අපි ජාතිවාදී වුණා නම් ඔය පල්ලි නැහැ

බොදු බල සේනා සංවිධානයේ මහලේකම් ගලගොඩඅත්තේ ඥානසාර හිමි

• අපි ගැන දීපු නිර්දේශ ප්‍රතික්ෂේප කරනවා
• අපිව තහනම් කරන්නේ මොනවා කළාටද?
• හැම පාලනයක් යටතේම ඉස්ලාම් අන්තවාදය වැඩි වුණා
• හැම කාලයකදිම මේ රටේ බෝම්බ පිපිරුණා
• ජාත්‍යන්තරයට යාම අහක ඉන්න නයි ඇඟට දාගැනීමක්
• අවි ආයුධ අවි පුහුණුව ලැබුණේ කොහෙන්ද? ඒවාට උත්තර නෑ

හාමුදුරුවනේ.. මොකද මේ වෙන්නෙ?

කියන්න තියෙන්නෙ කොහෙද යන්නෙ මල්ලෙ පොල් උත්තර තමයි අපිට දැන් ලැබිලා තියෙන්නෙ.

ඒ කියන්නෙ මෙතනින් පස්සෙ ගලගොඩඅත්තේ ඥානසාර හිමි කියන ස්වාමින් වහන්සේත් උන්වහන්සේගෙ වැඩපිළිවෙළත් ඉවරද?

මම හිතන්නෙ දැන් තමයි අපිට වගකීම වැඩිම තැන එන්නෙ. අපි අවුරුදු 15ක් තිස්සෙ රටට තිබ්බ ආදරයත් ජාත්‍යාලයත් ආගමික ආලයත් නිසා මේ රටේ සිදුවෙන අන්තවාදයත් කල්ලිවාදයත් නොවලහා ඉදිරිපත් කළා. අන්න ඒ නිසා තමයි අපිට පුළුවන් වුණේ රටේ මිනිස්සුන්ට ඒත්තු ගන්වන්න මේ රටේ ප්‍රශ්නයක් තියෙනවා කියලා. අපි 2013 තමයි කිව්වෙ සහරාන් කියලා පුද්ගලයෙක් ඉන්නවා කාත්තන්කුඩියෙ. අන්න ඒ පුද්ගලයා සුහී මුස්ලිම්වරුන්ගේ සොහොන් කඩනවා. වළලපු අයගේ මිනී ගොඩදාලා පුළුස්සා දානවා. කඩු කිනිසි අරන් සැරිසරනවා. ඒ නිසා ඒ පුද්ගලයො වහාම අත්අඩංගුවට ගන්න කියලා. ඒ වගේම සිබ්ලි ෆාරුක් සහ අබ්දුල් රහුමාන් කියන දෙන්නා සහරාන්ව රටෙන් පන්නන්න හදනවා කියලත් අපි කිව්වා. අන්න එදා අපි කිව්ව දේ අපේ ඇත්තො කන්දීමක් කළා නම් ඔය පාස්කු ප්‍රහාරය ගැන කතා කරන්න වෙන්නෙ නෑ. 

හැබැයි මේ යන විදියට නම් ඉදිරියෙ වැඩ කරන්න හම්බවෙන්නෙ නෑ නේද?

අපිට තියෙන කනගාටුව තමයි අපි විශාල අනාවරණ රුසක් පාපන්දු පහර කනවා වගේ බැට කකා අනාවරණය කරලත් අවසානයේ අපිටම අධිකරණයේ නඩු පවරන්න කියලා යෝජනා කරලා තියෙනවා. මම අහන්නෙ අපි කරපු වරද මොකක්ද? ඒක අහස පොළොව නුහුලන කතාවක්. 

හැබැයි එතන තියෙන්නෙ ඔබවහන්සේලා තමයි මේ ජාතිවාදය ඇතුළු ප්‍රශ්න රුසකට මූලිකත්වය වුණේ කියලා?

මෙහෙමනෙ. අපේ රටේ ආදි කාලෙ ඉඳන් තියෙනවා වචන දෙකක් ජාතිවාදය සහ ආගම්වාදය කියලා. නමුත් අපේ රටේ නායකයොත් හැමෝම දැනගන්න ඕන දෙයක් තමයි මේ රටේ ජාතිවාදය කියලා දෙයක් තියෙනවද කියලා. අපි කියනවද කොහෙ හරි තැනක මේ රටේ 70%ක් ඉන්නෙ බෞද්ධයො. වැඩිපුරම තියෙන්නෙ පන්සල්. ඒ නිසා බුද්ධාගමට අවනත වෙන්න ඕනෙ කියලා. අන්න එහෙම කියනවා නම් ඒ තමයි ආගම්වාදය. හැබැයි මේ රටේ ක්‍රිස්තියානි ඇතුළු අන්‍යාගමීකරණය ඉතා විශාල තැනක තියෙනවා. අපිව ඒවා දැකලා සද්ද වහලා ඉන්නවා. අන්න ඒවා තමයි ආගම්වාදය කියන්නෙ. අපි කවදාවත් ඒවට ගහලා නෑ. ඒ නිසා ආගම්වාදයවත් ජාතිවාදයවත් කියන එක හරියට විග්‍රහ කරගන්න බැරුව මේ මහා සමාජයට චෝදනා දාන එක වැරදියි. බටහිර කඳවුරු චින්තනයෙන් පොහොසත් වෙච්ච වැරදි ආකල්පයක්. මතක තියාගන්න අපි ජාතිවාදී වුණා නම් ඔය පල්ලි තියෙන්න විදිහක් නෑ. 

ඒ කියන්නෙ මේ රටේ ජාතිවාදයක් ඇත්තෙම නැද්ද?

ජාතිවාදය තියෙන්නෙ කාත්තන්කුඩියෙ. සිංහලයෙක්ට යන්න බෑ. ව්‍යාපාරයක් කරන්න දෙන්නෙ නෑ මිනිහෙක්ට. එල්.ටී.ටීයත් ජාතිවාදය ගෙනාවා. සිංහල මිනිහෙක්ට යාපනයෙ ඉන්න දුන්නෙ නෑ. හැබැයි දකුණෙ මිනිස්සු කොයි වෙලාවෙවත් කියලා තියෙනවද දෙමළ මිනිහා යාපනේට යන්න ඕනෙ. මුස්ලිම් මිනිහා නැගෙනහිරට යන්න ඕනෙ කියලා. ඒ නිසා ප්‍රශ්න දිහා වැරදි කෝණයකින් බැලුවාම ලැබෙන උත්තර වැරදියි. ඒ නිසා මේ කොමිසමේ සාමාජිකයන් ප්‍රශ්නෙ තේරුම් අරගෙන තියෙන්නෙ වැරදියට. ඒ නිසා උත්තර දීලා තියෙන්නෙ වැරදියට. 

එතකොට කොමිසමේ වගකීමක් නැද්ද ජාතිවාදය ගැන හොයන එක?

හිටපු ජනාධිපතිතුමා මේක පත් කළේ පාස්කු ප්‍රහාරය ගැන හොයලා ඒකට සම්බන්ධ පුද්ගලයො කවුද? ඒකට සම්බන්ධ කවුරු හරි අය ඉන්නවා නම්, ඒවාට වගකිව යුතු අය ඉන්නවා නම් ඒ ගැන අනාවරණය කර ගන්න. 

හරි. ඔබවහන්සේ ඉස්සෙල්ලාම කියන්නකො කොමිසමෙන් ඔබවහන්සේගෙ සංවිධානය සම්බන්ධයෙන් දීලා තියෙන නිර්දේශ පිළිගන්නවද නැද්ද කියලා?

සම්පූර්ණයෙන් ප්‍රතික්ෂේප කරනවා. 

දැන් බොදුබල සේනා සංවිධානයට විරුද්ධව අධිකරණ ක්‍රියාමාර්ග ගන්න කියලා නිර්දේශ කරලා තියෙනවා. දැන් ඔබවහන්සේගෙ සංවිධානයෙන් මොකක්ද ඒ වෙනුවෙන් ගන්න පියවර?

මම නම් කිසිම පියවරක් ගන්නෙ නෑ. හරි නම් අපි ජීවත්වෙලා ඉන්නකොට රත්තරන් පිළිරුවක් හදන්න ඕනෙ අපි මේවා අනාවරණය කළාට. මතක තියාගන්න මේ දේවල්වලට නිදහසෙන් පස්සෙ මේ රට පාලනය කරපු සෑම පාලකයෙක්ම වගකිව යුතුයි. ඔය සෑම පාලකයෙක්ම ඉන්නකොට උන්මත්තක ඉස්ලාම් අන්තවාදය දවසින් දවස වැඩි වුණා. හැබැයි අවාසනාවට මෛත්‍රීපාල සිරිසේන මහත්තයගෙ කාලෙ පිපිරිලා ගියා. කෙසේ වෙතත් අපි නම් උසාවි ගාණෙ යන්නෙ නෑ. මොකද අධිකරණයේ ඉන්න අය මොනවද ඉස්ලාම් මුස්ලිම් අන්තවාදය ගැන දන්නෙ. ඒ අය මොනවද කියවලා තියෙන්නෙ. ඒ නිසා මේක අධිකරණ ප්‍රශ්නයක් නෙමෙයි. මෙතන තියෙන්නෙ ආගමික ප්‍රශ්නයක්. ඒ නිසා ආගමික ප්‍රශ්නෙ විසඳන්න ඕනෙ.

ඔබවහන්සේ කියන්නෙ මෛත්‍රීපාල මහත්තයා මේකට වගකියන්න ඕනෙ නෑ?

තොරතුරු ලැබිලා තියෙද්දිත් ඒවා වළක්වාගන්න පියවර නොගැනීම ගැන ප්‍රශ්නයක් තියෙනවා. ඒත් මේ රටේ හැම පාලකයාම පාලනය කරපු කාලෙ රට ඇතුළෙ බෝම්බ පිපිරිලා තියෙනවා. 

ඔබවහන්සේ ඉස්සෙල්ලා කිව්ව ආගමික ප්‍රශ්නය විසඳන්න මොකක්ද කළ යුත්තේ?

මේ ප්‍රශ්නෙ විසඳන්න ඉතාම ඉහළ ප්‍රබුද්ධ දේශපාලන මැදිහත්වීමකින් තොර ආගමික කියවීම් ඇති කණ්ඩායමකින් යුත් මණ්ඩලයක් පත් කරන්න ඕනෙ. මේ රටේ විතරක් නෙමෙයිනෙ මේ ප්‍රශ්නෙ තියෙන්නෙ. ලෝකයේ හැම රටකම විශේෂයෙන් යුරෝපයේ මේ ප්‍රශ්නෙ තියෙනවා. ඉන්දියාවෙ අමෙරිකාවෙත් තියෙනවා. ඒ රටවල්වල තියෙන අන්තවාදී ඉස්ලාමීය ආගමික මතවාද අපේ රටෙත් පැළපදියම් වෙලා තියෙනවා. හැබැයි මේ රටේ කිසිම කෙනෙක් මේ දේට එරෙහිව සංවිධානයක් හරි කණ්ඩායමක් හරි හදාගෙන නෑ. නමුත් බොදුබල සේනා සංවිධානය දැකලා ඊට එරෙහිව සංවිධානය වුණා. 

ගොඩක් අය කියනවා මේකෙන් දඬුවම් දිය යුතු පුද්ගලයන්ට දඬුවම් දීලා නෑ කියලා?

ඒක ඇත්තනෙ. මම කරපු කතා දෙකකට අයි.සී.සී.පී.ආර්. පනත යටතේ නඩු දාන්න පුළුවන්ද කියලා නීතිපතිගෙන් කරුණු විමසන්න තීරණය කරලා තියෙනවා. හැබැයි අබ්දුල් රාසික් කියන පුද්ගලයා බුදු හාමුදුරුවො මිනී මස් කෑවය, ත්‍රිවිධ රත්නය කියන්නෙ මැණික් ගල් තුනක්ය කියලා කිව්වා ඔහුට විරුද්ධව අපරාධ චෝදනා නෑ. අපිව තහනම් කරන්න කියන්නෙ අපි මොනවා කරලද? අපි එක ගල් කැටයක් ගහලා තියෙනවද? ඒ නිසා දැන්වත් පිස්සු නටන්නෙ නැතුව හරි දේ කරමු.

මේ කොමිසමේ ක්‍රියාත්මක කරන්න ඕන නිර්දේශ තියෙනවද?

ඔව්. සමහර නිර්දේශ ඉතාම සාර්ථක නිර්දේශ. ඒවා ක්‍රියාත්මක කරන්න ඕනෙ. එහෙම නැතුව අදාළ පුද්ගලයන්, අදාළ වැරදිකරුවන් හොයන්න ආපු කොමිසමට වෙලා තියෙන්නෙ වෙන දෙයක්නෙ. එතකොට බොදුබල සේනාව ගැන හොයන්න පත් කළේ නෑනෙ මේ කොමිසම. අපි ගැන හොයන්න ඕනෙ නම් වෙනම කොමිසමක් පත් කරන්න. බොදුබල සේනා නම් පිහිටුවලා තියෙන්නෙ මේ මෑතක. හැබැයි සමහර මුස්ලිම් අන්තවාදී සංවිධාන අපි පිහිටුවන්නත් කලින් පිහිටුවපුවා. 

ශ්‍රීලනිපය කියනවා සහරාන්ලට මුදල් හමුවුණු හැටි, මේ ප්‍රහාරයට මුදල් යොදවපු හැටි ගැන  කිසිම හෙළිදරව් කිරීමක් නෑ. හැබැයි බොදුබල සේනා සංවිධානය විතරක් තහනම් කරලා කියලා?

ඇත්තනෙ. ඒ මුදල් ආවෙ කොහෙන්ද? අවි ආයුධ ලැබුණෙ කොහෙන්ද? මේ අයට අවි පුහුණුව ලැබුණෙ කොහෙන්ද? මේ කිසි දෙයක් ගැන තොරතුරක් නෑ. අයි.එස්. සංවිධානය සමඟ සබඳතා තිබ්බ මිනිහත් දැන් නිදහස් වෙලා ගිහිල්ලා. මතක තියාගන්න ඔය ඉස්ලාම් අන්තවාදී සංවිධාන බහුතරයක් ආරම්භ කරලා තියෙන්නෙ එක්කො සමාජ සේවා ආයතන, නැත්නම් ලේ දන්දීමේ කඳවුරු, මද්‍රසා පාසල් වගේ දේවල් නිසා. ඒ නිසා ඒවයි හොයන්න ඕනෙ. 

එක සාක්ෂියක් තියෙනවා නේද ඔබවහන්සේ නිසා තමයි සහරාන් මේ පිපිරීම් සිදුකර ගත්තෙ කියලා. ඒක ඇත්තක්ද?

මම ඒක බැලුවා. සහරාන් එක තැනක විතරක් නෙමෙයි කඳවුරු ගණනාවකම සිදු කළ දේශනවලදි මට බැණලා තියෙනවා. එක තැනකදි කියනවා ඥානසාර යක්ෂයා කියලා. ඇයි මට යක්ෂයා කියන්නෙ. ඒකට හේතුව තමයි එයාලගෙ ඉගැන්වීම්, එයාලගෙ අන්තවාදී ආකල්ප මම අනාවරණය කළා. ඒ නිසා ඒගොල්ලන්ට තර්ජනයක්. අනික මේ ප්‍රහාරය එනකොට මම හිටියෙ හිරේ. ඒක නොදැන සහරාන් හිතලා තියෙනවා අබ්දුල් රාසික් ඇතුළට ගන්නයි ඥානසාර එළියෙ ඉන්නයි හේතුව ඇයි කියලා. ඒ වෙනකොටත් දන්නෙ නෑ මිනිහා මම ඇතුළෙ කියලා. මතක තියාගන්න සහරාන්ට නායකයෙක් නෑ. සහරාන්ට තියෙන්නෙ අන්තවාදී ආගමක්. 

දැන් ඕවා කොමිසමට ලබා දුන්නෙ නැද්ද ඔබවහන්සේ?

අනේ මම දුන්නා. මට මේ කොමිසම් වාර්තාව කියවද්දි හිතුණා මගෙන් මේ සම්බන්ධව ඇවිල්ලා තොරතුරු ගත්තා නම් මම හරියට වාර්තාව දෙනවා කියලා. මට මේ වැඩේ කරන්න තිබ්බා තනියම. 

ඉතින් ඔබවහන්සේ කිව්වනෙ එන්න මා ගාවට මම විස්තර දෙන්නම් කියලා. කවුරුත් ඇවිල්ලා විස්තර ගත්තෙ නැද්ද?

ඉතින් හැමදාම කටඋත්තර ගන්න එක විතරනෙ කළේ. මම 2013 දී මේවා හෙළි කරද්දී කාදිනල්ට පවා ගිහිල්ලා කිව්වා ලොකු අනතුරක් ළඟ ළඟ තියෙනවා. කතෝලිකයන්ට ප්‍රහාරයක් එල්ල වෙන්න පුළුවන් කියලා. ඒ කිව්වෙ ඔය මීගමුවේ සූඩානෙන් එහෙන් මෙහෙන් ගෙනල්ලා පදිංචි කිරීමත් එක්ක. මම ඒ වෙලාවෙ කිව්වා පෑලියගොඩ ඉඳලා මීගමුවට වෙනකම් වීසම්වල පියතුමාලා සම්බන්ධ කරලා දෙන්න කියලා මේ ගැන දැනුවත් කරන්න. නමුත් කරමුයි කියලා කිව්වා ඒත් වුණේ නෑ. 

පෞද්ගලිකව හෝ මේ ගැන දේශපාලන අධිකාරිය දැනුවත් කළේ නැද්ද?

නැත්තම්. කොච්චර කියලා තියෙනවද?

නම් ගම් සඳහන් කරන්න පුළුවන්ද?

උදාහරණයක් හැටියට හලාල් සිද්ධිය වෙලාවෙ එවකට ජනාධිපති මහින්ද රාජපක්ෂ මහත්මයා හම්බවෙලා දැනුවත් කළා. ඒ වගේම මෛත්‍රීපාල සිරිසේන මහත්තයත් අපි දැනුවත් කරලා තියෙනවා. තේරීම් කාරක සභාවලත් තොරතුරු දුන්නා. හැබැයි එක දෙයක් කියන්න ඕනෙ. මේ කාටත් රට ජාතිය ගැන කැක්කුමක් නෑ. මේ හැමෝටම ඕනෙ දේශපාලනය කරගෙන යන්න විතරයි. මොකද දේශපාලනඥයො හැම වෙලාවෙම තීන්දුවක් ගන්නෙ ඊළඟ ඡන්දෙ ගැන බලලා. අපිට කොච්චර අපහාස කළාද එක එක කතා කියලා. 

මේ ආගමික අන්තවාදය විසඳන්න මේ රටේ ආගමික අමාත්‍යාංශයට පුළුවන්නෙ?

ඒක තමයි අපි කියන්නෙ. ඒ අය හැමෝටම ඕනෙ දේශපාලනය කරන්න විතරයි. ඒ අයට අවශ්‍යතාවයක් නෑ මේ ප්‍රශ්නෙ විසඳන්න. මතක තියාගන්න අද බොකෝ හරාම්, අයි.එස්., තලෙයිබාන්, අල්කයිඩා වගේ සංවිධාන තිබුණට හෙට වෙනකොට ඒවා වෙනස් වෙනවා. අද මේ ඉස්ලාම් අන්තවාදය වෙනස් කළ යුතුයි කියලා හිතන සාම්ප්‍රදායික මුස්ලිම්වරුන්ට පවා බලයක් නැතිවෙලා තියෙනවා. 

මේ ප්‍රහාරය සම්බන්ධව සාධාරණය ඉෂ්ඨ කරගන්න කාදිනල්තුමා ජාත්‍යන්තරයට යනවා කියලා තියෙනවා. ඒ වගේම ඔබවහන්සේටත් පහුගිය දවසක දැඩි විවේචනයක් කාදිනල්තුමා එල්ල කළා. මොකක්ද මේ ප්‍රශ්නෙ?

කාදිනල්තුමාට අපේ ඉතාම හොඳ ගෞරවයක් තියෙනවා. හැබැයි එතුමාගේ සමහර ප්‍රකාශ සම්බන්ධයෙන් අපිට කැමැත්තක් නෑ. ලෝකෙ ගත්තොත් වඩාත්ම ප්‍රබලම සංවිධාන ශක්තිය තියෙන්නෙ පල්ලිවල. අනික බටහිර රටවල මේ ඉස්ලාම් අන්තවාදය ගැන කරලා තියෙන පර්යේෂණ බැලුවාම අපිට හිතාගන්නවත් බෑ. සිද්ධිය වුණාට පස්සෙ අඬලා තේරුමක් නෑ. ඒ සිද්ධිය වෙන්න කලින් සාකච්ඡා ඇතිකිරීම සම්බන්ධයෙන් යුතුකමක් තිබ්බා. එහෙම නැතුව දැන් ජාත්‍යන්තරයට ගිහිල්ලා අහක ඉන්න නයි මේක ඇතුළට දාගන්න ඕනෙ නෑ. හැබැයි මම එක දෙයක් පිළිගන්නවා වර්තමාන ආණ්ඩුවෙ මැති ඇමැතිවරු ගැන දන්නෙ නෑ. ජනාධිපතිවරයා මේ අන්තවාදය ගැන දැනුවත්. ඒ නිසා එතුමාව බිත්තියට හේත්තු කරන්නෙ නැතුව මේ ප්‍රශ්නය විසඳගන්න පුළුවන්. 

මේ වෙනකොට කළු ඉරිදාවකුත් කතෝලික සභාවෙන් නම් කරලා තියෙන්නෙ?

මුස්ලිම් අන්තවාදය කොහොමද වෙන්නෙ, කොහොමද හැදෙන්නෙ, මේ අන්තවාදී ආකල්ප ගැන හොඳ අධ්‍යනයකට එන තාක් ආණ්ඩු විරෝධී වැඩ කළාට කිසිම තේරුමක් නෑ. ඒවා පුහු වැඩ.

එහෙනම් කළ යුත්තේ මොකද්ද?

මේ රට ඇතුළෙ ඉන්නවා විශාල සංඛ්‍යාවක් ඉස්ලාමීය අන්තවාදී අධ්‍යාපනයෙන් ඔළුව හදාගත්ත අය. මේක මේ අද ඊයෙ වෙච්ච දෙයක් නෙමේ. අවුරුදු 25ක 30ක ඉඳන් එන මතවාදයක්. ඒ නිසා මුළු මහත් සමාජයම තියෙන්නෙ අවදානමක. ඔය මුස්ලිම් සමාජයේ නොමඟ ගිය අය පුනරුත්ථාපනය කරන එක වැදගත්. එහෙම නැතුව මේ විරෝධය පාන්නෙ කාටද? මෙන්න මේ කෑල්ල පත්තරේ දාන්න. මා ගාව පොතක් තියෙනවා හෙළ ලෝ සත්‍ය ආගම කියලා. ඒකෙ තියෙනවා පොඩි කෑල්ලක් අල්ලාගේ දිව්‍යමය ඉස්ලාමීය මූලික පණිවිඩය යන්නෙ මුළු මිනිස් සංහතියම ඔහුට අවනත විය යුතු බවය. ඔවුන් අණට කීකරු විය යුතු බවය. ඔහු දුන් අවවාද අනුශාසනා පිළිගෙන ජීවත් විය යුතු බවය. මේ වගේ දිගට තියෙනවා. දැන් හිතන්න මේ වගේ එකක් කියවලා වඩා දෙවියන්ට හිතවාදී වෙන්න ඕන කියලා හිතන තරුණයෙක් අල්ලාට අවනත නොවන කෙනෙක් ඝාතනය කරන්න හිතෙන්නෙ නැද්ද? දැන් එහෙම හිතෙන තරුණයෙක්ගෙ කවුද නායකයා. මේ අන්තවාදී ආගමික ඉගැන්වීම් විතරයි නේද? 

අවසාන වශයෙන් අහන්නෙ මෙතැනින් පස්සෙ බොදුබල සේනාව අවසන් වෙයිද? 

මෙහෙමනෙ. පාරමිතා පුරන කෙනෙක්ට එහෙම හිතෙන්නෙ නෑ. අපි මේ පාරමිතා පුරන්නෙ ජාති ආගම් වෙනුවෙන්. අපිට ඒ නිසා මොන අප්‍රසාද ආවත් අපි රටත් ජාතියත් වෙනුවෙන් පෙනී ඉන්නවා. මතක තියාගන්න නීති උසාවි ගියා කියලා මේ ප්‍රශ්නෙට පිළිතුරක් හොයන්න බෑ. මොකද මේක ආගමික ප්‍රශ්නයක්. 

 ගයාන් ගාල්ලගේ