අපි ආණ්ඩු විරෝධී දැවැන්ත සන්ධානයක් හදනවා

දයාසිරි ජයසේකර - පාර්ලිමේන්තු මන්ත්‍රී ශ්‍රී ලංකා නිදහස් පක්ෂය

• රජයේ සේවකයන්ට පඩි ගෙවන්න සල්ලි නෑ කියලා රාජ්‍ය ඇමැතිලා 37ක් පත් කළා
• පක්ෂයට අනුව විනය ක්‍රියාමාර්ග ගැනීම පළිගැනීමක් නොවේ
• සර්ව පාක්ෂික ආණ්ඩුවක් නැත්නම් ඇමැතිකම් එපා කිව්වේ නිමල් සිරිපාල මහත්තයාමයි
• තමන් නිසා තමයි පක්ෂය තියෙන්නේ කියලා හිතන එක වැරදියි
• මේ ආණ්ඩුව ගැන ජනතාවට කිසිම විශ්වාසයක් නෑ
• බඩගෝස්තරවාදී ඇමැතිකම් ගත් අයට ඒවා අත්හරින්න බෑ
• ශ්‍රීලනිපයේ දැන් කැළඹිලි අවසන්

ශ්‍රී ලංකා නිදහස් පක්ෂය ඇතුළේ මේ වෙද්දී කැළඹීමක් ඇතිවෙලා නේද තියෙන්නේ?

කැළඹීමක් නෑ. එහෙම කිසීම ගැටලුවක් නැහැ. 

කැළඹිලි නැත්තේ මොකද? බැලුවොත් පක්ෂයේ කට්ටිය බැනගෙන වොයිස් කට් දෙනවා.

කැළඹිලි නැහැ. කැළඹිලි තිබුණා. දැන් කැළඹිලි අවසන් වෙලා දැන් පක්ෂය නිවැරදි වැඩපිළිවෙළකට යනවා. මේක ශ්‍රී ලංකා නිදහස් පක්ෂයේ ලොකු වෙනසක්. 

ඇයි මේ පක්ෂයේ සාමාජිකයන්ගෙන් පළිගන්නේ?

එහෙම පළිගැනීමක් කරලා නැහැ. පක්ෂයක් විසින් ගත්ත තීන්දුව එක්ක එකට ඉන්න එක තමයි වඩාත් වැදගත් වෙන්නේ. පෞද්ගලික වශයෙන් කොයිතරම් කාරණා තිබුණත් පක්ෂයක් ගත්ත තීන්දුව එක්ක සිටියා නම් මේ වගේ දේවල් සිදුවන්නේ නැහැ. මොකද පක්ෂයක් තීන්දු ගන්නේ සාමූහිකව කතාබහ කරලා හොඳට හිතලා මතලා. ඒ නිසා ඒ වගේ වෙලාවලට අපිට පුද්ගල තීන්දු ගන්න බැහැ. 

තනතුරුවලින් ඉවත් කරන එක පළි ගැනීමක් නෙමෙයිද?

කිසිසේත්ම නැහැ. පක්ෂයට අනුව විනය ක්‍රියාමාර්ග ගැනීම පළිගැනීමක් නොවෙයි. 

හැබැයි මේ විනය ක්‍රියාමාර්ග ගත්ත මෛත්‍රීපාල සිරිසේන මහත්තයා ලස්සනට ප්ලෑන් කරලා බලය වැඩිකර ගත්තා නේද පක්ෂය ඇතුළේම? ඒක ප්‍රජාතන්ත්‍ර විරෝධී ක්‍රියාවක් හැටියටයි පක්ෂයේ සමහර අය සඳහන් කරන්නේ?

කිසිම විදිහකින් පක්ෂය ඇතුළේ ප්‍රජාතන්ත්‍ර විරෝධී ක්‍රියාත්මක වීමක් නැහැ. ඇත්තටම පක්ෂයට විරුද්ධව යන අයට විනය ක්‍රියාමාර්ග ගන්න එක ප්‍රජාතන්ත්‍ර විරෝධී වන්නේ නැහැ. උදාහරණයක් ලෙස ගත්තහම පත්තරයක ගිය ප්‍රවෘත්තියකට මේ අය ගිහිල්ලා වාරණ නියෝග ගත්තා. 

මොකක්ද පත්තරේ ගිය ප්‍රවෘත්තිය?

අමාත්‍ය ධූර ගත්ත අයට විරුද්ධව පක්ෂය විසින් විනය ක්‍රියාමාර්ග ගන්නට හදනවා කියලා දැනගත් ගමන් ඒ අය ගිහින් තහනම් නියෝග ගත්තා. දැන් එහෙම පත්තරේ ගිය දෙයකට හරි මේ පක්ෂයට විරුද්ධව වැඩකළ අයෙකුට හරි විනය ක්‍රියාමාර්ග ගන්න බැරිනම් පක්ෂයෙන් ඇති වැඩක් නැහැනේ. ඒ නිසා පක්ෂයක් ඇතුළේ ඊට වඩා බලවත් බලයක් අවශ්‍යයි විනය රැකගන්න. ඒ නිසා ඒ බලය පක්ෂයේ සභාපතිතුමා සහ පක්ෂ නායකයාට ලබාදීලා තියෙන්නේ අවශ්‍ය ක්‍රියාමාර්ග ගන්න. 

එහෙම එකපාරටම පක්ෂයෙන් අයින් කරන එක සහ ඒ නීතිය ප්‍රජාතන්ත්‍ර විරෝධියි කියලනේ ඒ අය කියන්නේ?

ඒ අය මේක ප්‍රජාතන්ත්‍ර විරෝධී කියන්න කලින් පක්ෂයේ තීන්දුවත් එක්ක හිටියා නම් කොයිතරම් ආරක්ෂාකාරීද කියලා බලන්න තිබුණා. පක්ෂයට විරුද්ධව වැඩ කරලා පක්ෂයේ නීතිවලට බනින එක උත්තරයක් නෙමෙයි. 

ඇමැතිකම් ගන්න එක එකපාරටම ගිහිල්ලා කරන්න බැහැනේ. ඕවා කනින් කොනින් ආරංචි වෙනවා. මහලේකම් හැටියට ඔබට හරි පක්ෂයේ සභාපතිවරයාට හරි අඩුම ගණනේ කිව්වේ නැද්ද මෙහෙම ඇමැතිකම් ගන්නවා කියලා?

විවිධ කටකතා තිබුණා. හැබැයි අපි කවුරුවත් දැනගෙන හිටියේ නැහැ නිමල් සිරිපාල ඇමැතිතුමාගේ වචනවලින් කිව්වොත් වචනයේ පරිසමාප්ත අර්ථයෙන්ම සර්ව පාක්ෂික ආණ්ඩුවක් නොවේ නම් අපි ඇමැති තනතුරු බාර නොගත යුතුයි කියලයි එතුමා කිව්වේ. ඉතින් එහෙම කියලා ඒ තීන්දුවට පිටින් ගියාම වෙච්ච දේ තමයි දැන් මේ තියෙන්නේ. මේක මේ සර්ව පාක්ෂික ආණ්ඩු ගමනක් නෙමෙයි. විවිධ පුද්ගලයන්ගේ තනි මතිමතාන්තර අනුව ගත්ත තීන්දුවක්. 

ඒ කියන්නේ තනතුරු බාරගන්නේ නැහැ කියන කතාවට ඒ අයත් කැමැත්ත පලකළාද?

ඔව්. ඒ අයත්  එකඟ වුණා. පුවත්පත් සාකච්ඡාවක් තියලා ඒ වෙලාවේ තමයි නිමල් සිරිපාල මහත්තයා අර කතාව කිව්වේ. එහෙම කියලයි ගියේ. 

ඒ වගේ තීන්දුවකට එකඟ වෙලත් ගිහින් ආණ්ඩුවේ තනතුරු ගන්න එක ගැන ඔබ හිතන්නේ මොකක්ද හේතුව?

ඒක ඉතින් පුද්ගලික වුවමනාවනේ. ඒකට ඒ අයට විවිධ උත්තර තියෙන්න පුළුවන්. රට කඩා වැටිලා තියෙන්නේ, රට ගොඩගන්න ඕන, අරක මේක. හැබැයි මේ තීන්දුව ගත්තේ පක්ෂයක් හැටියට නෙමෙයි. පෞද්ගලික තීන්දුවක් හැටියට. 

දැන් මේ ගිය අයට ආයේ පක්ෂයට එන්න බැරිවෙයිද?

නෑ අපි ඒ අයට කියලා තියෙන්නේ නැවත පක්ෂයට එනවා නම් ඇමැතිකම අත්හැරලා එන්න කියලා. එහෙම ආවොත් අපි ආදරයෙන් පිළිගන්නවා. පෞද්ගලික බඩගෝස්තරවාදය සඳහා තනතුරු ගත්තාම දැන් ඒ අයටත් ප්‍රශ්නයක් තිබෙනවා මේ තනතුරු අත්හරින්නේ කොහොමද කියලා.

තවම ශ්‍රී ලංකා නිදහස් පක්ෂය ක්‍රමිකව හැදෙමින් යන්නේ. දැන් ඔය ඉන්න අයත් එලෙව්වාම ඒ අය වටා ඉන්න පාක්ෂිකයොත් ගලවාගෙන යන්න පුළුවන්. ඒක පක්ෂයට පාඩුවක්නේ?

යම් පිරිසක් යයි. නමුත් දැවැන්ත කඩා වැටීමක් වෙන්නේ නැහැ. එක දෙයක් කියන්න ඕන. අපේ ඉන්න සංවිධායකවරු විශාල වශයෙන් කැමැත්ත පලකරලා තියෙන්නේ අපි ගත් තීරණයට. මොකද පක්ෂයක් හැටියට ඉස්සරහට යන්න නම් මෙවැනි තීන්දු ගත යුතුයැයි ඒ අයගේ මතයක් තිබෙනවා. එක දෙයක් මතක තියාගන්න ඕන. අපි හිතන්න නරකයි අපි නිසා තමයි පක්ෂය තියෙන්නේ කියලා. තව නායකයෝ ගොඩක් ඉස්සරහට බිහිවෙයි. ඉතිහාසයේත් එහෙමයි. මධ්‍යම කාරක සභාවේ 19 දෙනාගෙන් 13 දෙනකු පක්ෂය හැරගියා. ඒ සියල්ල එතැනින් ඉවත් කළා. චන්ද්‍රිකා මැතිනිය ගියා. විජය කුමාරණතුංග මහත්තයා ගියා. ඒ වගේ දැවැන්තයෝ පක්ෂය දාලා ගියත් නැවත පක්ෂය ගොඩගත්තා. මම කියන්නේ නිවැරුදි වැඩපිළිවෙලක් තිබෙනවා නම් රටට ආදරය කරන වැඩපිළිවෙළක් තිබෙනවා නම් දේශපාලන වශයෙන් නිවැරුදි තීන්දු ගන්නවා නම් පක්ෂය නැවත ගොඩනගන්න පුළුවන්. 

දැන් ඒ අයට විතරක් නෙමෙයිනේ පක්ෂයෙන් අනෙක් අයටත් ආරාධනා කරන්න ඇතිනේ ඇමැතිකම් ගන්න. ඔබට ආරාධනා කළේ නැද්ද ඇමැතිකමක් ගන්න?

පක්ෂයක් හැටියට අපට ආරාධනා කළා. නමුත් අපි පක්ෂයක් හැටියට ප්‍රතිපත්තිමය කාරණා කිහිපයක් ආණ්ඩුවට ඉදිරිපත් කළා. එකක් ජාතික සභාවක් හදන එක. ඒ ජාතික සභාවට සියලු පක්ෂවලට ආරාධනා කරන්න පුළුවන්. ඒ ජාතික සභාවෙන් අගමැති කෙනෙක් තෝරාගන්න, ඒ ජාතික සභාවෙන් අමාත්‍ය ධුර කීයද කියලා තීන්දු කරන්න වගේ යෝජනා ඉදිරිපත් කළා. අපි කිව්වා රාජ්‍ය අමාත්‍ය ධුර අවශ්‍යම නෑ කියලා. ඒ වගේම අරගලයට සහභාගි වුණ විද්වත්තු, වෘත්තීයවේදීන්ගෙන් සමන්විත විද්වතුන්ගෙන් උපදේශක සභාවක් හදන්න. ඒ වගේ යෝජනා තිබියදීත් ඒ අයගේ බලය ආරක්ෂා කරගන්න රාජ්‍ය ඇමැතිවරු 34 දෙනකු පත්කර ගත්තා. ඒකෙන්ම පේනවා රට ගොඩනගන වැඩපිළිවෙළක් ඒ අයට නැහැ. 

දැන් මේ දාල ගිය අය කියනවා ආයෙත් ශ්‍රී ලංකා නිදහස් පක්ෂයට යන්නේ නැහැ කියලා?

දාලා යන අය හැමදාම කියන්නේ එහෙම තමයි. එහෙම දාලා ගිය අය ආයෙත් පක්ෂයට එකතු වෙනවා. එහෙම දාලා ගිය අය එක්ක එකතු වෙලා නැවත පක්ෂයට ගොඩනගනවා. 

දැන් මේ ආණ්ඩුවට ගිය අයයි, ආණ්ඩුවේ ඉන්න අයයි කියන දෙයක් තමයි මේ ආණ්ඩුව කෙරෙහි ජනතා විශ්වාසය තියෙනවා කියන එක?

ආණ්ඩුව ගැන කිසිම විශ්වාසයක් ජනතාවට නැහැ. තවත් ඇවිල්ලා කෑගහන්න මිනිස්සුන්ට හයියක් නැතිව ඉන්නවා මිසක් නැත්නම් දැනටමත් පාරට බැහැලා. මොකද මේ ආණ්ඩුවේ ක්‍රියාමාර්ග ගැන ජනතාවට කිසිම විශ්වාසයක් නැහැ. හිතන්න රජයේ සේවකයන්ගේ පඩි දෙන්න බැරිවෙලා ඉන්න මොහොතක රාජ්‍ය අමාත්‍යවරු 34ක් පත් කරනවා. දැන් කැබිනට් එකත් 30 දක්වා වැඩි කරන්න යනවාලු. කොහොමද එහෙම කරලා රටක් ගෙනියන්නේ. ඉස්සෙල්ලා අපි රටක් හැටියට කැපවීම් කරන්න එපැයි. 

ඒ කියන්නේ මෙතැනින් පස්සේ කිසිම විදිහකින් ආණ්ඩුවත් එක්ක ශ්‍රී ලංකා නිදහස් පක්ෂය එකතු වෙන්නේ නැද්ද?

අපි පැහැදිලිවම ආණ්ඩුවට කිව්වා අපිව පාවිච්චි කරන්න එපා කියලා. අපි ආණ්ඩුවට දෙන්න පුළුවන් සහාය එළියේ ඉඳගෙන තනතුරු ගන්නේ නැතිව දෙනවා කියලා.

දැන් ආණ්ඩුවේ හිටිය කණ්ඩායම් කිහිපයක් බෙදිලා ගිහිල්ලා තැන් තැන්වල සංවිධානය වෙමින් යනවා. ඒ වගේම විපක්ෂයත් සංවිධානය වෙමින් යනවා. මේ සියල්ල ආණ්ඩු විරෝධී එක් කණ්ඩායමක් බවට පත්වේවිද?

ඔව්. අපි යෝජනා කරන්නේ ඒක තමයි. අපි දැවැන්ත සන්ධානයක් ගොඩනගනවා. විපක්ෂයේ සියලු බලවේග ටික එකට එකතු කර ගන්නවා. ඒ සන්ධානය ගොඩනගන වැඩේට අපේ පූර්ණ සහාය ලබා දෙනවා. 

හැබැයි පොහොට්ටුවේ අය නම් කියන්නේ තවමත් ජනතාව පිළිගන්නේ පොහොට්ටුව කියලයි?

ඒ ඒ අයගේ හීන. ඕන කෙනෙකුට එහෙම හීන දකින්න පුළුවන්. 

ඇත්තටම ගමේ එහෙම යනකොට ජනතාවගේ ප්‍රතිචාරය කොහොමද?

අපි ගත්ත තීන්දුව ගැන ජනතාව පැහැදීමකින් ඉන්නේ. හැබැයි ඒ වගේම ජනතාවට ජීවත් වෙන්න බැරි තත්ත්වයකටත් රට පත්වෙලා තිබෙනවා. ජීවන වියදමින් මිරිකිලා ඉන්නේ. තමන්ගේ අමාරුකම් පාරවල් දිගේ අඬ අඬා කියන්නේ නැහැනේ ජනතාව. මේ තත්ත්වය තව තවත් වර්ධනය වෙමින් යන්නේ. අන්න එතැනදී මිනිස්සු කොයි විදිහට ප්‍රතිචාර දක්වාවිද කියලා අපි දන්නේ නැහැ. 

ඉතින් ඒක දන්නවා නම් ඇයි මේ 225ටම එකතු වෙලා රට ගොඩදාන්න බැරි?

ඉතින් 225ම එකතුවෙලා රට ගොඩනගන්න තමයි සර්ව පාක්ෂික ආණ්ඩුව යෝජනා කළේ. පොදුජන පෙරමුණ 225 එකතු කරගෙන රට ගොඩනගන වැඩපිළිවෙළක් ගැන නෙමෙයිනේ හිතන්නේ? ඒ අය හිතන්නේ ගෝලබාලයින්ට ඇමැතිකම් දීලා සතුටු කරන්නේ කොහොමද කියලයි. ඒ නිසා පක්ෂය ගොඩගන්න එකයි රට ගොඩගන්න එකයි දෙකක්. 

ඔබලා සහ සමගි ජනබලවේගය අතර මේ වනවිට අභ්‍යන්තර වශයෙන් සාකච්ඡාවක් යනවාද?

තවම ඒ සම්බන්ධව අපි කතා කරලා නැහැ. හැබැයි අපේ ස්වාධීන වෙච්ච කණ්ඩායම් එක්ක නම් අපි කතා කරලා තිබෙනවා. ඒ සියල්ල එකතු කරගෙන යන්න තමයි අපේ කල්පනාව.

දැන් ගොඩක් අය මැතිවරණ ඉල්ලනවා. ඔබලාත් මැතිවරණයක් ඉල්ලනවාද?

ඔව්. මැතිවරණයක් තියන එක අත්‍යවශ්‍යයි. මැතිවරණයක් තියන එක හැර විකල්පයක් නැහැ. රට සාමකාමී මට්ටමකට පැමිණි ගමන්ම මැතිවරණයකට යා යුතුයි.

ඔබලා ඉල්ලන්නේ මොන වගේ මැතිවරණයක්ද?

ප්‍රාදේශීය සභා මැතිවරණය වහාම තියන්න පුළුවන්. මේ 31 වනවිට මැතිවරණ කොමිසමට බලය එනවා ඡන්දය තියන්න. ඒක ක්‍රියාත්මක කරන්න ලබන මාර්තුවලට කලින් ඡන්දයක් තියන්න පුළුවන්. ඊළඟට මහ මැතිවරණය සම්බන්ධව තීන්දුව තිබෙන්නේ ජනාධිපතිවරයාගේ අතේ. මොකද මේ වෙලාවේ විකෘති ආණ්ඩුවක් පවතින්නේ. මාර්තු 23න් පස්සේ එතුමාට බලය එනවා එතුමාට ඕනෑ නම් ආණ්ඩුව විසුරුවන්න.

දැන් මේ සන්ධානයට නායකයෙක් ඉන්නවාද?

දැන් අවශ්‍ය වන්නේ නායකයෙක් නෙමෙයි. දැන් අවශ්‍ය වෙන්නේ ප්‍රතිපත්තිමය වැඩපිළිවෙළක්. ප්‍රතිපත්ති මාලාවකට අනුව මේ වැඩපිළිවෙළ ක්‍රියාත්මක කරන එක.

 ගයාන් ගාල්ලගේ