මග වරද්දා නොගත යුතුයි
රට පුරා පෝලිම් තවම ඉවරයක් නැත. තෙල් පෝලිම් සඳුදා (21) වනතුරු පවතිනු ඇතැයි ආණ්ඩුවේ ප්‍රකාශවලින් කියැවෙන බව අපගේ ප්‍රධාන සිරස්තලයෙන් හෙළිකර තිබේ. ඉන්දියාව සමඟ ගිවිසුම් ක්‍රියාත්මක වනතුරු මේ ප්‍රමාදය සිදුවන බවද සඳහන්ය.
තෙල් සඳහා පමණක් නොව ගෑස් සැපයුම සම්බන්ධයෙන්ද පවතින්නේ බරපතළ තත්ත්වයකි. ප්‍රමාණවත් තොග නැතිවීම හේතුවෙන් ගෑස් සැපයීම සම්පූර්ණයෙන් අත්හිටුවීමට සිදුවූ බව ලිට්‍රෝ සහ ලාෆ් ගෑස් සමාගම් දෙකම පසුගිය බදාදා (16) ප්‍රකාශ කර තිබිණි. දින 11ක් පමණ තිස්සේ වරායේ නවතා තිබූ ගෑස් නැව්වලට ගෙවීමට ඩොලර් නොමැතිවීම එයට හේතු වී තිබිණි. පසුව දැනගන්නට ලැබුණේ අදාළ ගාස්තු ගෙවා එක් නැවක ගෑස් තොගය බාගත් බවත් අනෙක් නැවේ ගෑස් සඳහා මුදල් ගෙවීමටද සූදානම් වන බවත්ය. දිනකට ඩොලර් 18,000 බැගින් ප්‍රමාද ගාස්තු ගෙවමින් නැව් මෙසේ නවත්වාගෙන සිටීම රටේ තිබෙන ඩොලර් තවදුරටත් සිඳී යාමකි. ඒ අනුව දවස් 11ට නිකරුණේ ගෙවන්නට සිදුවූ ගාස්තුව ඩොලර් ලක්ෂ 02කට ආසන්නය. මෙය මොන තරම් නාස්තියක්ද? අපරාධයක්ද?
මේ ආකාරයට දවස් කිහිපයකට වරක් බැගින් ගෑස් තොග, ඩීසල් තොග, පෙට්රල් සහ භූමිතෙල් තොග නිදහස් කිරීම පවතින ගැටලුවට විසඳුමක් නම් නොවේ. එසේම ඇති තරම් තෙල් තොග බෙදාහරින බවට අමාත්‍යවරුන් විසින් වරින් වර සිදු කරන ප්‍රකාශද පවතින ගැටලු තවදුරටත් උග්‍ර කරවනවා මිස ඒවා සමනය කිරීමට හේතු වන්නේ නැත. මහ මගට බසින ඕනෑම කෙනකුට ඉන්ධන පිරවුම්හල් අසල තිබෙන තෙල් පෝලිම් දැකිය නොහැකි නම් එය පෙනුමේ හෝ දැනීමේ වරදක් විය යුතුය. නැතහොත් දැන දැනම එවැනි කතා කියන්නේ රටේ පොදු මහජනතාව අඳ බාලයන් කියා සිතාගෙන විය යුතුය. ඇති තරම් තෙල් තොග බෙදාහරිනවා නම් ඉන්ධන පිරවුම්හල් අසල කිලෝමීටර් ගණන් දුරට පෝලිම් තිබිය නොහැකි බව ඕනෑම කෙනකුට තේරුම් යා යුතුය.
තෙල් සහ ගෑස් සැපයුම අඩාලවීම රටේ සකල ක්‍රියාකාරීත්වයටම බලපායි. තෙල් නැත්නම් විදුලිය කැපීමද දිනපතාම සිදුවෙයි. ගෑස් නැත්නම් නිවෙස්වල ඉවුම් පිහුම් කටයුතු පමණක් නොව හෝටල් ව්‍යාපාරද ඇනහිටියි. එයින් විශාල පිරිසකගේ රුකියාද අහිමි වෙයි. මෙවැනි තත්ත්වයක් පවතිද්දී රටේ ජනතාව තුළ අවිනිශ්චිත බවක්, ව්‍යාකූල බවක් සහ අවුල් සහගත හැඟීම් ඇතිවීම වැළැක්විය නොහැක. මේ පෝලිම්වල ජනතාව පැය ගණන් රැඳී සිටින්නේ ඇඟේ අමාරුවට නොව අවශ්‍යතාව හේතුවෙනි. ඔවුන්ගේ කටවල් ඇරෙන්නේ ඇඟේ අමාරුව වැඩිවන විට බව සීනිබෝල කතා කියන අමාත්‍යවරුන්ද දැන සිටිය යුතුය.
රටට තෙල්, ගෑස් සහ සෙසු අත්‍යාවශ්‍ය භාණ්ඩ පැමිණිය යුත්තේ අවශ්‍යතාව සපුරන ආකාරයට මිස එදිනෙදා වියදම් කළ හැකි ඩොලර් ප්‍රමාණය මත රුඳෙමින් නොවේ. එය සිදුවන තුරු ජනතාවගේ සිත්වල පවතින සැක සංකා දුරුවන්නේ නැත. එසේ කටයුතු නොකෙරෙන්නේ නම් රට ඉදිරියේ ඇත්තේ මහා අර්බුදයක පෙරනිමිති බවට ඔවුන් තවදුරටත් සැක කරනු ඇත. එය රටේ යහපතට කිසිසේත් හේතු නොවේ.
පෝලිම්වල දහදුක් විඳ නිවෙස්වලට යන විට විදුලිය කප්පාදුව හේතුවෙන් අඳුරේ සිටීමට සිදුවීම තත්ත්වය තවදුරටත් සංකීර්ණ කරයි. මේ ගැටලුවලට මැජික් බලයෙන් විසඳුම් සෙවිය නොහැක. ඩොලරය පාවීමට ඉඩ හැරීමත් සමඟ රුපියල පහළටම ඇදවැටීමෙන් සියලු භාණ්ඩ මිල ගණන් වැඩිවීමද ඉදිරියේදී වැඩිවීමට නියමිත විදුලි බිල්පතද සලකන විට ජනතාවට විඳින්නට සිදුව තිබෙන පීඩනය තවදුරටත් ඉහළ යනු ඇත. ආර්ථිකය සම්බන්ධයෙන් ඇතිව තිබෙන මේ තත්ත්වය රජය නිවැරදිව තේරුම් ගැනීමත් ඒ අනුව කටයුතු කිරීමත් සිදුනොවුණොත් රට ප්‍රපාතයට ගමන් කිරීම නවත්වාගත නොහැකි වනු ඇත.
මුදල් අමාත්‍ය බැසිල් රාජපක්ෂ මහතා ඉන්දීය රජය සමඟ ආර්ථික ගිවිසුම් ගණනාවකට අත්සන් තබන්නේ මේ පසුබිමේය. දෙවරක් කල් දැමුණු මුදල් අමාත්‍යවරයාගේ ඉන්දීය සංචාරය මේ වර ප්‍රතිඵලදායක වී ඇති බව අත්සන් කෙරුණු ගිවිසුම් අනුව පැහැදිලි වෙයි. ඩොලර් බිලියන 01ක ණයක් හෝ ණය පහසුකමක් හෝ වශයෙන් ලැබෙන මේ ආධාර පැකේජයේ නිසි ප්‍රයෝජන ගැනීමට ආණ්ඩුව වගබලා ගත යුතුය. අත්‍යාවශ්‍ය ආහාර, තෙල් සහ ඖෂධ ගෙන්වා ගැනීමට එහිදී ප්‍රමුඛත්වය ලබාදීම අවශ්‍යය. මේ ණය ආධාර ඉන්දියාව නිකම් ලබා දෙන්නේ නැත. දෙරට අතර පවතින සමීප මිත්‍රත්වය සහ රාජ්‍ය තාන්ත්‍රික වශයෙන් පවතින සමීප සබඳතා හේතුවෙන් මේ අවස්ථාව ශ්‍රී ලංකාවට ලැබීම භාග්‍යයක් කොට සැලකිය හැකි වුවත් එය උදම් ඇනීමට කාරණාවක් නොවන බවද ඒ සමඟ සඳහන් කළ යුතුය. නිසැකවම ඉන්දියාව ශ්‍රී ලංකාවෙන් බලාපොරොත්තු වන අවශ්‍යතා සම්පූර්ණ කිරීමට සිදුවන බවද දැන සිටිය යුතුය.
ඉන්දියාව ශ්‍රී ලංකාවේ ප්‍රධාන ආයෝජන සහකරුවකු වශයෙන් මේ වනවිට කටයුතු කරමින් සිටී. ත්‍රි^මලේ බලශක්ති සමාගම, සාම්පූර් සූර්ය බලශක්ති ඒකකය, විදුලිබල මණ්ඩලය සමඟ අදානි සමාගම ඇතිකරගත් මන්නාරමේ මෙගාවොට් 500 සුළං බල විදුලි උත්පාදන ඒකකය එම ආයෝජනවලින් කිහිපයකි. වඩාත් විශාල ආයෝජනය වන්නේ කොළඹ වරායේ බටහිර පර්යන්තය සංවර්ධනයට අදානි සමාගම සහ ජෝන් කීල්ස් හෝල්ඩිංස් සමාගම අතර ඇතිවූ ගිවිසුමයි. ශ්‍රී ලංකාව ඉදිරියේදී යා යුතු වන්නේ මින් පෙර ගිය ගමන් මාර්ගයට වඩා වෙනස් මාර්ගයක බව ඉතාම පැහැදිලිය. මේ පාර වරද්දා ගත්තොත් එය රටටම මහත් අභාග්‍යයක් විය හැකි බව සඳහන් කළ යුතුය.
