විපක්ෂයට තිබෙන ආර්ථික සැලැස්ම කෝ?
- වයඹ පළාත් ආණ්ඩුකාර ලක්ෂ්මන් යාපා අබේවර්ධන
- අද තිබෙන තත්ත්වය රනිල් මහත්තයා දැක්කේ අවුරුදු 20කට 30කට කලින්
- රට මේ තැනට වැට්ටුවේ වාමාංශික මතධාරී දේශපාලනඥයන්
- දේශපාලකයෝ පමණක් නොවේ නිලධාරිනුත් දූෂණ වැඩ කළා
- අද තත්ත්වයේ හැටියට ආණ්ඩුකාරයාත් දේශපාලනඥයෙක්
- අරගලයේ පණිවුඩය තවම සමහරු තේරුම් අරන් නැහැ
- ගෝඨාභය මහත්තයට වැරැද්දුවේ වියත්තු
- ආණ්ඩුවක ඉන්නකොට පක්ෂ ගොඩක් නිසා ප්‍රශ්න ඇතිවෙනවා
- අපි බලය අරගෙන සිංහයෝ වගේ හැසිරෙන්න හොඳ නෑ
• ඔබ ක්‍රියාකාරී දේශපාලනයේ හිටිය කෙනෙක්. අද ඔබ ආණ්ඩුකාර ධුරයේ වැඩ පටන් ගත්තා. ආණ්ඩුකාර ධූරය කියන්නේ ක්‍රියාකාරී දේශපාලනයට වඩා පරිපාලනමය තනතුරක්. ක්‍රියාකාරී දේශපාලනයේ හිටිය කෙනකුට මෙම තනතුරේ මොන ආකාරයෙන්ද කටයුතු කරන්න පුළුවන්?
අද පළාත් සභාවේ ඉඳලා පළාත් පාලන ආයතන දක්වා එකක්වත් ක්‍රියාත්මක වන්නේ නැහැ. ඒ නිසා එදා ආණ්ඩුකාරවරයා වගේ නොවෙයි අද ආණ්ඩුකාරවරයා. ඉස්සර ආණ්ඩුකාරවරයාට යටින් දේශපාලන අධිකාරියක් තිබුණා. ආණ්ඩුකාරවරයාට තිබුණේ මධ්‍යම ආණ්ඩුවේ පණිවිඩය දෙන එක විතරයි. හැබැයි මේ මොහොතේ ආණ්ඩුකාරවරයාට තිබෙනවා පරිපාලන වැඩකටයුතු මෙන්ම දේශපාලන වැඩකටයුතු. මොකද දේශපාලනඥයා පසුගිය කාලයේ ජනතාව හමුවෙලා අඩුපාඩු ඕනෑ එපාකම් විවිධ සංවර්ධන වැඩකටයුතු සිද්ධ කළා වගේ දැන් මටත් ඍජුව ජනතාව එක්ක වැඩ කරන්න වෙලා තියෙන්නේ. අද ජනාධිපතිවරයාගේ කාර්යභාරය ආණ්ඩුකාරවරයා අතින් ඉටුවෙන්නේ. දේශපාලන පක්ෂයක් නැතිවුණාට ආණ්ඩුකාරවරයාට දේශපාලනඥයෙන් ලෙස මෙතැනදී හැසිරෙන්න වෙනවා.
• පළාත් පාලන ආයතන හරහා විශේෂයෙන් නගර සංවර්ධනය වගේම නගර පිරිසිදුකම සහ පරිපාලනය පසුගිය කාලයේ සිදුවුණා. දැන් මන්දගාමී වෙලා හෝ ඒවා නතර වෙලා තිබෙනවා. ඔබ කොහොමද ඒ දේවල් ඍජුව මැදිහත් වෙලා කටයුතු කරන්නේ?
මම ඒ යාන්ත්‍රණය හදනවා වයඹ පළාතේ. මම සති දෙකකට සැරයක් ප්‍රගති සමාලෝචන රුස්වීමක් පවත්වන්න තීරණය කරලා තියෙන්නේ. මේ හැමෝටම මම අනිවාර්යයෙන්ම දෙනවා යම්කිසි ඉලක්කයක්. මම පෞද්ගලික අංශයත් සම්බන්ධ කරගෙන යම් යම් ව්‍යාපෘති එම ප්‍රදේශවල සිදුකරනවා. මෙන්න මේ දවස වෙනකොට මෙන්න මේ දේවල් වෙනස් වෙන්න ඕන කියලා මම ඒ අයට ඉලක්කයක් දෙනවා. කුරුණෑගල දිස්ත්‍රික්කය වගේම පුත්තලම දිස්ත්‍රික්කයෙත් ඉලක්කයක් සහිතවයි මම වැඩ කරන්නේ.
• ජනතාව සහ දේශපාලනඥයා අතර බෙදීම් රේඛාව පටන් ගන්නේ දූෂණය සහ වංචාව නිසා. ඉහළ ඉඳලා පහළට ගත්තහමත් දූෂණය වංචාව දැඩි ලෙස තිබෙනවා. විශේෂයෙන් පළාත්පාලන ආයතනවල මුදල්වලට වෙන දේ සම්බන්ධයෙන් නිශ්චිත තොරතුරක් නැහැ. ඔබ මොකද ඒ වෙනුවෙන් කරන්නට බලාපොරොත්තු වන්නේ?
සමාජයේ ලොකු වැරුදි මතයක් තිබෙනවා දේශපාලනඥයෝ සියයට සියයක් වැරදි කළා කියලා. මම ඒ කාරණය නෑම කියන්නෙත් නෑ. හැබැයි ඒ නිලධාරිනුත් මේ දූෂණවලට සම්බන්ධයි. මිනිස්සු ඒක දැක්කේ නැහැ. රජයේ වැඩක් කරගන්න ගියාම දේශපාලනඥයාට බැන්නට එක තැනකින් එහාට යන්නේ නැහැ. ඒකට දේශපාලනඥයන් නෙමෙයි හේතුව නිලධාරීන්. ඒක නිසා මම මේ ගැන දන්නවා. මම මගේ කාලයේ උපරිමය යොදවන්නේ මෙන්න මේ දේවල් නතර කර ගන්න. මම පැය 24න් පැය 18ක් වැඩ කරන්න බලාපොරොත්තු වෙනවා. මම මගේ ඉලක්කයට කොහොම හරි යනවා. මොකද අපේ විශ්වාසයක් ඇතුවනේ ජනාධිපතිතුමා මේ තනතුර දුන්නේ.
• මේ තනතුර දීලා ජනාධිපතිතුමා මොකද කිව්වේ?
ජනාධිපතිතුමා තනතුර දීලා කිව්වේ මහජන නියෝජිතයෝ නැති නිසා අපේ වගකීම හරියට මේ වෙලාවේ ඉටු කරන්න කියලා. ඒක ඇත්ත. ඒක නැත්නම් ඒ අප්‍රසාදය එන්නේ රජයට. කොවිඩ් කාලයේ ආර්ථිකය කඩා වැටුණානේ. ඒක නැවත හරිගස්සන්න ඕන. මොකද වයඹ පළාත කියන්නේ ලංකාවේ කෘෂිකර්මාන්තය අතින් වැඩිම කෘෂිකර්මාන්තයේ යෙදෙන පළාත. දළ දේශීය නිෂ්පාදිතය අනුව ගත්තාම කොළඹට පසුව රජයට වැඩියෙන්ම ආදායමක් ගෙනෙන්නේ වයඹ පළාත. භූමියෙනුත් ලංකාවේ තුනෙන් එකක් තිබෙන්නේ වයඹට.
• ඔබට ඔය ආණ්ඩුකාර ධුරය ලැබෙන්න පක්ෂයද යෝජනා කළේ නැත්නම් ජනාධිපතිතුමාගේ කැමැත්තක්ද?
පක්ෂයෙනුත් යෝජනාවක් කළා. හැබැයි ජනාධිපතිතුමාගේ ප්‍රසාදයක් තිබුණ නිසා තමයි ලැබුණේ. එතුමාත් එක්ක වැඩකළ කෙනෙක් හැටියට එතුමා දන්නවා අපේ වැඩකටයුතුවල පිළිවෙළ සම්බන්ධයෙන්. මොකද මමත් කාලයක් එක්සත් ජාතික පක්ෂයේ හිටි කෙනෙක්. ඒ නිසා එතුමා ඒ පිළිබඳව හොඳට දන්නවා. මොකද අපේ නම් යෝජනා කළාම අපිට බනින්න කවුරුවත් නැහැ. මොකද අපි වැරුදි වැඩ කරලා නැහැ.
• පක්ෂයෙන් නම් කීයක් යෝජනා කරලා ඇරියද?
නම් හතරක් යෝජනා කරලා ඇරියා.
• පසුගිය කාලයේ ආණ්ඩුවට එකතුවෙලා ඇමැතිකම් ගන්න පොහොට්ටුවේ පිරිසක් බලාපොරොත්තුවෙන් හිටියා. නමුත් ඒක තවම සිද්ධ වුණේ නැහැ. මේ සම්බන්ධයෙන් විපක්ෂය කියන්නේ ආණ්ඩුව ඇතුළේ පිපිරීමක් තිබෙනවා කියලා.
ඕක ඉතින් සාමාන්‍ය දෙයක්නේ. ආණ්ඩුවක ඉන්න කොට පක්ෂ ගොඩක් නිසා යම් යම් ප්‍රශ්න තිබෙනවා. දැන් බලන්නකෝ ආණ්ඩුවක් නොකර විපක්ෂයේ කොච්චර බෙදීමක් තිබෙනවාද කියලා. සමහර අය ආණ්ඩුවට එනවා. සමහර අය අලුත් පක්ෂ හදනවා. ඒක දේශපාලනයේ හැටි. ආණ්ඩුවට ඔය වගේ ප්‍රශ්න තිබුණාම විසඳගන්න පුළුවන්. ඔබට මතක ඇති මහින්ද රාජපක්ෂ මහත්තයාගේ කාලයේදීත් ඔයිට වඩා ප්‍රශ්න තිබුණා.
• ඔහොම ආණ්ඩු කරන්න පුළුවන්ද?
මොනවා වුණත් ජනතාව දැන් පිළිගන්නවානේ රනිල් වික්‍රමසිංහ මහත්තයා ඇරෙන්න වෙන නායකයෙක් නැහැ කියලා. ඒ නිසා අපි දැනගන්න ඕන එතුමාත් එක්ක එකතුවෙලා වැඩ කරන්න.
• වෙන කෙනෙක් ඇත්තේම නැද්ද?
කවුද ඉන්නේ. කවුද ගලපන්න පුළුවන්.
• පොහොට්ටුවේ සමහර අය කියනවා ඊළඟ රටේ නායකත්වයට සුදුසු අපේක්ෂකයා රනිල් වික්‍රමසිංහ ජනාධිපතිවරයා කියලා. ඔබත් ඒක පිළිගන්නවාද?
මට නම් පේන්න නැහැ වෙනත් අපේක්ෂකයෙක් ආණ්ඩුවේ සහ විපක්ෂයේ. මම හිතනවා ඊළඟ ජනාධිපති අපේක්ෂකයාත් රනිල් වික්‍රමසිංහ මහත්මයා වේවි කියලා.
• ඒක ජනතාවගේ කැමැත්තද නැත්නම් දේශපාලනඥයාගේ කැමැත්තද?
දැනටම ජනතාව අතර කැමැත්තක් තිබෙනවානේ. ඒක අපි හංගන්න ඕන නැහැ. ජනතාවගේ හිතේ මතයක් තිබෙනවා රනිල් වික්‍රමසිංහ මහත්තයා නිසා ජීවත් වෙන්න පුළුවන් වුණා කියලා. අපේ රටේ දේශපාලන වශයෙන් තීන්දු ගන්න පුළුවන් හැම අවස්ථාවකම ඒවාට බාධා ආවා. එන්න ඒ අභියෝගවලට මුහුණ දීලා තීන්දු තීරණ ගන්න පුළුවන් නායකයෙක් තමා රටට අවශ්‍ය. බලන්නකෝ නැගෙනහිර ජැටිය දෙනකොට විරුද්ධ වුණ අය බටහිර ජැටිය දෙනකොට විරුද්ධ වුණේ නැහැ. අද මිනිස්සු ඉන්නේ පෞද්ගලික අංශය හරි කමක් නැහැ කරනවා නම් ඒක හොඳයි කියලා.
• ඔබ හිතන්නේ ජනාධිපතිවරයාට ඒ හැකියාව තිබෙනවා කියලද?
අද තිබෙන තත්ත්වය රනිල් වික්‍රමසිංහ මහත්තයා අවුරුදු 20කට 30කට කලින් දැක්කේ. මට මතකයි 2001 මැතිවරණය වෙලාවේ කතාකරන කොට එතුමාට හිනාවුණා. මගේ රුස්වීමේදී කිව්වා තරුණයන්ට මාලයක් දාන්න බ්‍රේස්ලට් එකක් දාන්න හැකියාව හදනවා කියලා. ඒ වගේ තව රුස්වීමකදී කිව්වා තෙල් අර්බුදයක් විදුලිය අර්බුදයක් අනාගතයේදී එන්න පුළුවන් කියලා. නමුත් අපේ අය කළේ ඒක විවේචනය කරන එක. අන්තිමට එහෙම අය බලයට ආවාම ඒ ප්‍රශ්නය ඇති කළා. මට මතකයි යුද්ධය ඉවර කරලා ෂැංග්‍රිලා හොටලේ ආයෝජනය ගෙනාවාම අපිව විවේචනය කළා. ජේම්ස් පැකර් ගේන්න හදනකොටත් ඒ විවේචනයමයි කළේ. අද පැකර් ආවානම් මොකද වෙන්නේ. ප්‍රශ්නයක් නෑනේ.
• ඔබ මේ නොකියා කියන්නේ පසුගිය කාලයේ මේ රට හදන්න දුන්නෙ නැත්තේ දේශපාලනඥයෝ කියලාද?
අනිවාර්යයෙන්ම. අද මේ රට මේ තැනට වැටෙන්න ප්‍රධාන හේතුව මේ දේවල්වලට විරුද්ධව වැඩකළ දේශපාලනඥයෝ. අද වචනයක් කතා කරන්නේ නැහැ.
• ඒ කියන්නේ ඔබ කියන්නේ වැඩිම හානිය කළේ ආණ්ඩුවේ දේශපාලනඥයෝ කියලද?
වැඩි වශයෙන් වාමාංශික මතධාරී දේශපාලනඥයෝ. ඒ අය කළේ ජනතාව අවුස්සලා ප්‍රශ්න ඇතිකරපු එක. මේ පසුගිය දවසක ජවිපෙ අනුර කුමාර මහත්තයා ලොකු කතාවක් කළා. ඒකේ කිව්වේ රනිල් වික්‍රමසිංහ මහත්තයා සිදුකරන වැඩකටයුතු ටික පිළිබඳව. එතැන වැඩිපුර දේකට තිබුණේ පුන පුනා දූෂණ නවත්වනවා කියලා විතරයි. ඉතින් විපක්ෂයේ ඉඳලා කියෝ කියෝ ඉන්නේ නැතිව රනිල් වික්‍රමසිංහ මහත්තයත් එක්ක එකතුවෙලා වැඩ කළා නම් ඉවරනේ. රට හදන්න ඒගොල්ලෝ බලයට එනකම්ම ඉන්න ඕනැයැ.
• ඔබ හිතන විදිහට අපේ රටේ නායකයෝ ඇයි එවැනි තීරණ ගන්න ඇඹරෙන්නේ?
අපේ රටේ නායකයෝ හරිම සංවේදියි. ජනතාව වෙනුවෙන් තීන්දු තීරණ වෙනස් කරනවා. ඒවා යොදාගෙන ඇතැම් පක්ෂ තමන්ගේ දේශපාලන වැඩකටයුතු කර ගන්නවා. අන්තිමට එහෙම විරුද්ධ වුණ අය දැන් අද කොහෙද ඉන්නේ?
• මේක ගෝඨාභය රාජපක්ෂ මහත්තයාගෙන් පස්සේ වෙනස් වුණා කියලා ගොඩක් අය කියනවා?
මහින්ද මහත්තයා ඉන්න කාලේ බිම් මට්ටම හොඳින් හඳුනාගෙන හිටියා. ගෝඨාභය මහත්තයා ඉතාම අහිංසක කෙනෙක්.
• හැබැයි ගෝඨාභය රාජපක්ෂ අහිංසක කෙනෙක් හැටියට නෙමෙයිනේ ජනතාව බලාපොරොත්තු වුණේ?
ඒකට හේතුව වියත්තු. පොහොර ගේන්න එපා කිව්වේ කවුද? හාල් වගයක් ගෙනැල්ලා 60%ක් විතර රසායනික තියෙන්නේ කියලා දොස්තර කෙනෙක් රටේ නැති කතා කිව්වා. සමහර හාමුදුරුවරු කිව්වා මේ තීන්දුව වෙනස් කරන්න එපා කියලා. අවසාන මොහොතේ ගෝඨාභය මහත්තයා තනිවුණා. ඒ අය පැනලා ගියා. ලෝකයේ වෙන රටවල් කළේ ටික ටික. මම කෘෂිකර්ම ඇමැතිනම් කරන්නේ රසායනික පොහොර ඕන කෙනෙකුට ගේන්න කියලා කාබනික පොහොර නිකම් බෙදනවා. එහෙනම් පාරට මිනිස්සු එන්නේ නැහැ.
• ඔබ හිතන්නේ නැද්ද ඒ මොහොතේ ඇතිවුණ ප්‍රශ්නෙත් එක්ක පොහොට්ටුවට තිබුණ ජනතා ප්‍රසාදය නැතිවුණා කියලා?
යම් ප්‍රමාණයක් ගිලිහිලා ගියා. හැබැයි පදනම තවම තිබෙනවා.
• ඒ පදනම තියෙන්නේ මහින්ද මහත්තයා නිසාද? පක්ෂයේ වැඩකටයුතු නිසාද?
ඒ දෙකම නිසා. හැබැයි එදා තිබුණ තත්ත්වය දැන් නැහැ.
• විපක්ෂය කියන්නේ මේ ආණ්ඩුවට ආර්ථික දැක්මක් නැහැ කියලා. ඒක ඇත්තද?
2048 වෙනකම් සැලසුම් හදලා තියෙනකොට ආර්ථික සැලැස්මක් නැහැ කියන්නේ කොහොමද? විපක්ෂයට තිබෙන ආර්ථික සැලැස්ම කෝ? ඒක පෙන්වන්න එපැයි. ඒ ගොල්ලෝ ඔක්කොම සැලැස්ම තියාගෙන හංගගෙන ඉන්නවා. ඔය හැමෝම ගාව තියෙන්නේ රනිල් වික්‍රමසිංහ මහත්මයාගේ සැලැස්ම.
• විපක්ෂය කියන්නේ නම් රනිල් වික්‍රමසිංහ මහත්තයාට ජනතා බලයක් නැහැ කියලා?
එහෙනම් ඒ ගොල්ලෝ කොහොමද ඩී.බී. විජේතුංග ජනාධිපතිවරයාත් එක්ක වැඩ කළේ. එතුමාට ජනතා බලයක් තිබුණාද? එතුමා පත්කළේත් රටේ ව්‍යවස්ථාව.
• අරගලයෙන් පස්සේ දේශපාලනඥයන්ට වුණේ මොකක්ද?
සියයට හැටකගේ විතර දේශපාලන ප්‍රතිරෑපය කඩාවැටුණා. ඒ අයම තමයි දැන් ප්‍රතිරෑපය ගොඩනගා ගන්න ඕන. මිනිස්සු අරගලයේදී කිව්ව දේවල් වැරුදි නෑ. ආපු ක්‍රමය තමයි වැරුදි. මිනිස්සුන්ගේ අදහස් නිවැරුදියි. දේශපාලනඥයන් දැනගන්න ඕන මේ බලය තියෙන්නේ තාවකාලිකව සහ ජනතාව වෙනුවෙන් වැඩකරන්න කියලා. අපි බලය අරගෙන සිංහයෝ වගේ හැසිරුණාම මෙහෙම වෙනවා.
• අරගලයේ පණිවුඩය දේශපාලනඥයෝ තේරුම් ගන්න ඕන කියලද කියන්නේ?
අනිවාර්යයෙන්ම. ඒක තේරුම් නොගත්තොත් ආයේ අමාරුවේ වැටෙනවා.
• තේරුම් අරන් ඉන්නවාද ඒ අය?
සමහර අය නම් තවම තේරුම් අරගෙන නැහැ.
I ගයාන් ගාල්ලගේ
