අපිම වවාගත් කොවිඩ් වින්නැහිය
නරක ආරංචි අහන්න අපි කවුරුත් කැමැති නොවෙමු. අලුත් අවුරුද්දේ උණුසුම පහව යාමටත් කලිත් ඊළඟට එළඹෙන හෝරාව මහා භයානක විය හැකි යැයි සෞඛ්‍ය බලධාරීන් අනතුරු අඟවනවා නම් එය කිසිසේත් හොඳ ආරංචියක් නොවේ. අප අහන්න අකැමැතිම නරක ආරංචිය එයයි. කොවිඩ් රකුසා යළි විළිස්සමින් සිටියි.
සෞඛ්‍ය බලධාරීහු අලුත් අවුරුද්දට පෙර සිටම උදාවිය හැකි මේ අවදානම පිළිබඳ දිගින් දිගටම ප්‍රකාශ නිකුත් කළහ. එහෙත් රටේ ජනතාව එයට කන්දුන් බවක් පෙනෙන්නට තිබුණේම නැත. එයට තවත් හේතුවක් වූයේ අලුත් අවුරුද්ද මේ වසරේ සැමරීමට පුල පුලා බලා සිටි ජනතාවගේ එම බලාපොරොත්තු තද සීමා පැනවීම් හරහා අවහිර කිරීමට රජය උත්සාහ නොදැරීමයි. රජයද ජනතාවට සෞඛ්‍ය නීති රීතිවලට අනුකූලව කටයුතු කරන ලෙසද සිදුකළ අවවාදවල එතරම් ප්‍රාණවත්භාවයක් තිබුණේද නැත. දැන් වටින් ගොඩින් දැනගන්නට ලැබෙන්නේ රාජ්‍ය ආයතන, පෞද්ගලික සමාගම් මට්ටමෙන් කොවිඩ් වෛරසය ව්‍යාප්ත වෙමින් පවතින බවය. කුරුණෑගල, ගම්පහ දිස්ත්‍රික්කවල ගම්මාන කිහිපයක්ම ලොක්ඩවුන් වී තිබෙන බවටද තොරතුරු ලැබිණි.
සෞඛ්‍ය අංශ රටේ මහජනතාවට දිගමට දැනුම් දුන්නේ එන්නත ලබාදුන්නත් කොවිඩ් රෝගය වැළැක්වීමට උපකාරී වන සියලු සෞඛ්‍යරක්ෂක ක්‍රම ඒ ආකාරයටම පිළිපැදිය යුතු බවය. විශේෂයෙන් සමාජ දුරස්ථභාවය පිළිබඳ ඉහළ ප්‍රමුඛත්වයක් ලබාදිය යුතු බවට අවවාද කරනු ලැබීය. එහෙත් අවුරුදු ආසන්න කාලසීමාව තුළදී අපට දකින්නට ලැබුණේ ඊට හාත්පසින්ම වෙනස් දර්ශනයකි. ජනතාව කිටි කිටියේ තදවෙමින් මීටරය සෙන්ටිමීටරයට අඩුකරගෙන සාප්පු සවාරියේ යන බවය. එවැනි මහා සෙනඟක් මැද මුව වැස්මෙන් පමණක් ආරක්ෂාව සැලසෙනු ඇතැයි සිතීම පවා මහා මුලාවකි. අවුරුදු වෙළෙඳාම් යහමින් තිබූ කඩසාප්පුවල සේවකයන්ට පවා කොවිඩ් වැළඳී ඇති බවට දැන් ලැබෙන ආරංචි බොහෝ දෙනෙකුට ගැටලුවක් වන බව නිසැකය. ඒ ගැන විමසිල්ලෙන් සිටීම අවුරුදු සාප්පු සවාරි ගිය හැමදෙනාගේම වගකීමකි.
ලංකාවේ තත්ත්වය ඉන්දියාව සමඟ ගලපාගත් විට අපේ සිත් තුළ මැවෙන්නේ බියකරු චිත්‍රයකි. ඉන්දියාව මේ වනවිට දිනකට ලක්ෂ 3කට ආසන්න කොවිඩ් ආසාදිතයන් බිහිකරන යන්ත්‍රයක් බවට පත්ව සිටියි. එහි මියගිය පිරිස් අවසන් කටයුතු කිරීම සඳහා පෝලිම් පවා ඇතිව තිබේ. රෝහල් පිරී ඉතිරී ගොසිනි. මිය යන රෝගීන්ගේ සංඛ්‍යාලේඛන ලබාගැනීම පවා සංකීර්ණ කටයුත්තක් බවට පෙරළී තිබේ. පවතින තත්ත්වය එරට මෝදිගේ රජය පවා බරපතළ තැනක හිරකර තිබේ. එවැනි වින්නැහියක් අපේ රටට නම් සිදු නොවේවා යන්න අපගේ ප්‍රාර්ථනයයි.
මේ හමා එන්නේ ශ්‍රී ලංකාව තුළ කොවිඩ් 3 වැනි රැල්ලදැයි අපි නොදනිමු. එහෙත් අලුත් අවුරුද්දේ ජනතාව අතින් තම පරෙස්සම පිළිබඳ වගකීම ගිලිහී යාම මේ තත්ත්වයට මග පෑදූ බව නම් පැහැදිලිය. එය යළිත් ආපසු කරකවා ගැනීම් හැකියාව ඇත්තේද අප අතේමය. ඒ පිළිබඳව ඉහළම අවධානය යොමු කිරීමත් සෞඛ්‍යාරක්ෂිත ක්‍රම දිගටම පිළිපැදීමත් හැර වෙනත් විකල්පයක් අපට නැත.
කොවිඩ් පළමු රැල්ල අපි සාර්ථකව පාලනය කර ගත්තෙමු. ඒ සඳහා ආණ්ඩුවේ බලධාරීන්, සෞඛ්‍ය බලධාරීන්, ආරක්ෂක බලධාරීන් ඇතුළු සියලු දෙනාගේම සහාය ලැබිණි. රටම ලොක්ඩවුන් වූ ඒ කාලයේ රෝගය සහ රෝග කාරක වෛරසය පිළිබඳ මහජනතාව තුළ තිබූ දැනුමද අල්ප විය. එන්නතක් පිළිබඳ තිබුණේ කතාබහක් පමණි. එහෙත් රෝගය පාලනය කරගැනීම අතින් අප සිටියේ ලෝකෙන්ම ඉහළම ස්ථානයකය. නමුත් දෙවැනි රැල්ල වඩාත් භයානක විය. එහි පැතිරීමද වේගවත් විය. රට ලොක්ඩවුන් කර ගැනීමකින් තොරව එය යම්තාක් දුරකට පාලනය කරගත හැකි වූ අතර මේ වසරේ ජනවාරි මුල්කාලයේ පටන් රටේ තත්ත්වය ක්‍රමයෙන් යහපත් අතට හැරෙමින් තිබිණි. සංචාරක ව්‍යාපාතිය හැර සෙසු ව්‍යාපාරික කටයුතුවල පිබිදීමක්ද ඇතිවිය. ස්වයං රැකියා ඇතුළු කුඩා ව්‍යාපාරද ඇරඹිණි. තුන්වැනි රැල්ල හෝ අලුත් අවුරුදු රැල්ල හෝ ඇතිවූයේ එයින් පසුවය. මෙම අවස්ථාවේ වෛරසයේ පැතිරීම වඩා වේගවත් බවද තරුණ පිරිස්වලට පවා රෝගය වැළඳීම ඉහළ අවදානමක් තිබෙන බවද දැනගන්නට තිබේ. සියලුදෙනා මේ පිළිබඳ අවධානය යොමු කිරීම ඉතාම වැදගත් වන බව පෙන්වා දිය යුතුය.
වෛරසයේ ව්‍යාප්තිය අන්තරාදායක ලෙස ඉහළ යන්නේ නම් රජය එය මැඩපැවැත්වීම සඳහා සියලු පියවර නොපමාව ගතයුතුය. ප්‍රමාදය තත්ත්වය තවදුරටත් සංකීර්ණ කරනු ඇත. මහජනතාවට අමතක වී ඇති කොවිඩ් ආරක්ෂක සෞඛ්‍ය නීති රීති පිළිබඳව දැනුවත් කිරීමද යළි ඇරඹීම සුදුසුය. රට ලොක්ඩවුන් කිරීමකින් තොරව හැකි හැම පියවරක්ම ගෙන මේ ව්‍යාප්තිය තුන්වැනි රැල්ල බවට පත් වීමෙන් වළක්වා ගැනීමට රජයේ ඉහළම ප්‍රමුඛත්වය හිමිවිය යුතු අතර මහජනතාවගේ වගකීම වන්නේ ඒ සඳහා තම උපරිම සහාය ලබාදීමය. සෞඛ්‍යාරක්ෂිත නීති සියල්ල අනුගමනය කිරීමෙන් එය පහසුවෙන්ම කළ හැකිවනු ඇත. නැතහොත් නරක ආරංචිය නරක දසාවක් බවට පරිවර්තනය වීම වළක්වාගත නොහැකි වනු ඇත.