කර්මාන්තකරුවන්ගේ අඳෝනාව
ඉන්ධන මිල ඉහළ යාමත් අමුද්‍රව්‍ය හිඟයත් හේතුවෙන් දේශීය වශයෙන් ක්‍රියාත්මක වූ කුඩා හා මධ්‍ය පරිමාණ කර්මාන්තශාලා 5000ක් පමණ මේ වනවිට වැසී ගොස් ඇතැයි දේශීය ව්‍යාපාර සුරුකීමේ සභාව පසුගියදා සඳහන් කර තිබිණි. මේ නිසා දේශීය කර්මාන්ත සුරක්ෂිත කිරීමට වැඩපිළිවෙළක් සකස් කරන්නැයි ආණ්ඩුවට බල කිරීම සඳහා තමන් විරෝධතා ව්‍යාපාරයක් සිදු කරන බවත් එම සභාව ප්‍රකාශ කර තිබිණි.
දේශීය කර්මාන්තශාලා මුහුණ දී සිටින මේ බරපතළ ගැටලුව අද මුළු රටම මුහුණ දී සිටින ආර්ථික අර්බුදයේම කොටසකි. කුඩා කම්හල් වැසී යාම ඒවායේ සේවය කළ විශාල පිරිසකගේ රැකියා අහිමි වීමකි. එම කම්හල් ආශ්‍රිතව වෙනත් ව්‍යාපාර කළ බොහෝ දෙනකුගේ ආදායම නැති කිරීමකි. එසේම රජයට ලැබෙන බදු ආදායම පහත හෙළීමකි. මේ ලෙස රැකියා, ආදායම් මාර්ග අහිමිවීම රට මුහුණදෙන අර්බුදයේ සැබෑ ස්වරූපය තියුණු ලෙස පෙන්වා දී තිබේ.
මෙහි වඩාත්ම බරපතළ තත්ත්වය මේ කර්මාන්ත ගොඩ දාගත හැකි ක්‍රමයක් හෝ දිනයක් හෝ නිශ්චිත නොමැති වීමය. දේශීය ව්‍යාපාර සුරුකීමේ සභාව ප්‍රකාශ කරන්නේ පවතින අර්බුදයෙන් වඩාත්ම පහර වැදී ඇත්තේ දේශීය රෙදි පිළි කර්මාන්තයට බවය. එපමණක් නොව සම්භාණ්ඩ ඇතුළු දේශීය වශයෙන් ක්‍රියාත්මක වන සෑම කර්මාන්තයකටම මෙහි බලපෑම් ඇතිව තිබෙන බවද එම සභාව පෙන්වා දෙයි.
දේශීය කර්මාන්ත රුකගැනීම සඳහා ඔවුන් සිදු කරන බලපෑම් විරෝධතා රැලියකට සහ පාගමනකට පමණක් සීමාවීමෙන් මේ ගැටලුවට විසඳුම් සොයා ගැනීම කළ නොහැක්කකි. මෙය සමස්ත ආර්ථික අර්බුදයේ ගොදුරක් වී ඇති බැවිනි. අර්බුදයට ආර්ථික පමණක් නොව දේශපාලන විසඳුමක් පවා අවශ්‍ය වී ඇති මොහොතක දේශීය කර්මාන්ත රැකගැනීම සඳහා වෙනම වැඩපිළිවෙළක් සකස් කර ගැනීමට තිබෙන අවස්ථාව ඉතා අල්පය. යථාර්ථය එයයි.
එසේ වුවද කම්හල් 5000ක් පමණ සංඛ්‍යාවක් වැසී යාමත් ඒවායේ සේවය කළ පිරිසකට රැකියා අහිමිවීමත් නොසලකා සිටිය හැකි තත්ත්වයක් නොවේ. දේශීය කම්හල් පමණක් නොව මෙරට මහා පරිමාණයෙන් ක්‍රියාත්මක වන විශාල කර්මාන්ත පවා පවතින අර්බුදය හමුවේ දැඩි දුෂ්කරතාවලට මුහුණ දී සිටී. විදුලි කප්පාදුවත් ඩීසල් හිඟයත් රට පුරා පවතින විරෝධතාත් හේතුවෙන් තමන්ගේ නිෂ්පාදන කටයුතු අඛණ්ඩව පවත්වාගෙන යාමේ අසීරැකම් එම ආයතන හිමිකරුවන් විසින් මීට පෙර ආණ්ඩුවට දැනුම් දී තිබිණි. තම නිෂ්පාදන ඉලක්ක සපුරාගත නොහැකි වුවහොත් තමන්ගේ ආයතන වෙනත් රටවලට ගෙන යාමට සිදුවනු ඇති බවටද ඔවුන් අනතුරු අඟවා තිබිණි. එසේ වුවහොත් රටට දැනට ලැබෙමින් තිබෙන සීමිත ඩොලර් ආදායමද අහිමි වනු ඇත. රැකියා ලක්ෂ ගණනින් නැතිවනු ඇත. එවැනි තත්ත්වයක් රටට කිසිසේත්ම දරාගත හැකි වන්නේ නැත.
රටේ පවතින ඉතා සංකීර්ණ වූත් අතිශය අනතුරැදායක වූත් ආර්ථික සහ දේශපාලන අර්බුදයට විසඳුම් සෙවීම ප්‍රකාශ නිකුත් කිරීමෙන් සහ මාධ්‍ය සාකච්ඡා පැවැත්වීමෙන් පමණක් කළ නොහැක. දේශපාලන අර්බුදය දිග්ගැසෙන තරමට ආර්ථික අර්බුදය ද ඇදී යනු ඇත. මේ කර්මාන්තකරැවන් හඬ නගා කියන්නේ එම ඛේදවාචකයේ සැබෑ දිග පළලයි. ඒ ගැන නිසි අවධානය යොමුකර හැකි ඉක්මනින් විසඳුමක් ලබා නුදුන්නොත් රට මහත් විපතකට පත්වනු වැළැක්විය නොහැක.
රට පුරා පැවැත්වෙන විරෝධතා ව්‍යාපාර ඇතුළේ දේශීය කර්මාන්ත වැසී යාමෙන් රැකියා අහිමි වූ තරැණ තරුණියන්ද සිටිනු ඇත. තවදුරටත් විරෝධතා දිග්ගැසුණොත් තමන්ගේ අනාගතය අහිමි වනු ඇති බවට එවැනි තරුණ තරැණියන් තුළ පවතින අසහනය තවදුරටත් මෝරා ගොස් ඔවුන් සාමකාමී විරෝධතා වෙනුවට වෙනත් විකල්ප තෝරාගැනීමට පවා ඉඩකඩ තිබේ. මේ බව ආණ්ඩුවේ බලධාරීන් අවධානයට ගත යුතුය. හැකි තරම් ඉක්මනින් මේ ගැටලුවලට විසඳුම් ලැබිය යුතුය.
පාර්ලිමේන්තුව පසුගිය දින කිහිපය තිස්සේම රුස්වුවද රටේ කැකෑරෙන මේ ගැටලු සම්බන්ධයෙන් ප්‍රමාණවත් අවධානයක් යොමු වූයේ නැත. තවමත් ඒ පාර්ලිමේන්තුවේ කතා කරන්නේ තම තමන්ගේ දේශපාලන බලය රැකගැනීම සඳහා ගන්නා ක්‍රියාමාර්ග ගැන මිස රටේ පුපුරා යාමට ආසන්න අර්බුදයට ලබා දිය හැකි විසඳුම් නොවේ. මේ තත්ත්වය ගැන ආණ්ඩුවත් විපක්ෂයත් යථා අවබෝධයකින් තොරව කටයුතු කළොත් ආපසු හැරිය නොහැකි භයානක අන්තයකට රට තල්ලු වීම වැළැක්විය නොහැකි වනු ඇත.