සේ ආණ්ඩුවේ වැඩ කරන්න 20 වැනි ව්‍යස්ථාව සම්මත විය යුතුයි කිව්වා. දැන් එයත් 2/3කට වැඩි ඡන්දයෙන් සම්මත වෙලා තිබෙනවා. තවත් මොනවද අවශ්‍ය ජනතාවට කියපු දේවල් ඉටු කරන්න?
මේ ආණ්ඩුවට වගේම ජනාධිපතිතුමාට හොඳ කශේරුකාවක් තිබෙනවා. ඒ නිසා අපි කියපු දේවල් ඉටු කරන්න සූදානමකින් ඉන්නවා.
කියපු දේවල් කරනවා කිව්වට මැතිවරණය අවසන් වෙලා දැන් දැන් මාස තුනකට කිට්ටුයි. නමුත් ජනතාව කියන්නේ සහන ලැබුණේ නැහැ කියලා?
අපි ජනතාවට සහන දුන්නා. අතවශ්‍ය ආහාර ද්‍රව්‍ය රුසකම මිල අඩු කළා. අනිවාර්යයෙන්ම තවත් මිල අඩු කිරීම් කරලා ජනතාවට සහන දෙන්න අපි බලාපොරොත්තු වෙනවා.
ආණ්ඩුව ලබන වසරේ ඉදිරිපත් කරන්න නියමිත අයවැයෙන් පස්සෙත් විපක්ෂයේ මන්ත්‍රීවරු කිහිප දෙනෙකු ආණ්ඩුවට එක් වෙන්න යනවා කියලා ආරංචියක් පැතිරී යනවා. ඇත්තටම ඔබලා 2/3ක බලයක් තියාගෙනත් ඇයි මේ තවත් පිරිස් ආණ්ඩුවට එක්කර ගන්නේ? විපක්ෂයක් නැති කිරීමද ඔබලාගේ අරමුණ?
ඇත්තටම ශක්තිමත් විපක්ෂයක් තිබෙන තරමට අපිත් කැමතියි නමුත් දැන් අවාසනාවකට වගේ අපිට ශක්තිමත් විපක්ෂයක් තියා හරිහමන් විපක්ෂයක්වත් නැහැ.
මෙවර 20 වැනි සංශෝධනයට පක්ෂව ඡන්දය දුන්න සුළු පක්ෂවල මන්ත්‍රීවරුන්ට ඇමතිකම් දෙන්න යනවා කියලා ආරංචියි?
නැහැ කිසිසේත්ම එවැනි සිදුවීමක් වෙන්නේ නැහැ. ඇත්තටම දැන් ඇමතිකම් ලබා දී ඉවරයි. එය අසත්‍ය කාරණාවක්.
පසුගිය යහපාලන රජය කාලයේ අරලියගහ මන්දිරයේ ඉඳන් තීරණ අරගෙන එවකට විපක්ෂයේ සිටි ඔබලාට නොකළ වැරදිවලට දඬුවම් දෙනවා කියලා ඔබලා ඒ කාලයේ නිතරම කිව්වා. නමුත් වර්තමාන විපක්ෂය කියන්නේ එහෙම දේවල් අරලියගහ මන්දිරය තුළ වුණේ නැහැ කියලා?
ඒ කාලයේ වුණ දේවල් අරලියගහ මන්දිරය තුළ කරපුවා, අධිකරණවලට බලපෑම් කරපුවා, ඔක්කොම රෙකෝඩින් එක්කම එළියට ආවා ජනතාව දන්නවා ඒ ගැන. ඒ නිසා අපි මුකුත් කියන්න අවශ්‍ය නැහැ.
20 වැනි සංශෝධනය තුළ ඇතුළත් ද්විත්ව පුරවැසියකුට මැතිවරණවලට ඉදිරිපත් විය හැකියි කියන කාරණයට ඔබ එකඟයිද?
අනිවාර්යයෙන්ම මම එකඟ වෙනවා. ඇතැම් රටවල නායකයෝ ඒ රටවලම පුරවැසියෝ නෙවෙයි. නමුත් ඔවුන් හොඳින් ඒ රටවල් පාලනය කරනවා. ඇත්තටම එහි වැරුද්දක් මම දකින්නේ නැහැ.
පසුගිය සතියේ ඇමරිකානු රාජ්‍ය ලේකම්වරයා දිවයිනට පැමිණියා. විපක්ෂය කියන්නේ ඒ හමුව පැවැත්වුණේ ආණ්ඩුව ඇමරිකාවත් සමග ඩීල් එකක් දාන්න කියලා?
විපක්ෂයට පුළුවන් ඔය වගේ එක එක චෝදනා කරන්න විතරයි. ඇමරිකානු රාජ්‍ය ලේකම්වරයා පැමිණි කාරණය හැමෝම දන්නවා මෙරට ආරක්ෂාව පිළිබද සාකච්ඡා කළා. රටේ පෞද්ගලික ආයෝජන පිළිබඳව ඔහු කරුණු සාකච්ඡා කළා. ඒ වගේම මෙරට වෙරළ ආරක්ෂක දෙපාර්තමේන්තුවට වෙරළ ආරක්ෂක නෞකාවක් පිරිනැමීමටත් ඔහු කටයුතු සිදුකරන බව පැවසුවා. එහෙම නැතුව රට විකුණන ඩීල් දැම්මේ නැහැ අපි. ඩීල් දැම්මේ කවුද කියලා ජනතාව දන්නවා.
ඔබලා බලයට ආවම මහ බැංකු බැඳුම්කර වංචාවට සම්බන්ධ පුද්ගලයන්, පාස්කු ප්‍රහාරයට සම්බන්ධ පුද්ගලයන් අත්අඩංගුවට ගන්න බව පුන පුනා කිව්වා නමුත් කෝ තවම එහෙම එකක් පේන්න නැහැනේ?
ඒ සියළු වැරදිවලට සම්බන්ධ සැකකරුවන්ට අනිවාර්යයෙන්ම තරාතිරම මොකක් වුණත් දඬුවම් ලබා දෙනවා. මොකද මේ රටේ ජනාධිපතිතුමා කශේරුකාව කෙළින් තියාගෙන වැඩකරන පුද්ගලයෙක්. ඒ නිසා ඒ ගැන කිසිවකු බිය විය යුතු නැහැ. අනිවාර්යයෙන්ම ඔවුනට දඬුවම් ලබා දෙනවා.
වත්මන් ආණ්ඩුව කොතරම් පුරසාරම් කිව්වත් තවමත් රටේ සංවර්ධනයට කිසිදු වැඩසටහනක් ක්‍රියාත්මක කරලා නැහැ කියලා ඔබලට විපක්ෂයෙන් චෝදනාවක් නැගෙනවා?
රටට වැඩ කළේ කවුද? වැඩ නොකලේ කවුද? කියලා ජනතාව දන්නවා. ඒ වගේම පහුගිය අවුරුදු පහ තුළ යහපාලන රජය කිසිම දෙයක් රටට කළේ නැහැ. ඔවුන් කළේ අපි ආණ්ඩු බලයේ ඉන්න කාලයේ කරපු සංවර්ධන කටයුතුවලට ඔවුන්ගේ නම්වල බෝඩ් ලෑල්ල දාගත්ත එක විතරයි. ඔවුනට මේ රටේ තිබුණ කිසි දෙයකින් ප්‍රයෝජනයක් ගන්න ආකාරය පිළිබඳ වැටහීමක් තිබුණේ නැහැ. ඔවුන්ට තිබුණේ රාජපක්ෂ නම පිළිබඳ වෛරයක්. ඒකයි ඔවුන් අපේ ආණ්ඩු කාලයේ කරපු හැමදේම වහලා ප්‍රයෝජනයක් ගන්න බැරි ආයතන බවට පත්කළේ. අපි අපේ සංවර්ධන කටයුතු නතර කරලා නැහැ. දැන් මේ රටේ තිබෙන තත්ත්වය නිසා ඒ සංවර්ධන කටයුතු මඳක් අඩාල වෙලා තිබෙනවා. නමුත් අපි හැකි ඉක්මනින් ඒවා පටන් ගන්නවා.
ආණ්ඩුව වසරක් තුළ ගේනවා කියන අලුත් ආණ්ඩුක්‍රම ව්‍යවස්ථාවත් බාලගිරිදෝෂයක් වෙයිද?
සමාජයේ සිටින විවිධ පුද්ගලයන්ගෙන් අදහස් අරගෙන හැකි ඉක්මනින් වසරක් වගේ කාලයක් තුළ ව්‍යවස්ථාවක් ගෙන ඒම තමයි ආණ්ඩුවේ බලාපොරොත්තුව.
ඔබ රටම පිළිගත් අමාත්‍යාංශයක රාජ්‍ය ඇමතිවරයා. නමුත් තවමත් අධ්‍යාපන ක්‍රමය තුළ කොළඹට කිරි ගමට කැකිරි සංකල්පය කියාත්මක වෙනවා නේද? බොහෝ දුෂ්කර පාසල් වලට ගුරු හිඟයක් තිබෙනවා?
මම රටපුරාම තිබෙන සැම පාසලක් ගැනම සොයා බලමින් ඉන්නේ මේ දිනවල මේ කොවිඩ් ප්‍රශ්නය නිසා තමයි ගැටලුව. ඒ දුෂ්කරතා තිබෙන පාසල් හඳුනාගෙන ඒවාට අවශ්‍යය පියවර කඩිනමින් ලබාදෙනවා. තව වසරක් පමණ යනවිට කොළඹටත් කිරි, ගමටත් කිරි කියලා කියන්න පුළුවන්. දැන් උපාධිධාරීන් රුකියා දීමේ වැඩසටහන අපි ආරම්භ කරලා තිබෙනවා. ඒ මගිනුත් අපි මේ පුරප්පාඩු වූ ගුරු පත්වීම් පිරවීමට පියවර ගන්නවා.
අද බොහෝමයක් ළමයින්ගේ ආරක්ෂාව ගැන ප්‍රශ්න මතුවෙලා තිබෙනවා. පසුගිය කාලය පුරාම ළමා හිංසන පිළිබඳ අපිට අහන්න දකින්න ලැබුණා?
ළමා හිංසන පිළිබඳව ගන්න ඕන ක්‍රියාමාර්ග පිළිබඳව අපි ළමාරක්ෂක දෙපාර්තමේන්තුව එක්ක සාකච්ඡා කරලා පොලිසිය එක්ක කථා කරලා වැඩපිළිවෙළක් සකස් කරනවා. ළමයින් කියන්නේ මේ රටේ ඉදිරි අනාගතය. ඒ නිසා ඔවුන් රුකගැනීම අපේ වගකීම.
මෙතරම් බලයක් තියාගෙන ඔබලා මේ සුදානම් වෙන්නේ රට ඒකාධිපති පාලනයක් කරා ගෙනියන්න කියලා විපක්ෂය චෝදනා කරනවා.
අපිට රට ඒකාධිපති පාලනයක් කරා ගෙනියන්න වුවමනාවක් නැහැ. ජනතාව වගේම මන්ත්‍රීවරුත් මේ එකතු වෙන්නේ රට හදන දැක්ම තියෙන්නේ වත්මන් ජනාධිපතිවරයා ප්‍රමුඛ ආණ්ඩුව තුළ. ඒ නිසා ඒ වැඩපිළිවෙළට මේ රටම කැමතියි.
සටහන: හසිත් අංජන
