තෙල් පෝලිමේ මැරයන් පන්නනු
තෙල් පෝලිම් මේ රටේ සකල ජනජීවිතය කරකවා අතහැර තිබේ. එය නිමවෙන දවසක් ගැන සිතා ගැනීමත් අපහසුය. ඉන්ධන ගැටලුව සම්පූර්ණයෙන් විසඳීමට තව කාලයක් ගතවන බව පසුගියදා ආණ්ඩුවේ ඉදිරි මාර්ග සිතියම (ගමන් මග) පාර්ලිමේන්තුවේදී සභාගත කරමින් අග්‍රාමාත්‍ය රනිල් වික්‍රමසිංහ මහතාද ප්‍රකාශ කර තිබිණි. ඉතා පරෙස්සමෙන් ඉන්ධන භාවිත කරන ලෙසද ඔහු ජනතාවගෙන් ඉල්ලීමක් කළේය.
ඉන්ධන ගැටලුව කොතරම් බරපතළදැයි හරියට දැනගැනීමට තෙල් පෝලිමකට යා යුතුය. එහි වරු ගණන් ගතකළ යුතුය. දැන් මේ වනවිට ඉන්ධන පෝලිම්වල ඇතිව තිබෙන සැබෑ තත්ත්වය එවිට අවබෝධ කරගත හැක. මුල සිට කිසියම් විනයකට යටත්ව ක්‍රියාත්මක වූ තෙල් පෝලිම්වල උණුසුම වැඩිවී ජනතාව ආවේගශීලී වූයේ තෙල් බවුසර් පැමිණීම ක්‍රම ක්‍රමයෙන් අඩු වී ගිය බැවිනි. දින කිහිපයක් ඩීසල් නොලැබී යාම නිසා රටේ පෞද්ගලික බස් ධාවනයද සම්පූර්ණයෙන් අඩපණ විය. යාන්තමින් එම තත්ත්වය මගහැරී ගියද පෙට්රල් පෝලිම් වල තත්ත්වය යළිත් බැරූරුම් අතට හැරෙමින් තිබේ. මුලින් කිලෝමීටරයක් පමණ දුරකට ඇදී ගොස් තිබූ පෙට්රල් පෝලිම මේ වනවිට කිලෝමීටර දෙක තුනක් දක්වා දිගු වී තිබේ. එය ජනතාවට මහත් පීඩාකාරී අත්දැකීමකි. නමුත් ඊටත් වඩා බරපතළ ගැටලුවක් දැන් මතුවෙමින් තිබෙන්නේ එම පීඩාකාරී තත්ත්වය තවදුරටත් තීව්‍ර කරමිනි.
මේ තත්ත්වය උදා වී ඇත්තේ තෙල් පෝලිම්වලට පාතාලයේ මැරයන් සහ බේබද්දන් කඩාපාත් වීම හේතුවෙනි. මුල් කාලයේදී තෙල් බෙදාහැරීමේදී පැන නගින ගැටලු බේරුම්කරුවන් බවට පත්ව සිටියේ පෝලිමේ සිටින පිරිසමය. ඇතිවීමට ගිය සුළු සුළු ආරවුල් ඔවුන් මැදිහත් වී විසඳූ අතර එම ගැටුම් ගෝරි බවට පත් වී කපා කොටා ගැනීම් වාර්තා වූයේ කිහිප අවස්ථාවකදී පමණි. එහෙත් පෝලිමේ වරු ගණන් රස්තියාදු වී පැමිණි වාහනවලට කෙසේ හෝ තෙල් ලබාගෙන ආපසු යාමට හැකියාවද තිබිණි. නමුත් දැන් තත්ත්වය වෙනස් වී ඇත්තේ පාතාල චණ්ඩින් සහ බේබද්දන් විසින් ඉන්ධන පිරවුම් හල්වල තම අණසක පැතිරවීමට ගන්නා උත්සාහයද සමඟිනි.
බොහොමයක් පිරවුම් හල්වලට තෙල් බවුසර පැමිණීමත් සමඟ මේ මැරයන් පිරිස ක්‍රියාත්මක වෙති. ඔවුන් තමන්ගේ හිතවතුන්ට පෝලිමෙන් පිට තෙල් ලබා දීමට විවිධ උප්පරවැට්ටි යොදති. වෙනත් වාහන පෝලිමේ තබා ඒවා ඉවත් කරගෙන තමන්ගේ ගැනුම්කරුට වාහනය දමා ගැනීමට පාර හදති. මුලදී මෝටර් සයිකල් සහ ත්‍රිරෝද රථ පෝලිම් පමණක් මේ මැරයන්ට ගොදුරු වුවද දැන් දැන් මේ තත්ත්වය සෙසු වාහන පෝලිම් කරාද පැතිරෙමින් තිබේ. මේවාට විරුද්ධ වීමට සාමාන්‍ය ජනතාව ඉදිරිපත් වන්නේ නැත. එසේ ඉදිරිපත් වන සියලුදෙනා තග දමා නිහඬ කිරීමට මේ මැරයන්ගේ ගෝලයෝ ක්‍රියා කරති. කනගාටුවට කරුණ ඔවුන් මේ චණ්ඩිකම් කරන්නේ පොලීසිය බලා සිටියදීම වීමය.
මේ චණ්ඩිකම්වලට &අත්‍යාවශ්‍ය සේවා* ලේබලයේ පිහිට ලැබෙන අවස්ථාද තිබෙන බවට පැමිණිලි තිබේ. එම ලේබලය යටතේ පැමිණෙන ඇතැම් ප්‍රාදේශීය දේශපාලකයන්ගේ ගෝල පිරිසට පෝලිමට පිටින් ඇවිත් තෙල් ලබාදීමට උදව් දෙන්නේ පිරවුම්හල් පාලනය සියතට ගෙන කටයුතු කරන මැරයන් පිරිසය. පෝලිමේ වරු ගණන් නිදිවරාගෙන රස්තියාදු වූ පිරිසට ඉතිරි වන්නේ හිස් අතින් ආපසු හැරීම පමණි. මේ තත්ත්වය නොඉවසන අයට මැරයන්ගේ රුවුම් ගෙරවුම්වලට මුහුණදීමට සිදුවෙයි. මේ තත්ත්වය ඇතිවීමට ඇතැම් ඉන්ධන හල් හිමියන්ද පොම්පකරුවන්ද වගකිවයුතු බව බොහෝදෙනාගේ අදහසය. විශේෂයෙන් ඉන්ධන හල් හිමියන් වගකීමෙන් යුතුව කටයුතු කරන්නේ නම් පොලීසියද සමඟ එක්වී මේ තත්ත්වය පාලනය කළ හැකි බව ඔවුහු කියති. එහෙත් එය සිදු නොවීමත් ඇතැම් ප්‍රාදේශීය දේශපාලන නායකයන්ගේ අත පෙවීමත් නිසා මේ තත්ත්වය දිනෙන් දින බරපතළ තත්ත්වයට හැරෙමින් තිබේ. එය කොළඹ දිස්ත්‍රික්කයේ ඇතැම් ඉන්ධන හල් කරාද පැතිර යමින් තිබීම භයානක පෙරනිමිත්තකි.
පිරවුම්හල් වල ආරක්ෂාවට සිටින පොලිස් නිලධාරීන් මේ තත්ත්වය පිළිබඳ රජයේ වගකිවයුත්තන්ට දන්වා ඇතිදැයි අපි නොදනිමු. එහෙත් මේ සම්බන්ධ මාධ්‍ය වාර්තා පසුගිය දිනවල පළවිය. එම වාර්තා බලධාරීන්ගේ අවධානයට යොමු වන්නට ඇතැයි අපි විශ්වාස කරමු. පවතින තත්ත්වය තවදුරටත් ව්‍යාප්ත වී පිරවුම්හල් පාලනය පාතාලයේ අතට පත් වීමට ඉඩහැර බලා සිටියොත් වෙන්නේ මහා වින්නැහියක් බව සඳහන් කළ යුතුය.
ඉන්ධන පිරවුම්හල් වල පෝලිම් පාලනය කරන මේ මැරයන්ගේ ක්‍රියා නතර කිරීමට අප්‍රමාදව කටයුතු නොකළොත් දැනට සීමිතව සිදුකෙරෙන තෙල් බෙදාහැරීමේ කටයුතු පවා අවුල් වී යාමට ඉඩ තිබෙන බව පෙන්වාදීමට කැමැත්තෙමු. අද පෝලිමට තබන පාතාල මැරයන්ගේ අත පිරවුම් හලේ ලාච්චුවට තබන දිනය වැඩි ඈතක නොවන බවද ඒ සමඟ කිව යුතුය.