ඉවසිය නොහැකි විදුලිය කැපීම
විදුලිය කැපිල්ල මුළු රටේම ලොකුම දුක්ගැනවිල්ල බවට පත් වී තිබේ. පෝලිම්වල විඳවිල්ල යටපත් කරමින් සිදුවන ලයිට් කැපිල්ල දැන් පවතින්නේ දරාගත නොහැකි මට්ටමකය. මේ වනවිට විදුලිය කපන වෙලාවට වඩා විදුලිය ලබාදෙන වෙලාව ප්‍රකාශ කිරීම වඩාත් පහසු වන බව ලංවිම ඉංජිනේරුවරුන් කියන තරමට තත්ත්වය බරපතළය. හෙට අනිද්දා වනවිට දවස පුරාම ලයිට් නැතිවන්නේදැයි විමසමින් සිටින තත්ත්වයක්ද උදා වී තිබේ.
මෙය සෙල්ලමක් නොවේ. රටේ සමස්ත ක්‍රියාකාරීත්වයම හකුළුවා දමන්නකි. විදුලිය කප්පාදුවට හේතු දහස් වාරයක් ජප කරමින් කිව හැකිය. අලුත් අවුරුද්දට පසුව එසේත් නැත්නම් ඊළඟ සතියේදී මේ සියලු ප්‍රශ්න අවසාන වනු ඇතැයි වැනි සිත නිවන කතා ඇති තරමට ප්‍රකාශ කළ හැකිය. එහෙත් යථාර්ථය නම් දවසේ පැය 24න් වැඩිම පැය ගණනක් විදුලිය නොමැති තත්ත්වයක පවතින ආසියාවේ එකම රට බවට අපේ රට ශ්‍රීඝ්‍රෙයන් පත්වෙමින් තිබෙන බවය. මෙය රටවැසියන් වශයෙන් අප කිසිවකුටත් දරාගත නොහැකි තත්ත්වයකි.
විදුලි ඉංජිනේරුවරුන් ප්‍රකාශ කරන්නේ තාප විදුලි බලාගාර පැය 24ම ක්‍රියාත්මක කරවීම සඳහා අවශ්‍ය තරම් ඩීසල් සපයනතුරු විදුලි කප්පාදුව නොනවතින බවය. ජල විදුලි බලාගාර ආශ්‍රිත පෙදෙස්වලට මැයි මාසය අග වනතුරු ප්‍රමාණවත් තරම් වැසි නොලබන බවට පුරෝකථනය වී තිබෙන බැවින් ජල විදුලිය නිෂ්පාදනය ගැන බලාපොරොත්තු තබාගත නොහැක. එසේනම් ඩීසල් ගැටලුවට විසඳුමක් ලැබෙන තුරු විදුලිය කප්පාදුව නවතින්නේ නැත. ජල විදුලිය නැතත් තාප බලාගාර සියල්ල ක්‍රියාත්මක කිරීම සඳහා ප්‍රමාණවත් තරම් ඩීසල් සැපයුමක් තිබෙයි නම් අඛණ්ඩව විදුලිය ලබාදීමට මණ්ඩලයට හැකියාව තිබෙන බවද ඉංජිනේරුවරු කියති. එසේ නම් සැබෑ ගැටලුව ඩොලර් සැපයීම ඇනහිටීම මිස වැසි නොලැබීම හෝ වෙනත් හේතුවක් හෝ නොවන බව ස්ථීරය.
තත්ත්වය එසේ නම් ආණ්ඩුව විදුලිය කප්පාදුව නවත්වා ගැනීමට හැකි වෙනත් විකල්ප මාර්ග හෝ සොයාගත යුතුය. විදුලිය කැපීමට සිදුවන බව මෙරට විදුලි ඉංජිනේරුවරුන් විසින් මුලදීම සිදුකළ ප්‍රකාශ බලධාරීන්ගේ අවධානයට යොමු නොවීම බලවත් අඩුපාඩුවක් වශයෙන් අපි දකිමු. ඉදිරියේදී සිදුවිය හැකි ව්‍යසනය හොඳින්ම හඳුනාගෙන එය වැළැක්වීමට ආණ්ඩුව පියවර ගත යුතුව තිබිණි. මේ ව්‍යසනය කොවිඩ් වසංගතය මෙම හඳුනාගත නොහැකි වූ හෝ මුළු ලොවම ග්‍රහණයට ගත් ව්‍යසනයක් හෝ නොවන බව බලධාරීහු හොඳින්ම දැන සිටියහ. එසේ දැනගෙනත් මුල සිට දිනකට පැයක හෝ විදුලිය කප්පාදුවකට ගියා නම් මේ තරම් දරුණු කැපිල්ලකට හසු නොවීමටද අවස්ථාවක් තිබිණි. ලැබුණු අවස්ථා පහසුවෙන්ම අතහරින දේශපාලන නායකයන් සිටින අපේ රටේ එවැන්නක් සිදුවීම පිළිබඳ එක් අතකින් පුදුම විය යුතුද නැත.
විදුලිය කැපීම නිවෙස්වල එදිනෙදා ජීවිතවලට සිදුකරන හානිය පමණක් නොව කර්මාන්ත, කෘෂිකාර්මික වැඩටද කාර්යාල සේවාවලටද සිදුකරන්නේ බරපතළ හානියකි. රටට ආදායම ගෙන එන වෙළෙඳ කලාප කම්හල් මුහුණ දී සිටින්නේද අනතුරුදායක තත්ත්වයකටය. පැය 24ම දුවන එවැනි කම්හල් බොහොමයක් තම ජෙනරේටර් ක්‍රියාත්මක කරවීමට අවශ්‍ය ඩීසල් නොමැති වීමෙන් නිෂ්පාදන ඉලක්ක සපුරා ගැනීමේ අවදානමකට මුහුණ දී සිටී. එය ඔවුන්ගේ ගැනුම්කරුවන්ගේ විශ්වාසය පවා අනතුරේ දැමීමකි. රටට ඩොලර් ආදායම් ලබාදෙන කර්මාන්ත පවා විදුලිය කැපිල්ලේ වින්දිතයන් බවට පත්වීම තරම් අවාසනාවක් රටට තවත් තිබිය නොහැක.
එපමණක් නොව තේ වතුවල දෛනික වැඩටද මෙයින් දැඩි බලපෑමක් එල්ල වී තිබේ. තමන්ගේ කර්මාන්තශාලාවලට අවශ්‍ය ඩීසල් සහ විදුලිය ලබාදීම නිසි ක්‍රමවේදයක් සකස් නොකෙරුණොත් තම කම්හල් වසා දැමීමට පවා සිදුවිය හැකි බවද ඔවුහු කියති. එසේම පාසල් අධ්‍යාපන වැඩට, අන්තර්ජාතික ව්‍යාපාර කටයුතුවලට, අන්තර්ජාල පහසුකම් ඇතුළු සියලු දේට විදුලිය කප්පාදුව හේතුවෙන් සිදුවී ඇත්තේ කිව නොහැකි තරම් හානියක් බවද පෙන්වා දිය යුතුය.
විදුලිය කප්පාදුව සහ ඊට අදාළ සැබෑ තත්ත්වයන් පිළිබඳව රජය රටේ ජනතාව අඳුරේ නොතැබිය යුතුය. ඩීසල් සපයා ගැනීම පිළිබඳව මුහුණ දී සිටින සැබෑ ගැටලු සම්බන්ධයෙන් රජය ජනතාව දැනුවත් කළ යුතුය. ඒ සම්බන්ධයෙන් විවිධ ඇමැතිවරුන් විවිධ ප්‍රකාශ කරන අතර ජනතාව අතර එයින් ගොඩනැගෙන්නේ අවිනිශ්චිත බවකි. මෙතරම් බරපතළ තත්ත්වයකදී රජය එක මතයක සිට කරුණු පැහැදිලි කරන්නේ නම් එය වඩාත් සුදුසු බව කිව යුතුය.
විදුලිය නැතිව තව කොතරම් කාලයක් ඉන්නට සිදුවේද යන ගැටලුවට විසඳුමක් රටේ ජනතාව බලාපොරොත්තුවෙන් සිටිති. ඉන්දියාවෙන් ලැබෙන ඩීසල් නැව් මගින් ඒ ගැටලු විසඳෙනු ඇතැයි යන බලාපොරොත්තුවද දැන් රටේ ජනතාව තුළ තිබේ. ඒ බලාපොරොත්තුව කඩ නොවන සේ කටයුතු කිරීම රජයේ වගකීමය.
