තාත්තලාගේ පට්ටම් ගලවන දේශපාලන පුත්තු
මැති ඇමැතිවරුන්ගේ සහ ඒ අයගේ පුතුන්ගේ චණ්ඩි වැඩ, හොර වැඩවලට අපේ රට චිරප්‍රසිද්ධය. අතීතයේත් එසේමය. වර්තමානයේත් වෙනසක් නැති බවට වන ආසන්නම සිදුවීම දැන් උසාවියේ පවතින අරුන්දික ප්‍රනාන්දු හිටපු රාජ්‍ය ඇමැතිවරයාගේ පුත්‍රයාගේ නීති විරෝධී ක්‍රියාවය.
අරුන්දික ප්‍රනාන්දු මහතාට ඔහු දැරෑ රාජ්‍ය ඇමැති පදවිය අහිමි වූයේ තමන්ගේ කවරකු හෝ රාගම සිද්ධියට සම්බන්ධ බව ඔප්පු වුණොත් රාජ්‍ය ඇමැති පදවියෙන් ඉල්ලා අස්වන බවට කර තිබූ ප්‍රකාශය බව බැලූ බැල්මට පෙනේ. එහෙත් අපට පෙනෙන්නේ සිද්ධියේ බරපතළ බව සැලකිල්ලට ගෙන රාජ්‍ය ඇමැති ධුරයෙන් අස්වන ලෙසට ජනාධිපති ගෝඨාභය රාජපක්ෂ මහතා අරුන්දික ප්‍රනාන්දු මහතාට කර තිබූ දැනුම්දීම හේතුවෙන් ඔහුට ඉල්ලා අස්වීමට සිදුවූ බවය. එසේ නොවුණා නම් වෙනත් කුමන හෝ හතර වරමක් ගසා පට්ටම බේරා ගැනීමට ඔහු කටයුතු කරනු ඇති බවට කතා දෙකක් නැත. මෙහිදී රජයේ කීර්තිනාමය ආරක්ෂා කර ගැනීම සඳහාත් මැති ඇමැතින් තුළ තිබිය යුතු විනයගරුක බවත් සම්බන්ධයෙන් ජනාධිපතිවරයා දරණ ස්ථාවරයද පැහැදිලි වූ බවත් කිව යුතුය.
කෙසේ වුවද අරුන්දික ප්‍රනාන්දු හිටපු රාජ්‍ය ඇමැතිවරයා ලොහාන් රත්වත්තේ රාජ්‍ය ඇමැතිවරයා තරම් වාසනාවන්ත නැත. අනුරාධපුර බන්ධනාගාරය තුළ සිදුවීමක් සම්බන්ධයෙන් බරපතළ චෝදනාවක් එල්ල වූ ලොහාන් රත්වත්තේ මහතාටද ඉල්ලා අස්වන ලෙසට දැනුම්දීමක් කෙරුණු අතර ඔහු තමන් දැරෑ බන්ධනාගාර ප්‍රතිසංස්කරණ ධුරයෙන් ඉල්ලා අස්විය. එහෙත් ඔහුගේ නමට තවත් රාජ්‍ය අමාත්‍ය විෂයන් ගණනාවක් පැවරී තිබීම හේතුවෙන් බන්ධනාගාර විෂය ගැලවුණත් ලොහාන් රත්වත්තේ තවමත් රාජ්‍ය ඇමැතිවරයෙකි. අදාළ චෝදනාවට සම්බන්ධ පොලිස් සහ බන්ධනාගාර අංශ මගින් පැවැත්වූ විමර්ශනවලට සිදුවූ දෙයක් දැනගන්නටද නැත.
එහෙත් අරුන්දික ප්‍රනාන්දුගේ පුත්‍රයා රාගම වෛද්‍ය පීඨයේ ප්‍රහාරයට සම්බන්ධව අත්අඩංගුවට ගනු ලැබූ සැකකරුවන් අතරේ සිටින්නෙකි. සෙසු සැකකරුවන් සමඟ ඔහුද රිමාන්ඩ් භාරයට පත්කරනු ලැබ සිටී. සිද්ධිය සම්බන්ධයෙන් නීතියට අනුව කටයුතු කරන ලෙසට පොලීසිය භාර අමාත්‍යවරයා වන සරත් වීරසේකර මහතා පොලිස්පතිට උපදෙස් ලබාදී තිබේ. සිද්ධියට සම්බන්ධ අමාත්‍යංශයේ ආයතනයක නිල රථයක්ද පොලීසිය භාරයට ගෙන ඇත. එසේම අරුන්දික ප්‍රනාන්දු මහතාට වෙනත් විෂයක්ද පැවරී නැති නිසා සියලු පට්ටම් අතහැර යනු හැර අන් විකල්පයක්ද නොතිබිණි. සිද්ධියට සම්බන්ධ පරීක්ෂණ පවත්වා අවසන් වනතුරු තමන් ධුරයෙන් ඉවත්වන බව ඔහු ප්‍රකාශ කර තිබේ.
සරසවි ඇතුළේ සිසු අරගලවලට පිටස්තරයන් සම්බන්ධ වූ පළමු අවස්ථාව මෙය නොවේ. එහෙත් ආණ්ඩුවේ ඇමැතිවරයකුගේ පුත්‍රයකු මැර පිරිසක්ද කැටුව සරසවි භූමියකට කඩා වැදී සිසුන්ට පහරදීමේ සිද්ධියක් මෑතකදී වාර්තා වූ පළමු අවස්ථාව මෙයයි. දේශපාලන හයියෙන් ඕනෑම දෙයක් යටපත් කළ හැකි යැයි සිතාගෙන කටයුතු කරන දේශපාලනඥයන්ගේ දූ දරුවන්ට මෙය හොඳ පාඩමකි. නීතිය හරියට ක්‍රියාත්මක වුවහොත් මේ කතාව අවසානය කෙසේ වනු ඇතිදැයි දැක බලාගත හැකිවනු ඇත.
දේශපාලන පුත්‍රයාගේ කඩා වැදීම සිදුවී ඇත්තේ සරසවියේ නවකවද සිද්ධියක් සම්බන්ධයෙන් ඇතිවූ මත ගැටුමක ප්‍රතිඵලයක් වශයෙන් බවට වාර්තා වූ තොරතුරුවලින් අනාවරණය වෙයි. මීගමුව රෝහලේ ප්‍රතිකාර ලබන මැර ප්‍රහාරයට ලක්වූ සිසුවාගේ මව වන විශේෂඥ වෛද්‍ය කේ.ඩී.සී. පරණවිතාන මහත්මිය මාධ්‍යයට කියා තිබුණේ සිද්ධියට හේතුව ශිෂ්‍ය සමිති අතර ගැටුමක් බවය. තම පුත්‍රයාට පහරදීමට ප්‍රධාන හේතුව ඔහු නවකවදයට එරෙහිව පෙනී සිටීම බවත් තම පුතුට පළමු වසරේදීද ජ්‍යෙෂ්ඨ සිසුන් මෙවැනිම පහරදීමක් සිදුකළ බවත් විශ්වවිද්‍යාලවල ගැටුම්වලට හේතුවන නවකවදය අවසන් කිරීමට කටයුතු කිරීම සියලුදෙනාගේ වගකීමක් බවත් ඇයගේ ප්‍රකාශයේ සඳහන් විය.
නවකවදය විශ්වවිද්‍යාල තුළ උප සංස්කෘතික අංගයක් බවට ඒ වෙනුවෙන් පෙනී සිටින පිරිස් පැවසුවද අමානුෂික, ක_ර මට්ටමේ නවකවදය සිදුවන විට එය මනෝ ව්‍යාධීන්වලින් පෙළෙන පරපීඩක අසහනයෙන් බැටකන තිරිසන් ගති ඇති පිරිසකගේ මනදොළ සපුරා ගැනීමක් පමණක් බව වටහාගැනීම අසීරු නැත. කෘෘර නවකවදය හේතුවෙන් විශ්වවිද්‍යාල හැර යන එසේම මානසික රෝගවලට ගොදුරුවන ශිෂ්‍ය පිරිස් විශාල සංඛ්‍යාවක් වෙති. මේ ඇතැම් දෙනා සියදිවි නසාගන්නට තරම් මානසික පීඩනයකට ලක්වූ අවස්ථා තිබූ බව මෑත ඉතිහාසයේ සඳහන්ය. සරසවි තුළ දේශපාලනයක් සමඟ ගැට ගැසී තිබෙන නවකවද උන්මාදනය තුරන් කර දැමීමට විශ්වවිද්‍යාල ප්‍රජාවට සම්බන්ධ සියලු පිරිස් එක්ව කටයුතු කළ යුතු බවත් පෙන්වා දිය යුතුය.
එය කෙසේ වුවද නවකවදයට විරුද්ධව මත දරමින් සිටියත් ඇතුළේ ගැටුම්වලට පිටස්තර පුද්ගලයන්ට ඇරියුම් කිරීම කිසිසේත් සාධාරණීකරණය කළ නොහැක. එසේ ඇරියුම් ලබන පුද්ගලයන් දේශපාලන පුත්‍රයන් වූ විට එය කොතරම් දුරදිග යා හැකිද යන්න මේ සිසුන්ට දැන් අවබෝධ වී ඇතුවාට සැකයක් නැත. එසේම අනුන්ගේ තැන්වල තමන්ගේ හයිය පෙන්වීමට යාම තාත්තලාගේ පට්ටම් ගැලවීමට පවා හේතුවන බව දේශපාලන පුත්‍රයන්ට මේ සිද්ධියේදී කියා දී ඇති පාඩමයි.