ඉම්රාන්ගේ නායකත්වයේ ඉනිම
a day of shame for Pakistan - පාකිස්තානයට ලජ්ජාසහගත දිනයක් - මේ ප්‍රකාශය පාකිස්තාන් අගමැති ඉම්රාන් ඛාන් විසින් සිදුකර තිබුණේ ශ්‍රී ලාංකික ප්‍රියන්ත කුමාර දියවඩන ම්ලේච්ඡ ලෙස පහර දී මරා දමා සිරුරට ගිනි තැබූ දිනයේදීය. ඉම්රාන් ඛාන් මහතාගේ එම ප්‍රකාශය සනාථ කරමින් තවත් එවැනිම ප්‍රකාශ ගණනාවක් සිදුව තිබිණි. ලාහෝර් නගරයට රුස්වූ පාකිස්තානු ජාතිකයන් පිරිසක් සියල්කොට් ඝාතනයට විරෝධය පළ කරමින් විරෝධතාවක්ද පවත්වා තිබිණි. පාකිස්තානු කාන්තාවන් පිරිසක්ද පෝස්ටර් අතැතිව ඒ සඳහා සහභාගි වී සිටීම විශේෂත්වයක් විය.
පාකිස්තානයේ ප්‍රධාන පෙලේ පුවත්පතක් වන ඩෝන් මේ සිද්ධිය ලතෝනි දෙමින් වාර්තා කර තිබුණේ අපේ ජාතිය ඇද වැටී තිබෙන ගැඹුරු අගාධයේ තරම මේ නඩු නැති දඬුවම මගින් සිහිපත් කරදී ඇති බවය. බලවත් වේදනාවට පත්ව සිටි තවත් පාකිස්තාන ජාතිකයෙක් ට්විටර් ගිණුමේ අපි මොක්කු වෙලාද? යනුවෙන් සටහනක් තබා තම වේදනාව පිටකර ගෙන තිබිණි. එවැනිම සටහනකින් අපි යක්ෂයන් නිර්මාණය කර ඇත්තෙමු යැයි තව අයෙක් කියා තිබිණි. පාකිස්තාන පූජකවරුන් මේ ප්‍රචණ්ඩත්වය හඳුන්වා තිබුණේ ඉස්ලාම් විරෝධී ක්‍රියාවක් වශයෙනි.
ප්‍රියන්ත කුමාර දියවඩන මරා දැමූ දිනයේදී මේ රටේ ජනතාවට සියලුම පාකිස්තානුවන් පෙනෙන්න ඇත්තේ එම කෘෘර ඝාතකයන් ජාතක කළ අයගේම දූ පුතුන් හැටියටය. එහෙත් එය එසේ නොවන බවත් සිද්ධියට සම්බන්ධ ම්ලේච්ඡයන්ගෙන් සෙසු පාකිස්තාන ජාතිකයන් වෙනස් බවත් රටට ලෝකයට පෙන්වා දුන්නේ පාකිස්තාන් අගමැති ඉම්රාන් ඛාන්ය. ආගමික මතවාදයක තදින් එල්බ ගෙන සිටිමින් දේව අපහාසය නඩු නැතිව මිනීමැරිය හැකි වරදක් බව හඳුන්වා නීතිය අතට ගෙන මිනීමරා එය වීර ක්‍රියාවක් වශයෙන් හුවා දැක්විය හැකි පිරිස් වීරයන් නොව පරයන් බව පෙන්වා දුන්නේ ඉම්රාන් ඛාන්ය. පාකිස්තානු ජාතිකයන්ගේත් ලොවේ සෙසු ජාතීන්ගේත් සිරුරේ දුවන්නේ එකම ලේ බව ඉම්රාන් එතැන් පටන් මේ දක්වා කළ ක්‍රියාවලින් පැහැදිලි කර දී තිබේ.
එක් අතකින් මේ කෘෘර ඝාතකයත් සමඟ සේදී යන තම රටේ ගෞරවය සහ අභිමානය රුකගැනීමේ දුෂ්කර සටනකද අනෙක් අතින් තම රට තුළ එළිපිටත් හොර රහසේත් ක්‍රියාත්මක වන අන්තවාදී ආගම් කල්ලිවල බලපෑම්වලට මැදිව සිටින ඉම්රාන් ඛාන් ඒ සියලු දුෂ්කරතා මැඩ ගනිමින් මානව වර්ගයාට සිදුවන අසාධාරණ, අයුක්ති සහගත ක්‍රියාවන්ට එරෙහිව නොබියව ක්‍රියා කිරීම සම්බන්ධයෙන් අපගේද ප්‍රශංසාව හිමි වන බවද සඳහන් කළ යුතුය.
සිද්ධියෙන් වඩාත්ම අසීරුවට පත් ප්‍රියන්ත කුමාරගේ දරු පවුලේ ඉදිරි සුබසාධන කටයුතු වෙනුවෙන් ඉදිරිපත් වීමත් ඔහුට අවසන් ගෞරවය දැක්වීමට සහ එම සාහසික ම්ලේච්ඡ අපරාධය සිදුවීම වැළැක්වීමට උත්සාහ ගත් පාකිස්තාන ජාතිකයාට රටේ ඉහළම ගෞරව සම්මානයක් පුද කිරීමට පියවර ගැනීමත් ඉම්රාන් ඛාන්ගේ පරිණත, ශක්තිමත් නායකත්වය පෙන්නුම් කරන සාධක වෙයි. එසේම එම සිද්ධිය ආගමික අන්තවාදයේ කඩතුරාවෙන් වැසී යාමට ඉඩ නොදී එය අපරාධයක් හැටියට හඳුන්වා දී එයට හවුල් වූ ප්‍රධාන අපරාධකරු සහ ඊට සහාය දැක්වූ සියලු සැකකරුවන් හැකි ඉක්මණින් අත්අඩංගුවට ගැනීමට පොලිසිය මෙහෙයවීම හේතුවෙන්ද ඉම්රාන් ඛාන් පැසසුම් ලැබිය යුතුය. එරට ආරක්ෂාව භාර ප්‍රධාන නිලධාරීන් කිසිදු හිරිකිතයකින් තොරව තරුණ ළමයින් කරන මේ දේවල් වැරදියි කියලා කියන්න බෑ කියමින් එම කෘෘර ඝාතකයන්ගේ ම්ලේච්ඡත්වය සාධාරණීකරණය කරන තත්ත්වයක් තුළ ඉම්රාන් ඛාන්ගේ ඉදිරිපත් වීම කැපී පෙනෙන ආදර්ශයක් ලබාදී තිබෙන බවද සඳහන් කළ යුතුය.
ප්‍රියන්ත කුමාරගේ ඝාතනය ආගමික අන්තවාදයකට යා හැකි දුර මුළු ලොවටම පෙන්වා දී තිබේ. ආගමික අන්තවාදය මුළු මහත් මානව වර්ගයාටම එරෙහි ආයුධයක් බවත් එය පාකිස්තානයට පමණක් සීමා වී නැති බවත් සියලුදෙනා විසින්ම තේරුම් ගත යුතුය. එකම රටක් තුළ වුවද ආගමික අන්තවාදයේ ගින්න ඇවිලුණු විට විය හැකි අපරාධවල තරම පිළිබඳ මේ රටේද උදාහරණ තිබේ. අලුත්ගම, බේරුවල, දිගන සහ මාවනැල්ල ප්‍රදේශවල වූ සිද්ධීන් එවැනි අවස්ථා කිහිපයකි. ආගමික හෝ ජාතික හෝ අන්තවාදයේ ඊළඟ පියවර ත්‍රස්තවාදයයි. පාස්කු ඉරිදා ප්‍රහාරය එයට ජීවමාන උදාහරණයකි.
සියලුම ආකාරයේ අන්තවාදය ප්‍රතික්ෂේප කිරිම හැර වෙනත් විසඳුමක් මේ ගැටලුවට නැත. අන්තවාදී හැඟීම් අවුස්සා මිනීමරණ සංස්කෘතියක් තිබෙන රටකට ඉදිරි ගමනක් නැත. ඉම්රාන් ඛාන් පෙන්වා දී ඇත්තේ පාකිස්තානයේ තමන්ගේ නායකත්වය තුළ අන්තවාදයට කිසිදු බුරුලක් නැති බවය. රටක ඉදිරි ගමන පිළිබඳ සුබවාදීව සිතන සියලුම නායකයන්ට ඉම්රාන් ඛාන් පෙන්වා දී ඇත්තේ ඉහළ ආදර්ශයකි. එය ඔහු ක්‍රිකට් ක්‍රීඩාවේ පෙන්නුම් කළාටත් වඩා අගනා නායකත්වයේ ඉනිමක් බව සඳහන් කරන්නේ පාකිස්තාන නායකයාට හරසර පිණිසය.