ගැටලු විසඳීමට එකතු වනු
ආණ්ඩුවේ මන්ත්‍රී පිරිසක් ස්වාධීන වීමත් සමඟ සරල බහුතරයක් සහිත ආණ්ඩුවක් බිහි විය. අස්වූ අමාත්‍යවරුන් වෙනුවට යළිත් පත්කිරීමේ කටයුතුද තවම සාර්ථක නැත. රටේ පාලනයට හවුල් වන්නැයි රජය කළ ඉල්ලීම විපක්ෂයේ දේශපාලන පක්ෂ සියල්ල විසින් ප්‍රතික්ෂේප කෙරිණි. ආණ්ඩුවේ හවුල්කාර පක්ෂද එම ඉල්ලීමට එකඟත්වය පළ කර නැත. දැන් ආණ්ඩුවක් තිබේ. විපක්ෂයක් ද තිබේ. එහෙත් රටේ වත්මන් ගැටලු එකක්වත් විසඳී නැත. ඒ සියල්ලම එලෙසම පවතී.
මෙවැනි තත්ත්වයකින් රටකට ඉදිරියට යාමට නොහැක. ජනතාවගෙන් විශාල පිරිසක් දිනපතා විරෝධතාවල නිරත වෙති. ඔවුන්ගේ ගැටලුවලට යම් තරමක හෝ විසඳුමක් නොලැබෙන්නේ නම් මේ විරෝධතා නවතින්නේ නැත. දින කිහිපයකින් මේ විරෝධතාවල උද්ඝෝෂණවල සැර බාල වී උණුසුම පහවී ජනතාව විඩාවට පත්වී සියල්ල යථා තත්ත්වයට පත්වනු ඇතැයි යන බලාපොරොත්තුවේ රජය රැඳී සිටින බවත් එවැනි අවස්ථාවකදී යළිත් රජය ක්‍රියාකාරී කර ගැනීමට හැකිවනු ඇති බවට අදහසක් රජය තුළ තිබෙන බවත් බැලූ බැල්මට පෙනී යයි.
එහෙත් රටේ මේ අරගලයට මූලික වූ සියලු ගැටලු එසේම තිබියදී ජනතාවගේ වීදි බැසීම නැවතී රට යථා තත්ත්වයට පත්වනු ඇතැයි බලාපොරොත්තු තැබීම අනුවණකමකි. රසායනික පොහොර ඉල්ලා වීදි බැස්ස ගොවීන් අදටත් එම සටනේ සිටින බවත් ඔවුන් තමන්ගේ ගැටලුවලට විසඳුමක් ලැබෙන තුරු සටන් අත්නොහරින බවත් පැහැදිලිය. අනෙක් අතට රටේ අනෙකුත් ගැටලුවලටද විසඳුමක් නොමැති තත්ත්වයක් දිගින් දිගටම පැවතුණහොත් රට අරාජක තත්ත්වයට පවා යොමුවීමට ඉඩ තිබේ. එසේ සිදුවුවහොත් එහි ප්‍රතිඵල අප සිතනවාට වඩා බරපතළ විය හැකි බව ආණ්ඩු පක්ෂයේ විපක්ෂයේ සියලු දේශපාලනඥයන් විසින් වටහා ගත යුතුය. ආපසු හැරිය නොහැකි තැනකට රට තල්ලු වෙනු බලා සිටීමට රජයටත් විපක්ෂයටත් නොහැක. ඔවුන් සියලු දෙනා මේ රටේ මහජන ඡන්දයෙන් පත්වූ නියෝජිතයන් බැවිනි. මහජනතාවට වගකීමට මේ සියලු මැති ඇමැතිවරු බැඳී සිටිති.
රජයට ඉල්ලා අස්වන ලෙසට සිදුකෙරෙන විරෝධතාවලට සහ උද්ඝෝෂණවලට හිස නැමීමට සූදානම් නැති බව රජයේ ප්‍රකාශවලින් පැහැදිලි වෙයි. පාර්ලිමේන්තුවේදී පසුගියදා සභානායක ජොන්ස්ටන් ප්‍රනාන්දු ඇමැතිවරයා තදින්ම ප්‍රකාශ කළේ ජනාධිපතිවරයා කිසිසේත් ඉල්ලා අස්නොවන බවය. එසේ නම් රට ඉදිරියට ගෙන යාමට සුදුසු වැඩපිළිවෙළක් රජය සතුව තිබිය යුතුය. එම වැඩපිළිවෙළ විපක්ෂයටත් ජනතාවටත් පිළිගත හැකි වැඩපිළිවෙළක් වීමද අවශ්‍යය. එය සිදු නොකර කල්මැරීම මෙවැනි ජනතා අරගලවලට විසඳුමක් නොවන බවද එයින් ගැටලුව තවදුරටත් ඔඩුදුවා ඕජස් ගලන තත්ත්වයට පත්විය හැකි බවද පෙන්වා දිය යුතුය.
රටත් ජනතාවත් අමාරුවේ නොදැමීමත් රටේ ආර්ථිකය යළි ගොඩනංවා ගැනීමත් සම්බන්ධයෙන් විපක්ෂයටද පැහැදිලි දැක්මක් තිබීමත් අවශ්‍යය. පාර්ලිමේන්තුව ඇතුළේ කෑකෝ ගැසීමෙන් විවිධ තර්ක විතර්ක ගෙනහැර පෑමෙන් රටේ වත්මන් සංකීර්ණ ගැටලුවලට විසඳුමක් ලැබෙන්නේ නැත. මේ රජය යටතේ කැබිනට් ඇමැති පදවි ගනිමින් රජයට සම්බන්ධ වීමට තමන්ගේ අදහසක් නැතැයි විපක්ෂය ප්‍රකාශ කර තිබේ. එසේ නම් ඔවුන්ටද කිසියම් හෝ විකල්ප වැඩපිළිවෙළක් තිබිය යුතුය. එවැනි විකල්පයක් තමන් සතුව නැත්නම් විපක්ෂයද මේ කරන්නේ ආණ්ඩුවේ කල්මැරීමේ සටකපට උපක්‍රමයේ කොටස්කරුවකු බවට පත්වීම පමණක් බවට වන හැඟීමක් ජනතාව තුළට කාන්දු වීමට ඉඩ තිබේ. පාර්ලිමේන්තුවේ සිටින මන්ත්‍රීවරුන් 225 දෙනාටම හෙණ ඉල්ලන තත්ත්වයකට ජනතාව වැටී සිටියදී විහිලු සපයමින් සිටීමට වගකිවයුතු විපක්ෂයකට හැකියාවක් නැති බවද පෙන්වා දිය යුතුය.
මේ සටහන තබන විටත් තීන්දු තීරණ ගැනීමට අවශ්‍ය කරන කැබිනට් මණ්ඩලයක් පත් කර නැත. ඉල්ලා අස්වූ මහ බැංකු අධිපති වෙනුවට පත්කරන ලද අලුත් අධිපතිවරයා දැන් වැඩ බාරගෙන තිබේ. එසේ වුවත් ජනාධිපති විසින් පත්කෙරුණු විශේෂ ආර්ථික කමිටුව විසින් ගනු ලබන තීරණ ක්‍රියාත්මක කිරීමට ආණ්ඩුවට හැකියාවක් තිබේද යන්න ගැටලුවකි. පාර්ලිමේන්තුව ඇතුළේ උගුර ලේ රහවන තුරු කෑගැසූ පමණින් එළියේ තිබෙන ප්‍රශ්න විසඳෙන්නේද නැත.
රටේ මහජනතාව බලාපොරොත්තු වන්නේ විදුලිය කප්පාදුව නැවතීමය. ගෑස්, ඩීසල්, කිරිපිටි පෝලිම් නවතිනු දැකීමටය. තමන්ගේ ස්වයංරුකියා ඇතුළු සියලු වෘත්තීන් රුකගැනීමටය. මේ වනවිට රෝහල් අත්‍යාවශ්‍ය ඖෂධ බරපතළ හිඟයකට මුහුණපා සිටින බවටත් මේ තත්ත්වය දිගටම පැවතුණහොත් තව සති දෙකකදී රෝහල්වල ඖෂධ නැතිව යනු ඇති බවටත් රජයේ වෛද්‍යවරු අනතුරු අඟවති. එළියේ ෆාමසිවලද පැනඩෝල් පෙත්ත පවා මිලදී ගන්නට නැත. මේ සියලු ගැටලු එලෙසම තිබියදී රජයත් විපක්ෂයත් පාර්ලිමේන්තුව ඇතුළේ දාදු කෙළීම ඉවසිය නොහැකිම තත්ත්වයයි.
