ජනවරම පොහොට්ටුවට තිබුණට ජනමතය දැන් පිරිහිලා
පාර්ලිමේන්තු මන්ත්‍රී දයාසිරි ජයසේකර (ශ්‍රී ලංකා නිදහස් පක්ෂය)
- ත්‍රස්තවාදීන්ට ඉඩක් නොදිය යුතු බවට ජනාධිපති කියන කතාව ඇත්තක්
- මෙච්චර ප්‍රශ්න මැද්දේ රාජපක්ෂලා එනවා කියන පණ්ඩිත - උද්ධච්ච පිරිසකුත් ඉන්නවා
- මැතිවරණයක් තැබිය යුතු නිරවුල් මනසක ජනතාව මේ වෙලාවේ නෑ
- පොහොට්ටුවේ අයට සිදුවූ දේ නිසා ඔවුන් ඉන්නේ වෛරයකින්
- මේ රට තවදුරටත් අරාජික වීමට ඉඩ තැබිය යුතු නෑ
- මෛත්‍රීපාල මහතා කතානායක වෙනව නම් අපි කැමතියි
- සර්ව පාක්ෂික ආණ්ඩුව අපි හැදූ දරුවෙක්
- තනියෙන් බලය අල්ලන්න සිතන එක ඉතා ආත්මාර්ථකාමීයි
- දූෂිත පුද්ගලයන් එක්ක අපට වාඩිවෙන්න බෑ
මේ වෙද්දී අලුත් ජනාධිපති කෙනෙක් පත්වෙලා ඉන්නේ. දැන් ඔබලා දරන මතය වෙන්නේ මේ ජනාධිපතිට වැඩ කරන්න ඉඩ දෙන්න ඕන කියලද?
ජනාධිපතිවරයා තෝරාගැනීමේ ඡන්දයෙදී ඔබ දන්නවා ශ්‍රී ලංකා නිදහස් පක්ෂය සහාය දැක්වූයේ ඩලස් අලහප්පෙරුම මන්ත්‍රීතුමාට. ඒත් දිනන්නේ වර්තමාන ජනාධිපතිතුමා. එළියේ කවුරු මොනව කිව්වත් එතුමා නිවැරදි ක්‍රමයට ජනාධිපතිවරයා හැටියට පත්වෙලා ඉවරයි. ඒ වගේම තවදුරටත් මේ රට අරාජික වෙන්න ඉඩ තියන්න බෑ. ඒ තැනක නෙමෙයි මේ රට තියෙන්නේ. මොකද රට කඩාවැටිලා තියෙන්නේ. ඒ වගේ වෙලාවක කවුරු වුණත් රට ගොඩගන්න උත්සාහ ගන්නවා නම් ඒ වෙනුවෙන් සහාය දෙන තැනක තමයි අපේ පක්ෂය තියෙන්නේ.
කොහොමද ඒ සහාය දක්වන්න අදහස් කරන්නේ?
අපි ජනාධිපතිවරයා සමඟ සාකච්ඡා වට දෙකක් තිබ්බා. එහිදී කාරණා කීපයක් සමඟ කතා කරලා එකඟතාවයට ආවා. ඉතිං අපේ සහාය කොහොමද දෙන්නේ කියන එක ඉදිරි සාකච්ඡා එක්ක තීරණය වෙයි. අපි තනතුරු ගන්නවද නැද්ද එහෙම කියලා.
ඔබලාගේ යෝජනා සහ අදහස් සම්බන්ධයෙන් වර්තමාන ජනාධිපතිවරයාගෙන් සාධනීය ප්‍රතිචාරයක් තියෙනවද?
ඔව් අනිවාර් යෙන්. අවුරුදු හතළිහක් පමණ පාර්ලිමේන්තුවේ හිටිය කෙනෙක් හැටියට එතුමා දන්නවා සර්වපාක්ෂික ආණ්ඩුවක තියෙන වටිනාකම. එතුමා පාර්ලිමේන්තුවේදීත් කිව්වා අපිට 225ම ආණ්ඩුවක් මිසක් කට්ටියකගේ ආණ්ඩුවක් නෙමේ කියලා. එතුමා ඒ ගැන හොඳ අවබෝධයකින් ඉන්නේ.
සමහර විපක්ෂයේ අය නම් සර්වපාක්ෂික ආණ්ඩුවට එකඟ නෑ. ඔවුන් කියන්නේ මේක අටවගන්න හදන දෙයක් කියලා. ඇත්තටම මේ වෙලාවේ සර්වපාක්ෂික ආණ්ඩුවක වටිනාකම මොකක්ද?
මේ රට වැටිලා තියෙන වෙලාවේ සියලුම පක්ෂ එකතුවෙලා මේ රට හදන එක තමයි වැදගත් වෙන්නේ. විශේෂයෙන් බහුතර බලය තිබ්බ පොදුජන පෙරමුණ මේ වෙද්දී කඩා වැටිලා තියෙන්නේ. එළියේ සමාජය ඇතුළේ එම පක්ෂය සම්බන්ධයෙන් ජනමතය පිරිහිලා තියෙන්නේ. ඒ පක්ෂය දැන් වලංගු සාධකයක් නෙමෙයි. ඉදිරියේදී විශාල අභියෝග රුසකට මේ ආර්ථිකයත් එක්ක මුහුණ දෙන්න වෙනවා. ඒ මොහොතේදී සියල්ල එකතු කළා ඒ වෙනුවෙන් වැඩකටයුතු කරන්න ඕන කැපවීමෙන්. ඒ නිසයි මේ සර්වපාක්ෂික ආණ්ඩුවේ වටිනාකම තියෙන්නේ.
හැබැයි කණ්ඩායමක් තවම සර්වපාක්ෂික ආණ්ඩුවකට විරුද්ධයි?
සමහර පක්ෂ ඉන්නේ බලය තනියෙන් අල්ලන්න ඕන කියන තැනක. ඒ අය හිතන්නේ රට කඩා වැටුණට පස්සේ බලය ගන්න පුළුවන් වෙයි කියලා. ඒක ඉතාම ආර්මාර්ථකාමී තීරණයක්. ඒ විනාශය අවසානයේදී අපිට කිසි දෙයක් ඉතුරු වෙන්නේ නෑ. මොකද දේශපාලනය කරන්නත් රටක් තියෙන්න ඕන. ඒ නිසා මේ වෙලාවේ සියලුදෙනාම එකතුවෙලා වැඩ කළ යුතුයි පටු අරමුණුවලට නොගිහින්.
21 වැනි ව්‍යවස්ථා සංශෝධනයට අත උස්සන්නේ නැතුව ගමට එන්න එපා කියන්න කියලා පාක්ෂිකයන්ට කිව්ව ඔබට හිතෙන්නේ නැද්ද සර්වපාක්ෂික ආණ්ඩුවක් වෙනුවෙනුත් ඒ බලපෑම ජනතාවගෙන් ඕන කියලා?
ඒක තමා අපි තමයි ඉස්සෙල්ලම සර්වපාක්ෂික ආණ්ඩුවක් සම්බන්ධයෙන් මාස හයකට පෙර කතා කළේ. පස්සේ ගෝඨාභය රාජපක්ෂ ජනාධිපතිවරයාගේ කාලයේ සර්වපාක්ෂික සමුළුවකුත් තිබ්බා. ඒත් අවසානයේ ඔහු කළේ අපේ පක්ෂයේ හතරක් කඩලා පක්ෂය විනාස කරපු එක. ඒකේ ප්‍රතිඵල අවසානයේ එතුමට විඳින්න වුණා. ඒක රාජපක්ෂවරුන්ගේ ඉතිහාසගත ක්‍රමය. ඒ නිසා අනාගතයේ එවැනි දෙයක් නොවන්න තමයි අපි ජනතාව දැනුවත් කරලා මේ දේ සිදුකරන්නේ.
සර්වපාක්ෂික ආණ්ඩුවක් හැදුවම ඉන්න ඇමැති මණ්ඩලය ලොකු වෙයිනේ?
අපේ යෝජනාව තමයි කැබිනට් මණ්ඩලය පොඩි වෙන්න ඕන කියන එක. ඒ වගේම ගෝඨාභය රාජපක්ෂ මහත්තයා විසින් ඉවත් කරන ලද හොරු, දූෂිත අයව මේ කැබිනට් මණ්ඩලයට ගන්න එපා කියන යෝජනාව ගෙනාවා. අපිට දූෂිත පුද්ගලයෝ එක්ක එකට වාඩිවෙන්න බෑ. මොකද වැදගත් මිනිස්සු එක්ක මේක කරන්න ඕන.
ඔබලා පක්ෂයක් හැටියට සර්ව පාක්ෂික ආණ්ඩුවකදී කතානායක ධූරය ඉල්ලා සිටියද?
අපි එවැනි ඉල්ලීමක් කරලා නෑ. ඒත් සර්ව පාක්ෂික ආණ්ඩුවකදී යම්කිසි එකඟතාවයකින් වැඩ කරන්න පුළුවන් කතානායකවරයෙක් හැටියට පත් කරනවා නම් ඉන්නේ අපේ මෛත්‍රීපාල ජනාධිපතිතුමා. එහෙම වෙනවා නම් ඒකට කැමතියි.
දැන් තවම පාර්ලිමේන්තුව ක්‍රියාත්මක වෙන්නේ ජනවරම එක්ක. ඒත් ජන මතය වෙනස්. ඒ නිසා ගොඩක් අය කියන්නේ ඡන්දයකට යන්න ඕන කියලා. ඒ ගැන මොකක්ද ශ්‍රීලනිප අදහස?
ඔව් ඔබ කියනවා වගේම ජනවරම තියෙන්නේ තවම පොහොට්ටුවට. ඒත් ජන මතය පිරිහිලා තියෙන්නේ. ඒ නිසා තවදුරටත් පොදුජන පෙරමුණ ආණ්ඩුවක් හදන එක නෙමෙයි කරන්න ඕන. ඒ වගේම කියන්න ඕන ජන මතය මේ වෙලාවේ හරිම කැළඹිලි සහගතයි. ව්‍යාකූලයි. විකෘති වෙලා තියෙන්නේ. ඔවුන් වෛරයකින් ඉන්නේ. නිරවුල් මනසකින් නෙමෙයි ජනතාව ඉන්නේ. මේ මෑතකදී කරපු සමීක්ෂණයකදී තහවුරු වුණා 58෴ක් විතර කිසිම කෙනෙක් ඡන්දය දාන අදහසක නෑ. ඒ නිසා මේ වෙලාවේ ඉතාම අවිනිශ්චිතයි. ඒ නිසා වෙන්න ඕන ජනතාවට නිරවුල් මනසකින් ඡන්දය ප්‍රකාශ කිරීමේ නිදහසක් හදලා දෙන්න ඕන.
ඒ කියන්නේ ඡනවරම පාවිච්චි කළොත් රට අවුල් වෙයි කියලද කියන්නේ මේ වෙලාවේ?
ඔව් පැහැදිලිවම. ඒක තමා අපි කියන්නේ මේ වෙලාවේ අවුල්. ඒ නිසා මැතිවරණයක් දැන්ම අවශ්‍ය නෑ.
ජනාධිපතිගේ සැලැස්ම එදා රාජසන කතාවෙදී එතුමා කළා. එතුමගේ සැලැස්මට සමහර විට ඔබලා එකඟ නැතුව ඇති. ශ්‍රීලනිපයට ආර්ථිකය ගොඩගන්න සැලැස්මක් තියෙනවද?
එදා ජනාධිපතිතුමාගේ කතාව ඉතාම සමබර කතාවක්. එතුමා සියලු කොටස් අංශ එක හා සමානව ස්පර්ශ කරලා කතා කළා. එතුමා කිව්ව දේවල් එක්ක අනාගතයේ වැඩ කළොත් ඒක ඉතාම වටිනවා. හැබැයි ඒ සඳහා සියලු පක්ෂ එකතුවෙලා අදහස් ගත යුතුයි කියන අදහසේ මම ඉන්නේ.
සිස්ටම් එක චේන්ජ් වෙන්න නම් විශේෂයෙන් රාජ්‍ය සේවයත් ඒ ආකාරයෙන්ම වෙනස් විය යුතුයි නේද?
ඔව් අනිවාර් යෙන්. ඒ ගැන අපි ජනාධිපතිතුමා එක්ක කතා කළා. විශේෂයෙන් සභාපතිවරු අධ්‍යක්ෂවරු පත් කරද්දි සුදුසු අය දාන්න කියලා. ඒ වගේම පැවති පාලනය තුළ රාජ්‍ය සේවය ක්‍රියාත්මක වුණු ආකාරය ගැනත් හොයලා බලන්න කියලා අපි කියලා තියෙන්නේ. මොකද ඒ තැන් පවා වෙනස් වෙන්න ඕන.
දැන් මේ වෙද්දී අරගලකරුවන්ව අත්අඩංගුවට ගැනීම් දිගින් දිගටම සිදුවෙනවා. මේක මර්දනයක් නේද?
අපි අරගලකරුවන් එක්ක සාකච්ඡා කරන වෙලාවේ ඒ අයගෙන් ඇහුවා ගෝඨාභය රාජපක්ෂ මහත්තයා ඉවත් කරලා කවුද ගේන්නෙ කියලා. ඒ වෙලාවේ එයාලා මහා පණ්ඩිත උත්තර දුන්නේ. මෙයාව ඇරලා පස්සේ බලමු කිව්වා කවුද ගේන්නේ කියලා. ඕවා මම ප්‍රශ්න කළා. ඒ නිසා දැන් ඒවට අඬලා වැඩක් නෑ. තමන්ට විපත ගෙන්න ගත්තෙම මේ අරගලකරුවන් තමයි. ඒ වගේම ජනාධිපතිතුමා කියන කතාවේ ඇත්තක් තියෙනවා. ඒ ත්‍රස්තවාදීන්ට ඉඩ ලබා නොදිය යුතුයි කියලා. රෑපවාහිනියට පැනලා ඒක අල්ලගෙන කටයුතු කරපු දේවල් පිළිගන්න බෑ,
අරගලකරුවෝ ත්‍රස්තවාදීන්ද?
නෑ. සැබෑ අරමුණකින් ආපු ජනතාවක් ඔතන හිටියා. ඒ අය බලාපොරොත්තු වුණේ ලස්සන රටක් හදන්න. ඒත් එක එක කල්ලි කණ්ඩායම් මේක අල්ලගත්තා. එතනින් පස්සෙයි මේක වෙනස් වුණේ. පස්සේ අර අවංක අරමුණ වෙනුවෙන් පෙනී හිටිය අය අයින් වුණා. අවසානයේ අහන්න වුණා රස්තියාදුකාර පිරිසක් ඉන්නෙ කියලත් සමහරුගෙන්. එවැනි තත්ත්වයක් ඇතිවුණේ ඔවුන් හිතාගෙන හිටියා ඔවුන් තමයි රට පාලනය කරන්නේ කියලා. ඒ තැනට පත්වුණා.
ඒ කියන්නේ අරගලකරුවෝ වැරදී?
නෑ නෑ. මේ සීමිත පිරිසක්. ඒ අය තමයි මේ ප්‍රශ්නය ඇති කළේ.
සමහර අය කියනවා මේ මර්දනයේ ඉන්නේ පොහොට්ටුවේ අය කියලා?
ඔව්. එහෙම තත්ත්වයක් තියෙනවා. ඔවුන්ට වෛරයක් තියෙනවා ඔවුන්ට වුණු දේත් එක්ක.
ඒ කියන්නේ ඔවුන් ජන මතය ගැන විශ්වාස කරන්නේ නෑ?
නෑ. ඔවුන් එහෙම හිතන අය නෙමෙයිනේ. ඔවුන් මහ අධිපතිවාදී පණ්ඩිත උද්දච්ඡ පිරිසක්නේ ඉන්නේ. මෙච්චර ප්‍රශ්නය මැද කියනවනේ රාජපක්ෂලා එනවා කියලා. ඔළුවක් නැති මිනිස්සු. ඔවුන් කවදත් ඉගෙන ගන්නේ නෑ. ඒ නිසා ඔවුන්ට ඒක උගන්නන්න නම් ඡන්දයක් ආපුවම ගෙදර යවන්න ඕන. මොකද ඔවුන් තවත් හිතනවා ඔවුන් හරි කියලා.
යම් විදිහකින් සර්ව පාක්ෂික ආණ්ඩුවට අනෙක් පක්ෂ එකඟ නොවුණොත් ශ්‍රීලනිපය ජනපති එක්ක එකට හිටගන්නවද?
අපි කිව්වා එතුමට පුළුවන් තරම් පක්ෂ එකතු කරගන්න කියලා. ඒ සඳහා අපි පූර්ණ සහය දෙනවා කියලා. මොකද අපි ඒ වෙනුවෙන් පෙනී ඉන්නවා. මොකද ඒ අපි හදපු දරුවා. අපි හිතනවා මෙතුමා ඒක කරයි කියලා. ගෝඨාභය රාජපක්ෂ ජනාධිපතිවරයට වඩා සංයමකින් මේක විසඳලා සාර්ථක කර ගනීයි කියලා.
ගයාන් ගාල්ලගේ