අපි ඉන්නේ කලකිරීමෙන්

එස්.බී. දිසානායක - (පාර්ලිමේන්තු මන්ත්‍රී - ශ්‍රී ලංකා පොදුජන පෙරමුණ)

• 22ට මම විරුද්ධ වුණත් ඡන්දෙ දුන්නේ බෙදෙන්න බැරි නිසා
• දියුණු රටවල් හැදුවේ දේශප්‍රේමී ආඥාදායකයෝ
• ගොන් වැඩ කරලා ආර්ථිකය වැට්ටුවේ අපේ අය තමයි
• සමහර අමාත්‍යංශ මෙලෝ වැඩක් නෑ
• පොහොට්ටුවට එක ඇමැතිකමක්වත් නෑ
• අයවැයට කලින් ආණ්ඩුව හදන්න ඕනෑ
• ද්විත්ව පුරවැසි ප්‍රශ්නය මට අදාළ නෑ

• ඔබතුමා දැන් වැඩිය සද්දයක් බද්දයක් නෑ. මොකද දේශපාලනය අතඇරලද?

ගෝඨාභය රාජපක්ෂ මහත්තයා අවසාන කාලයේ ජනතා විරෝධය මැද අත්දැකීම්වලින් අඩු පිරිස් කැබිනට් මණ්ඩලයට පත් කළා ඒ මොහොතේ තත්ත්වයත් එක්ක. ඒ නිසා අපිට පැත්තකින් ඉන්න වුණා. ඊටපස්සේ රනිල් වික්‍රමසිංහ මහත්තය පත් කරනකොට අපි පොදුජන පක්ෂය හැටියට ඉල්ලීමක් කළා අත්දැකීම් ඇති කණ්ඩායමක් එතුමා පත් වුණායින් පස්සේ කැබිනට් මණ්ඩලයට පත්කරන්න කියලා. ඒ නිසා අපේ ඒ යෝජනාව පරාදවෙන එක ජනාධිපතිවරයාට හොඳත් නෑ. ආණ්ඩුවටත් හොඳ නෑ. අපිටත් හොඳ නෑ.

• දැන් පත්කරලා තියෙන අමාත්‍යංශවලින් වැඩක් වෙන්නේ නැද්ද?

ආණ්ඩුවේ දැන් පත්කරලා තියෙන සමහර අමාත්‍යංශ ගත්තම මෙලෝම දෙයක් වෙන්නේ නෑ. මහා අවුලක් වෙලා. විෂය දන්නේ නෑ. අමාත්‍යංශවල ඉන්න කට්ටිය උදව්වක් සහායක් දෙන්නේ නෑ. සමහර අය ඕන දෙයක් වෙයන් කියලා ඔහේ ඉන්නවා. එහෙම ආණ්ඩු කරන්න බෑනේ.

• ඒ ගැන කලකිරීමෙන්ද ඉන්නේ?

ඔව්. අපි කලකිරීමෙන් ඉන්නේ.

• සරලවම කිව්වොත් රනිල් වික්‍රමසිංහ ජනාධිපතිවරයාව බලයට ගේන මෙහෙයුමේ තිබුණු එකඟතාවයන් බිඳලා නේද?

මම හිතන්නේ ඒ එකඟතාවයන් කඩවීමක් වෙලා තියෙනවා කියලා.

• ඒකද මේ කැඩිලා වගේ කට්ටිය?

ඇත්තටම මම 22 වැනි ව්‍යවස්ථා සංශෝධනයේදී එකහෙළා කිව්වා පක්ෂය කඩලා වැඩ කරන්න එපා කියලා. මම 22ට විරුද්ධයි. මොකද මම විධායක බලය පොඩ්ඩක් අඩු කරනවාට කැමති නෑ. මම කැමති විධායක බලතල වැඩි කරනවාට. මේ රට හදන්න දේශප්‍රේමී ආඥාදායකයෙක් ඕන. අපි ගෝඨාභය රාජපක්ෂගෙන් බලාපොරොත්තු වුණේ ඒක. ඔය ගොඩක් දියුණු රටවල් හැදුවේ දේශප්‍රේමී ආඥාදායකයෝ. ප්‍රජාතන්ත්‍රවාදයට අරන් ගිය රටවල් ගොඩක් විනාශ වුණා. ඒ නිසා ජනාධිපතිවරයා ඇවිල්ලා 22ට සහාය ඉල්ලපුවම මම කිව්වා බෙදෙන්න එපා! එකතුවෙලා මේකට උදව් කරමු කියලා.

• ඔබ කැමති වුණේ ඇයි?

මම සම්පූර්ණයෙන් අකැමැතියි. ඒත් මේ වෙලාවේ පක්ෂය කඩන්න ඕන නැති නිසා එකඟ වුණා. ඒත් ඉතිං 44 දෙනෙක් ආවේ නෑ. ඒ තමයි මේකට තියෙන අප්‍රසන්නකම.

• අපි දන්නවා කැබිනට් මණ්ඩලය පත්කිරීමේදී එකඟතාවයක් තිබ්බා 16ක් පොහොට්ටුවට 14ක් අනෙක් පක්ෂ වලට කියලා. දැන් බහුතරයක් ඉන්නේ පොහොට්ටුවේ අය. තවත් මොකක්ද ප්‍රශ්නය?

එකක්වත් පොහොට්ටුවට හම්බ වුණේ නෑ.

• එතකොට මේ ඉන්න අය කවුද? 

ඒ අය ගෝඨාභය රාජපක්ෂ විසින් තාවකාලිකව පත්කළ කැබිනට් මණ්ඩලය. අනෙක් දෙන්නා සජිත්ගෙන් ආපු දෙන්නා. අපිට ඉන්නේ අගමැතියි, ආණ්ඩු පක්ෂයේ සංවිධායකයි විතරයි.

• එක්කෙනෙක්වත් නැද්ද ඒ කියන්නේ?

නෑ ඉන්නවා. රමේෂ් පතිරණ වගෙ හතර පස් දෙනෙක් ඉන්නවා. හැබැයි බහුතරයක් ඉන්නේ තාවකාලිකව අටවපු කැබිනට් එකේ අය. තවම අපේ පක්ෂයේ ඉල්ලීම ඉෂ්ට කරලා නෑ.

• දැන් මේ ගැන ජනාධිපති එක්ක කතා කළේ නැද්ද?

එක් වතාවක් කතා කළා. එතුමා බලාපොරොත්තු වෙනවා තව පක්ෂවලින් කට්ටිය එයි කියලා. කොහොම වුණත් මෙහෙම කල් යන එකට අපේ කැමැත්තක් නෑ.

• ඇමැතිකමක් නැතුව අමාරුයි නේද ඉන්න?

නෑ ඇමැතිකමක් ගන්න තියෙන එක නෙමෙයි. අද තියෙන අමාත්‍යංශ දුවන්නේ නෑ. ඒකයි දවසින් දවස මේ ආණ්ඩුව අවුලෙන් අවුලට යන්නේ.

• හැබැයි සමහර පොහොට්ටුවේ අය දැනටම වෙනත් පක්ෂ තෝරගෙන ඒ අයගේ ඉදිරි දේශපාලන ගමන යන්න. මෙහෙම ගියොත් පොහොට්ටුවට කවුරුත් නැතිවෙයිනේ?

පොහොට්ටුව එහෙම වැටිලා නෑ. ගම් මට්ටමෙන් වුණත් ලොකු වෙනසක් නෑ. මම එක්ක හඟුරන්කෙත ආසනයේ හිටිය හැමෝම තවම මා එක්ක ඉන්නවා. මට එක මනුස්සයෙක්ගෙවත් වෙනසක් පේන්න නෑ. හැබැයි අපිට තීරණයක් ගන්න වෙනවා ළඟදීම. මැතිවරණයට පෙර, පළවැනිම දේ ජනාධිපති සහ අගමැති එකතුවෙලා ස්ථාවර ආණ්ඩුවක් හදන්න ඕන.

• ඔය තත්ත්වය උඩ අයවැය පරදින්නත් පුළුවන්නේ?

ඔය අපේ පොදු පෙරමුණේ ඇමැති මණ්ඩලයට පත්කරන්න දුන්න නම් ටික පත්කළේ නැත්තන් ඔව්, අයවැය පරදිනවා.

• ඒ කියන්නේ පොදුජන පෙරමුණ අයවැය පරද්දයි වගේ නේද?

වෙන්න පුළුවන්. ස්ථාවර ආණ්ඩුවක් නැතිවීම හේතුවෙන්න පුළුවන්. ඒ නිසා අයවැයට කලින් ආණ්ඩුව හදන්න ඕන.

• ඒ කියන්නේ දැන් සර්වපාක්ෂික කතා නෑ. දැන් තියෙන්නේ පොහොට්ටුව විතරයි ආණ්ඩුව?

නෑ... නෑ... දැනටමත් ඔ‍ය පක්ෂවලින් ඇවිල්ලා ඉන්නවනේ. ඒ අය දැන් තනතුරුත් දරනවා ඇමැතිකමුත් දරනවා. ඒත් අපිට තවම පාර්ලිමේන්තුවෙ බහුතරයක් තියෙනවා නොසැලී.

• 22ට ඔබලා එකඟ නොවුණේ බැසිල් රාජපක්ෂ මහත්තයා කේන්ද්‍ර කරගෙන ද්විත්ව පුරවැසි විරෝධය ආපු නිසා?

නෑ.. නෑ... ඒ එක එක අය කියන්න ඇති. ඒත් මම ඒකට අයිති නෑ. මට ඒක තිබ්බත් එකයි නැතත් එකයි. මට ඒක වැදගත් වුණේ නෑ.

• ඒ කියන්නේ ඔබලාට බලපෑමක් තිබුණේ නෑ?

එහෙම නෑ. මේ සම්බන්ධයෙන් රැස්වීම තිබ්බ වෙලාවේ චමල් රාජපක්ෂ මහත්තයා නැගිටලා කිව්වේ මම රාජපක්ෂලා බලාගන්නම්. මේ වෙලාවේ බෙදෙන්නේ නැතුව මේකට ඡන්දය දෙන්න කියලා. ඒ වෙලාවේ එතුමා හැමෝටම ශක්තියක් වුණා. ඒක අපි පිළිගන්න ඕන. ඔය කියන කතා හැමදේම ඇත්ත නෙමෙයි. අනික ඔය ද්විත්ව පුරවැසිභාවය තිබ්බත් නැතත් මට අදාළ නෑ.

• හැබැයි ඒකෙන් වුණේ පක්ෂය බිඳුණා වගේ නේද?

එහෙම එකක් නෑ. කාරණා ගණනාවක් තිබ්බා. ඔය කැබිනට් ප්‍රශ්නයත් එක දෙයක්.

• පොහොට්ටුව මේ යන විදිහට නම් කැඩෙයිනේ?

නෑ... නෑ... එහෙම කැඩෙන්නේ නෑ.

• එහෙනම් ඩලස්ලා, ජී.එල්. ලා ගියේ?

ඒ ගිය අයනේ. ගිය අය ගියා.

• ඒ අය ආයේ ගන්නේ නෑ?

ඒ මොනදේ කරන්නත් ස්ථාවර ආණ්ඩුවක් ඕනේ.

• ඒ කියන්නේ ආර්ථිකයක් හැදෙන පාටක් නෑ... මේ තත්ත්වයත් එක්ක?

අනිවාර්යයෙන්ම. අපිට මේ ආර්ථිකය ගොඩගන්න බැරිකමක් නෑ. අපේ වගේ රටකට එහෙම බැරිකමක් නෑ.

• එහෙම කිව්වට මේක මේ තැනට ඇදලා දැම්මේ ඔබලා කියලනේ කියන්නේ? ඒක ඇත්තනේ?

ඔව්. අපේ අය තමා කඩා වැට්ටුවේ පැහැදිලිවම. ගොන් වැඩකරලා කඩා වැට්ටුවේ අපේ අය. ඒක අපි පිළිගන්න ඕන. හැබැයි මේක කඩා වට්ටන්න පටන් ගන්නේ යහපාලනය. ඒකත් මතක තියාගන්න. ගෝඨාභය මහත්තයට එනකොට කොවිඩ්  ආවා. ඊට පස්සේ යුක්‍රේන අර්බුදය තිබ්බා ඒවා එක්ක බැරිවුණා.

• ඉතිං ගොඩගන්න තිබ්බනේ?

අපෝ ඔව් බේරගන්න තිබ්බා. ඒත් ඒකවුණේ නෑ.

• ඇත්තද සමහර නම් ජනාධිපතිට යෝජනා කරද්දී කැබිනට් එකට දාන්න කියලා, ඒක එතුමා ප්‍රතික්ෂේප කළා කියන්නේ?

ඒවා මම දන්නේ නෑ. එහෙම ප්‍රශ්නයක් තියෙනවා නම් අනෙක් අයට දෙන්න පුළුවන්නේ. තවම ආණ්ඩුව ස්ථාවර නෑනේ.

• අගමැතිතුමා කියන දේ අහන්නෙත් නැද්ද?

මම දන්නේ නෑ. අහන්නේ නැද්ද අහනවද කියලා. මම හිතනවා එතුමාටත් වුවමනාවක් ඇති කියලා. ඒත් දෙන්නා එකතුවෙලා කරන්න ඕන.

• මහින්ද මහත්තයා අරගෙන ගමින් ගමට යන්නේ ඡන්දයක්වත් ළඟ එනවද?

අපේ පක්ෂය 2/3ක් අරන් කුජීත වෙලා, පොළව යටට ගිහින් දැන් ඉන්නේ. ඒක හදාගන්න ඕන අපි. නැත්තන් මිනිස්සු අනාථ වෙනවනේ.

• මිනිස්සු රාජපක්ෂවරුන්ට බලය දෙයිද?

ඒවා වෙන කතානේ. ඔයාටයි මටයි කතා කරන්න සංවාද කරන්න බෑ. මේක පක්ෂයක්නේ. පක්ෂය කියන්නේ රාජපක්ෂවරුම නෙමේ. ඒත් මේ රට බේරගත්ත නායකයා මහින්ද රාජපක්ෂ. ඒක මිනිස්සුන්ට අමතක නෑ. මේ රට කඩා වැටුණ එකට මහින්ද මහත්තය වග කියන්න ඕන නෑනේ.

• කැබිනට් එක හැදුවේ නැත්තන් ඉල්ලන්නේ මැතිවරණයක්ද?

නෑ... එහෙම කියන්නේ නෑ මම. මේක අපේ පක්ෂය. මේක අපි හදපු ආණ්ඩුව. ජනාධිපති අගමැති අපි පත්කළේ. අපිට ඕන මේක ශක්තිමත්ව රැකගන්න. ඒකටයි මේ කැබිනට් එක හදන්න කියන්නේ.

• ඔබ ගැන බැලුවෙ නැත්නම් තීරණයක් ගන්නවද?

එහෙම නෑ.... එහෙම නෑ.... මේක අපේ පක්ෂය. අපේ ජනාධිපති. අපේ අගමැති. අපි එකතුවෙලා මේක හදන්න ඕන. මම කැමති නෑ මේක බෙදනවාට.

I ගයාන් ගාල්ලගේ