මේ වසංගතය අස්සෙත් සමහරු ගසාකනවා

ජාතික ජනබලවේගය පාර්ලිමේන්තු මන්ත්‍රී 
විජිත හේරත්

අපට දැන් කරන්න වෙලා තියෙන්නෙ කතාකරන එක විතරයි

කොවිඩ් දෙවැනි රැල්ල ආණ්ඩුව වරද්දගත්තා

රට ණය කන්දක හිරකළ අයවැයක්

සෙක්කුවෙ ගොනා මාරු කරනවා වගේ ආණ්ඩු මාරුකරන රටක් මේ

කොරෝනාව නිසා ආර්ථිකය වැටිල කියන එක පට්ටපල් බොරුවක්

මෙයාල සීනිවලට ගැසට් කීයක් ගැහුවද?

ආණ්ඩුව හොරු එක්ක ඩීල් දාලා

රටේ ජනතාවගේ එකම හයිය විපක්ෂය. අයාලේ යන ආණ්ඩුවක් වුණත් හරි මගට ගන්න පුළුවන් හරි විපක්ෂයකට. ඒත් වර්තමාන නිල හෝ නොනිල විපක්ෂය් හරිම ඇල්මැරුණු ස්වභාවයක් තියෙන්නේ. ඔබත් විපක්ෂයේ මන්ත්‍රීවරයෙක් මොකද මෙහෙම වෙලා තියෙන්නේ?

එක තමයි කොරෝනා තත්ත්වය නිසා ප්‍රබල ආණ්ඩු විරෝධී තීන්දු තීරණ ගන්න අමාරුයි. දැනට කරන්න තියෙන එකම දේ කතා කරන එක විතරයි. ආණ්ඩුවට එරෙහිව ජනතාව දැන් පෙළගැහිලා. ඒත් ඒක සංවිධානය කරන්න මේ කොරෝනා තත්ත්වය බාධාවක් වෙලා තියෙනවා. ඒ නිසා අපි මේ අසීරු කාල සීමාව ඇතුළේ උපරිම වශයෙන් විපක්ෂයේ කාර්ය ඉටුකරනවා.

හැබැයි අපි දැකලා තියෙන දෙයක් තමයි කෝවිඩ් වසංගතයත් එක්ක විපක්ෂය විසින් ආණ්ඩුවට නගන චෝදනා කිසිම පදනමක් නැති ඒවා. කිසිම තොරතුරක් දත්තයක් නැතිව ඔහේ ගහනවා. මේ හරහා විපක්ෂය හෑල්ලු වෙලා කියලා හිතෙන්නේ නැද්ද?

අනිත් අය දන්නේ නෑ. හැබැයි ජනතා විමුක්ති පෙරමුණ හරි එය නියෝජනය කරමින් පැමිණි ජාතික ජන බලවේගය හරි ආවට ගියාට, කටට ආවට චෝදනා කරන්නේ නෑ. යම් දූෂණයක් වංචාවක් ගැන අපි තොරතුරු කියනවා නම් යම් කරුණු සහ දත්ත සහිතවයි අපි ඒ ගැන කියන්නේ. ඔබ කියන කාරණා අනෙක් අයට අදාළයි.

ආණ්ඩුව විසින් ගෙන එන අය වැය අති බහුතරයකින් ජයග්‍රහණය කළා. විපක්ෂය විසින් මේ අයවැය ගැන රටේ නැති කතා කියනවා. ඒත් ඒ අඩුපාඩු මොනවද කියන එකවත් ජනතාව තවම දන්නේ නෑ. ඒ අඩුපාඩුව විපක්ෂයේ වරදක් නේද?

මේ අයවැයේ ආදායම් උපදවන යෝජනා කිසිවක් නෑ. තවත් රට ණය කන්දක හිරකරන අයවැයක්. තවත් බිලියන හයදාහක් මේ අවුරුද්දට ගන්න හදන්නේ. ඒ කියන්නේ රටේ මුළු ණය ප්‍රමාණය බිලියන 19000 ක් දක්වා වැඩිවෙනව. ජනතාවට කිසිම සහනයක් නෑ මේ අයවැයෙන්. අපි අපේ විරෝධය දැක්වූවා. ගම් මට්ටමට ගිහින් මේ අයවැයේ තියෙන මිත්‍යාව ගැන ජනතාව දැනුවත් කළා. ඉතිං ඒක තේරුම් ගන්න එක ජනතාවගේ පැත්තෙනුත් වගකීමක්.

ආණ්ඩුව කියන්නේ අයවැය හරහා ආනයනය සීමා කරලා දේශීය ගොවියා ශක්තිමත් කරන්න, දේශීය ව්‍යාපාරිකයා සිටුවන්න හදපු අයවැයක් කියලා. ඉතිං එහෙම අයවැයක් ජනතාවට හොඳ නැති වෙන්නේ කොහොමද?

ඕවා සුන්දර වචන. ආණ්ඩුව කිව්වනේ මේ කොරෝනා තත්ත්වය නිසා ආර්ථිකය වැටිලා කියලා. ඒක පට්ටපල් බොරුවක්. 2020 මුල් කාර්තුවේදී කෘෂිකර්මාන්තය 5.6% කින් වැටිලා. කර්මාන්ත ක්ෂේත්‍රය 7.8% කින් වැටිලා. සේවා ක්ෂේත්‍රය 1.5% වැටිලා. පළමු කාර්තුව කියන්නේ ජනවාරි මාර්තු කාර්තුව. රටට කොරෝනා ආවේ මාර්තු අග. රට වැහුවෙත් මාර්තු අග. ඒත් පළවෙනි කාර්තුවෙම රට වැටිලා. එහෙනම් කොහොමද කියන්නේ අපේ රටේ කෘෂිකර්මාන්තය නගා සිටුවනවා කියලා. ඒවා හුදු ප්‍රකාශ විතරයි. ඇත්ත ගත්තොත් ගොවියා අසරණ වෙලා ඉන්නේ. හාල්, පොල් වැඩිවෙලා. සීනිවලට ගැසට් කීයක් ගැහුවද? ඒ ගැසට්වලට ගන්න සීනි රටේ නෑ. මිනිස්සුන්ගේ ජීවන බර වැඩිවෙලා. ඉතිං අයවැයක් හොඳයි නම් එහෙම වෙනවද?

හැබැයි ආණ්ඩුවේ අය කියන්නේ මේ කොවිඩ් වසංගතය හමුවේ ලෝක ආර්ථිකය පවා කඩා වැටිලා තියෙන මොහොතක ලංකාවේ ආර්ථිකය හරි මේ වගේ තත්ත්වයක යන්නේ ඒ අයගේ දක්ෂතාවය නිසා කියලා?

ඒක අමූලික බොරුවක්නේ. දැන් මේ අය කිව්වා අපනයනය වැඩිවෙලා කියලා. ඒකත් පට්ටපල් බොරුවක්. එහෙම වෙලා නෑ. අපනයනය අඩුවෙලා. අඩුම තරමේ ආනයනත් අඩුවෙලා. ගිය අවුරුද්දට වඩා අපනයන, ආනයන පරතරය අඩුවෙලා. ඒකට හේතුව ලෝක වෙළඳ පොළේ තෙල් මිල අඩුවුණා. ඒ වගේම ලංකාවේ තෙල් ඉල්ලුමත් අඩුවුණා. ඒ වගේම ආනයනය අඩුකළා. ඒ නිසයි ඒ ආනයන, අපනයන පරතරය අඩුවුණේ. ගිය අවුරුද්දේ මාස අට ගත්තොත් අපනයනය වැඩියි. ඒත් මේ පාර අපනයනය අඩුවෙලා. කොරෝනා තත්ත්වය එන්න කලින් ඉඳලම මේ ප්‍රශ්නය ඇතිවෙලා තියෙන්නේ.

එතකොට මේ අයවැයේ කිසිම දෙයක් නැද්ද ජනතාවට සුබවාදී වැරදි විතරමද තියෙන්නේ?

මේ අයවැය කියන්නේ තවත් බිලියන 6000 ක් රට ණය කරන එකයි, සල්ලි අච්චු ගහන එකයි විතරයි. ඒ හැර වෙන මොනවත්ම නෑ. ඇත්තටම රටේ නිෂ්පාදනය වැඩි කරන්න කිසිම යෝජනාවක් මේ අ‍යවැයේ නෑ.

ඉතිං මෙච්චර දේවල් තියාගෙනද පාර්ලිමේන්තුව ඇතුළේ පක්ෂ විපක්ෂ අය පෞද්ගලික දේවල් කිය කියා රණ්ඩු වෙන්නේ. අනික විපක්ෂය පවා කාලය කා දමමින් පෞද්ගලික දේවල්, අතීත කතා කතාකළාම හරියනවද?

ඔය පත්වෙච්ච බහුතරයක් වල්පල් හෑලි දොඩවන අය. ඒ අය පත්කරල එවලා තියෙන්නේ රටේ ජනතාව. දැන් ඒ අයට බැණලා වැඩක් නෑ. රටේ ජනතාවනේ ඡන්දය දුන්නේ. හැබැයි අපි හැමවිටම හරි දේවල්, තොරතුරු දත්ත එක්ක කතා කරන්නේ. එහෙම නොවන අය ප්‍රධාන පක්ෂ දෙකේම ඉන්නවා. ඒ අය කුණුහරප, වල්පල් කතා කරන්නේ. ඒවා දැන් අහන්න වෙනවා. ඒ අය පත්කළ ජනතාව තමයි ඒකට වගකියන්න ඕන.

විශේෂයෙන් ආණ්ඩුව කෝවිඩ් වසංගතයත් එක්ක ජනතා සහන දුන්නා කියනවා. වසංගතය මර්දනය කරන්න කටයුතු කළා කියනවා. හැබැයි ඒ කිසිදෙයක් විපක්ෂය නොපෙනෙන බව ආණ්ඩුවේ අය කියනවා? විවේචන විතරයි තියෙන්නේ කියනවා?

මෙච්චර කෝවිඩ් වසංගතයක් තියෙද්දී අධිකරණ අමාත්‍යංශයේ ගොඩනැගිල්ල මාරු කරනවා. රුපියල් කෝටි 41 ඒකට යට කරනවා. මාසෙක බිල්ඩින් කුලිය එක්කෝටි හැත්තෑ ලක්ෂයක්. හැබැයි මිනිස්සු කන පොල්ගෙඩිය 110යි. හාල් කිලෝ එක 120-140යි. මිනිස්සුන්ට දෙන 5000න් ජීවත් වෙන්න බෑ. ඒක හැමෝටම හම්බවෙන්නෙත් නෑ. කොරෝනා නිසා ගොඩක් අයගේ රස්සා අහිමිවෙලා. සංචාරක ක්ෂේත්‍රයේ වැඩකළ අය ඔක්කොම අද ගෙවල්වල. එහෙම තත්ත්වයක් තියෙද්දී මේ වගේ දේවල් වෙනකොට ඒ ගැන විවේචනය නොකර ඉන්නද? ඒ අඩුපාඩු පෙන්නනන එක වැරදිද? ජනතාව කබලෙන් ලිපට වට්ටලා ආණ්ඩුව නාස්තිකාර වියදම් කරද්දී ඒ ගැන පෙන්නන එක වැරදිද? එහෙම පෙන්නන එක අපේ වගකීමක්.

මේ කෝවිඩ් වසංගතය ව්‍යාප්තිය සම්බන්ධයෙන් එක එක අය එක එක චෝදනා කරනවා. විපක්ෂය කියනවා ආණ්ඩුව වගකියන්න ඕනලු. ආණ්ඩුව කියනවා ජනතාව වගකියන්න ඕනලු. ඇත්තටම කවුද වගකියන්න ඕන?

සම්පූර්ණයෙන් ආණ්ඩුව වගකියන්න ඕන. ආණ්ඩුව අඩු තක්සේරුවට ගියා. ඒක හමුදාපතිවරයත් පිළිගත්තා. කොරෝනා මර්දනය අධි තක්සේරුවට ගියා කියලා. එ්කෙන් තමයි මේක හෑල්ලුවට ගත්තේ. ලෝකයෙන්ම දෙවැනි තැන කියලා. පුරාජේරු ගහලා ගන්න ඕන තීන්දු තීරණ නිසිවෙලාවේ ගත්තේ නැති නිසයි මේ දෙවැනි රැල්ල මෙහෙම වුණේ. මේක වගකීම ගන්න ඕන ආණ්ඩුව. මොකද පළවෙනි රුල්ල නිසිආකාරව පාලනය කළා. එතැනදී කිව්වා ආණ්ඩුවේ හැකියාව. හැබැයි වැරදෙද්දි මිනිස්සු ඇඟට චෝදනා දානවා. ඒත් අද වෙලා තියෙන දේට සම්පූර්ණයෙන් ආණ්ඩුව වගකියන්න ඕන.

ආණ්ඩුව කොරෝනා මර්දනය වෙනුවෙන් වැඩකරද්දී ඔබලා චෝදනා දානවා විතරනේ. මේකෙන් ආණ්ඩුව හම්බකරන් කනවා කියලා.

ඇත්තනේ. රට ඉඳන් එන අයගෙන් පවා දැන් ගසා කනවා. ආණ්ඩුවේ හිතවාදී ව්‍යාපාරිකයන් පිරිසකගේ ආදායම් මාර්ගය බවට කෝවිඩ් පත්වෙලා. රට ඉඳලා එන මනුස්සයෝ ඉතාම අමාරුවෙන් එන්නේ. ඒ එන අයගෙන් පීසීආර් එකේදී මුදල් ගසාකනවා. 8000 හේ ඒවා දෙකක්. හෝටලයේ නවතින්න 7500 ගානේ දවස් 14කට ගන්නවා. ඇන්ටිජන් සිද්ධියත් එහෙමයි. කොරෝනා අස්සේ මේක දැන් ජීවන මාර්ගයක් කරගෙන. ඒව කරන්නේ ආණ්ඩුව බලයට ගෙන්න උදව් කරපු කණ්ඩායමක්.

ඕවා කියද්දී ආණ්ඩුවෙන් කියන්නේ ඔබලගේ තියෙන කුහක අදහස් නිසයි එහෙම කියන්නේ කියලා?

වැරදි දේට වැරදි කීම හරිදේට හරි කීම කුහකකමක් වෙන්නේ කොහොමද? ඇත්ත කතා කරද්දී කුහකයි කියනවා. හැබැයි අපි හැමදාම ඇත්ත ඇති සැටියෙන් කතා කරනවා. ආණ්ඩුවෙ වැරදි හංගන් ඉන්නවා නම් අපි හොඳද. කිව්වොත් කුහකද?

ආණ්ඩුවේ 2/3 බහුතරයක් ඉන්නේ. ඔබලට තුන්දෙනයි ඉන්නේ. ඔය සටන කරන්න පුළුවන්ද? ආණ්ඩුවෙන් එන විරෝධය විශාලයි. ඒකට මුහුණ දෙන්න හැකියාවක් තියෙනවද?

අපි තුන්දෙනා ඒක කරලා පෙන්නලා තියෙනවා. ගෙවුණු පුංචි කාලය තුළ අපේ හඬ අවදිකරලා විශාල දෙයක් කළා. මේ රටෙ සමස්ත ජනතාව වෙනුවෙන් අපි උපරිමයෙන් මැදිහත් වෙලා කටයුතු කළා. අපි ඒ සියල්ල ප්‍රායෝගිකව ඔප්පු කරලා ඉවරයි. කාටවත් ඒක නැහැයි කියන්න බෑ. මේ රටේ විපක්ෂයේ කාර්ය අපි තුන්දෙනා ඉෂ්ට කරනවා.

ඒත් අපිට නම් පේන්නේ ආණ්ඩුවේ බහුතරය නිසා විපක්ෂය බයවෙලා ඉන්නේ වගේ?

ආණ්ඩුව ඔළුගෙඩි වලින් බහුතරේ හදාගෙන ඉන්නේ. අයවැය සම්මත කරගත්තෙත් ඒ ඔළුගෙඩි වලින්. හැබැයි ඒ ඔළුගෙඩි වලින් සම්මත කරගත්තට බහුතර ජනතාව තවම ඒක සම්මත කරලා නෑ. ඒක පිළි අරගෙන නෑ. ජනතාවට ලැබුණු දේකුත් නෑ. ඒ නිසා ඔළුගෙඩි වලිනුත් කටවල් වලිනුයි ආණ්ඩුව බහුතරය පෙන්නුවට ඇත්තටම වෙන්නේ ආණ්ඩුව දවසින් දවස පිරිහෙන එක. පසුගිය දවසේ වුණු මහර බන්ධනාගාර සිද්ධිය, කොමිසන් වලින් තමන්ගේ හිතවාදීන් නිදහස් කිරීම්, හිතවාදීන් නීති ක්ෂේත්‍රයට පත්කර ගැනීම් හරහා ජනතාවට එපාවෙලා ඉන්නේ. ඒ නිසා කොච්චර සද්දය දැම්මත් ආණ්ඩුව මිනිස්සුන්ගෙන් පිරිහිලා ඉවරයි.

ඔබල මොනවා කිව්වත් ජනතාව මේ ආණ්ඩුව පත්කරගත්තේ ඉස්සෙල්ලා ආණ්ඩුව ගැන කලකිරිලා. ජනතාවට ඕන වුණ ආණ්ඩුවයි මේ ගෙනත් තියෙන්නේ?

ඔව්. ඉඟුරු දීලා මිරිස් ගත්තා. ඕක තමයි හැමදාම කරන්නේ 48 ඉඳලා අවුරුදු පහෙන් පහට සෙක්කුවේ ගොනා මාරුකරපු එක කළේ. අන්තිමේ අමාරුවේ වැටිලා හූල්ල හූල්ල ඉන්නවා. මෙන්න මේ තට්ටු මාරු ක්‍රමය අවසන් වුණ දවසට තමයි ජනතාවට සහනයක්, නිදහස් ලැබෙන්නේ. එතකල් මේ දුක විඳින්නම වෙනවා.

ඉතිං මොන තර්ක ගෙනාවත් ඔබලා කියන අදහස මිනිස්සු අහගෙන හිටියත් ඒක පිළිඅරගෙන් ඔබලට බලය දෙන්නේ නෑනේ. ඒ ඇයි?

පිළිගන්නේ නැතුව නෙමෙයි පිළිගන්නවා. හැමදාම මිනිස්සුන්‍ට ජනතා විමුක්ති පෙරමුණ විශ්වාසයි. ඒත් ඡන්දයකදී මොකක් හෝ වාසියකට නැත්තන් පරම්පරාගත පුරුද්දකට අර පක්ෂ වලට ඡන්දය දෙනවා. හැබැයි ජනතාවට විශ්වාසම පක්ෂය ජනතා විමුක්ති පෙරමුණ.

සාමාන්‍යයෙන් බලය තියෙන තැනට මිනිස්සු එකතු වෙනව. ආණ්ඩුව ශක්තිමත්. විපක්ෂයේ අයත් ආණ්ඩුවට එකතු වෙනවා. ඉතිං එහෙම වෙලාවක තවදුරටත් ආණ්ඩුව එක්ක ඉස්සරහට සටන් කරමින් ඉස්සරහට යන්න හයියක් තියෙනවද?

ඔයිට වඩා බලයක් 2014 තිබ්බා. 162 ක් ඔවුන්ට තිබ්බා. අන්තිමට නතර වෙන්න වුණේ මැදමුලන ගෙදරින්. එදා ඒ පුම්බන් හිටිය සියලු පිම්බිලි ඇද වැටුණා. රනිල් මෛත්‍රී ආණ්ඩුවත් එහෙමයි. තුනෙන් දෙකේ බලයක් තිබුණා. අන්තිමේ පාර්ලිමේන්තුවටවත් එන්න බැරිවුණා. ඕවා තාවකාලිකයි. ජනතාව ඉක්මනින් වෙනස් වෙනවා. අපි ජනතාව ගැන විශ්වාසයි. අපිට පුළුවන් ඒ පෙළගැස්ම කරන්න.

ආණ්ඩුව කියන දෙයක් තමයි ගිය ආණ්ඩුවෙන් දේශපාලන පලිගැනීම් කළා කියලා. ඒ සියල්ල මෙහෙයවීම පිටිපස්සේ ඔබලා හිටියා කියලා?

අපි වංචා දූෂණවලට විරුද්ධව හැමදාව සෘජුව කටයුතු කළා. එදත් අපි ඒ වෙනුවෙන් උපරිමය මැදිහත් වුණා. අපි අල්ලස් කොමිෂන්වලට පැමිණිලි කළා, පොලීසිවලට පැමිණිලි කළා. උසාවි පවා ගියා. හැබැයි ආණ්ඩුව ඒ හොරු එක්ක ඩීල් දැම්මා. ඒ ඩීල් නිසා හොරු නිදහස් වෙනවා. හැබැයි අපි ඒ අරගලය එදත් කළා, අදත් කරනවා, අනාගතයෙත් කරනවා. ඒක නවත්තන්නේ නෑ. ජනතාව වෙනුවෙන් ඒ වගකීම ඉටු කරනවා. වැරදිකාරයෝ අල්ලගන්න බැරිවුණ එක පාලකයන්ගේ වැරුද්දක්.

හැබැයි අද ඒ චෝදනා බොරු කියලා විවිධ තැන්වල කතාවෙනවා තහවුරු කරනවා. මොකක්ද ඇත්ත?

අද  මොකක්ද වෙන්නේ කැළෑ කොමිෂන් දාලා හොරු සුද්ද කරගන්නවා.

ඇත්‍තටම ඒවා දේශපාලන පළිගැනීම් නෙමෙයිද?

හරි කියන්න පරීක්ෂණ සිදුකරපු සිද්ධි මේ රටේ වෙලා නැති හදපු සිද්ධිද? ඝාතන කිරීම්, වංචා, දූෂණ මේව වෙලා නැද්ද? එතකොට ඒ ගැන පරීක්ෂණ කළ එක වැරදිද? ඒ සම්බන්ධයෙන් ලබාගත් සාක්ෂි අධිකරණයට දීම වැරදිද? අධිකරණය ගත්ත තීන්දු අධිකරණය හරහා විසඳගත යුතුයි. හැබැයි මොන දේ කළත් ගිය ආණ්ඩුව හොරු සමඟ ඩීල් දැම්මා. ඒ නිසයි මේ තත්ත්වය වුණේ.

කෝවිඩ් වසංගතයත් සමඟ රට විශාල ප්‍රශ්න කන්දරාවක හිරවෙලා. ඔබ හිතන්නේ අනාගත ලංකාව මොනවගේ වෙයිද?

මේ යන ක්‍රමයට ගියොත් රටේ ආර්ථිකයත් ප්‍රපාතයට හැලෙනවා. මිනිස්සුන්ගේ ජීවිත ප්‍රපාතයට හැලෙනවා. මේ යන ගමන වෙනස් කරන්න ජනතාව ඒකරාශි වෙන්න ඕන පෙළගැහෙන්න ඕන. එහෙම වෙලා සංවිධානය වු‍ණොත් මේ රට බේරගන්නත් පුළුවන්. අනාගතය බේරගන්නත් පුළුවන්.

 ගයාන් ගාල්ලගේ