මහින්ද මහත්තයාගෙ දේශපාලන ගනුදෙනු කෝපි කෝප්පෙකට විතරයි
ක්‍රීඩා හා යෞවන කටයුතු අමාත්‍ය නාමල් රාජපක්ෂ
- ක්‍රීඩා ආයතන සියල්ලටම වැඩ කරන නිදහස ලබාදුන්නා
- පහුගිය ආණ්ඩුව රාජ්‍ය නිලධාරීන් බය කෙරුවා
- ආණ්ඩුවේ මැති ඇමැතිවරු හතරකට බෙදිලා රට පුරා වැඩ
- එෆ්.සී.අයි.ඩිය නීතිවිරෝධියි කියලා රනිල් මහත්තයාම දැන් කියන්නේ
- සමහර මුදලාලිලා පාලන මිලත් එක්ක ගේම් ගහනවා
- විපක්ෂය හැමදාම කළේ ආණ්ඩුවට ගහන කතා ගොතන එකයි
- අයි.පී.එල්. ගැහැව්වා නම් එල්.පී.එල්. බැරි ඇයි?
ඔබ මේ මොහොතේ දරමින් සිටින්නෙ පළමු ඇමැති ධූරයයි. මේක භාරධූර අමාත්‍ය ධූරයක්. ඔබට කොහොමද මේ අලුත් අමාත්‍ය ධූරය සම්බන්ධයෙන් දැනෙන හැඟීම?
ඇත්තටම මේක වගකීම් සහගත අමාත්‍ය ධූරයක්. විශේෂයෙන් කියන්න ඕනෙ අද සියලුම අමාත්‍ය ධූර සහ රාජ්‍ය අමාත්‍ය ධූර වගකීම් සහගත වැඩක් කරන්න පුළුවන් අමාත්‍යාංශ බවට ජනාධිපතිතුමා පත් කරලා තියෙනවා. මේ වෙනකොට අමාත්‍ය ධූරය බාර අරගෙන මාස දෙක තුනක් ගෙවිලා. මම හිතන්නෙ පළමු මාස තුන තුළ සැලසුම් හදන එක තමයි කළ යුත්තේ. ඒ නිසා අපි ඒ දේ කරගෙන යනවා. අපි බලධාරීන් එක්ක ඉදිරි වසර පහේ සැලසුම් හදන ගමන් අවශ්‍ය කටයුතු සිදු කරගෙන යනවා.
වර්තමානයේ ඇතිවෙලා තියෙන වසංගතයත් එක්ක ඔය සැලසුම් ක්‍රියාත්මක කරන්න පුළුවන්ද අනාගතයේ?
ඔව්. අපි සැලසුම් හදලා තියෙන්නෙ මේ වසංගතයත් එක්ක ක්‍රීඩකයන් සහ ක්‍රීඩාව ඉදිරියට අරගෙන යන හැටි ගැනයි. එතනදි මා විසින් පත් කරන ලද ක්‍රීඩා කවුන්සලය විශාල සහයෝගයක් වෙලා තියෙනවා මේ වෙනකොට. කියන්නෙ ඕනෙ ඒ අය තමන්ගෙ රාජකාරිය මැද්දෙ ස්වේච්ඡාවෙන් තමයි මේ කවුන්සලයට සහභාගි වෙලා ඉන්නෙ.
ක්‍රීඩා ඇමැතිවරුන්ට එන චෝදනාව තමයි එක එක ක්‍රීඩාවලට සැලකුම් ලබා දෙන්නෙ කුඩම්මගෙ ක්‍රමයට කියලා. නාමල් රාජපක්ෂටත් ඒ චෝදනා අහන්න වෙයිද?
අපේ මූලික අරමුණ තමයි මේ රටේ ක්‍රියාශීලී ක්‍රීඩකයන් මිලියන හයක් හදන එක. විශේෂයෙන් මගේ අදහස තමයි ක්‍රීඩා අමාත්‍යාංශය තුනකට බෙදෙන්න ඕනෙ. එක තමයි ජාත්‍යන්තර තලයේ ක්‍රීඩා හඳුනාගෙන ඒවා දියුණු කරන්න පුළුවන් ක්‍රමවේදයක් සෑදීම. දෙක තමයි ක්‍රියාශීලී සහ විනෝදාස්වාදය සඳහා ක්‍රීඩාව හදන්න ඕනෙ. විශේෂයෙන් දෙවැනි කාරණයේදී ක්‍රීඩා ආර්ථිකයක් රටේ ඇති කරන්න ඕනෙ. තුන්වැනි කාරණය තමයි ඊ ස්පෝට්ස් ක්‍රමය. වර්තමානයේ මේක මිලියන ගාණක ආදායම් ලබන ව්‍යාපෘතියක් බවට පත්වෙලා. අපේ අරමුණ තමයි ඒ සියලු ක්‍රීඩාවන්ට අවශ්‍ය සැලසුම් සකසන එක. විශේෂයෙන්ම මම බලාපොරොත්තු වෙනවා ක්‍රීඩා සංගම් ඉතාමත් ක්‍රියාශීලී ලෙස කටයුතු කරයි කියලා. ඒ සඳහා අපි සහයෝගය ලබා දෙන්න සූදානම්.
පසුගිය කාලයේ ක්‍රීඩා සංගම් සමඟ ක්‍රීඩා අමාත්‍යාංශය යම් යම් ගැටුම් ඇතිකර ගත්තා?
ඒකට හේතුව තමයි ක්‍රීඩා අමාත්‍යාංශය හැමදේම කරන්න යන එක. ක්‍රීඩා සංගමයට අයත් වගකීම සංගමයට නොදී අමාත්‍යාංශය සිදු කිරීම තුළයි ප්‍රශ්නය ඇතිවෙන්නෙ.
විශේෂයෙන් පාසල් ක්‍රීඩාව ක්‍රීඩා අමාත්‍යාංශයට අමතක වෙලා තියෙනවා. ඒ නිසා දක්ෂ ක්‍රීඩකයො උඩට එන්නෙ නෑ. ඔබ දකින්නෙ මොකක්ද ඒ ගැන?
ඇත්තටම පාසල් ක්‍රීඩා මට්ටම ගත්තොත් ඉතාම ඉහළ මට්ටමක තියෙනවා. ඒ ක්‍රීඩා අමාත්‍යාංශයේ ඍජු මැදිහත් වීමක් හෝ අවධානයක් යොමු වෙන්නෙ නැතුව. හැබැයි අද ක්‍රීඩා අමාත්‍යාංශයත් අධ්‍යාපන අමාත්‍යාංශයත් එකට වාඩිවෙලා වැඩ කටයුතු කරගෙන යනවා. විශේෂයෙන්ම ක්‍රීඩා පාසල් ටික දියුණු කරලා ජාත්‍යන්තර මට්ටමට ගෙන ඒම තමයි අපේ අරමුණ. විශේෂයෙන්ම කියන්න ඕනෙ ජනාධිපතිතුමා පාසල් ක්‍රීඩාව නංවන්න රාජ්‍ය ඇමැතිවරයෙක් පත් කරලා ඉන්නවා. එතුමා විශේෂ කටයුත්තක් සිදු කරනවා.
ඒ වගේම පසුගිය කාලේ ක්‍රීඩා අමාත්‍යවරයා සහ ක්‍රිකට් ක්‍රීඩාව අතර ගැටුම්කාරී තත්ත්වයක් උදා වුණා. ඒ වගේම ක්‍රිකට් ක්‍රීඩාව විශාල වශයෙන් පහළට කඩා වැටුණා. ශ්‍රී ලංකා කණ්ඩායම දුර්වල කණ්ඩායමක් බවට පත් වුණා. ඔබ දැන් ක්‍රීඩා ඇමැති. මොකක්ද ක්‍රිකට් ක්‍රීඩාව වෙනුවෙන් කරන්නෙ?
ක්‍රිකට් ක්‍රීඩාව සම්බන්ධයෙන් ආන්දෝලනාත්මක කතා ලංකාව තුළ වගේම පිටත් සිදු වුණා. ඒ වැඩි ජනතා ආකර්ශනය නිසා. මගේ මතය තමයි ක්‍රිකට් ක්‍රීඩාව විතරක් නෙමෙයි වෙන ඕනෑම ක්‍රීඩාවකට දේශපාලන මැදිහත් වීමක් හෝ ක්‍රීඩා අමාත්‍යවරයාගේ මැදිහත් වීමක් සිදු නොවිය යුතුයි. එහෙම මැදිහත් වෙනවා නම් අත්‍යවශ්‍යම කාරණයක් සඳහා පමණක් විය යුතුයි. ඒ නිසා මම සියලුම ආයතනවලට නිදහස දීලා තියෙනවා අභිමතය පරිදි වැඩ කරන්න. ඉතින් මම බලාපොරොත්තු වෙනවා ඒ අය ඉතාම විනිවිදභාවයකින් මෙන්ම වෘත්තීය මට්ටමකින් තම කටයුතු සිදු කරයි කියලා.
මේ වෙනකොට සමාජයේ කතාබහට ලක්වෙලා තියෙනවා මේ කොවිඩ් වසංගතය ඇතුළෙ එල්.පී.එල්. ක්‍රීඩා තරගාවලිය පවත්වන්න තීරණය කරපු එක ගැන. ඇයි මේ මෙච්චර අවදානමක් මැද්දෙ මෙහෙම දෙයක් කරන්න ඔබ මැදිහත් වෙන්නෙ?
එයට හේතු කරණා කිහිපයක් තියෙනවා. බලන්න අද මුළු ලෝකෙම කොවිඩ් වසංගතය මැද්දෙ ක්‍රීඩාව සිදු කරගෙන යනවා. අපි කොවිඩ් වසංගතය මර්දනය කිරීමේ ක්‍රමවේදයෙහිලා විශාල ගෞරවයක් ජාත්‍යන්තර වශයෙන් අරගෙන තියෙනවා. හැබැයි අපි තවම අපොහොසත් වෙලා තියෙනවා ජන ජීවිතය සාමාන්‍ය අතට පත්කර ගන්න. අපි කරන්නෙ ආර්ථිකමය වැඩපිළිවෙළ සම්පූර්ණයෙන්ම වහලා දාලා සමාජ කටයුතු සියල්ලම සිදු කරනවා. කඩවල් කාර්යාල වහනවා. හැබැයි මිනිස්සු ට්‍රිප් යනවා. එතකොට මොකක්ද ඒකෙ තියෙන සම්බන්ධතාවය. අපි ඇත්තටම වහගෙන ඉන්න එක නෙමේ කරගෙන ඉන්න ඕන. වසංගතය ඇතුළෙ ජන ජීවිතය පවත්වාගෙන යාමයි කරන්න ඕනෙ. දැන් බලන්නකො අයි.පී.එල්. ක්‍රීඩා උළෙල පැවැත්වුවා. කිසිම අර්බුදයක් ඇතිවුණේ නෑ. මේ කාර්යයේදී මිනිස්සුන්ගෙ මානසික ආතතිය දරුණු ලෙස බලපානවා. ඉතින් ඒකට ක්‍රීඩාව හොඳම බෙහෙතක්. ඒක සම්පූර්ණ සහනයක් නෙමේ. යම්කිසි තරමක සහනයක් ලැබෙනවා.
දැන් ඕක කරන්න සෞඛ්‍ය රෙගුලාසි අරගත්තද?
ඔව්. අපි සියලුම සෞඛ්‍ය මාර්ගෝපදේශ යටතේ තමයි මෙය සිදු කරන්නෙ. අපි සෞඛ්‍ය අංශත් එක්ක කතා කරලයි මේ වැඩේ ඉතාම ක්‍රමානුකූලව සිදු කරන්නෙ. මේ තරගාවලියත් කොවිඩ් අතරත් කිසිම සම්බන්ධතාවයක් ඇතිවෙන්නෙ නෑ. මොකද ප්‍රේක්ෂකයො සහභාගි වෙන්නෙ නෑ. ක්‍රීඩකයො විතරයි ඉන්නෙ. ඒ සියල්ල රෑපවාහිනියෙන් ජනතාවට පෙන්වන්න පුළුවන්.
ඔබ වගකීම ගන්නවද මේ ක්‍රීඩා උළෙල නිසා රටට හානියක් වෙන්නෙ නෑ වගේම සෞඛ්‍ය රීති පිළිපදිනවා කියලා?
අමාත්‍යාංශය වගේම ක්‍රිකට් ක්‍රීඩා ආයතන ඇතුළු සියලු දෙනාම වගකීම අරගෙනයි මේ දේ සිදු කරන්නෙ. මේක රූපවාහිනිය හරහා සජීවීව ලබාදෙන නිසා ජනතාව එක්රැස් වීමක් සිදුවෙන්නෙ නෑ.
දැන් ගොඩක් අයට හිතෙන්න පුළුවන් ක්‍රිකට් ක්‍රීඩා සැණකෙළියක් ලංකාවේ පවත්වනවා. හැබැයි විදෙස් රටවල හිරවෙලා ඉන්න ශ්‍රමිකයන් ලංකාවට ගෙන්නගන්න ආණ්ඩුවට වුවමනාවක් නෑ කියලා?
ඒ අයගේ එහෙම චෝදනාවක් තියෙනවා නම් ඒක සාධාරණයි. හේතුව අපි ඒ අයව ඇත්තටම ගෙන්වාගන්න ඕනෙ. ඒ වගේම ආණ්ඩුවක් හැටියට අපි ඒ සඳහා උපරිම දායකත්වය දක්වලා තියෙනවා. නමුත් අද වෙලා තියෙන්නෙ තමයි හදිසියේ ඇතිවුණු තත්ත්වයත් එක්ක අපේ කොරන්ටයින් සෙන්ටර්ස්වල ධාරිතාවය වැඩි වුණා. ඉතින් මේක යම්කිසි ආකාරයකින් කළමනාකරණය වුණාම නැවත සුපුරුදු පරිදි ඒ අයව ලංකාවට ගෙන්වන වැඩපිළිවෙළ ක්‍රියාත්මක කරනවා. ඒ හින්දම අපි මේ වෙනකොට නව නිරෝධායන ක්‍රමවේදයත් වෙනස් කරලා තියෙන්නෙ. හැබැයි එක දෙයක් කියන්න ඕනෙ ඒ අය ගේන එකයි එල්.පී.එල්. එකයි අතර කිසිම සම්බන්ධයක් නෑ.
විපක්ෂය චෝදනා කරනවා ආණ්ඩුව මේ කොවිඩ් වසංගතය සම්බන්ධයෙන් ගනු ලබන ක්‍රියාමාර්ග සාර්ථක නෑ. ඉතාම අවුල් සහගතයි කියලා. හැබැයි ඒකට ආණ්ඩුවෙනුත් හරි උත්තරයක් නෑ?
ඕක ඉතින් ඔය විපක්ෂය හැමදාම ගොතන කතානෙ. ඕවා මැතිවරණ කාලෙත් කිව්වා. ඒ අය කියනවා පාර්ලිමේන්තු රුස්වීම් තියන්න එපා කියලා. හැබැයි ඒ අයම ගම්වල ගිහිල්ලා රුස්වීම් කරනවා. ඒ අය කරන්නෙ දෙපැත්ත එක්ක සෙල්ලම් කරන එකයි. හැබැයි ආණ්ඩුවක් හැටියට අපි ඉතාම පිළිවෙලට වැඩ කටයුතු කරගෙන යනවා.
ආණ්ඩුව හොඳින් කරගෙන යනවා කිව්වට අවම වශයෙන් වෙළෙඳපොළේ මිල පාලනය කරගන්න බෑ. ගැසට්ම ගහලා ඇති දවස ගාණෙ. ඇයි මේ මෙහෙම වෙලා තියෙන්නෙ?
පාලන මිලක් දැම්ම නම් ඒ පාලන මිලට අනුව කටයුතු කරන්නෙ නැත්තම් අනිවාර්යෙන්ම නීතිය ක්‍රියාත්මක කළ යුතුයි. අපිට පේන දේ තමයි එක්කෙනෙක් දෙන්නෙක් මේ කොවිඩ් එක ඇතුළෙ ව්‍යාපාර කරන්න ලෑස්ති වෙනවා. තමන්ගෙ ව්‍යාපාර දියුණු කරගන්න හදනවා. හැබැයි අපි ආණ්ඩුවක් හැටියට අපේ පාරිභෝගික ජනතාව ගැන තමයි වැඩිපුර හිතන්නෙ. ජනාධිපතිතුමත් අගමැතිතුමත් ඒ වෙනුවෙන් තමයි කටයුතු කරන්නෙ.
ඕකට ඔච්චර ගැසට් ගහන්න ඕනෙද?
නෑනෙ. චක්‍රලේඛනත් අවශ්‍යයිනෙ. ගමේ අහිංසක මිනිහෙක්ට ඔප්පුවක් හදන්නත් ජනාධිපතිවරයගෙන් චක්‍රලේඛන ඉල්ලුවනෙ. එවැනි තත්ත්වයක් උදාවෙලා තියෙන්නෙ. පහුගිය ආණ්ඩුව කරපු දේවල් නිසා තමයි ඒ තත්ත්වය උදාවෙලා තියෙන්නෙ. මොකද රාජ්‍ය නිලධාරීන් බයයි. අපි රාජ්‍ය නිලධාරීන්ට කියන්නෙ ඔබ රජය වෙනුවෙන් ගන්න ලද ඕනෑම නිවැරදි තීන්දුවක් වෙනුවෙන් අපි රජයක් හැටියට පෙනී ඉන්නවා.
වැඩිය ඕනෙ නෑ අපි දැක්කා හාල් මෝල් හිමියො හම්බුවෙන්න ගියාම ඒ අය මූණට බණිනවා කියන දේ කරන්න බෑ කියලා. ආණ්ඩුව එයාලට බයද?
ආණ්ඩුව නම් කිසිසේත් බය නෑ. අපි බයත් නෑ. එහෙම වැරදි කරන අයට අනිවාර්යයෙන් නීතිය ක්‍රියාත්මක කරනවා. ඔය මහා වීමෝල් හිමියන්ගෙ සහෝදරයොත් රටේ නායකයො වෙලා හිටියනෙ. එච්චර නායකයො හිටිය කාලෙත් හාල් මිල පාලනය කරන්න බැරි වුණා.
මෙච්චර ප්‍රශ්න තියෙද්දිත් අගමැතිතුමා වැඩිය කතා කරන්නෙ නෑනෙ. ඔබ ඔබේ පියා වෙලත් අහන්නෙ නැද්ද ඇයි මේ කියලා?
අගමැතිතුමත් ජනාධිපතිතුමත් අපිත් එකතුවෙලා අදාළ කටයුතු ඉතාම හොඳින් කරනවා. ජනාධිපතිතුමා ඉතාම දක්ෂ ලෙස රාජ්‍ය සේවය හසුරුවමින් රට පාලනය කරනවා. එතනදි අගමැතිතුමාගේ මැදිහත්වීම අවශ්‍ය තැන පමණක් ලබා දෙනවා. අගමැතිතුමා එතුමාගේ රාජකාරිය අවශ්‍ය වෙලාවට ඉටු කරනවා.
දැනට පේන දේ අනුව ආණ්ඩුවට මුදල් නැති තත්ත්වයක් තියෙනවා. මේ විදිහට අනාගතයේ ආර්ථික කළමනාකරණය හරි ආකාරයෙන් කරගෙන යන්න බැරි වෙයි නේද?
මෙහෙමයි. ලෝකෙ පුරාම මේ තත්ත්වය ඇතිවෙලා තියෙනවා. එහෙත් අගමැතිතුමාගෙ ප්‍රධානත්වයෙන් ඒ සඳහා වෙනම කණ්ඩායමකුත් බැසිල් රාජපක්ෂ මහත්මයාගෙ නායකත්වයෙන් දිළිඳු පවුල් නගාසිටුවීමේ වැඩසටහනකුත් මේ වෙනකොට ක්‍රියාත්මක වෙමින් යනවා. ඒ වගේම අපිත් ආණ්ඩුවේ මැති ඇමැතිවරු හතරකට බෙදිලා රට පුරාම යනවා. අපේ දේශීය ආර්ථිකය විශාල වශයෙන් නිෂ්පාදන ආර්ථිකයක් සඳහා වෙනස් කරමින් යනවා. ඒ වගේම සේවා සැපයුම් ආර්ථිකයත් ඉහළ මට්ටමකකට අරගෙන එන්න ඕනෙ. ඒ සඳහා අවශ්‍ය කටයුතු අපි සිදු කරගෙන යනවා.
ඔබ ආණ්ඩුවේ ඇමැතිවරයෙක්. ඇත්තම කතා කළොත් කොවිඩ් වසංගතය දැන් සෞඛ්‍ය අංශ පාලනයෙන් මිදිලා නේද තියෙන්නෙ?
ඇත්තටම පාලනය කරගන්න පුළුවන් තත්ත්වයක දැන් තියෙන්නෙ. ඒ වගේම පාලනය කරලත් තියෙන්නෙ. සෞඛ්‍ය අංශත් ආරක්ෂක අංශත් පැය විසි හතර මුළුල්ලෙම ඒ සඳහා කටයුතු කරනවා. දැන් හිතන්න කොවිඩ් ගැන අපිට උපදෙස් දුන්න ලෝක සෞඛ්‍ය සංවිධානයේ ප්‍රධානියටත් කොවිඩ් හැදුණනෙ. ඒකෙන් පේන දේ තමයි මේ ලෙඩේ කොතැනද තියෙන්නෙ කියලා හිතාගන්න බෑ. මේක ත්‍රස්තවාදයක් නෙමෙයි. මේක ඒ නිසා කාලයත් එක්ක ක්‍රමානුකූලව අපේ ජීවන ක්‍රමය හැඩගස්වමින් ඉදිරියට යන්න ඕනෙ ගමනක්.
විපක්ෂය චෝදනා කරනවා මේක ආණ්ඩුව හිතවත් ව්‍යාපාරිකයන්ගෙ ආදායම් මාර්ගයක් බවට පත් කරලා තියෙනවා කියලා.?
ඒක පිළිගන්න බෑ. ඒක බොරුවක්. එහෙම චෝදනාවක් තියෙනවා නම් ඒගොල්ලන්ට පුළුවන් සාක්ෂි සහිතව පැමිණිල්ලක් ඉදිරිපත් කරන්න. දැන් පොලිසිය ඉස්සර වගේ නෙමෙයි ස්වාධීනයි. දැන් රනිල් වික්‍රමසිංහ මහත්තයම කියනවනෙ එෆ්.සී.අයි.ඩී එක නීති විරෝධීයි කියලා. හැබැයි ඒ දැනගෙනත් අපි ඒ නීතිවිරෝධී ආයතනවලට ගියා. අපි නීතියට ගරු කළා. අපේ නඩු තාම යනවා.
ඇත්තම කියන්න. ඔබගේ බාප්පා බැසිල් රාජපක්ෂ පාර්ලිමේන්තුවට එන එක තහවුරුයි නේද?
මම එතුමත් එක්ක සාකච්ඡා කරපු වෙලාවෙත් එතුමා මට කිව්වෙ එහෙම අදහසක් හෝ එවැනි තීන්දුවක් තාම නෑ කියලා. එතුමා මේ වෙලාවේ ඉන්නෙ කොවිඩ් වසංගතයත් එක්ක ජනතාවට සහන සැලසීමේ අගමැතිතුමාගේ සංකල්පය ක්‍රියාත්මක කරමින්. විශේෂයෙන් පක්ෂයේ වැඩ කටයුතු එතුමා බලනවා. එතුමා පාර්ලිමේන්තුවට ඒම සම්බන්ධව මම නම් වැරුද්දක් දකින්නෙ නෑ. එතුමාට සම්පූර්ණ අයිතියක් තියෙනවා පාර්ලිමේන්තුවට එන එක පොදුජන පෙරමු‍ණේ නිර්මාතෘ හැටියට. හැබැයි ඒක පක්ෂයේ අනෙකුත් අය සමඟ සාකච්ඡා කරලා තීන්දු කරයි.
අවසාන වශයෙන් ඔබගෙන් අහන්නෙ 20 වැනි සංශෝධනයට පාර පැන්න විපක්ෂයේ අයට ආණ්ඩුවෙන් කීයක් සල්ලි දුන්නද?
ඒ විපක්ෂයේ ආපු අය බැලුවම අපට කීයක් හරි දෙන්න තමයි වෙන්නෙ ඒ අයට. ඒ විපක්ෂය කියන්නෙ ඒ අය දුන්න ගණං හිලව්. හැබැයි මහින්ද රාජපක්ෂ මහත්තයා ගනුදෙනු කරන්නෙ කෝපි කෝප්පයකට විතරයි.
ගයාන් ගාල්ලගේ