කොවිඩ් ජීවිතයට හැඩගැසෙමු
කොවිඩ් වසංගතයේ ව්‍යාප්තිය විසින් බස්නාහිර පළාතම අගුලු දමා වසනු ලැබ තිබේ. ඉරිදා (15) මධ්‍යම රාත්‍රිය වනතුරු එය ක්‍රියාත්මක වන බව නිවේදනය කෙරිණි. තවදුරටත් එම තත්ත්වය පවත්වාගෙන යනු ඇතිදැයි දැනගන්නට නැත. කෙසේ වුවද මේ වන විට පවතින තත්ත්වය අනුව බස්නාහිර පළාතෙන් කිසිවකුටත් පිටවිය නොහැක. ඇතුළු වන අයට ද දැඩි සීමා පැනවී තිබේ. ඊට අනුකූලව බස්නාහිර පළාත තුළින් පිටත ප්‍රදේශවලට සිදුකෙරෙන පොදු ගමනාගමන සේවාවලටද තහංචි වැටී ඇත.
අප අකැමැති වුවද මේ සිදුවෙමින් පවතින්නේ කොවිඩ් වෛරසය සමඟ ජීවත් වීමට සියලු දෙනා හුරු කරවීමකි. රටතුළ වඩාත් තදින්ම වෛරසය පැතිර යාම සිදුවන්නේ බස්නාහිර පළාත තුළ වීම නිසා එම පළාතේ ජනතාවට මෙම “කොවිඩ් ට්‍රේනිං” එකේ රඟ හොඳින්ම දැනෙමින් තිබේ. රටේ ජනගහනයෙන් තුනෙන් එකකට ආසන්න පිරිසක් දිවිගෙවන සහ රටේ ආර්ථිකයෙන් විශාල පරිමාවක භාරකරු ද වන බස්නාහිරට මේ තහංචි වැටී ඇත්තේ තවදුරටත් වෛරසය ව්‍යාප්තියෙන් සිදුවිය හැකි බරපතළ හානි වළක්වා ගැනීමේ අරමුණෙනි. ජනතාව වෛරසයෙන් ආරක්ෂා විය යුතු අතරම රටේ එදිනෙදා ජීවිතය ද ඉදිරියට පවත්වාගෙන යාමද අවශ්‍යය. එසේ නොවුණොත් අමාරැවේ වැටෙන්නේද පොදු මහජනතාවමය.
දැනට ව්‍යාප්ත වෙමින් පවතින කොවිඩ්-19 වෛරසය රට තුළ අධික වේගයකින් සංසරණය වන බව ප්‍රකාශ වී තිබේ. ශ්‍රී ජයවර්ධනපුර විශ්වවිද්‍යාලයේ වෛද්‍ය පීඨයේ මහාචාර්ය නීලිකා මලවිගේ මහත්මියගේ මතය වන්නේ රෝගය ඉහළ මට්ටමින් පැතිර යන ප්‍රදේශ සහ බොහෝ රෝගීන් සිටින ප්‍රදේශ හුදෙකලා කොට තාවකාලිකව ලොක්ඩවුන් කළ යුතු බවය. එයින් අරමුණු කෙරෙන්නේ වෛරසය වේගයෙන් බෝවීම වළක්වා වයස්ගත පුද්ගලයන්, දියවැඩියාව, පිළිකා සහ හෘදයාබාධ ඇති අය ද මරණයට ගොදුරැවීම වළක්වා ගැනීමය. දැනට අප රට තුළ කොරෝනා රෝගය බෝකරන විපරීත රූපයකින් යුත් වෛරසයට වේගයෙන් පැතිර යාමට හැකියාව තිබෙන බවත් මේ නිසා පූර්ව ආරක්ෂාව සලසා ගැනීමටත් සමාජ පුද්ගල දුරස්ථභාවය තබාගැනීමටත් අමතර සැලකිල්ල යොමුකිරීම වැදගත් බවත් මහාචාර්යවරිය මාධ්‍ය සමඟ පැවැති සම්මුඛ සාකච්ඡාවකදී ප්‍රකාශ කර තිබිණි. කෙසේ වුවද දිවයින පුරාම ලොක්ඩවුන් කිරීමකට නොයා යුතු අතර එසේ කිරීම විනාශකාරී සමාජ හා ආර්ථික ප්‍රතිවිපාකවලට හේතු විය හැකි බවද මහාචාර්යවරිය ප්‍රකාශ කර තිබිණි.
කොවිඩ් පැතිරීමේ අසහනයෙන් ඇඹරෙමින් සිටින සමස්ත ජන සමාජයටම ඇය සිදුකර ඇත්තේ මහත් වටිනා මග පෙන්වීමකි. තව දීර්ඝ කාලයක් ජනසමාජය තුළ කොවිඩ් වෛරසය සැරිසරනු ඇති බවට ලෝක සෞඛ්‍ය සංවිධානය පවා සිදුකර ඇති පුරෝකථනයට අනුව අප ද ජීවන රටාව හැඩගස්වා ගත යුතු බවට වන පණිවුඩය ඒ තුළ ගැබ්ව තිබේ. කොවිඩ් වෛරසය ලොව පුරාම රටවල වේගයෙන් ව්‍යාප්ත වන විට අපේ රටට ද එයින් ගැලවුමක් නැති බව මුලින්ම වටහා ගත යුතු වෙමු. යථාර්ථය එය නම් ඊට මුහුණදීම හැර වෙනත් විකල්පයක් අපට දැනට නැත. අනාගතයේ යම් දිනයක කොවිඩ් මර්දනයට සාර්ථක එන්නතක් යොදාගත හැකි විට අපට වෙනත් විකල්ප හමුවනු ඇත. එතෙක් අප සියලු දෙනාම අපගේ ජීවන රටාවන් “නව සාමාන්‍ය” තත්ත්වයට අනුගත කරගත යුතුය. කොවිඩ් සමඟ ජීවත් වීමට පුරුදු පුහුණු විය යුතුය.
කොවිඩ් හේතුවෙන් මෙතෙක් සිදුකළ වෘත්තීන් අතහැර දැමීමට කැමැති කිසිවකුත් නැත. එදිනෙදා කුලී වැඩ කර දවසේ වියදම සොයාගන්නා කම්කරුවාගේ පටන් ඉහළම තානාන්තර දරණ ලොකු ලොක්කන්ට ද මේ නියමය අදාළය. එසේ නම් කළ යුත්තේ ඒ සඳහා හැඩගැසීමය. මූලික වශයෙන්ම රෝගය තමන්ට බෝකර ගැනීම වළක්වා ගැනීමට හැකි හැම පියවරම ගත යුතු වෙයි. රැකියාවට අදාළ කාර්යයන් ඉටුකිරීමේදී, ගමනේ බිමනේදී, විනෝදය විවේකය ලබාගැනීමේදී පමණක් නොව කන-බොන රටා ද කොවිඩ් කාලයට ගැලපෙන සේ සකස් කර ගත යුතුය. පළාතම හෝ තමන් සිටින ගම් පියස හෝ නගරය හෝ හුදෙකලා කරනු ලැබීමට එරෙහිව යාම පැත්තකට දමා හැකි ඉක්මනින් එම ප්‍රදේශය හුදෙකලා බවින් මුදාගැනීමට බලධාරීන්ට සහාය දැක්වීම වැදගත්ය. පළාත ඇරුණොත් තමන්ගේ හුරුපුරුදු රැකියාවට සහ වෙනත් වැඩ කටයුතුවල යෙදීමට අවස්ථාව උදාවන බවත් එසේ නොකර හිතුමතේ වැඩ කිරීමට ගොස් තමනුත් අමාරුවේ වැටී ගමේ නගරයේ සෙසු පිරිසක් අමාරුවේ දැමීමට කටයුතු කළොත් එම අවස්ථාව පවා මගඇරෙන බවත් සිහි තබාගැනීම අවශ්‍යය. පළාත හුදෙකලා කිරීමෙන් වළක්වා ගත හැක්කේ සිහිබුද්ධිය මෙහෙයවා කටයුතු කිරීමෙන් මිස ගනු ලබන සියලු තීන්දුවලට විරුද්ධව කටයුතු කිරීමෙන් නොවන බව වටහා ගැනීම වැදගත්ය. කොවිඩ් උවදුරෙන් රට මිදෙන දවස ඉක්මන් වෙන තරමට අපගේ එදිනෙදා වැඩ කටයුතු ද සාමාන්‍ය තත්ත්වයට පත්වීම ඉක්මන් වනු ඇත.
රජයේ, සෞඛ්‍ය ක්ෂේත්‍රයේ, හමුදාව ඇතුළු ආරක්ෂක අංශවල දොස් දැකීමෙන් මේ ගැටලු ජයගත නොහැක. ඔවුන් කටයුතු කරන්නේ ද මේ උවදුරින් හැකි ඉක්මනින් රට මුදාගැනීමට බව අමතක නොකළ යුතුය. ඔවුන් අතින් සිදුවන වැරදිවලට දොස් පැවරීම නොව අප සියලු දෙනා විසින් කළ යුත්තේ එක්ව සටන් කොට කොවිඩ් සතුරා පරාජය කිරීමට උදව් දීමය. ඒ හැර වෙනත් විකල්පයක් නැත.
