විදුලිය කැපිල්ලේ රතු එළිය
විදුලිය අර්බුදය මුළු රටම බලවත් අසීරුවකට ඇද දමා තිබේ. අපගේ දේශය පුවත්පතේ ප්‍රධාන සිරස්තලයකින් ප්‍රකාශ වන පරිදි ඉදිරි මාස 03ක කාලය තුළදීම විදුලිය කප්පාදුවකට මුහුණදීමට රටට සිදුවනු ඇත. වැසි ප්‍රමාණවත් තරමට නොලැබුණොත් මේ තත්ත්වය තවත් බරපතළ වීමට ඉඩ තිබේ. ඩීසල් ගැටලුවට විසඳුමක් නැත්නම් ඊටත් වඩා බරපතළ අර්බුදයකට රට ඇද වැටෙන බව නිසැකය.
මහජන උපයෝගිතා කොමිසමේ සභාපති ජනක රත්නායක මහතා මාධ්‍යයට ප්‍රකාශ කර තිබුණේ ලබන මාර්තු සහ අප්‍රේල් මාස සඳහා ලංකා විදුලිබල මණ්ඩලය මගින් ප්‍රමාණවත් තරම් ඉන්ධන ගබඩා කර නොගතහොත් පැය 05ක පමණ කාලයක් දක්වා විදුලි කප්පාදුවකට යාමට සිදුවිය හැකි බවය. ඔහුගේ මතයට අනුව ශ්‍රී ලංකාව මුහුණ දෙන්නේ විදුලිය අර්බුදයකට නොව ඉන්ධන අර්බුදයකටය. විදුලි කප්පාදුව එහි ඍජු ප්‍රතිඵලයක් වශයෙන් සිදුවන්නකි. ඩීසල් ප්‍රමාණවත් තරම් ලැබෙන්නේ නම් විදුලිය කැපීමක් සිදු නොවන බව එයින් ප්‍රකාශ වෙයි.
එය කෙසේ වුවද මෙරට ජනතාවට විදුලිය කැපෙන්නේ ඉන්ධන අර්බුදයක් නිසාද වැසි නොලැබෙන නිසාද යන්න අදාළ නැත. ඔවුන්ට දැනෙන එකම දෙය මේ වනවිට දිනකට පැය 4 ½ක් විදුලිය නැතුව ජීවත්වීමට සිදුව තිබෙන බවය. විදුලිය නැතිව පැයක් හමාරක් සිටීම එතරම් ගැටලුවක් නොවිය හැක. එහෙත් පැය 4 ½ක් විදුලිය නොමැති විට ජනතාවට බොහෝ ප්‍රශ්න වලට මුහුණදීමට සිදුවෙයි. තමන්ගේ ශීතකරණවල ගබඩා කර ඇති එළවළු, මාළු, මස් රුකගැනීම පවා ඔවුන්ට අසීරුවෙයි. බොහොමයක් දෙනා කලින් පිසගත් ආහාර පසුව ප්‍රයෝජනයට ගැනීම සඳහා ශීතකරණයේ තබන අතර ඒවා පැය ගණනාවක් විදුලිය නොමැතිව තිබෙන විට නරක් වීම වළක්වා ගත නොහැක. එවිට සිදුවන්නේ මේවාට වගකිව යුතු අයට හැකිතරම් බැණ වදිමින් බාගෙට පිළුණු වූ ආහාර ගිල දැමීම පමණි.
විදුලිය පැය ගණනක් නැතිවීම සියලු දෙනාගේ එදිනෙදා ජීවිත කෙරෙහි ඇති කරන බලපෑම ඉතා ඉහළය. ඉගෙන ගන්නා වයසේ සිටින ළමුන්ට මහත් පාඩුවක් සිදුවෙයි. කුඩා වෙළෙඳසල්, ආහාර අලෙවිසල්, සුළු ව්‍යාපාර මේ හැමදෙයක්ම ඇනහිටියි. ඔවුන්ට ජෙනරේටර් මගින් විදුලිය ලබාගත හැකි වුවද එය අතිරේක වියදමකි. එසේම ජෙනරේටර් සඳහා ඩීසල් සොයාගැනීම ඊටත් වඩා අමාරු කාර්යයකි. නිකම් සිටිනු හැර වෙනත් යමක් කළ නොහැක. මේ හේතුවෙන් එම පැය කිහිපය තුළ අපතේ යන මිනිස් ශ්‍රමයේ වටිනාකම කිව නොහැකි තරම්ය.
පෙබරවාරි - මාර්තු වනවිට රට තුළ විදුලි උත්පාදනයේ අර්බුදකාරී තත්ත්වයක් හටගනු ඇති බවට විදුලිබල මණ්ඩලයේ ඉංජිනේරුවරු මේ වසර ආරම්භයේදීම අනතුරු ඇඟවූහ. එහෙත් රජයේ බලධාරීන් එයට කන්දුන් බවක් නොපෙනිණි. පැයක කාලයක් හෝ විදුලිය කැපිය යුතු බවට මේ මස මුලදී ඔවුන් යෝජනා කරද්දී මහජන උපයෝගිතා ගිවිසුම ප්‍රකාශ කළේ මාස 03ක් යනතුරු විදුලිය කැපීමක් අවශ්‍ය නොවන බවය. එසේ කියා පැය 24ක් යනවිට විදුලිය කැපීම ආරම්භ විය. කවුරු කාට බොරු කරනවාද කියා සිතාගැනීම පවා අපහසුය.
එහෙත් රජයේ බලධාරීන් සැමවිටම නිවැරදි උපදෙස් ලබා ගැනීමටත් පිළිපැදීමටත් පියවර ගැනීම අවශ්‍යය. එය සිදු නොවන විට ජනතාවගේ මූලික අවශ්‍යතා ඉටුකරදීම පවා ආණ්ඩුවට නොහැකි වනු ඇත. දැන් සිදුවෙමින් පවතින්නේ එයයි. විදුලිය ලබාගැනීම ජනතාවගේ මූලික අවශ්‍යතාවකි. අග්නිදිග ආසියාවේ හොඳින්ම විදුලිය ලබාදීම පිළිබඳව ඉහළින්ම කියැවෙන රටක් වූ ශ්‍රී ලංකාව අද පැය ගණනක් අඳුරේ සිටින්නේ වැරදි උපදෙස් නිසා යැයි නැගෙන චෝදනාවලට ආණ්ඩුවට පිළිතුරක් සොයාගැනීම පහසු නැත.
විදුලිය කැපීමේ බලපෑම ඍජුව එල්ලවන පිරිසක් වන්නේ මේ දිනවල උසස් පෙළ විභාගය ලියන සිසු දරුවෝය. නිවෙස්වලදී විභාගයට සූදානම් වීම පමණක් නොව විභාග මධ්‍යස්ථානවලදී විභාගයට ලිවීමද විදුලිය කැපීම හේතුවෙන් දැඩි බලපෑමකට හසුවෙයි. එය සිසු දරුවන්ගේ පැත්තෙන් බලවත් අසාධාරණයකි. ජීවිතයේ අනාගතය තීන්දු කරන විභාගයේදී එවැනි අසාධාරණයක් සිදුවීම සිසුන් කලකිරවන අත්දැකීමකි.
ප්‍රශ්නය අර්බුදයක් වනතුරු බලා සිටීම හේතුවෙන් අද අපේ රටට මේ තත්ත්වයට මුහුණදීමට සිදුව තිබේ. හැකිතරම් පිටරටවලින් ණයට මුදල් ගෙන ඒවා කෑමට බීමට යොදා ගැනීමේ ආදීනව ඇස් පනාපිට කැරකෙමින් තිබේ. තවමත් අප සිටින්නේ බරපතළ ආර්ථික කඩා වැටීමක එළිපත්තේය. හරි තීරණ නොගතහොත් රට අඳුරට තල්ලු වීම ශක්‍රයාටවත් නවත්වා ගත නොහැකි වනු ඇත.
