එන්නතේ බලය
දැනට මාසයකට පෙර ශ්‍රී ලංකාව කොවිඩ් එන්නත ලබාගැනීම සම්බන්ධයෙන් සිටියේ දෙගිඩියාවකය. කොවිඩ් එන්නත මෙරටට ගෙන්වා ගැනීම හෝ නොමිලේ ලබාගැනීම සම්බන්ධයෙන් රජය නිශ්චිත තීන්දුවක සිටි බවක් පෙනුණේ නැත. වරින් වර සිදුකෙරුණු දේශපාලන කතා තුළ හැර එන්නත ගැන අදහස් දැක්වීමක් නොවීය. ඒ වෙනුවට කොවිඩ් වෛරසය “නැත්තට නැති කරන පැණි” වර්ග පිළිබඳ බොරු ෂෝක් කතා රට පුරා පැතිර ගියේය. අපේ රටට එන්නත නොලැබේද යන ගැටලුව රට තුළින්ම ප්‍රශ්න කෙරෙන විට එන්නත මෙරටට ගෙන්වා ගැනීමේ බලධාරියා වශයෙන් ජනාධිපති ජ්‍යෙෂ්ඨ උපදේශක ලලිත් වීරතුංග මහතා පත් කරනු ලැබීය. සියල්ල එතැනින් ඇරඹිණි.
කොවිඩ් එන්නත ලංකාවට ලබාගැනීම සඳහා ලලිත් වීරතුංග මහතාගේ ප්‍රධානත්වයෙන් ජනාධිපති කාර්ය සාධක බලකාය පත් කිරීමෙන් පසුව ගතවූ සති කිහිපය තුළදී එම ගැටලුවට පිළිතුරු ලැබී තිබේ. මෙරට ඇතැම් ජ්‍යෙෂ්ඨ දේශපාලනඥයන් පවා අපේ රටට කොවිඩ් එන්නත ලබාගැනීම පිළිබඳව සැක පහළ කරද්දී ප්‍රථම එන්නත් තොගය පසුගිය බ්‍රහස්පතින්දා (28) වන විට ශ්‍රී ලංකාවට ලැබිණි. බොහොමයක් ගැටලුවලට විසඳුම් බොරු පූච්චානම් කතාවලට සීමා වෙද්දී ලලිත් වීරතුංග මහතාගේ ප්‍රධානත්වයෙන් යුත් කමිටුව ඉහළ කාර්යක්ෂමතාවකින් කටයුතු කර ඇති බව එයින් පැහැදිලි වෙයි. දිනකට හමුවන කොවිඩ් ආසාදිතයන්ගේ සංඛ්‍යාව 700 ඉක්මවන තත්ත්වයක් තුළ මෙසේ රටට කොවිඩ් එන්නත ළඟාවීම පවා සැනසිලිදායක ආරංචියක් වීම ස්වභාවිකය.
මෙම එන්නත් තොගය ශ්‍රී ලංකාවට ලැබෙන්නේ ඉන්දීය රජයේ ප්‍රදානයක් වශයෙනි. එන්නත ලබාදීම පසුගිය සිකුරාදා (29)ම ආරම්භ විය. ලලිත් වීරතුංග මහතා ප්‍රකාශ කර ඇත්තේ කොවිඩ් මර්දන කටයුතුවල ඉදිරියෙන්ම සිටින සෞඛ්‍ය කාර්ය මණ්ඩලවලටත් (1,50,000ක්) හමුදාවේ සහ පොලීසියේ සිටින පිරිස්වලටත් (1,15,000ක්) එන්නත මුලින්ම ලබා දෙනු ඇති බවය. එන්නත් ලබාදීම සඳහා එවැනි ප්‍රමුඛතා ක්‍රමවේදයකට අනුව කටයුතු කිරීම හැම අතින්ම සුදුසුය. එම ප්‍රමුඛතා ලැයිස්තුවේ ඊළඟට සිටින පිරිස් සම්බන්ධයෙන් නිරන්තරයෙන් රට දැනුම්වත් කිරීම තුළින් ජනතාව තුළ මතුවිය හැකි සැක සංකා දුරු කළ හැකිවනු ඇත.
දැනට ශ්‍රී ලංකාවට කොවිඩ් මර්දන එන්නත ලැබෙනුයේ ප්‍රදානයක් වශයෙනි. එහෙත් මීට අමතරව එන්නත් මිලදී ගැනීම සඳහා රජය දැනටම ක්‍රියාමාර්ග ගෙන ඇති බවද සඳහන්ය. ඒ අනුව මෙරටට තවත් එන්නත් මිලියන තුනක් මිලට ගැනීම සඳහා අවශ්‍ය ඇනවුම් ඉන්දියාවට ලබා දී ඇති බවද වාර්තා වෙයි. අපට කොතරම් හදිසියක් තිබුණත් එන්නත් ගෙන්වාගත හැකිවනු ඇත්තේ ඒවා නිපදවන සමාගම්වල ඇති අලෙවිකරණ ප්‍රමුඛතාව අනුව පමණි. හැකි තරම් ඉක්මනට ශ්‍රී ලංකාව වැනි කුඩා රටවලටද එන්නත ගෙන්වා ගැනීමට හැකිවනු ඇතැයි යන්න අපගේ ප්‍රාර්ථනය වෙයි.
එන්නත්කරණය රට තුළ විධිමත් ලෙස ආරම්භ කිරීමෙන් පසුව රටේ ආර්ථිකය වර්ධනය කර ගැනීමට තිබෙන අවස්ථා පිළිබඳව රජය සිය අවධානය යොමු කිරීමද සිදුවිය යුතුය. ඒ සඳහා රජය මේ වන විට එක් පියවරක් වශයෙන් කටුනායක ගුවන් තොටුපොළ වාණිජ ගුවන්යානා සඳහා විවෘත කර තිබේ. ඒ හරහා සුළු වශයෙන් හෝ සංචාරකයන් මෙරටට පා තබනු දැකීම පවා භාග්‍යයකි. ඒ සමඟ කොවිඩ් වසංගතය හේතුවෙන් කඩාවැටී තිබෙන ආර්ථිකයේ වෙනත් වැදගත් ක්ෂේත්‍ර පිළිබඳ අවධානය යොමු කිරීමද අවශ්‍යය. සියල්ල සකස් කර ගැනීමට වසංගතය තුරන් වනතුරු බලා සිටියොත් අපට අනාගතයක් නැතිවනු ඇත.
ඉදිරි මාස කිහිපය තුළදී එන්නත් ගෙන්වා ගැනීමේ වෑයම සාර්ථක කර ගැනීමට අපට හැකි වුවහොත් මේ වසර අවසානය වන විට කොවිඩ් වසංගතය සෑහෙන දුරකට මර්දනය වී තිබෙනු ඇතැයි බලාපොරොත්තු තැබිය හැක. ඒ වන විට රටේ සෙසු අංශවල වර්ධනයක් ඇතිකර ගැනීමට රජයට හැකියාව ලැබුණොත් අනාගත ආර්ථික අභියෝග ජය ගැනීමට පොට පාදාගැනීම අපහසු නොවනු ඇත. අන්තර්ජාතික මූල්‍ය අරමුදල මගින් නිකුත් කර ඇති නවතම සංඛ්‍යාලේඛනවල දැක්වෙන පරිදි ලෝක ආර්ථිකය 2021 වසර අවසානය වන විට 5.5%ක වර්ධනයක් සහ 2022 වසර තුළදී 4.2%ක වර්ධනයක් අත්කර ගනු ඇත. එසේ වුවහොත් අපේ ආර්ථික බලාපොරොත්තු ඉටුකර ගැනීම සඳහා කල් තබාම සූදානම්ව සිටිය යුතුය. නැතහොත් රට තවදුරටත් අමාරුවේ වැටෙනු ඇත.
අප රටට පමණක් නොව ලොවේ බලවත් රටවල්වලට වුවද එන්නත්කරණය හරහා කොවිඩ් වසංගතය පිටුදැකීම පහසුවෙන් ජයගත හැකි අභියෝගයක් නොවේ. එය සාර්ථක කර ගැනීම සඳහා සියලු පාර්ශ්වවල සහාය ලබාගැනීම අවශ්‍යම වෙයි. ජනගහණය අධික රටවල එන්නත් විදීමේ කාර්යය ඉටුකිරීම පහසු වන්නේ නැත. එවැනි රටවලට අවශ්‍ය එන්නත් තොගය ප්‍රමාණයෙන් ඉතාම විශාල බැවින් ඔවුන් තම ඇනවුම් කල් තබාම බාරදී තිබෙනවා විය හැකිය. මුදල් තිබේ නම් එය පහසුවෙන්ම කළ හැකි දෙයකි. එහෙත් ශ්‍රී ලංකාවට එවැන්නක් පහසු නැත. කලින්ම ඉදිරිපත් වි ඇනවුම් ලබාගැනීමට සුදුසු ආර්ථිකයක් රටට නොතිබීම ඊට බලපෑ ප්‍රධානම සාධකයයි. එහෙත් අසල්වැසි ඉන්දියාව “ඔක්ස්ෆර්ඩ් ඇස්ට්‍රාසෙනෙකා කොවිෆීල්ඩ්” එන්නත නිපදවන රටක් බැවින් වරින් වර එරටින් එන්නත් ගෙන්වා ගැනීමට සුදුසු වැඩපිළිවෙළක් දැන් සිටම සැලසුම් කිරීම අවශ්‍යය. හැමදාම ඉන්දියාව අපට එන්නත් නිකම් ලබා දෙන්නේ නැත. ඔවුන්ට එසේ කිරීමට හැකියාවක් ද නැත. චීන රජයෙන්ද එන්නත් ලක්ෂ තුනක් මෙරටට නොමිලයේ ලැබෙන බව කියා තිබේ. ඒ ගැනද අවධානය දක්වනු වටී.
කෙසේ වෙතත් අපේ රටට අවශ්‍ය වන එන්නත් ප්‍රමාණය කොතරම්දැයි යන්න මේ වන විට සෞඛ්‍ය අංශ මගින් තීරණය කර අවසන් යැයි අපි අදහස් කරමු. එම ප්‍රමාණය එකවරම නැතත් අවශ්‍ය පරිදි ගෙන්වා ගැනීමට ප්‍රමුඛත්වය ලබාදීම අවශ්‍යය. හැකි ඉක්මනින් කොවිඩ් වසංගතය පාලනය කිරීම අංක එකේ අවශ්‍යතාව බැවිනි.
