සර්ව පාක්ෂික සහනය
පවතින අර්බුදකාරී තත්ත්වයට විසඳුම් සෙවීම සඳහා කැඳවා තිබූ සර්ව පාක්ෂික සමුළුවේදී ඉදිරි මුදල් වර්ෂය සඳහා නව පරිපූරක ඇස්තමේන්තුවක් ඉදිරිපත් කළ යුතු බවට කෙරුණු යෝජනාවට අනුමැතිය පළවූ බව සඳහන් වී තිබේ. ශ්‍රීලනිප නායක හිටපු ජනපති මෛත්‍රීපාල සිරිසේන මහතා විසින් සමුළුව අමතා කළ ප්‍රකාශයේදී මේ යෝජනාව ඉදිරිපත් විය. ඔහු සඳහන් කර තිබුණේ 2022 අයවැය යෝජනා වහා ප්‍රතිශෝධනය කර ඉදිරි මුදල් වර්ෂය සඳහා නව ඇස්තමේන්තුව ඉදිරිපත් කළ යුතු බවය.
මේ යෝජනාව ඉදිරිපත් කිරීමේදී මෛත්‍රීපාල සිරිසේන මහතා ප්‍රකාශ කර තිබුණේ අනවශ්‍ය වැයශීර්ෂ කපා දැමිය යුතු බවය. එහිදී කැබිනට් මණ්ඩලය අඩු කිරීම, මිත්‍ර රටවල නියෝජිතයන් කැඳවා රාජ්‍ය නායක සමුළුවක් පවත්වා ආර්ථික ආධාර ලබා ගැනීම, එම ආධාර නිසි ලෙස ප්‍රයෝජනයට ගැනීම සහතික කිරීම සඳහා විගණන හා ප්‍රසම්පාදන කොමිෂන් සභා යළි පිහිටුවීම කළ යුතු බවද ප්‍රකාශ විය. මේ යෝජනාවට තල්ලුවක් දෙමින් එජාප නායක රනිල් වික්‍රමසිංහ මහතා පැවසුවේ සංවර්ධන අයවැයක් වෙනුවට සහන අයවැයක් ගෙන ආ යුතු බවය. මේ කතාවට පිළිතුරු දෙමින් මුදල් අමාත්‍ය බැසිල් රාජපක්ෂ මහතා සඳහන් කර තිබුණේ අමාත්‍ය මණ්ඩලයේ එකඟතාව අනුව එවැනි අයවැයක් ගෙන ඒමට සූදානම් බවය.
වසරක් සඳහා අයවැයක් ඉදිරිපත් කර ඒ පිළිබඳ විවාද පවත්වා අවශ්‍ය සංශෝධනද හඳුන්වා දීමෙන් පසුව තුනෙන් දෙකක ඡන්දයකින් සම්මත කරගත් අයවැය වෙනුවට පරිපූරක ඇස්තමේන්තුවකින් අවශ්‍ය සහන සැලසිය හැකිද යන්න ගැටලුවකි. රට හමුවේ පවතින බරපතළ ආර්ථික අර්බුදයේ ස්වභාවය අනුව එම අයවැයට ඔරොත්තු දීමේ හැකියාවක් නොමැතිවීම අරුමයක් නොවේ. අයවැයේ සමහර යෝජනා ආර්ථික අර්බුදයේ සැඩපහරට ගොදුරු වූ පරඬැල් බවට පත් වී තිබේ. එම අයවැය ඉදිරිපත් වූ දිනවලදීම විපක්ෂයේ සහ ඇතැම් ආර්ථික විශ්ලේෂකයන්ගේ අදහස වී තිබුණේ රටේ ප්‍රධානම ගැටලුව වන විනිමය අර්බුදයට අයවැයෙන් විසඳුමක් ඉදිරිපත් වී නැති බවය. රටට ඩොලර් ආදායම වර්ධනය කරගන්නා යෝජනාද අයවැයේ නොමැති බවට චෝදනාද නැගිණි. එහෙත් ඒවාට රජයේ පාර්ශ්වයෙන් ප්‍රමාණවත් පිළිතුරක් නොලැබිණි. අපට ඕන තරම් මුදල් තිබෙනවා වැනි කටකාර පිළිතුරු ලබාදුන් කිහිපදෙනකු හැර සෙසු අය සිටියේ නිහඬවය.
සර්ව පාක්ෂික සමුළුවේදී ඉදිරිපත් වූ නව සහන අයවැය පිළිබඳ යෝජනාව ආණ්ඩුවේ වියදම් අඩු කිරීමේ අරමුණින් ගෙන ඒමට සූදානම් නම් එය රටට කෙටිකාලීන සහ දීර්ඝ කාලීන වශයෙන් වාසියක් බව කිවහැකිය. එසේ වුවද එවැනි සහන අයවැයක් සඳහා කැබිනට් අනුමැතිය අවශ්‍ය බව මුදල් අමාත්‍යවරයා ප්‍රකාශ කර තිබිණි. එයින් අදහස් වන්නේ සර්ව පාක්ෂික සමුළුවේදී ගනු ලබන සියලු තීන්දු තීරණ සහ එකඟතා කැබිනට් මණ්ඩලය මගින් අනුමත විය යුතු බවය. එහෙත් ඒවා අමාත්‍ය මණ්ඩලය සංශෝධනය කළහොත් එය ගැටලුවක් බවට පත්වනු ඇත. මෙතෙක් කැබිනට් මණ්ඩලයේ අනුමැතිය ඇතිව ආර්ථිකය සම්බන්ධයෙන් ගනු ලැබූ තීරණවල සාර්ථක - අසාර්ථක බවද දැඩි විවාදයට තුඩු දී ඇති බව නොරහසකි.
සමුළුව පැවැත්වීමේ පරමාර්ථ පිළිබඳව ජනතාව එතරම් සංවේදී නොවුවත් එයින් ගනු ලබන තීරණ පිළිබඳව ඔවුන් සංවේදී වන බව අමතක නොකළ යුතුය. සහන අවැයක් ගැන කතාකරන විට රටේ බොහොමයක් ජනතාවට සිතෙන්නේ ළඟ එන අලුත් අවුරුද්ද අතේ තිබෙන මුදලට අනුව යහතින් ගත කිරීමට ඉඩක් ලැබෙනු ඇතැයි කියාය. එහෙත් ගෑස් නැති, තෙල් නැති, විදුලිය නැති තත්ත්වයක් තුළ කෑමට බීමට පමණක් දින කිහිපයකට සහන ලැබීමෙන් නම් පළක් නොවනු ඇත. ඒ අලුත් අවුරුද්දෙන් පසුවද ජනතාව යහතින් ජීවත් විය යුතු බැවිනි.
සර්ව පාක්ෂික සමුළුව ආරම්භයේදීම ජනාධිපති ගෝඨාභය රාජපක්ෂ මහතා ප්‍රකාශ කළේ මේ සමුළුව දේශපාලන වාසි අපේක්ෂාවෙන් සිදු නොකරන බවය. මෙය රට මුහුණ දී සිටින අර්බුදයට විසඳුම් සෙවීමේ අවංක අරමුණින් සංවිධානය කරන බවද ඔහු ප්‍රකාශ කර තිබිණි. අපගේ ප්‍රාර්ථනය වන්නේද සර්ව පාක්ෂික සමුළුව සියලුදෙනාගේ උත්සාහයෙන් විසඳුම් සොයන මෙවලමක් විය යුතු බවය. දේශපාලන මතිමතාන්තර මත ගැටෙමින් කාලය කා දැමීමට මෙවැනි වැදගත් සමුළුවක් යොදාගත යුතු නැත. එසේම මෙය දෙබස්වලට සීමාවන කතා සාප්පුවක් පමණක් වීමට ඉඩක් තැබිය යුතුද නැත. මේ සමුළුවට කැඳවා ඇත්තේ රට මුහුණ දී සිටින ආර්ථික අර්බුදය සඳහා යෝජනා සහ අදහස් ලබා ගැනීමේ අපේක්ෂාවෙන් බව සියලුදෙනා විසින් අවබෝධ කරගත යුතුය.
මොන සමුළුවක් කැඳවුවත් ජනතාවට සහන ලබාදීම එක රුයින් විසඳිය හැකි ප්‍රශ්නයක් නොවේ. ආණ්ඩුවේ වියදම් කපා දමා සහන අයවැයක් ඉදිරිපත් කිරීමෙන් පමණක් දැන් පවතින අර්බුදය විසඳෙන්නේ නැත. අර්බුදය නොවිසඳෙන තාක් ජනතාව විඳින පීඩා දිනෙන් දින උග්‍ර වීම නැවැත්විය නොහැක. මේ යථාර්ථය පිළිබඳ නිසි අවබෝධයක් ඇතිව තීරණවලට එළඹිය යුතු බවද පෙන්වාදීමට කැමැත්තෙමු.