කෘෂි ඇමැතිගෙ මැසිවිල්ල
අවසානයේදී පොහොර අර්බුදය තමන්ගේ දේශපාලන ජීවිතයද විනාශ කළ බව කෘෂිකර්ම අමාත්‍ය මහින්දානන්ද අලුත්ගමගේ මහතා පිළිගෙන තිබේ. මහ කන්නයේ කාබනික වගා වැඩපිළිවෙළ සම්බන්ධයෙන් ගොවීන් නගන චෝදනා අසාධාරණ නැති බවද අමාත්‍යවරයා තවදුරටත් කියා ඇත. මේ යථාර්ථය තේරුම් ගැනීමට මහින්දානන්ද අමාත්‍යවරයාගේ පඹයන් සෑහෙන සංඛ්‍යාවකට පිළිස්සෙන්නට සිදු වූ බවත් මෙහිදී සඳහන් කළ යුතුය.
අමාත්‍යවරයා මේ කතාව කියා තිබුණේ ගොවි සංවිධාන ජාතික බල මණ්ඩලය සමඟ කෘෂිකර්ම අමාත්‍යංශයේදී පැවැති සාකච්ඡාවකදීය. මෙවැනි සාකච්ඡාවලදී ඇතැම් විට අමාත්‍යවරුන් තමන්ගේ ජාම බේරාගන්නට මේ වගේ කතා කිව්වත් පසුව එම කතාව වෙනස්කර පරණ තැටියම වාදනය කරන අවස්ථාද තිබේ. එහෙත් මහින්දානන්ද අමාත්‍යවරයා ගොවීන් නගන චෝදනාව සම්බන්ධයෙන් කළ ප්‍රකාශය සහ තමන්ගේ දේශපාලන ජීවිතය ගැන කළ ප්‍රකාශය අව්‍යාජ එකක් වශයෙන් අපි දකිමු. නමුත් එය තේරුම් ගැනීමට මෙතරම් කාලයක් ගතවීම සම්බන්ධයෙන් අපි කනගාටු වෙමු.
ඒ සමඟම අමාත්‍යවරයා ප්‍රකාශ කර තිබුණේ කාබනික වගා වැඩසටහන රටටත් ජනතාවටත් ඉතා වැදගත් වූ වැඩපිළිවෙළක් නිසා තමා ඉදිරියටත් එම වැඩපිළිවෙළ සාර්ථක කර ගැනීමට ජනාධිපතිවරයා සහ රජය සමඟ කැපවෙන බවය. ඒ අතර රාජ්‍ය මාධ්‍ය වාර්තා කළේ ගොවි සංවිධාන ජාතික බල මණ්ඩලයේ ඇතැම් ගොවීන්ට කාබනික ගොවිතැන අසාර්ථක බව රටට කියන්නේ නම් රුපියල් ලක්ෂ තුන බැගින් ලබාදීමට ඇතැම් පාර්ශ්ව සැරසෙන බවය. ඒ බව මහින්දානන්ද අමාත්‍යවරයාගේ මෙම ගොවි හමුවේදීම ඔවුන් පවසා තිබිණි. කාබනික වගා වැඩසටහනක් රටට නොගැළපෙන බවක් කිසිවකුත් කියන්නේ නැත. ගොවීන් වුවද එසේ කියන්නේ නැත. නමුත් එම වැඩසටහන ක්‍රියාත්මක කිරීමේ වැඩපිළිවෙළේ අඩුපාඩු රාශියක් තිබිණි. එම අඩුපාඩු හඳුනා නොගෙන රජයේ තීන්දු තීරණ ක්‍රියාත්මක කිරීමට පියවර ගැනීමෙන් සිදුවුණේ ඉතා වටිනා වැඩපිළිවෙළක් ප්‍රායෝගික වශයෙන් අසාර්ථක වීමය. ගොවීන් හඬ නගන්නේ ඒ හේතුවෙනි.
කෘෂිකර්ම අමාත්‍යංශයේ හිටපු ලේකම් මහාචාර්ය උදිත් කේ. ජයසිංහද මීට සමාන අදහසක් ප්‍රකාශ කර තිබිණි. ඔහු පැවසුවේ කාබනික පොහොර ව්‍යාපෘතිය දීර්ඝකාලීන වැඩපිළිවෙළක් යටතේ සාර්ථකව ක්‍රියාත්මක කළ යුතුව තිබූ යහපත් කටයුත්තක් වුවද කේවට්ටයන් විසින් ලබාදෙන උපදෙස් අනුව වැඩකරන්නට ගොස් රජය එය අසාර්ථක කරගත් බවය. මේ කේවට්ටයන් කවුදැයි මහින්දානන්ද අමාත්‍යවරයා හොඳින් දන්නවා ඇතැයි අපි සිතමු. එහෙත් අවසානයේ සිදුවූයේ කාබනික පොහොර වගාවේ ප්‍රතිපත්තිය සකස් කිරීමට දායක වූ මහාචාර්ය උදිත් කේ. ජයසිංහට අමාත්‍යංශයෙන් ඉවත්ව යාමටයි. එය කනගාටුවට කරුණකි.
කාබනික පොහොර ව්‍යාපෘතිය හොඳ වැඩපිළිවෙළක් බවට සැකයක් නැත. එහෙත් කොතරම් හොඳ වැඩක් වුවද ගොවීන්ට එයින් සිදුවන හානිය නිවැරදිව තක්සේරු කර ගැනීමට කෘෂිකර්ම ක්ෂේත්‍රයේ බලධාරීන්ට නොහැකි වීම මහත් අවාසනාවකි. එයින් රටපුරා ගොවීහු අමාරුවේ වැටී සිටිති. ඔවුන්ගේ වගාවට හානි වී තිබේ. ලැබෙන අස්වැන්න අඩු විය. ඇතැම් වගා කහ පැහැ ගැන්වී විනාශ විය. අද ඔවුන් තම වී විකුණා ගැනීම කෙසේ වෙතත් තමන්ගේ පරිභෝජනයට හෝ ප්‍රමාණවත් තරම් වී නැතිවනු ඇතැයි බියෙන් සිටිති. ඔවුන් පාරට පැමිණ කෑගසන්නේ මේ හේතූන් නිසාය. මේ හේතුවෙන් අද මුළු රටේම ජනතාවට තමන්ගේ ප්‍රධාන ආහාරය වන සහල් මිලදී ගැනීමට සිදුව ඇත්තේ අධික මිලකටය. මේ තත්ත්වය ඉදිරියේදී වෙනස් වනු ඇති බවට කිසිදු පෙරනිමිත්තක් නැත. හානිය සිදුවී ඇත්තේ වී වගාවට පමණක් නොවේ. එළවළු, පළතුරු වගාවන්ට පවා මෙයින් බලපෑම් එල්ල විය.
එහෙත් තේ වගාවට අවශ්‍ය පොහොර ලබාදීමට ගත් ක්‍රියාමාර්ගය හේතුවෙන් සිදුවෙන්න ගිය විශාල හානියක් වළක්වා ගැනීමට හැකි වී තිබේ. තේ වගාවේ දලු නෙලීම පවා දුෂ්කර තත්ත්වයට පත්ව තිබුණත් දැන් පොහොර ලැබීම නිසා දලු නිෂ්පාදනය ඉහළ ගොස් ඇති බව පැවසේ. එය යහපතකි. රටට අවශ්‍යම විදේශ විනිමය උපයා දෙන තේ වගාවට අවශ්‍ය පොහොර ටික හෝ ලබාදීමට පියවර ගැනීම අගය කළ යුතුය. එසේ වුවද පොහොර මුලින් නොලැබීම නිසා අස්වැන්නෙන් 5෴ක අඩුවක් සිදුවිය හැකි බව තේ ව්‍යාපාරිකයෝ කියති.
මේ අතර රටේ ප්‍රධානම පෙළේ සහල් නිෂ්පාදකවරයා වන අරලිය සමූහ ව්‍යාපාරයේ සභාපති ඩඩ්ලි සිරිසේන මහතා පසුගියදා ප්‍රකාශ කර තිබුණේ කාබනික පොහොර හොඳ වැඩපිළිවෙළක් වුවත් දැන් දකින්නට ලැබෙන්නේ එය ක්‍රියාත්මක කළ ආකාරයේ ප්‍රතිඵල බවය. සහල් මිල පාලනය වීමට නම් වැඩියෙන් වී වගා කළ යුතු බවද රටේ වී නිෂ්පාදනය අඩුවීමේ වගකීම තමාට ගත නොහැකි බවද ඔහු ප්‍රකාශ කර තිබිණි. මේ වනවිට සහල් වෙළෙඳපොළේ දක්නට ලැබෙන මිල ඉහළ යාම ගැන සහල් නිෂ්පාදකයා දක්වන එම අදහස වැරදි යැයි කිව නොහැක. යළිත් කිවයුතු වන්නේ හොඳ වැඩපිළිවෙළක් ක්‍රියාත්මක කිරීමට යොදාගත් වැරදි ක්‍රමවේදය හානියක් සිදුකර තිබෙන බවය.
ගොවියාත් පාරිභෝගිකයාත් රුකෙන අන්දමට විද්‍යාත්මක ප්‍රවේශයකින් සිදුකළ යුතුව තිබූ කාබනික පොහොර ව්‍යාපෘතිය කඩිමුඩියේ සිදුකිරීම හේතුවෙන් රටේ වී නිෂ්පාදනයට සිදුව ඇති හානිය ගණන් බැලීමෙන් වැඩක් නැත. ඉදිරියේදී හෝ එම තත්ත්වය වෙනස් කර ගැනීමට සියලු බලධාරීන්ගේ අවධානය යොමුවිය යුතුය. කෘෂිකර්ම ඇමැතිවරයාගේ ප්‍රකාශය එම වෙනස ඇතිකර ගැනීමට හොඳ ආරම්භයක් කරගත හැකිය.
