කොවිඩ් සතුරා ඔබේ දොරකඩ!
කොවිඩ් වසංගතය යළිත් මහ රුල්ලක් ලෙස රටපුරා හමා යන ලකුණු පහළ වෙමින් තිබේ. මේ වනවිට දෛනිකව වාර්තා වන රෝගීන් සංඛ්‍යාව දහස ඉක්මවමින් තිබෙන අතර පසුගිය ජනවාරි 29 වැනිදායින් පසුව මේ දක්වාම එහි වෙනසක් සිදුවී නැත. දැන් එම සංඛ්‍යාව 1200 මට්ටම පවා ඉක්මවා තිබේ. සති ගණනාවකට පසුව රෝහල්ගතව ප්‍රතිකාර ලබන සහ නිවෙස්වල සිට වෛද්‍ය සුපරීක්ෂාව යටතේ ප්‍රතිකාර ලබන සංඛ්‍යාවද විසිදහසට වැඩිය. වත්මන් රැල්ල හට ගැනීමට පෙර රෝහල් බොහෝමයක කොවිඩ් වාට්ටු සම්පූර්ණයෙන් හිස් වූ තත්ත්වය සමඟ සංසන්දනාත්මකව බලන විට මෙය භයානක ප්‍රවණතාවකි. ඒ පිළිබඳව රටේ සියලු ජනතාවගේ අවධානය යොමුවීම අවශ්‍යය.
ඩෙල්ටාවෙන් ඔමික්‍රෝන්වලට පිවිසෙන විට ජනතාව තුළ විශාල බියක් සහ චකිතයක් හටගත් බව පෙනෙන්නට තිබිණි. එහෙත් ඔමික්‍රෝන් පිළිබඳව ප්‍රචාරය වූ එය එතරම් භයානක විකෘතියක් නොවන බවට වූ ප්‍රකාශ හේතුවෙන් බොහොමයක් දෙනා අතුරින් අවධානය ගිලිහී යාම මේ ව්‍යසනයට හේතු වූ බව පෙනී යයි. ජනතාව එක්රුස්වන ස්ථාන සහ අවස්ථා දිගින් දිගටම ඉහළ ගියේය. තමන් හුරැපුරැදු වී සිටි සෞඛ්‍යාරක්ෂිත නීති රීති පිළිපැදීම බොහෝ අය අතුරින් අතහැරැණි. ඔමික්‍රෝන් සමාජය තුළට කිඳා බැසීමට එය අවස්ථාවක් වූ බව පැහැදිලිය. වෛද්‍යවරැන් සහ රජයේ බලධාරීන්ද ජනතාවගේ අවධානය ගිලිහී යා නොදී දිගටම තබාගත යුතු බවට කළ අවවාදවලට නිසි සැලකිල්ලක් නොලැබීමෙන් බලා සිටියදී කොවිඩ් යළිත් රටපුරා පැතිර ගියේය. එය තවදුරටත් ව්‍යාප්ත වෙමින් තිබේ.
සෞඛ්‍ය අමාත්‍යංශය පවසන්නේ කොවිඩ් ආසාදිත බවට හඳුනාගනු ලැබ රෝහල් ගත කළ පුද්ගලයන් සඳහා වෙන්කෙරෙන ඇඳන් සංඛ්‍යාව 45% සිට 49% දක්වා මේ මාසයේ මුල් සතිය වනවිට දී ඉහළ ගොස් තිබුණු බවය. එය ඊට පෙර සතියට වඩා සීයට 32 සිට 34කින් ඉහළ යාමකි. මරණ සංඛ්‍යාවද 10%කින් ඉහළ නැග තිබෙන බවද සෞඛ්‍ය අමාත්‍යංශ ආරංචි මාර්ග ප්‍රකාශ කර තිබිණි. මේ සියලු සංඛ්‍යාලේඛන මවන්නේ අඳුරැ චිත්‍රයක් බව කිවයුතු නැත. මේ ගැන පූර්ණ අවධානයකින් කටයුතු කිරීම අවශ්‍යමය. එසේ නොකිරීම සතුරා ගේ ඇතුළටම කැඳවා ගැනීමකි.
ශීඝ්‍රයෙන් පැතිරෙන ඔමික්‍රෝන් වෛරසයෙන් ගැලවීමට නම් බූස්ටර් එන්නත වහාම ලබාගන්නැයි සෞඛ්‍ය අමාත්‍යංශය මගින් දිගටම අවවාද කෙරේ. මේ මාසයේ මුල වනවිට බූස්ටර් එන්නත ලබාගෙන සිටි සංඛ්‍යාව ප්‍රතිශතයක් වශයෙන් දැක්වූයේ 39%ක් වශයෙනි. එහෙත් කොවිඩ් පැතිරීම සාර්ථකව පාලනය කර ගැනීමට නම් අඩුම තරමින් එන්නත් කළ පිරිසෙන් 70%ක්වත් බූස්ටරය ලබාගත යුතු බවද සඳහන් වෙයි. බූස්ටරයට එරෙහිව ඇතැම් පුද්ගලයන් විසින් සිදුකරන අසුබවාදී අදහස් පළකිරීම්වලට කන්දීමෙන් වැළකී තමන් ගැන සිතා බූස්ටරය ලබා ගැනීමට ක්‍රියා කිරීම මේ මොහොතේ ජනතාවගේ ප්‍රධානතම වගකීමයි. තමන්ගේ ප්‍රවේශම සිදුවන විට එය සමාජයේම ප්‍රවේශමට හේතු වෙයි.
කොවිඩ් ව්‍යාප්තිය වැළැක්වීම සම්බන්ධයෙන් සමාජය තුළ සිටම ක්‍රියාත්මක වන මහජන සෞඛ්‍ය පරීක්ෂකවරැන්ගේ සංගමයේ සභාපති උපුල් රෝහණ මහතා ප්‍රකාශ කරන්නේ පවතින තත්ත්වයේ හැටියට රටෙන් බාගයක්ම කොවිඩ් රෝගීන්ගේ ආශ්‍රිතයන් බවට පත්ව සිටින බවය. සෑම සතියකදීම ආසාදිතයන් සංඛ්‍යාව දෙගුණයකින් වැඩිවෙන බවත් ඒ මහතා කළප්‍රකාශයක සඳහන් විය. ඔහු පෙන්වා දී තිබුණේ නිසි පරිදි එන්නත් නොගත් පුද්ගලයන් අතර කොවිඩ් ව්‍යාප්තියේ ශීඝ්‍ර වැඩිවීමක් පෙන්නුම් කරන බවය. මේ කාරණාව රටේ සියලුදෙනා විසින්ම තදින්ම අවධානයට ගතයුතු බව පෙන්වා දිය යුතුය.
මේ අතර සෞඛ්‍ය සේවා අධ්‍යක්ෂ ජනරාල් වෛද්‍ය අසේල ගුණවර්ධන මහතා පසුගියදා ප්‍රකාශ කර තිබුණේ පසුගිය ජනවාරි දක්වා කාලය තුළදී පොසිටිව් වෙමින් සිටි රෝගීන්ගේ සංඛ්‍යාව පහළ බැසීමක් සිදුවෙමින් තිබූ බවය. එහෙත් ඉතා ශීඝ්‍රයෙන් ව්‍යාප්ත වන ඔමික්‍රෝන් හේතුවෙන් රෝගීන් සංඛ්‍යාව යළිත් ඉහළ යමින් පවතින බවද ඒ මහතා පෙන්වාදී තිබිණි. ඔහු දිගටම අවධාරණය කරන්නේ එන්නත් දෙකම ලබාගැනීමෙන් මාස තුනකට පසුව බූස්ටරය ලබා ගැනීම අත්‍යාවශ්‍ය බවය. බූස්ටරය නොගන්නා තැනැත්තා සැලකෙන්නේ එන්නත්කරණය නොවූ පුද්ගලයකු වශයෙන් බවද ඒ මහතා කියා තිබිණි.
රටේ පවතින තත්ත්වය තවදුරටත් ව්‍යාකූලවීම වළක්වා ගත හැකි වන්නේ ජනතාව ඒ පිළිබඳව දක්වන කැපවීම මත පමණි. බූස්ටරය නොගැනීම මෝස්තරයක් බවට පත්කර ගැනීම තමන්ගේ සමාජ වගකීම පැහැර හැරීමක් බවට කතා දෙකක් නැත. එය තමනුත් අමාරැවේ වැටී යළිත් රට සම්පූර්ණයෙන් හෝ පළාත් වශයෙන් හෝ වසා දැමීමේ අවස්ථාවට මගපෑදීමකි. එසේ වුවහොත් දැනටමත් දැඩි ලෙස ආර්ථික පීඩාවෙන් බැටකන සියලුදෙනාටම එය දරාගත නොහැකි පහරක් වනු ඇත. එවැන්නක් යළි කිසි විටෙකත් සිදු නොවිය යුතුය. රුකියා අහිමි වී, එදිනෙදා ආදායම් උපයන පිරිසට යන එනමං නැති වී සියල්ල එකතැන ඇන හිටින තත්ත්වයකට රට යළි පත්විය යුතු නැත. එසේ නොවන තැනට වගබලාගත යුත්තේද අපට පමණි.
කොවිඩ් රෝගයේ පැතිරීම පහළ මට්ටමකට පැමිණි අවස්ථාවේ රටේ සියලුදෙනා තුළ නිදහස් වාතාවරණයක් තුළ යළි ජීවත්වීමේ අපූරැව හොඳින් පැළපදියම් විය. එය දිගටම පවත්වාගෙන යා හැක්කේ කොවිඩ් වෛරසය මුළුමනින්ම පාලනය කර ගැනීමෙන් පමණි. එය තනිව කළ නොහැක. ඒ සඳහා සියලුදෙනා අත්වැල් බැඳගත යුතුය.