විස පොල්තෙල් සැකය දුරුකළ යුතුයි
අපේ රටට එක එක ව්‍යාධි වරින්වර වැළඳෙයි. ආහාර වර්ග සම්බන්ධයෙන්ද එහි වෙනසක් නැත. වරක් රටින් ගෙනා ටින් මාළුවල පණුවන් සිටි බව වාර්තා විය. එය ගෙන්වූ කෙනෙකු හෝ ඒ සම්බන්ධව සිදුකෙරුණු විමර්ශනවල වාර්තාවලට කුමක් සිදුවීදැයි කිසිවෙක් නොදනිති. යාන්තමට දැනගන්නට ලැබුණේ පණුවන් සහිත ටින්මාළු තොගය ආපසු යැවූ බව පමණි. එහි වැරදිකරුවකු අද දක්වාද නැත. සමහරවිට ඒ තැනැත්තාගේ කොම්පැණිය වෙනත් නමකින් ටින්මාළු ගෙන්වා බෙදාහරිනවාදැයි අපි නොදනිමු.
අපට මේ තොරතුරු මතකයට ආවේ පිළිකා කාරක පොල්තෙල් තොගයක් මෙරටට පැමිණ ඇති බවට පළවන වාර්තා දැකීමෙනි. මෙවැනි පොල්තෙල් තොගයක් රටට ගෙන්වා ඇති බවට පසුගිය දිනවල රාවයක් පැවති අතර ඒ පිළිබඳ මාධ්‍ය සාකච්ඡාවක් පැවැත්වීමෙන් පසුව මේ ගැටලුව පාර්ලිමේන්තුව දක්වා ඇදී ආවේය. එයට වෙළෙඳ ඇමැති ආචාර්ය බන්දුල ගුණවර්ධන මහතාගේ පිළිතුර වී තිබුණේ පිළිකාකාරක සහිත පොල්තෙල් රටට ඇතුළු වී ඇතිදැයි සෙවීමට පරීක්ෂණයක් පවත්වන්නැයි තමා පාරිභෝගික කටයුතු අධිකාරියේ සභාපතිවරයාට උපදෙස් දුන් බවය. එසේම අහිතකර පොල්තෙල් වෙළෙඳපොළේ තිබෙන බවට කිසිදු පාරිභෝගිකයකු මෙතෙක් පැමිණිලි ඉදිරිපත් කර නැතැයිද එසේ තිබියදීත් ලැබී ඇති තොරතුරැ සම්බන්ධයෙන් පරීක්ෂණයක් පැවැත්වීමට තමා තීරණය කළ බවද ඇමැතිවරයාගේ පිළිතුරේ සඳහන් වී තිබිණි.
වෙළෙඳපොළේ තිබෙන අහිතකර ද්‍රව්‍ය සම්බන්ධයෙන් පාරිභෝගිකයන් බොහෝවිට පැමිණිලි නොකරන බව රටේ ජ්‍යෙෂ්ඨම ඇමැතිවරයකු වන ආචාර්ය බන්දුල ගුණවර්ධන මහතා නොදන්නවා විය නොහැක. එසේ පැමිණිලි කරනවා නම් පාරිභෝගිකයන්ට වෙළෙඳපොළේ ඇති සහල් ඇටයේ පටන් අහිතකර හෝ අහිතකර ද්‍රව්‍ය අඩංගු බොහෝ ආහාර ද්‍රව්‍ය සම්බන්ධයෙන් පැමිණිලි ඉදිරිපත් කිරීමට සිදුවනු ඇත. කල්තබා ගත හැකි රසායන ද්‍රව්‍ය ඉසීමකින් තොරව කීර මිටියක්වත් විකිණීමට නොතබන අපේ රටේ රටින් ගෙනා පොල්තෙල්වල පිළිකා කාරක අඩංගු යැයි පැමිණිලි කරන පාරිභෝගිකයන් සිටිය හැකි නම් එය විස්මයට කරුණක් වනු ඇති බවද කිව යුතුය.
විස සහිත රසායනික ද්‍රව්‍ය ඇතුළත් පාරිභෝගික ද්‍රව්‍ය නිශ්චිතව හඳුනාගැනීමට පාරිභෝගිකයන්ට හැකියාවක් නැතිවීම ඊට ප්‍රධානම හේතුවය. සමහර ආහාර ද්‍රව්‍ය දුටු පමණින් ඒවා සිරුරට අහිතකර බවට හඳුනාගැනීමේ විශේෂ හැකියාවක් ඇතමුන්ට තිබුණත් හැමෝටම එවැනි දැනුමක් නැත. එහෙත් ඒ පිළිබඳ සොයාබැලීමට පහසුකම් ඇති විවිධ ආයතන මෙන්ම සැකසහිත භාණ්ඩ පිළිබඳ පැමිණිලි කළ හැකි ආයතනද රට තුළ තිබේ. පාරිභෝගික සේවා අධිකාරිය සහ ශ්‍රී ලංකා ප්‍රමිති ආයතනය එයින් දෙකක් පමණි.
අහිතකර පොල්තෙල් රටට ගෙන්වා ඇති බවට හෙළිදරව් කළ සමස්ත ලංකා පාරම්පරික පොල්තෙල් නිෂ්පාදකයන්ගේ සංගමයේ නිලධාරීන්ගෙන් අවශ්‍ය තොරතුරු ලබා ගැනීමෙන් පසුව අදාළ පරීක්ෂණ පැවැත්වීමට අමාත්‍යංශයට හැකියාව තිබේ. අමාත්‍යවරයා ඒ සඳහා පියවර ගන්නා බවද ප්‍රකාශ කර තිබිණි. මෙහිදී පෙන්වා දිය යුත්තේ රට තුළට ගෙන එන පොල්තෙල් පමණක් නොව සියලු භාණ්ඩවල ප්‍රමිතිය සහ හිතකර අහිතකර බව සොයාගන්නා පැහැදිලි වැඩපිළිවෙළක් තිබීම අවශ්‍ය බවය. එක් ආයතනයකින් තවත් ආයතනයකට බෝලය පාස් කරන වර්ගය පරීක්ෂණවලින් නම් රටට පළක් වන්නේ නැත. ඒ වර්ගයේ පරීක්ෂණ බොහෝ විට අවසන් වන්නේ ගෙන්වූ කෙනෙකුත් නැත. අයිතිකාරයකුත් නැත යන පදනමිනි. ටික කාලයක් ගත වනවිට මෙවැනි සිදුවීම් හැමෝටම අමතක වෙයි. පිළිකා කාරක හෝ වෙනත් විස සහිත රසායනික අඩංගු බොහෝ ආහාර ද්‍රව්‍ය රටේ සංසරණය වීමට එය එක් ප්‍රබල හේතුවකි.
ලංකාවට ගෙන්වා ඇති බව කියන පිළිකා කාරක අඩංගු පොල්තෙල් මේ වනවිට රටපුරා බෙදාහැර තිබෙන බවට ජනතාව තුළ සැකයක් පවතී. මේ රටේ සිටින වැඩිදෙනා පොල්තෙල් පරිභෝජනයට හුරුපුරුදු වූ අය වුවද ඔවුන් සියලුදෙනාටම මේ රටේ නිෂ්පාදනය වන පොල්තෙල් ලබාගැනීමට හැකියාවක් නැත. ඇතැම්විට වැඩි ලාබ ගැනීමේ අරමුණින් මෙරට නිෂ්පාදිත පොල්තෙල්වලට පවා විවිධ අහිතකර ද්‍රව්‍ය මිශ්‍රකොට අලෙවි කරන පිරිස් සිටින බවද රහසක් නොවේ. පිටරටින් ගෙන්වන පොල්තෙල්වල මෙන්ම මේ රටේ පොල්තෙල්වලද ප්‍රමිතිය පරීක්ෂා කිරීමද වැදගත් වන්නේ එබැවිනි.
රේගුව හරහා රට තුළට පිළිකා කාරක අඩංගු පොල්තෙල් පමණක් නොව මොනම දෙයක්වත් ගෙන්වීමට ඉඩක් තිබිය නොහැක. දැන දැනම එවැනි විස පොල්තෙල් හෝ වෙනත් පාරිභෝගික ද්‍රව්‍යයක් හෝ රේගුවෙන් පිටකළා නම් එහි යට ඇත්තේ ලොකු ජාවාරමක් බව නිසැකය. මෙම ජාවාරමට සම්බන්ධ ජාවාරම්කරුවන් නීතියේ රැහැනට කොටුකර ගැනීම අත්‍යවශ්‍යය. එහෙත් මේ ජාවාරම්වලට දේශපාලන ලොකු ලොක්කන්ගේත් “අත හිත” ලැබෙයි නම් මේ පරීක්ෂණ වැඩිදුර යන්නේ නැත. එම පරීක්ෂණවල වාර්තා එළියට එන්නේත් නැත. එහෙත් අපට අවශ්‍ය වන්නේ ජනතාවගේ ශරීර සෞඛ්‍යයට ඍජුවම බලපාන මෙවැනි අහිතකර අද රට තුළට පැමිණීම වළක්වා ගැනීමටය. ඒ සඳහා හැකි හැම පියවරක්ම ගතයුතු බව කිවයුතුය.
