කොරෝනා ඇවිත්: අපි නටමු, ගයමු, ජොලි කරමු?
රට වශයෙන් අද අපි බරපතළ අවදානමක රැඳී සිටිමු. එය දිනෙන් දින වර්ධනය වන ආකාරයක්ද හතරවටින් දිස්වෙයි. කොරෝනා වසංගත අවධියේ කිසිදු අවස්ථාවක නොවූ විරූ භයානක තත්ත්වයක් නිර්මාණය වීම ඊට හේතුවය. කොවිඩ් - 19 ව්‍යාප්තිය කළමනාකරණය කරගැනීමේ දැවැන්ත අර්බුදයක් මතුවෙමින් තිබෙන අතර අනුගමනය කළ යුතු පියවර කෙරෙහි නොපමාව අවධානය යොමු නොකළහොත් සියලුදෙනා අමාරුවේ වැටෙනු ඇත.
මෙවැනි බරපතළ තත්ත්වයක් තිබියදීත් රජය සහ සෞඛ්‍ය අංශ මගින් දැඩිව අනතුරු අඟවා තිබියදීත් සති අන්තයේ කොළඹින් පිටත විනෝද චාරිකා යාමට ඇතුම් පිරිස් කටයුතු කළ ආකාරය පිළිකුල් සහගතය. එසේ චාරිකා කරන අතරතුරදී නුවරඑළිය, බණ්ඩාරවෙල ආදී ප්‍රදේශවල අතරමග වාහන නැවැත්වූ විවිධ කණ්ඩායම් නිරෝධායන නීති තුට්ටුවකට මායි නොකර කමින්, බොමින්, නටමින්, ගයමින් කටයුතු කළ ආකාරය සමාජ මාධ්‍ය ඔස්සේද වාර්තා කෙරිණි. රටේ මහා ව්‍යසනයක් තිබියදීත් වගකීම් විරහිතව ජොලි කරන සමාජයකට කොරෝනා අභියෝගය ජයගත හැකිද යන්න දන්නේ දෙවියන් පමණි. එය එසේ සිදුවිය යුතු නැත. තමනුත් අමාරුවේ වැටී රටත් විපතට පත් කරන මෙවැනි හැසිරීම් රටේ ජනතාවගේ දැඩි විරෝධයට සහ පිළිකුළට හේතු වී තිබෙන බව මේ වගකීම් විරහිත පිරිස් දැන සිටිය යුතුය.
බ්‍රැන්ඩික්ස් පොකුර එකවරම පත්තු නොවූවත් රතුඑළි වැටෙද්දී ගතයුතුව තිබූ පියවර ගැනීමේ කිසියම් ප්‍රමාදයක් තිබූ බව පෙනී ගියේය. ඒ ගැන තොරතුරු හමු වනවිට පෑලියගොඩ පොකුර දෙගොඩ තලා ගියේය. චීනයේ හුබෙයි ප්‍රාන්තයේ වූහාන් සත්ව වෙළෙඳපොළ තරමට ලංකාවේ පෑලියගොඩ මාළු වෙළෙඳපොළද කොවිඩ් - 19 පතුරුවා හැරීමේ කේන්ද්‍රස්ථානයක් බවට පත්වූයේ එක් රැයකිනි. එහි උප පොකුරු තවමත් වරින්වර තැනින් තැන මතුවෙයි. එම ව්‍යාප්තියේ අවසානයක් දැකීමට අප කොතරම් කැමැති වුවද එම අවස්ථාව තවත් සෑහෙන ඈතක බව පමණක් මේ අවස්ථාවේ සඳහන් කළ හැකිය. එයට දුරදිග යා නොදී නවත්වා ගැනීමට හැම වෙහෙසක්ම දැරිය යුතුය. මිනුවන්ගොඩින් පටන්ගෙන පෑලියගොඩ හරහා දැන් කෝවිඩ් - 19 රටටම කාන්දු වී තිබෙන බව යථාර්ථයයි.
පවතින යථාර්ථයට මුහුණ දීමට නම් අප සියලුදෙනාම විසින් අපගේ ආරක්ෂාව සලසා ගත යුතු වෙයි. නිරෝධායන නීතිය යටතේ ක්‍රියාත්මක කළයුතු සියලු සෞඛ්‍යාරක්ෂක නීති රීති අනුගමනය කිරීමට කිසිවිටෙක පසුබට නොවීම එහි වැදගත්ම පියවරයි. එය අවම වියදමකින් සිදුකර ගැනීමට හැකියාවක් තිබෙන බව තේරැම් ගත යුතු වෙමු. මුහුණු වැස්ම නිවැරදිව පැළඳීමත්, නිතරම අත් සෝදාගැනීම සහ විෂබීජහරණය කර ගැනීමත් හැකි තරම් සංචාරණය සීමා කිරීමක් කෙරෙහි සියලුදෙනා විසින් දක්වන උනන්දුව මුළු මහත් සමාජයටම ආවරණයක් ලබාදෙනු ඇත.
මෙහිදී සෞඛ්‍ය බලධාරීන් විසින් ලබාදෙන උපදෙස් පිළිපැදීමද වැදගත්ය. විශේෂයෙන් වෛරසය දැඩිව ව්‍යාප්ත වෙන ප්‍රදේශවල වෙසෙන ජනතාව එම උපදෙස් කෙරෙහි දැඩි අවධානයක් යොමුකිරීම අවශ්‍යය. කිසිදු වගකීමක් නොමැතිව කටයුතු කළ කිහිපදෙනකු විසින් විශාල පිරිසක් කොවිඩ් අවදානමට ඇද දමා ඇති බවද හෙළි වී තිබේ. කහතුඩුවේ මාළු ව්‍යාපාරිකයා, හැටන්හි නිරෝධායනය වෙමින් සිටියදී මත්පැන් මිලදී ගැනීමට ගිය පුද්ගලයා වැනි අය හේතුවෙන් තවත් පිරිසකට රෝගය බෝ වී තිබේ. තමන්ට වෛරසය වැළඳී ඇති බවට අනුමාන කර තිබියදී ඒ බව නොදන්වා සමාජය තුළ සැරිසැරීම නිරෝධායන නීතිය යටතේ දඬුවම් ලැබිය හැකි වරදකි. එම වරද කළ පිරිස් සොයාගෙන ඔවුන්ට එරෙහිව නඩු පැවරීමද සිදුවිය යුතුය. එසේ නොවුණොත් එය නරක පූර්වාදර්ශයක් වනු නිසැකය.
එක්දිනක් තුළ රෝගීන් තිදෙනකුගේ මරණ සිදුවීමත් දිනකදී හමුවන ආසාදිතයන් සංඛ්‍යාව හාරසීයකට ආසන්න වීමත් බරපතළ අනතුරු ඇඟවීමකි. අපේ රටේ ජනගහණයට සාපේක්ෂව මෙතරම් මරණ සහ රෝගීන් සංඛ්‍යාවක් වාර්තා වීම කිසිසේත් සුළුවෙන් තැකිය හැකි තත්ත්වයක් නොවේ. මෙය ඉදිරියේදී සිදුවිය හැකි බරපතළ ව්‍යසනයක පෙර නිමිත්තක් වීමටද ඉඩ තිබේ. ආර්ථිකය කොතරම් කඩා වැටීමකට ලක්විය හැකි වුවද ඇඳිරි නීතිය පනවා දින ගණන් රටේ දැඩි අවදානමක් පෙන්නුම් කරන ප්‍රධාන නගර ලොක්ඩවුන් කිරීමට බලකෙරෙන තත්ත්වයක් මතුවෙමින් තිබේ. මේ අවස්ථාවේදී ගතයුතු පියවර තවදුරටත් ප්‍රමාද කිරීමට හැකියාවක් නැත. මෙහිදී රටේ ජනතාවටද තමන්ගේ පැත්තෙන් ආරක්ෂාව උපරිමව සලස්වා ගනිමින් කටයුතු කිරීම හැර වෙනත් විකල්පයක් නැත.
රජයේ වෛද්‍ය නිලධාරීන්ගේ සංගමය දැඩිව අනතුරු අඟවන්නේ වෛරසය සමාජය තුළට කාන්දු වීමක් සිදුවුවහොත් තත්ත්වය පාලනය කරගැනීමේ අවස්ථාව ගිලිහී යාමට ඉඩ ඇති බවය. කොවිඩ් උප පොකුරු බිහිවීමේ විශාල තර්ජනයකට ශ්‍රී ලංකාව මේ වනවිට මුහුණ පා සිටින බවටද එම සංගමය පසුගියදා අනතුරු ඇඟවීය. එය එසේ වීමෙන් වළක්වා ගැනීමට රජය තුළද විධිමත් වැඩපිළිවෙළක් තිබිය යුතුය. එවැනි වැඩපිළිවෙළ මුල් අවස්ථාවේදී අපි දැක ගත්තෙමු. එහෙත් මෙවර තවමත් එවැනි කාර්යක්ෂම සහ මනා ලෙස සංවිධානාත්මක ක්‍රමවේදයක් දකින්නට නැත. එවැන්නක් තිබුණා නම් බ්‍රැන්ඩික්ස් පොකුර මේ තරමට රටපුරා විහිදී නොයන්නට හොඳටම ඉඩ තිබිණි.
කොවිඩ් - 19 සාර්ථකව පාලනය කළ රටක් වශයෙන් මීට පෙර ශ්‍රී ලංකාවට කිත් පැසසුම් පවා ලැබිණි. එය කොතරම් නිවැරදි අගැයීමක්ද යන්න තීරණය වනු ඇත්තේ ඉදිරියේදී තත්ත්වය පාලනය කරගන්නා ආකාරය අනුවය. ඒ සඳහා අප විසින් කළ යුත්තේ වෛරසයේ ව්‍යාප්තිය වළක්වා ගැනීමට ගතහැකි සියලු පියවර අප්‍රමාදව ගැනීමය. එය සාර්ථක කරගැනීමට හැකි වුවහොත් කිත් පැසසුම් නොලැබුණත් කමක් නැත. වෛරසය අළු යට ගිනිපුපුරැ මෙන් නලියද්දී ලැබෙන චරිත සහතිකවල වටිනාකමක්ද නැත.
