ආර්ථිකය ගැන ආණ්ඩුව සුරංගනා කතා කියනවා
එක්සත් ජාතික පක්ෂ හිටපු ජාතික ලැයිස්තු පාර්ලිමේන්තු මන්ත්‍රී සමන් රත්නප්‍රිය
රටපුරා මේ වනවිට කොවිඩ් 19 රෝගයේ දෙවැනි රැල්ල සීඝ්‍රයෙන් පැතිරෙමින් පවතිනවා රජය මේ කොරෝනා රෝගය පාලනය කරන්න ගත හැකි සෑම පියවරක්ම ගන්නා බව කියනවා. එක්සත් ජාතික පක්ෂය ලෙස මේ අවස්ථාවේ රෝගය මර්දනය කරන්න රජයට සහාය දෙන්න සූදානමක් නැද්ද?
කොවිඩ් 19 කියලා කියන්නේ ගෝලීය වසංගතයක් ඇත්තටම ලෝකය පුරාවටම මේ වනවිට මෙම රෝගය පැතිරෙමින් පවතිනවා. දැන් මෙරටත් රෝගීන් දොළොස්දහසකට වැඩියෙන් වාර්තාවෙනවා. ඇත්තටම රජය මේ වනවිට මේ රෝගය පාලනය කරන්න දැඩි මහන්සියක් ගන්න බව පේන්න තිබෙනවා. අපේ එක්සත් ජාතික පක්ෂය නිරතුරැවම ජනතාව වෙනුවෙන් පෙනී ඉන්න නිසා මේ කොවිඩ් තුරන් කරන්න අපි ආණ්ඩුවට සහාය ලබාදෙන්න සූදානම්. නමුත් ආණ්ඩුව ඒ සඳහා කිසිම පක්ෂයකින් උදව් ලබාගන්න බවක් පේන්න නැහැ.
ආණ්ඩුව මේ කොවිඩ් රැල්ල පාලනය කරන්න අසමත් වෙලාද තියෙන්නේ?
මේ ආණ්ඩුව කොවිඩ් රැල්ලෙහි පළමු අවස්ථාව යම්තාක් දුරට අවසන් වෙද්දී උදම් ඇනුවා අපි මේ රෝගය පාලනය කළා. අපි ලෝකයෙන්ම රෝගය පාලනය කර රටවලින් දෙවැනි තැන ඉන්නවා කියලා. නමුත් ආණ්ඩුව කිසිම පිළියමක් යෙදුවේ නැහැ කොවිඩ් දෙවැනි රැල්ලක් පිළිබඳව. ලෝක සෞඛ්‍ය අංශත් මෙහි දෙවැනි රැල්ල පිළිබඳ අනතුරු අඟවා තිබුණා. නමුත් ආණ්ඩුව එය ගණන් ගත්තේ නැහැ. එහි ප්‍රතිඵලය තමයි මේ ජනතාව පිටින් යන්නේ.
ඔබ හිතනවද මේ වෙලාවේ රට ලොක්ඩවුන් කළ යුතුයි කියලා?
අපි ආණ්ඩුවට කියන්නේ නැහැ රට ලොක්ඩවුන් කරන්න ඕන කියලා. නමුත් ආණ්ඩුව දැනගත යුතුයි මේ වෙලාවේ ගන්න ඕන තීරණ මොනවද කියලා. දැන් ලෝක සෞඛ්‍ය සංවිධානයත් කියලා තිබුණා සෞඛ්‍ය අංශ ලබාදෙන විධිවිධාන අනුව කටයුතු කරන්න කියලා දේශපාලනය අනුව මේ රෝගයේදී කටයුතු කරන්න එපා කියලා ඔවුන් නිවේදනයක් මගින්ම කියලා තිබුණා. රට ලොක් ඩවුන් කරනව නම් රජයට ඒ සඳහා නිසි වැඩපිළිවෙළක් තිබිය යුතුයි. එසේ නොමැතිව රට ලොක්ඩවුන් කොළොත් ජනතාව තමයි අසරණ තත්වයට පත්වෙන්නේ.
සෞඛ්‍ය ඇමතිතුමිය පසුගිය දිනක පැවසුවා කොවිඩ් රෝගය පාලනය වෙනව නම් තමන් මුහුදට වුණත් බිලිවෙන්න සූදානම් කියලා?
එතුමිය මුහුදට බිලිවුණා කියලා කොවිඩ් නවතිනවද නැහැනේ. මොකද මේක ලෝකේම පැතිරී යන වෛරස් එකක්. ලෝකයේ වෙනත් රටවලින් මේ රෝගය පාලනය කිරීමට වෙහෙසෙනවා ඒ වගේම මේ රෝගයට බෙහෙත් හොයන්න මහන්සි වෙනවා. නමුත් අපේ සෞඛ්‍ය ඇමතිතුමිය ඔය කිසි දෙයකට උත්සාහ කරන්නේ නැතුව ජනතාවට විහිළු සපයනවා.
අලුත් ආණ්ඩුව ඉදිරියේදී අයවැය ඉදිරිපත් කරන්න සූදානම් වෙනවා එජාපය මොනවද කරන්න බලාපොරොත්තු වෙන්නේ?
මේ ආණ්ඩුව බලයට ආවේ ජනතාවට සහන රුසක් දෙනවා කියලා. නමුත් ආණ්ඩුව අද වනතුරු ජනතාවට මුකුත් කරලා නැහැ. රනුක්ගේ වැටුප් වාර්තාවට අනුව කම්කරුවෙකුට රුපියල් 3000ක් හිමිවෙනවා. මේ ජනවාරි ඉඳන් තමයි ඒක දෙන්න තිබුණේ. නමුත් ඔවුන් ඒක කළේ නැහැ. විශ්‍රාමිකයන්ට වැටුප් විෂමතා ඉවත් කළාද? තවම ඒක කළේ නැහැ. ආණ්ඩුව කිව්වේ බලය නැහැ කියලා. ඒ වෙනුවට 20 ගේන්න ඕන කිව්වා. දැන් 20ත් සම්මත වෙලා තියෙනවා. ඒත් තවම සහන දෙන පාටක් පේන්න නැහැ.
ආණ්ඩුව කියන්නේ ඔවුන් මේ 20 වැනි සංශෝධනය ගෙනාවේ පසුගිය යහපාලන රජය ගෙනාපු 19 වැනි සංශෝධනයෙන් කිසිදු වැඩක් කරන්න හැකියාවක් නැති නිසා කියලා?
ඒක බොරැවක්නේ. දැන් කලින් ආණ්ඩුව වැඩ කළේ නැද්ද? කලින් ආණ්ඩුව වැඩ කළා. එතැනදී පක්ෂ දෙකේ තමයි පොඩි පොඩි අවුල් තිබුණේ. 19 කාලේ තනි පුද්ගලයකු වටා තිබුණු බලය සැලකිය යුතු ප්‍රමාණයකට පාර්ලිමේන්තුවට පැවරීම ඒක රට ප්‍රජාතන්ත්‍රවාදී කිරීමක්. තනි බලයක් තිබුණ පුද්ගලයන් තමයි තමන්ට කැමති දෙයක් කළේ. නමුත් අපි කළේ 19 ගෙනැල්ලා ඒක නැති කළ එක.
නමුත් ආණ්ඩුව කියන්නේ යහපාලන රජය 19 ව්‍යවස්ථාව ගෙනත් සිදුකළේ පොදුජන පෙරමුණේ මන්ත්‍රීවරුන්ගෙන් සහ ඒ හිතවතුන්ගෙන් දේශපාලන පළිගැනීම කියලා?
යහපාලන රජය කාගෙන්වත් පළිගත්තේ නැහැ. ඒක ආණ්ඩුව තමන්ගේ වාසියට හදාගත්ත කථාවක්.
ජනතාව බොහෝ දෙනෙක් කියනවා අද ජීවන වියදම ඉහළ ගිහින් තියනවා කියලා. නමුත් ආණ්ඩුව කියන්නේ ජනතාවට සහන ලබා දෙනවා කියලා එජාපය මොකද මේ ගැන කියන්නේ?
මේ ආණ්ඩුව ජනතාවට සහය ලබාදෙන්නේ නැහැ. 2015 අගෝස්තු මාසයෙන් පස්සේ ජනතාවට ඕන කරන සියලු අත්‍යවශ්‍ය භාණ්ඩවල මිල අඩුකළා. ඒ වගේම රාජ්‍ය සේවකයන්ගේ පඩි වැඩිකළා. රටේ සංවර්ධන කටයුතු විශාල ප්‍රමාණයක් අපි සිදුකළා. නමුත් වර්තමාන රජය බලයට ඇවිත් දැන් මාස තුනක් වෙනවා. කෝ මොනවද ජනතාවට ලබාදුන් සහන? මේ ආණ්ඩුව බලයට ආවට ජනතාවට සහන දෙනවා කියලා එහෙම ලබා දෙන්නේ නැහැ.
නමුත් ආණ්ඩුව කියන්නේ රටේ ආර්ථිකය කඩා වැටුණේ යහපාලන කාලය තුළ ඒනිසා තමයි මේ ආර්ථිකය ගොඩ ගන්න මෙතරම් අමාරු කියලා?
යහපාලන රජය කාලේ ආර්ථිකය කඩා වැටුණේ නැහැ. අපි බාරගත්තේ කඩා වැටුණ ආර්ථිකයක් තිබුණ රටක්. අපේ එක්සත් ජාතික පක්ෂයේ නායකතුමා ඇතුළු යහපාලන රජය මේ ආර්ථිකය ගොඩගනිමින් තමයි ජනතාවට සහාය දුන්නේ. ආණ්ඩුව ඔය කියන සුරංගනා කථා කවුරැත් විශ්වාස කරන්නේ නැහැ.
මෙරට පැරණිතම දේශපාලන පක්ෂයක් වුණ එක්සත් ජාතික පක්ෂය කඩාවැටිලා තිබෙනවා. නැවත ගොඩඒමක් පේනතෙක් මානයකවත් නැහැ කියලා ජනතාව කියනවා ඒක ඇත්තද?
එක්සත් ජාතික පක්ෂය කඩාවැටිලා නැහැ. එජාපයේ අර්බුදයක් ආවා. ඒක අපි පිළිගන්නවා. සජිත් ප්‍රේමදාස මහත්තයා පක්ෂය කඩාගෙන එළියට ගියා. ඇත්තටම ඒක බරපතල වැරැද්දක්. එතුමාට තිබුණේ පක්ෂයේ ඇතුළෙම දේශපාලන බලය ලබාගන්න කටයුතු කරන්න. නමුත් එහෙම කළේ නැහැ. එජාපය කැඩීමේ පල විපාකය තමයි ආණ්ඩුව 20 තුනෙන් දෙකෙන් සම්මත කර ගැනීම. ඔහු වටා හිටපු සුළු පක්ෂවල මන්ත්‍රීවරුත් ඒකට සහාය දුන්නා. ඒ වගේම පක්ෂය ලබාදීපු මිනිස්සු පවා ආණ්ඩුවට ඡන්දය දුන්නා.
ඒ වුණාට සමගි ජනබලවේගය තමයි පාර්ලිමේන්තුවේ විපක්ෂය නියෝජනය කරන්නේ. නමුත් ඔබලට හිමි ජාතික ලැයිස්තු පාර්ලිමේන්තු මන්ත්‍රී ධූරය සඳහාවත් තවමත් කෙනෙක් පත් කරන්න බැරිවෙලා තියනවා නේද?
මන්ත්‍රීධූරයක් අත්‍යාවශ්‍ය කාරණයක් කියලා අපි විශ්වාස කරන්නේ නැහැ. මොකද රටේ ජනතාවත් මෙය තේරැම් ගතයුතුයි. ඒක නිසානේ යම් ප්‍රමාණයකටවත් එජාපය බලය ලබා නොදුන්නේ. නමුත් දැන් ජනතාවට තේරිලා තියෙන්නේ. රටේ ජනතාව විශ්වාස කළේ වෙන කණ්ඩායමක් එජාපය නැති එකේ ප්‍රථිපල දැනටමත් තේරිලා තියෙන්නේ.
ඔබලා සමගි ජනබලවේගය සමග එක්වීමට අදහසක් ඇත්තේ නැද්ද?
පක්ෂයේ නායකවරැන් සහ කෘත්‍යාධිකාරී මණ්ඩලය තමයි ඒ පිළිබඳ සලකා බලන්නේ. මම ඒ පිළිබඳව දන්නේ නැහැ.
ඉදිරි පළාත් සභා මැතිවරණය පැවැත්වුවහොත් ඔබලා එජාපය ලෙසද එයට ඉදිරිපත් වෙන්නේ?
අනිවාර්යයෙන්ම ඔව්. අපි පක්ෂය කඩා වැටිලා නැහැ. අපි පාර්ලිමේන්තු මැතිවරණයෙන් පරාජයට පත් වුණත් අපේ පක්ෂයේ වැඩකටයුතු නතර කරලා නැහැ. අපි ගම් මට්ටමින් ජනතාව දැනුවත් කරමින් පක්ෂයේ යාන්ත්‍රණය ශක්තිමත් කරමින් ඉන්නේ. මේ කොවිඩ් වසංගතය නිසා තමයි ඒ වැඩකටයුතු පස්සට ගිහින් තියෙන්නේ.
එක්සත් ජාතික පක්ෂයේ නායකයා කවුරැ වුණත් ඔබ ඔහු සමඟ වැඩ කරන්න සූදානම්ද?
පක්ෂයක තනතුරක් හිස් වෙද්දී කිහිපදෙනෙක්ට ඉදිරිපත් වෙන්න පුළුවන්. එහෙම ඉදිරිපත් වෙන්නත් ඕන. ඒක හොඳ දෙයක්. ඒ අය අතරින් දක්ෂතම පුද්ගලයා තමයි තෝරාගන්න ඕන ඒ නිසා. මම පක්ෂයේ උන්නතිය වෙනුවෙන් කැපවෙන ඕනම කෙනෙක් එක්ක වැඩ කරන්න ලෑස්තියි.
සටහන: හසිත් අංජන
