ආපදාවලට මුහුණ දුන් අයට අත දෙමු
ජල ගැලීම්, නාය යාම් හේතුවෙන් පසුගිය සතියේ රටම කැළඹිණි. දින කිහිපයක් තිස්සේ එකදිගට ඇදහැළුණු ධාරානිපාත වැස්ස ජනජීවිත අඩාල කළේය. දහස් ගණනක් අනතුරට පත්ව සිටි අතර මේ සටහන තබන විට ජීවිත 25ක් ජලගැලීම් සහ නායයාම්වලට බිලි වී තිබිණි. ඒ අතර එක පවුලේ සාමාජිකයෝද වූහ.
සිදු වූ විපත හේතුවෙන් ජීවිත අහිමි වූ පිරිසගේ ඥාති මිත්‍රාදීන්ට අපගේ ශෝකය පළ කරමු. ඔවුන්ට පමණක් නොව ගංවතුර සහ නාය යාම්වලට ගොදුරැවීම නිසා අනතුරට මුහුණ දී සිටින සියලු දෙනා වෙනුවෙන් අප හදවත් කම්පනය වන බවද සඳහන් කරන අතර හැකි තරම් ඉක්මනින් ඔවුන්ගේ ජීවිත යථා තත්ත්වයට පත්වනු ඇතැයි ප්‍රාර්ථනය කරමු. ඔවුන්ට පිහිටවීමට බලධාරීන් නොපමාව පියවර ගත යුතු බවද ඒ සමඟ පෙන්වා දීමට කැමැත්තෙමු.
මෙවර ගංවතුර සහ නායයාම් විපත් වැඩිපුරම බලපෑම් කර තිබුණේ සබරගමුව සහ මධ්‍යම කඳුකර ප්‍රදේශයට බව වාර්තා විය. ඒ හැර පුත්තලම සහ යාපනය දිස්ත්‍රික්කද දැඩි අවදානමකට ලක් වී තිබිණි. ජල ගැලීම් සහ නායයාම් හේතුවෙන් උන්හිටිතැන් අහිමි වූ පිරිස්වලට තම එදිනෙදා ජීවනෝපායන් පවා අහිමි වී තිබෙන බව සැබෑ තත්ත්වයයි. කොවිඩ් වසංගතයෙන් බැටකමින් සිටින රටේ ජනතාව මේ මුහුණ දී සිටින්නේ කොරේ පිටට මරේ තත්ත්වයකටය. මෙයින් කෙසේ හෝ ගොඩ ඒමට බලවතුන්ගේ ආධාර සහ මගපෙන්වීම අවශ්‍ය බවත් කිව යුතුය. මේ ප්‍රදේශවල තම ඡන්දදායකයන් පිළිබඳව සොයා බැලීම ඒ ඒ පළාත්වල මහජන නියෝජිතයන්ගේ වගකීමකි.
ජල ගැලීම් සහ නායයාම් ස්වභාවික විපත් වන මහා වර්ෂා සහ සැඩ සුළංවල ප්‍රතිඵලයකි. ස්වභාවික විපත් අපට පාලනය කළ නොහැක. එහෙත් එහි ප්‍රතිඵල අවම කර ගැනීම අපහසු නැත. දින ගණනක් වැසි වැටෙන විට ජල ගැලීම් ඇතිවීම වැළැක්විය නොහැකි වුවද පැය දෙක තුනක වැස්සකටත් යටවෙන නගර බොහෝ ප්‍රමාණයක් තිබේ. එසේම සුළු වැස්සකටත් නායයාම් සිදුවිය හැකි බවට අනතුරැ අඟවන කඳුවැටිද තිබේ.
මේවාට පාර කපන්නේ දුරදිග නොබලා මිනිසුන් විසින් සිදු කරන ක්‍රියාකාරකම් බව නොරහසකි. නගරවල කාණු හරස් වන ආකාරයටද වැසි ජලය ගලා බැස යාමට තිබෙන මුඩු ඉඩම් ගොඩ කරමින් ඉදිකෙරෙන ගොඩනැගිලි එයට ප්‍රධාන හේතුවකි. අනවසර ඉදිකිරීම් වශයෙන් සැලකෙන මෙවැනි ආකාරයේ ගොඩනැගිලි සඳහා අවසර ලබා දෙන්නේ කවුදැයි යන්න ද ප්‍රසිද්ධ රහසකි. තමන්ගේ ඡන්ද ව්‍යාපාරවලට නොමසුරැව මුදල් විසි කරන හෙංචයියන්ගේ මනදොළ සපුරා දීම සඳහා මෙවැනි අනවසර ඉදිකිරීම් හමුවේ අහක බලාගෙන සිටින දේශපාලනඥයන් ගංවතුරින් විපතට පත්වන ජනතාවට ආධාර උපකාර කිරීමට ඉදිරිපත් වීම හාස්‍යජනක කරැණක් බව පෙන්වා දිය යුතුය. මෙවැනි වැරදි සිදුවන තාක් මහ වැසිවලදී සිදුවන ආපදා අඩුකර ගැනීම පහසු නොවනු ඇත.
එපමණක් නොව කඳු බෑවුම්වල විවිධ ඉදිකිරීම් කරන පුද්ගලයන්ගෙන් ද මේ විනාශයට ලැබෙන්නේ ලොකු පිටුවහලකි. කඳු නායයාමට එක් ප්‍රධාන හේතුවක් වන්නේ පදිංචියට හෝ වෙනත් ව්‍යාපාර කටයුතු සඳහා හෝ අනවසරයෙන් ඉදිකරන ගොඩනැගිලි හේතුවෙනි. මෙවර මහ වැස්ස අතරේ කඩුගන්නාව සුප්‍රසිද්ධ ගල් කුහර වංගුව ද ඒ අසල බිම් ප්‍රදේශය ද නායයාමේ අනතුරට මුහුණ දුන්නේය. කොළඹ - නුවර මහා මාර්ගය වසා දැමීමට සිදුවිය. මෙය භයානක තත්ත්වයක් බව පෙන්වා දිය යුතුය. එහි වෙළෙඳාම් කරන පුද්ගලයන් ඉවත් කිරීම තාවකාලික පියවරක් පමණි. ගොඩනැගිලි පර්යේෂණ අංශවල විද්වතුන් කඩුගන්නාව ප්‍රදේශය පිළිබඳව දැඩි විමසිල්ලකින් සිටිය යුතු බව අපගේ වැටහීමය. එම ප්‍රදේශය නිරීක්ෂණයට ලක් කළ භූ විද්‍යාඥයන් පිරිසක් කියා තිබුණේ කඩුගන්නාව කන්ද ප්‍රදේශයේ භූමියට යටින් ජල ප්‍රවාහයක් ගලා බසින බැවින් නායයාම්වලට එම ප්‍රදේශය ලක්විය හැකි බවකි. මේ ගැන තවදුරටත් පර්යේෂණ අවශ්‍ය බවද පෙන්වා දෙමු.
නායයාම් තර්ජනයට මුහුණ දී සිටින ප්‍රදේශවල ජනතාවට එම ප්‍රදේශවලින් ඉවත් වන ලෙසට සිදු කරන දැනුම්දීම් නොසලකා හරින බවක් ද පසුගියදා වාර්තා විය. එවැනි තත්ත්වයකට ජනතාව පත්වූයේ ඇයිද යන්න ද සොයා බැලීම අවශ්‍යය. එසේ ඉවත් නොවන ඇතැම් පුද්ගලයන් ඔවුන්ගේ ආරක්ෂාව සඳහා අධිකරණ නියෝග ලබාගෙන නීති මගින් ඉවත් කිරීමටද පියවර ගනු ලැබීය. මෙවැනි අවදානම් ස්ථානවල ජීවත් වන පුද්ගලයන්ගේ අවශ්‍යතා පිළිබඳ නිසි පරිදි අගැයීමක් කර ඔවුන් සම්බන්ධයෙන් විධිමත් වැඩපිළිවෙළක් ඇතිකිරීම අවශ්‍යය. ආපදා කළමනාකරණ නිලධාරීන්ගේ අවධානය මේ සඳහා යොමුකරනු වටී.