අයවැයෙන් වැඩ ගනිමු
ලබන 2021 වසර සඳහා ඉදිරිපත් කෙරුණු අයවැය පසුගිය බ්‍රහස්පතින්දා (10) තුනෙන් දෙකකට අධික බහුතරයකින් සම්මත කර ගැනීමට ආණ්ඩුව සමත් විය. මෙය ශ්‍රී ලංකා පොදුජන පෙරමුණු ආණ්ඩුවේ ප්‍රථම අයවැය වූ අතර එය මෙලෙස විශාල වැඩි ඡන්ද සංඛ්‍යාවකින් සම්මත කර ගැනීමට හැකිවීම රජයේ සුවිශේෂ ජයග්‍රහණයකි. එසේම එය රජයේ ශක්තිමත් බව සහ ස්ථාවරභාවය තවදුරටත් ඉහළ යැවීමටද නිසැකවම හේතුවෙයි. අයවැය සම්මත කර ගැනීම පහසුවෙන් සිදුකර ගැනීමේදී ආණ්ඩුව සාර්ථක වුවත් ඊළඟ පියවර වන අයවැයේ යෝජනා ක්‍රියාත්මක කිරීමේදීද එම සාර්ථකභාවය එලෙසම පවත්වාගෙන යාම ආණ්ඩුව ඉදිරියේ පවතින ප්‍රබල අභියෝගයක් බව සඳහන් කළ යුතුය.
අයවැයේ සඳහන් වන සංඛ්‍යාලේඛන සියල්ල කෙරෙහි රටේ සාමාන්‍ය ජනතාවගේ ලොකු උනන්දුවක් නැත. ඔවුන්ට අවශ්‍ය වන්නේ තමන් මෙතෙක් කල් භුක්ති විඳිමින් සිටි ආර්ථික සහන එලෙසම ලැබීමත් තවත් වැඩිපුර ලැබීම් තිබේ නම් ඒවාද ලබාගැනීමත් පමණි. රටේ ඉදිරි ගමන්මග ඉලක්ක කරමින් අයවැයක් ඉදිරිපත් කර ඇති බව ඔවුන් දැන සිටියද එහි සාර්ථක අසාර්ථකභාවය ඔවුන් මැන බලන්නේ තමන්ට ලැබෙන දේ තුළින් පමණි. ආණ්ඩු මොනවා කිව්වත් රටේ බහුතරයක් ජනතාවගේ බලාපොරොත්තු කෙටියෙන් දැක්විය හැක්කේ එලෙසටය.
එසේ නම් රජය ඉදිරියේ ඇත්තේ සුළුපටු අභියෝගයක් නොවන බව තේරුම් ගැනීම අපහසු නැත. ලබන වසර ආරම්භයේ පටන් රජය තම අයවැය යෝජනා ක්‍රියාත්මක කරමින් රටේ ආර්ථිකය නිවැරදි ගමන් මගකට යොමු කිරීමට උත්සාහ දැරිය යුතු වෙයි. එහිදී ජනතාවගේ සතුටට හේතුවන තීන්දු පමණක් ගැනීමට රජයට හැකියාවක් නැත. ඇතැම් රෝග සුවකර ගැනීමට තිත්ත කසාය පානය කිරීමද අවශ්‍ය වෙයි. රටේ දැන් පවතින ආර්ථික තත්ත්වය සහ ඊට වැළඳී තිබෙන අට අනූවක් රෝග තත්ත්වයන් නිවාරණයට නම් කොතරම් කසාය පෙවිය යුතුදැයි නිගමනයකට එළඹීමත් අපහසුය. මේ බව රටේ සාමාන්‍ය ජනතාවද නොදන්නවා නොවේ. එහෙත් අලුත් රජයකින් ඔවුන් අපේක්ෂා කරන දේ ඉතාම ඉහළ අගයක පවතින බවද අමතක නොකළ යුතුය. මේ දෙකොන ගැටගසා ගනිමින් අයවැය යෝජනා ක්‍රියාත්මක කළ හැකි නම් එය රජයේ ජයග්‍රහණයක් වනු ඇත.
මේ රටේ ජනතාවට වඩාත් හුරුපුරුදු වන්නේ ඉටුවන අයවැය පොරොන්දු වලට වඩා ඉටු නොවන පොරොන්දුය. පසුගිය දශක ගණනාවක් තිස්සේම ඔවුහු මේ කටුක යථාර්ථය අත්දකිමින් සිටිති. මෙතෙක් බලයට පත් කිසිදු ආණ්ඩුවක් අයවැය යෝජනා කිසිවක් ක්‍රියාත්මක කර නැතැයි අප කියන්නේ නැත. නිල්පාට, කොළ පාට ඇතැම් විට රතු-නිල් මේ ආණ්ඩු කොයිකත් රටට වැඩදායක අයවැය යෝජනා ඉදිරිපත් කර ඇති බවත් එයින් ඇතැම් ඒවා ඉතාම සාර්ථක ලෙස ක්‍රියාවේ යොදවා ඇති බවත් පැවසීමට අපි මැලි නොවෙමු. එසේ නොවන්නට අපේ රටට මේ වනවිට ලැබී තිබෙන සංවර්ධන ප්‍රතිලාභ එසේ පැවතීමට හැකියාවක් නැත. සුවිශාල ජලාශ, අධිවේගී මාර්ග, පාලම්, ප්‍රවාහන සේවා, විදුලිය හා බලශක්තිය වැනි බොහොමයක් අංශවලින් අප රට සෑහෙන තරම් ප්‍රගතියක් අත්කරගෙන තිබේ. පසුගිය දශක දෙක පමණ කාලය තුළදී අප රට තාක්ෂණික වශයෙන්ද ඉහළ ප්‍රගතියක් අත්කරගෙන තිබෙන බවද ඒ සඳහා ඒ කාලය තුළ බලයේ සිටි සෑම රජයකටම අයිතිය කිව හැකි බවද පවසමු.
අප රටට නිදහස ලැබී ගෙවී ගිය දශක හතක කාලය තුළදී විවිධ ආණ්ඩු මගින් ඉදිරිපත් කරන ලද අයවැය යෝජනාවලින් අඩුම තරමින් හරි අඩක් හෝ ඉටුකරගත හැකි වී නම් අපේ රට මේ වනවිට සුරපුරයකි. එසේ වී නම් අනපේක්ෂිතව සියලු දෙනාගේ හිස මත කඩාවැටුණු කොවිඩ් වෛරසය වැනි ව්‍යසනයකට වුවද මීට වඩා ඉදිරියෙන් සිටිමින් සාර්ථකව මුහුණ දීමට අපට හැකියාව ලැබීම නියතයකි. නමුත් බොහොමයක් දේශපාලනඥයන් රටේ උන්නතියට වඩා තමන්ගේ බඩගෝස්තරය සොයාගැනීමට නැඹුරැවීම හේතුවෙන් අපේ රටට ලැබිය යුතු සම්පත් බොහෝ ප්‍රමාණයක් අපතේ ගියේය. රටට අත්කර ගත හැකිව තිබූ ආර්ථික ජයග්‍රහණ ආර්ථික විනාශයන් බවට පත්විය. රටට විශාලම ආර්ථික බරක් වන අධික පාඩු ලබන රාජ්‍ය ආයතන බිහිවීම එහි අනිවාර්ය ප්‍රතිඵලයක් විය. අඩුම තරමින් ඉදිරියේදී හෝ එවැනි ජාතික ආර්ථිකයට දැරිය නොහැකි බරක් පටවන රාජ්‍ය ආයතන එම තත්ත්වයෙන් මුදා ගැනීමට පැහැදිලි වැඩපිළිවෙළක් තිබීම අවශ්‍යය. එවැනි යෝජනා අයවැයේ නොමැතිවීම අඩුපාඩුවක් බවද පෙන්වා දිය යුතුය.
අප මුලින්ම පැවසූ පරිදි අයවැය යෝජනාවල සංඛ්‍යාලේඛන සඳහන් වීම පමණක් ප්‍රමාණවත් නැත. ඒවා ප්‍රායෝගිකව ක්‍රියාත්මක කළ හැකි වැඩසටහන් බවට හරවාගත යුතුය. එය රජයේ වගකීමය. විපක්ෂයේ වගකීම වන්නේ සංඛ්‍යාලේඛන හෝ වෙනත් වැරදි හෝ අල්ලාගෙන රජයට එරෙහිව මඩ ගැසීම නොවේ. අයවැයේ යෝජනා ඉටුනොවනවා නම් ඒ බව හරවත් ලෙස සහ සාධක සහිතව පෙන්වා දීමය. එය හරියට කළ නොහැකි නම් අනාගතයේදී රජයක් පිහිටුවීමේ සිහිනයද අත්හැර ගැනීම වඩාත් සුදුසුය.
