මහින්දානන්ද ඇමැතිගේ ආදර්ශය
ආණ්ඩු පක්ෂ මැති ඇමැතිවරුන්ගෙන් විපක්ෂයේ මන්ත්‍රීවරුන්ට හොඳක් අහගන්න ලැබෙන්නේ ඉතාම කලාතුරකිනි. එසේම විපක්ෂයේ මන්ත්‍රිවරයකු කෙරෙහි සානුකම්පිත හැඟීමක් පහළ කරගනිමින් ඔහුට යහපතක් සැලසීමට යෝජනාවක් ඉදිරිපත් කරන ආණ්ඩු පක්ෂයේ ඇමැතිවරයකු සිටී නම් එය ඇතැම්විට ඇදහීමටත් අමාරු සිද්ධියකි. එය ලංකාවේ දේශපාලනයේ හැටිය. ආණ්ඩුව කුමක් වුවද එහි වෙනසක් නැත.
ඒ අර්ථයෙන් ගත් කළ කෘෂිකර්ම අමාත්‍ය මහින්දානන්ද අලුත්ගමගේ මහතා පසුගියදා රන්ජන් රාමනායක මන්ත්‍රීවරයා සම්බන්ධයෙන් කළ යෝජනාව ඉතා අගනා බව කිව යුතුය. සාමාන්‍යයෙන් විපක්ෂයේ මන්ත්‍රීවරුන්ට විශේෂයෙන්ම කටකාර මන්ත්‍රීවරුන්ට පාර්ලිමේන්තුව තුළදී ඇට්ටි හැලෙන්න බැටදෙන ඇමැතිවරයකු වශයෙන් ප්‍රසිද්ධ මහින්දානන්ද අලුත්ගමගේ මහතා පසුගියදා කියා තිබුණේ සිරදඬුවම් විඳින පාර්ලිමේන්තු මන්ත්‍රී රන්ජන් රාමනායක මහතාට සාධාරණයක් ඉටුකරන්නැයි ආණ්ඩු පක්ෂ රුස්වීමේදී තමා පෞද්ගලික යෝජනාවක් ඉදිරිපත් කරන බවය. ඔහු එසේ ප්‍රකාශ කළේ රන්ජන් රාමනායක මහතාට තමන් විසින් පවරා තිබූ නඩුවක් ඉල්ලා අස්කර ගැනීමෙන් පසුව වීමද කැපී පෙනෙයි.
රන්ජන් රාමනායක මහතාගේ දේශපාලනය පිළිබඳව අපි කතා නොකරමු. එය ඔහුට අයිති කටයුත්තකි. එහෙත් ඔහු අද සිවුවසරක සිරදඬුවම් විඳින මහජන ඡන්දයෙන් බලයට පත්වූ දේශපාලනඥයෙකි. ඔහු හිරේ වැටුණේද දේශපාලන වැඩකටයුත්තක් හේතුවෙන් නොව කටට බ්‍රේක් නැති වීම හේතුවෙනි. ඔහුට උසාවියට අපහාස කිරීමේ චෝදනා එල්ලවූයේ වත්මන් ආණ්ඩුව යටතේ නොවේ. ඔවුන් බලයට පත්ව සිටි යහපාලන රජය කාලයේදීය. ඒ කාලයේ මහින්දානන්ද අලුත්ගමගේ මහතා සිටියේ විපක්ෂයේය. එසේ සිටියදී ඒ මහතාට එල්ල වූ චෝදනාවක් හේතුවෙන් සති කිහිපයක් සිරගත වීමටද සිදුව තිබිණි.
රන්ජන් රාමනායක මහතා 2016 වසරේදී පැවැත්වූ මාධ්‍ය සාකච්ඡාවකදී තමාට අපහාසයක් කළැයි නුගේගොඩ අධිකරණයේ පවරා තිබූ නඩුව ඉල්ලා අස්කර ගැනීමට අලුත්ගමගේ මහතා තීරණය කළ හේතුද උසාවි භූමියේදී ඔහු හෙළිකර තිබුණි. වෙනත් පිරිසකගේ උවමනාවන් ඉටුකිරීමට නොමග ගොස් රන්ජන් රාමනායක මහතා සිරගතව දුක් විඳින බවත් අද ඔහු වෙනුවෙන් පෙනී සිටිමට කිසිවකුත් නැති හෙයින් තමා එදා පැවරූ අපහාස නඩුව ඉල්ලා අස්කර ගැනීමට සිතූ බවත් ඔහු එහිදී කළ ප්‍රකාශයේ සඳහන් විය. මෙයද මෙරට දේශපාලන කරළියේ කලාතුරකින් විය හැකි සිද්ධියකි. සාමාන්‍යයෙන් සිදුවන්නේ විපක්ෂයේ මන්ත්‍රීවරයකු වශයෙන් සිටියදී පැවරූ අපහාස නඩු තමන් බලයට පැමිණ ඇමැතිවරයකු වීමෙන් පසුව තවදුරටත් තද කිරීමට කටයුතු කිරීමය. මහින්දානන්ද අලුත්ගමගේ මහතා එවැනි පියවරක් වෙනුවට තමන්ගේ දේශපාලන සතුරකුට එරෙහිව කටයුතු කිරීමෙන් වැළකීමට පියවර ගනිමින් සියලු දේශපාලනඥයන්ට හොඳ ආදර්ශයක් ලබා දී තිබේ.
අලුත්ගමගේ ඇමැතිවරයා තමන් ගත් තීරණය පිළිබඳව ගෝඨාභය රාජපක්ෂ ජනාධිපතිවරයාට දැනුම් දුන් අවස්ථාවේ කිසිවකුගෙන් පළිගැනීමට අවශ්‍ය නැතැයි ජනාධිපතිවරයා ප්‍රකාශ කළ බවද සඳහන්ය. තමන් මෙහිදී රටට ලබාදුන් ආදර්ශය වන්නේ දේශපාලන පලිගැනීම් නතර කරමු යන්න බවද යහපාලන ආණ්ඩු සමයේ තමාට වැඩිපුරම පහර ගැසූ පුද්ගලයා වන රන්ජන් රාමනායක මහතාට සමාව දුන්නේ ඒ නිසාම බවද ඇමැතිවරයා සඳහන් කර තිබිණි. මෙය මෙරට දේශපාලන ඉතිහාසය තුළ සුවිශේෂී සිද්ධියක් වශයෙන් සටහන් වනු ඇති බව නිසැකය.
දේශපාලන බලය අතැතිව සිටින විට බලය නැති පිරිසට එරෙහිව ඉවක් බවක් නැතිව පහර ගසන සම්ප්‍රදායෙන් මිදීමට මහින්දානන්ද අලුත්ගමගේ මහතා විසින් ගත් පියවර යහපත් ආදර්ශයක් වශයෙන් අපි සලකමු. එහෙත් කරුණු සාක්ෂි සහිතව ඔප්පු කළ හැකි බරපතළ අක්‍රමිකතා, දූෂිත ක්‍රියා සහ අපරාධකාරී ක්‍රියාවල සහායකයන් වශයෙන් කටයුතු කරන දේශපාලනඥයන් සම්බන්ධයෙන් මෙවැනි පියවරක් අනුගමනය කිරීම යහපත් ක්‍රියාවක් නොවන බවද ඒ සමඟ සඳහන් කරමු. රන්ජන් රාමනායක මහතා සිරගතව සිටින්නේ හොර මැරකම්, ඝාතන හෝ අක්‍රමිකතා නිසා නොව උසාවියට අපහාස කිරීම හේතුවෙනි. එම වැරුද්දේ බරපතළකම කොතරම්දැයි මේ වනවිට රන්ජන් රාමනායක මහතාට හොඳ අවබෝධයක් ලැබී ඇති බවද අපි විශ්වාස කරමු.
සිරගත වී අමාරුවේ වැටී සිටින තම දේශපාලන පසමිතුරකුට සාධාරණත්වයේ දැත දිගුකරන මහින්දානන්ද අලුත්ගමගේ ඇමැතිවරයාගේ ක්‍රියාව මෙරට දේශපාලනයේ යහපත් පූර්වාදර්ශයක් වනු ඇතැයි අපගේ බලාපොරොත්තුවය. එය මෙරට ජරාජීර්ණ දේශපාලන මඩගොහොරුව ශුද්ධ පවිත්‍ර කරගැනිමේ මුල් පියවරක් කරගැනීම දේශපාලනඥයන්ගේ වගකීමය. ඊට මූලික වූ ඇමැතිවරයාට අපගේ ප්‍රසාදය පිරිනමමින් රන්ජන් රාමනායක වැනි දේශපාලනඥයන්ට මොළය පෑදේවායි ප්‍රාර්ථනා කිරීමටද අමතක නොකරමු.