ක්‍රියාවට නැංවිය යුතු කතාවක්
සර්ව පාක්ෂික ආණ්ඩුවකට සියලු දේශපාලන පක්ෂවල මන්ත්‍රීවරුන්ට මිත්‍රත්වයේ හස්තය දිගු කරමින් රට ආර්ථික වශයෙන් සුඛිත මුදිත කර ජනතාව දුකින් මුදාගැනීම සඳහා සැවොම එක්වෙමු යන පණිවුඩය රනිල් වික්‍රමසිංහ ජනාධිපතිවරයා පසුගිය බදාදා (03) රටටම ලබා දුන්නේය. එම අවස්ථාව රනිල් වික්‍රමසිංහ මහතා මේ රටේ ජනාධිපතිවරයා වශයෙන් සිය ප්‍රතිපත්ති ප්‍රකාශය ඉදිරිපත් කළ පළමු අවස්ථාවද විය. රට තුළ තිරසාර ආර්ථික පුනරුදයක් ඇති කිරීම සඳහා ජාතික ප්‍රතිපත්තියක් සකස් කරන බවටද වික්‍රමසිංහ මහතා ප්‍රතිඥා දුන්නේය. සමස්තයක් වශයෙන් ගත් කල ජනාධිපතිවරයාගේ ප්‍රතිපත්ති ප්‍රකාශය ඉතා වටිනා අදහස් ගැබ් වූ රටේ අනාගතය ඉහළට ඔසවා තබන යෝජනා රාශියකින් සමන්විත බව බැලූ බැල්මටම පෙනී යයි.
මේ යෝජනා වසර 45ක අඛණ්ඩ පාර්ලිමේන්තු ඉතිහාසයක් ඇති රනිල් වික්‍රමසිංහ මහතාගේ දේශපාලන කෘතහස්තභාවයේත් රාජ්‍ය පාලන අත්දැකීම් සහිත පළපුරුද්දේත් සංකලනයකි. මේ ප්‍රතිපත්ති වචනයෙන් ක්‍රියාවට නැංවීමේදී මුහුණ දීමට සිදුවන අවහිර, බාධා පිළිබඳ සැබෑ අවබෝධයක්ද වික්‍රමසිංහ මහතා සතුව ඇති බව නොරහසකි. සියලු දෙනාගේ එකඟත්වයෙන් බොහෝ වැදගත් තීන්දු ගැනීමට තමන් තුළ තිබෙන අභිලාෂය ඒ මහතා ප්‍රකාශ කළේ එම අවබෝධය හේතුවෙනි. මහ පාරක මඩ වතුර බස්සන කාණුවකට බෝක්කුවක් ඉදිකිරීම පවා අඬබෙර ගසා බෝඩ් එල්ලන දේශපාලන සංස්කෘතියක් තිබෙන අපේ රටේ මෙවැනි යථාර්ථවාදී වැඩපිළිවෙළක් ක්‍රියාත්මක කිරීම කොතරම් දුෂ්කරදැයි තේරුම් ගැනීම අපහසු නැත. කොතරම් අපහසු වුවද දුෂ්කර වුවද එවැනි වැඩපිළිවෙළකින් තොරව රටට ඉදිරි ගමනක් පිළිබඳව සිතන්නටවත් හැකියාවක් නැත.
සියලු දේශපාලන පක්ෂ රටේ අනාගත සුබසිද්ධිය පාර්ථනා කරන්නේ නම් ජනාධිපතිවරයා පෙන්වා දෙන ලද කරුණු ගැඹුරින් විමසා බැලිය යුතු බව අපි සිතමු. ඒ සියල්ලට සියලු දෙනා එකඟ විය යුතු බවක් ඉන් අදහස් නොකෙරේ. එහෙත් අද රට වැටී තිබෙන්නේ තවදුරටත් කාලය කා දැමිය හැකි තත්ත්වයක නොවේ. කන්න බොන්න නැති, වාහනයට තෙල් ටිකක් ගන්න දවස් ගණන් පෝලිම්වල සිටිය යුතු, ලැබෙන මාසික වැටුප සතියෙන් දෙකෙන් වාෂ්ප වන අධික ජීවන වියදමකින් පීඩා විඳින රටක් අනාගතය ගැන සිතිය යුතු වන්නේ තනි තනිව නොව සාමූහිකව බව ඉතා පැහැදිලිය. පොදු ප්‍රතිපත්ති රාමුවක් තුළට සියලු දේශපාලන පක්ෂවල අදහස් ගොනු කිරීම කොතරම් අපහසුදැයි ජනාධිපතිවරයා හොඳින්ම දැන සිටියි. තමා මේ අතගසා ඇත්තේ භාරධූර කාර්යයකට බව සියලු පක්ෂවලට එකතු වන්නැයි කළ ආරාධනය තුළින් ඔහු පෙන්වා දී තිබේ.
ඒ අනුව සර්ව පාක්ෂික ආණ්ඩුවක් පිළිබඳ දැල්වී තිබෙන බලාපොරොත්තු නිවී යා නොදීමට කටයුතු කිරීම සඳහා සෙසු දේශපාලන පක්ෂවලටද වගකීමක් තිබේ. දුකට සහ පීඩනයට පත්ව සිටින ජනතාව තුළද ඇති ලොකුම බලාපොරොත්තුව ස්ථාවර පාලනයක් ඇති වී තමන් මුහුණ දී සිටින දුෂ්කරතාවලට යම් පමණක හෝ සහනයක් ලබාගැනීමය. ඒ බලාපොරොත්තු කඩ කිරීම මහා ඛේදවාචකයකට දොර හැර දීමකි.
මේ තත්ත්වය යටතේ පාර්ලිමේන්තුව නියෝජනය කරන දේශපාලන පක්ෂවල නායකයන් කිහිප දෙනකුම සුබවාදී ලෙස ප්‍රතිචාර දක්වා තිබීම යහපත් ප්‍රවේශයක් වශයෙන් සැලකිය හැකිය. විපක්ෂ නායක සජිත් ප්‍රේමදාස මහතා ප්‍රකාශ කර තිබුණේ ජනාධිපතිවරයාගේ සමස්ත කතාවම ඇසූ විට එය ධනාත්මක සහ හරයාත්මක කතාවක් බවය. කතාවෙන් කී දේ යථාර්ථයක් වේ යැයි සිතමු යැයිද ඔහු සඳහන් කර තිබිණි. සර්ව පාක්ෂික ආණ්ඩුවක් සම්බන්ධයෙන් සාකච්ඡා කිරීමට සූදානමින් සිටින බවද සජබ ඇතුළු සමගි ජන සන්ධානය ජනාධිපතිවරයා වෙත යැවූ පිළිතුරු ලිපියේ සඳහන්ව තිබේ. එම ලිපිය යවා ඇත්තේ සර්ව පාක්ෂික වැඩපිළිවෙළක් ක්‍රියාත්මක කිරීම සම්බන්ධයෙන් ජනාධිපතිවරයා විසින් යොමු කරන ලද ලිපියට පිළිතුරක් වශයෙනි. විපක්ෂයේ ප්‍රධාන පක්ෂය වශයෙන් සජබ ගන්නා තීන්දුවට වැඩි වටිනාමක් හිමිවන බවද කිව යුතුය.
ජවිපෙ ප්‍රධාන ජාතික ජන බලවේගය සර්ව පාක්ෂික ආණ්ඩුවකට එකතු නොවන බව ඍජුවම ප්‍රකාශ කර ඇතත් ජනාධිපතිවරයා සමඟ සාකච්ඡාවකට එකඟ වී තිබේ. ටී.එන්.ඒ. ප්‍රකාශ කර ඇත්තේ තමන් එවැනි ආණ්ඩුවකට සහාය පළ කරන බවය. සෙසු දේශපාලන පක්ෂ ගණනාවක්ද ධනාත්මකව ප්‍රතිචාර දක්වා තිබෙන බවද සඳහන් කළ යුතුය.
පවතින අර්බුදකාරී තත්ත්වයෙන් රට ගොඩගැනීමට නම් මේ රටේ සියලු ජනකොටස් වෙනස් විය යුතුය. දේශපාලන පක්ෂවලටද එය අදාළය. පැරණි අදහස් මතින් තවදුරටත් රට තුළ දේශපාලනය කිරීම ඉදිරියේදී පහසු නොවනු ඇත. රටේ උගත් බුද්ධිමත් තරුණ පිරිස ඉල්ලා සිටින ප්‍රජාතන්ත්‍රවාදී රාමුව තුළ සිදු කළ යුතු වෙනස්කම් ද සිදුවිය යුතුය. දේශපාලන පක්ෂවල ක්‍රියාකාරීත්වය අනාගතයට ගැලපෙන අයුරින් යළි සකස් විය යුතු බවටත් ඉදිරි මැතිවරණය තරුණ පරපුරේ වාරය විය යුතු බවටත් ජනාධිපතිවරයා ප්‍රකාශ කළේ මේ වෙනස්කම් සිහිපත් කරවමිනි.
ප්‍රතිපත්ති ප්‍රකාශය කොතරම් ප්‍රශස්ත, ධනාත්මක වුවද එය සාර්ථක කර ගැනීමට සියලු දේශපාලන පක්ෂවල සහාය ලැබිය යුතුය. මේ ලැබී ඇත්තේ එම සහාය ලැබිය යුතු ඓතිහාසික අවස්ථාවකි. එම අවස්ථාව භාවිත කරන ආකාරය තුළ රටේ අනාගතය ද රැඳී පවතිනු ඇත.
