ආණ්ඩුව මට බයයි

ජනක රත්නායක - (මහජන උපයෝගිතා කොමිසම් සභාවේ හිටපු සභාපති)

• රටට නායකත්වය දෙන්න කියා එන ඉල්ලීම් අහක දාන්න බෑ
• තෙල් මිල ගැන ඇත්ත කිව්ව දවසේ තමයි මගේ ප්‍රශ්න පටන් ගත්තේ
• මීට වඩා දෙයක් පාර්ලිමේන්තුවෙන් බලාපොරොත්තු වෙන්න බෑ
• අනික් අය වගේ සල්ලි දීලා රාජපක්ෂලාට මම කඩේ ගියේ නෑ
• මේ ස්වාධීන කොමිෂන් සභාවල මළගමයි
• හරියට වැඩ කරන්න මට උදව් දුන්නේ මාධ්‍ය සහෘදයෝ
• මම කරපු අරගලයෙන් මාව ඉස්මතු වුණා
• දේශපාලනයට ඕනෑ විදියට මම වැඩ කරන්නෙ නෑ

පසුගියදා ඔබට වෙච්ච සිදුවීම අපි ඉතිහාසයේ කවදාවත් දැකලා තිබුණ දෙයක් නෙමෙයි. ඔබටත් මේක හොඳ අත්දැකීමක් වෙන්න ඇති?

මම අර ඔයා අහන්න ගිය ඉතිහාස කතාවට උත්තරයක් දීලා ඉන්නද?

හරි ඔබ කියන්නකො?

ලංකා ඉතිහාසයේ පළවෙනි වතාවට තමයි ස්වාධීන කොමිෂන් සභාවක සභාපතිවරයෙක් එළවන්න පාර්ලිමේන්තුවේ 113 ට වඩා ඡන්ද අරගෙන පැය හතක කාලයක් විවාද කරලා කටයුතු කළේ. ඔබ කිව්වා වගේ මේ වගේ දෙයක් අතීතයේ කවදාවත් ඇතිවෙලා නෑ. ඉදිරියේදි ඇතිවෙන්නෙත් නෑ. මේක පාර්ලිමේන්තුවටත් ඉතිහාසගත වන වැඩක්. මම මේ තනි පුද්ගලයෙක්. 

ඇයි ඔබ ඉදිරියේදි මේ වගේ දෙයක් ඇතිවෙන්නෙ නැතිවෙයි කියන්නෙ?

නෑ ඉතින් දැන් මේගොල්ලන්ට ඕන දේ සිද්ධ කළානෙ. ඒ නිසා ඒ අවස්ථාව ඉදිරියෙදි ඇතිවෙන්නෙ නැතිවෙයි. 

එදා ඔබට පාර්ලිමේන්තුවෙන් ලැබුණු තීන්දුව සම්බන්ධයෙන් යම් මතයක් හෝ අදහසක් ඇති?

චෝදනා පත්‍රයක් ආවා. ඒක හැමෝම දන්නවා. ඒ චෝදනා පත්‍රයට මම නිසි පිළිතුරු දුන්නා. අපේ පාර්ලිමේන්තුව ගැන මම හොඳට දන්න නිසා ඒ තීන්දුව මට ලොකු දෙයක් නෙමෙයි. මම මේක කලින් දැනගෙන හිටියෙ. මේකට මම පුදුම වුණේ නෑ. මීට වඩා දෙයක් එතනින් බලාපොරොත්තු වෙන්න බෑ. මොකද පාර්ලිමේන්තු ඉතිහාසෙ ඉඳන් එහෙම දේවල් වෙලා තියෙනවා. ඒ නිසා චෝදනා සත්‍ය වුණත් අසත්‍ය වුණත් මම මේක බලාපොරොත්තු වුණා. 

ඔබට දුකක් නැද්ද?

මට එහෙම දුකක් නෑ. මම ඒ තීන්දුවට චැලේන්ජ් කරන්න යන්නෙත් නෑ. මොකද ඒක නිසි ක්‍රමවේදෙට සිද්ධ වුණේ. හැබැයි මම චෝදනාව පිළිගන්නෙ නෑ. 

දැන් හැමෝම කතා වෙන්නෙ ඔබගේ මේ ඉවත් වීම. හැබැයි මට ප්‍රශ්නයක් තියෙනවා ඔබ කොහොමද ඔතනට ආවෙ කියලා. මට කියන්නකො ඔබ කොහොමද ඔතනට ආවෙ කියලා?

මේ රටේ ආයතනවල සභාපතිවරු වගේම කොමිසම්වල සභාපතිවරුත් දාන්නෙ 99.9% ක් දේශපාලන සම්බන්ධතා තියෙන අය. ඒක තමා මේකෙ ක්‍රමවේදය. හැබැයි එහෙම දාන පුද්ගලයා දැනගන්න ඕනෙ දේශපාලනය පැත්තකින් තියලා ස්වාධීනව වැඩ කටයුතු කරන්න. ඒකට හොඳම උදාහරණය මම. මේ කොමිසමේ තියෙනවා පනතක්. ඒ පනතේ එක තැනක තියෙනවා සාමාජිකයො වැඩ කටයුතු කළ යුතු ආකාරය. ඒත් සමහර අය කිව්වා මේවා දේශපාලන පත්වීම් කියලා. 

ඔව් මටත් තියෙන ප්‍රශ්නෙ මේක දේශපාලන පත්වීමක් කියලා ඔබට චෝදනා කළා?

ඔබ කියන අයගෙ පවුලෙ කී දෙනෙක් දේශපාලන පත්වීම්වල ඉන්නවද? කවුද නිසි ක්‍රමවේදෙට බඳවා ගැනීම් සිදු කරලා තියෙන්නෙ. දැන් උදාහරණයක් හැටියට චාල්ස් මහත්මියව ආණ්ඩුකාරයා කරලා දැම්මා. එයාට වඩා සුදුසුකම් තියෙන අය නැද්ද? එයා විශ්‍රාම ගිය කෙනෙක්. එයා මැතිවරණ කොමිසමට දාලා මැතිවරණ කොමිසමේදි අවශ්‍ය තීන්දු තීරණ ඇයගෙන් අරගෙන ඒ කරපු දේට තුටු පඬුරක් හැටියට තමයි ආණ්ඩුකාර පත්වීම දුන්නෙ. ඒවත් දේශපාලන පත්වීම්. 

දැන් ඔය කොමිසමේ දේශපාලන පත්වීම් තියෙන්නෙ ඕක විතරද?

ඔය කොමිසමේ ඉන්නවා ඩග්ලස් නානායක්කාර කියලා කෙනෙක්. ඩග්ලස් නානායක්කාර කියන්නෙ කවුද? ඩග්ලස් නානායක්කාර කියන්නෙ විශ්‍රාම ගිය රාජ්‍ය පරිපාලන නිලධාරියෙක්. එයා වැඩ කළේ රනිල් වික්‍රමසිංහ මහත්තයා අගමැති කාලෙ ඒ ඔෆිස් එකේ. ඒ වගේම චතුරිකා විජේසිංහ. චතුරිකා විජේසිංහ කියන්නෙ මම වගේම රාජපක්ෂලත් එක්ක අවුරුදු විස්සක් විතර එකට ඉන්න මඟ නැගුම, අර නැගුම කියන තැන්වල වැඩ කරපු සාමාජිකාවක්. හැබැයි ඒ කවුරුත් කියන්නෙ නෑ දේශපාලන පත්වීමක් කියලා. ඒත් ඇත්ත තිත්තයි. හැබැයි මම නම් බය නෑ. හැබැයි මම දේශපාලනයට ඕන විදිහට වැඩ කරන්නෙ නෑ. ඒක තමයි මේ ප්‍රශ්නෙ මූලික පටන් ගැන්ම. 

එදා පාර්ලිමේන්තුවෙදි රාජ්‍ය ඇමැති චාමර සම්පත් දසනායක කිව්වා ඔබ ජනාධිපතිවරණයේදි ගෝඨාභය මහත්තයට කඩ කාමරයක් දුන්න කෙනෙක් කියලා?

(සිනාසෙයි.) මෙහෙමනෙ. ඔය චාමර කියන මනුස්සයනෙ මීට කලින් කිව්වෙ එයාට ඉංග්‍රීසි බෑ, එයාට අධ්‍යාපනයක් නෑ කියලා. එයාම එයා ගැන ස්වයං විවේචනයක් කළානෙ. ඉතින් ඒ වගේ මනුස්සයෙක් කතා කරන දේකට මම වගේ කෙනෙක් උත්තර දිය යුතුද? කියන ප්‍රශ්නය මම ඔබෙන් අහනවා. 

ඔබ ඉස්සෙල්ලා කිව්වා රාජපක්ෂවරුත් එක්ක අවුරුදු විස්සක විසි පහක ඉඳන් එකට වැඩ කළා කියලා. ඔබට මොන වගේ මිත්‍රකමක්ද රාජපක්ෂලා එක්ක තියෙන්නෙ?

මෙහෙමයි. රාජපක්ෂලාට වැඩ කළා නෙමෙයි. අනික රාජපක්ෂලා එක්ක මිත්‍ර වුණේ පවුල් සම්බන්ධතා නිසා නෙමෙයි. මම ව්‍යාපාරිකයෙක්. මම රාජපක්ෂවරු අඳුරගන්නෙ 2003 දි විතර. එතකොට මහින්ද රාජපක්ෂ මහත්තයා විපක්ෂ නායක. 

ඔබ රාජපක්ෂලාට කඩේ ගියා එදා ඉඳලා?

මම කඩේ ගියා කියන එක පිළිගන්නෙ නෑ. ඒ කට්ටිය එදා ඉඳන් මගේ පස්සෙන් ආවා. මොකද ඒ අයට අවශ්‍ය පහසුකම් මම සැපයුවා. 

ඔබ මොනවද රාජපක්ෂලාට සපයපු පහසුකම්?

මේක මිනිස්සු දන්නෙ නෑ. ඔයා මේක ලියන්න. 2005 මැතිවරණය වෙලාවෙ ප්‍රචාරණ කටයුතුවලට අපි කළා &කෝල් සෙන්ටර්* එකක්. මොකද මම කම්පියුටර් සම්බන්ධ ව්‍යාපාරයක්නෙ කළේ. ඒ නිසා ඒ ඩිජිටල් කැම්පේන් එක තනිකර කළේ මම. මගේ දැනුම, මගේ මුදල් සහ මගේ තැන. මම මේ අයට විසඳුම් දුන්නෙ. අනිත් අය වගේ සල්ලි දීලා කඩේ ගියෙ නෑ. 

2019 දි මොනවද දුන්න පහසුකම්?

මගේ ගොඩනැගිලි ප්‍රමාණයක් තියෙනවා, මම ඒ අවශ්‍යතාවය අනුව ඒ දේවල් දුන්නා. කඩේ යාමක් නෙමෙයි. මම දේශපාලනය කරන්නෙ නෑ. ඔයා දන්නවද අද වෙනකම් මම ඡන්දෙ දීලා නෑ කාටවත්. මම ප්‍රතිපත්තියක් හැටියට දෙන්නෙ නෑ. දීලා වැඩක් නෑ, මේ ඉන්න හැමෝම එක වගේ මිනිස්සු. 

එහෙනම් ජනාධිපතිවරු හදන්න උදව් කළේ?

ඉතින් රටට ජනාධිපති කෙනෙක්, අගමැති කෙනෙක් ඕනනෙ. ඉතින් ඒ අය වෙනුවෙන් මම මගේ පහසුකම් සපයලා තියෙනවා. 

එදා පාර්ලිමේන්තුවෙදි කතාවක් එළියට ආවා ශිරානි බණ්ඩාරනායක හිටපු අගවිනිසුරුතුමිය එළවන්න වැඩ කටයුතු කළේ සහ කැම්පේන් කළේ ඔබ කියලා?

මෙහෙමයි. එක එක්කෙනා එක එක චෝදනා ගේනවා. ඇයව ඉවත් කළෙත් පාර්ලිමේන්තුවෙන්. මාව ඉවත් කළෙත් පාර්ලිමේන්තුවෙන්. මේක සමාන වෙන නිසා චෝදනාවක් දාන එක තමයි ලේසිම වැඩේ. ඒ වෙනුවෙන් තමයි ඒ චෝදනා කරන්නෙ. 

ඔබට ගැලරියට නොයන්න කවුද ඉඩ නොදුන්නෙ?

මම මුලින් ඉඳන්ම දන්න නිසා මම ලිපියක් ලිව්වා පාර්ලිමේන්තු මහ ලේකම්වරයාට මටයි මගේ පුතාලා දෙන්නටයි මේ විවාදය බලන්න ඉඩ දෙන්න කියලා. ඒකට උත්තර නැති හින්දා මම කතා කළා කතානායකතුමාට. එතුමා මට කිව්වා ගැලරිය වහලා කියලා. මම දන්නෙ නෑ ඒ වගේ තනතුරු දරන අය එහෙම කිව්වෙ ඇයි කියලා. මම ඊටපස්සෙ හරි පිළිතුරක් නැති හින්දා වේත්‍රධාරියාට කතා කළා. එතකොට එතුමා කිව්වා පාර්ලිමේන්තුවෙ එදාට කතා වෙන දේවල් නිසා ඔබතුමා අපහසුතාවයට ලක්වෙයි, ඒ නිසා නොයාම හොඳයි කියලා. පස්සෙ මම ඒකට එකඟ වුණා. පස්සෙ විපක්ෂ නායකතුමා උත්සාහ කළා. ඒත් හරි ගියෙ නෑ. ආණ්ඩුවෙ අය මට බයයි. 

ඔබ හිතන්නෙ මේ ඔබව එළවීමේ වැඩේ මොන විදිහට වෙන්න ඇද්ද?

දේශපාලන ලොක්කෙක් ඇමෙරිකාවෙ ඉඳන් ලංකාවට ආවා. ඒ බැසිල් රාජපක්ෂ. එයා ලියුමක් ගැහුවා හැමෝටම අනිවාර්යෙන්ම පාර්ලිමේන්තු සැසිවාරයට සහභාගි වෙන්න කියලා. ඒ වගේම විෂය භාර ඇමැති ජනාධිපතිවරයා යෝජනාව පාර්ලිමේන්තුවට ඉදිරිපත් කරලා රට ගියා. ඔහු මුදල් ඇමැති. ආණ්ඩුව මට බයයි. 

ඔබ විවාදය ටීවී එකේ දකින්න ඇතිනෙ. මොකද හිතුණෙ?

මට හිනා ගියා. මහජනතාව වෙනුවෙන් කතා කරපු සභාපතිවරයෙක් එළවන්න මහජන නියෝජිතයො එකතුවෙලා ඡන්දය දෙන එක විහිළුවක් නෙමෙයිද? මට වඩා ජනතා හෘද ස්පන්දනය දන්න අයනෙ මේ අය. නමුත් මට දුකක් ඇතිවුණා කොමිසමේ සභාපතිවරයා හැටියට ජනතාවට තව ටිකක් වැඩ කරන්න තිබුණා කියලා. 

ඔබ එක්ක මේ ගැටුම පටන් ගන්නෙ කොතනදිද?

මම කෝප් කමිටුවට කිව්වා ආනයන තෙල් මිල වැඩියි, මීට වඩා අඩුවෙන් දෙන්න පුළුවන් කියලා. දත්ත පිටින්ම කිව්වා. ඒ අය ඒක පිළිගත්තෙ නෑ. 

ඔබට හිතුණෙ නැද්ද ඒ වගේ දෙයක් කියලා ප්‍රශ්නයක් ඇතිවෙයි කියලා?

ඇයි බය වෙන්නෙ. ඇත්තනෙ කිවුවෙ. ලංකාවෙ වැඩිම තෙල් ප්‍රමාණයක් භාවිත කරන්නෙ විදුලිබල මණ්ඩලය. ඒ අය ඉතින් අසාධාරණ ලෙස මුදල් ගන්නවා නම් ඒ සල්ලි ගෙවන්නෙ මහජනතාව. ඉතින් ඔතන ඉඳන් තමයි ප්‍රශ්න ඇතිවුණේ. 

වර්තමාන ජනාධිපතිවරයා ඔබත් එක්ක මේ ගැන කතා කළේ නැද්ද?

එතුමා මට ආමන්ත්‍රණය කළා දෙවැනි දවසෙ. ඒ අය ආවා මේකට අත ගහන්න. මම ජනාධිපති ලේකම් සමන් ඒකනායකට දැනුම් දුන්නා, මේක ස්වාධීන ආයතනයක්, මෙහෙම වැඩ කරන්නෙ කොහොමද කියලා. අන්තිමට මම මෙතුවක් කල් නොකිව්ව දේශපාලන සබඳතා ඔක්කොම කියලා බොරු චෝදනා පටලවලා මාව අයින් කළේ ඇමැති. මේක ස්වාධීන කොමිෂන් සභාවල මළගම. 

දැන් මේ ප්‍රශ්න මදිවට ඔබ ජනාධිපතිවරණය තෝරගත්තෙ මොකටද? ඔබ ප්‍රශ්න විසඳන්නද යන්නෙ ඒ හරහා?

මම ජනාධිපතිවරණයට ඉදිරිපත් වෙන්න තීන්දුවක් අරගෙන නෑ. වෙල්ගම මහත්තයා මාව එදා උපහාසයට ලක් කරලා කතාවක් කළා. දැන් මම අහන්නම් ඔයාගෙන් ඔයා අද මට කතා කරන්නෙ ඇයි? දැන් මේ කතා කරන ඇතුළතත් කෝල් සීයකට වඩා එනවා. අද කොහේ ගියත් මට කියන්නෙ හැමෝම ඔබවත් මේක හරියට හදන්න කියලා. ඒ ඉල්ලීම හැමතැනම තියෙනවා. ඒ වගේම සර්ව ආගමික නායකයො, ව්‍යාපාරිකයන්, වෘත්තිකයො මට මේ ඉල්ලීම කරලා තියෙනවා. මොකද ඒ අය දන්නවා කෙළින් කතා කරන්න පුළුවන්, කෙළින් වැඩ කරන්න පුළුවන් කාටද කියලා. ඒ නිසා තමයි අකැමැත්තෙන් හරි ඒ තැනට තල්ලුවෙලා තියෙන්නෙ. 

ඔබට එක්තරා කණ්ඩායමකින් පොදු අපේක්ෂකයා හැටියට ඉදිරිපත් වෙන්න කතා කළා නේද?

ඒක දන්නෙ නෑ. ඒ අය කතා වෙනවා ඇති. මට පක්ෂ කිහිපයකිනුත් කතා කළා. දැන් මේ රටට නායකයෙක්ගෙ අවශ්‍යතාවකුත් තියෙන නිසාත් ඒක කරන්න හැකියාවකුත් තියෙන නිසාත් දේශපාලනඥයො මේ රට කාපු එක ඉක්මනින් ගොඩගන්න ඕන නිසාත් දැන් එන ඉල්ලීම් ප්‍රතික්ෂේප කරන්න බෑ. 

ඔබ අරගලය සම්බන්ධයෙන් දකින්නෙ මොකක්ද?

මමත් කළේ ලොකු අරගලයක්. අරගලයේ තියෙන ප්‍රශ්නය තමයි අරගලයට හරි නායකයො ඕනෙ. ඒ නායකයන්ට හොඳ විෂන් එකක් තියෙන්න ඕනෙ. නායකත්වයක් නැති අරගලය පුස්සක් කියලා අපි දැක්කනෙ. හැබැයි අරගලයෙන් ලබාගත්ත ජයග්‍රහණත් තියෙනවා. ඒ වගේම මම කරපු අරගලයෙන් මම ඉස්මතුවෙලා තියෙනවා. ඉතින් ඒ අරගලය ඉස්සරහට අරගෙන යන එක තමයි වැදගත් දේ.

ඔබට කියන්න තියෙන දේ මොකක්ද රජයේ රුකියා කරන අයට ඔබට ඇති අත්දැකීම් අනුව?

මම කියන්නෙ මම වගේ කොන්ද පණ තියාගෙන වැඩ කරන්න කියලා. මගේ කොන්දට පාර්ලිමේන්තුවෙ කට්ටියත් බය වුණානෙ. කොන්ද තියෙනකොට අවබෝධය තියෙනකොට හරි දේ හරි විදිහට කරන්න පුළුවන්. ඒ නිසා හැමෝම තම තමන්ට පුළුවන් විදිහට අරගල කරන්න. මේකෙ වෙනසක් අත්‍යවශ්‍යයි. ඒ වගේම මට කියන්න තියෙන්නෙ මට විශාල වශයෙන් උදව් කළේ හරියට වැඩ කරන්න මාධ්‍ය සහෘදයො. ඒ හැමෝටම ස්තූතියි. 

ඔබගෙන් අවසාන වශයෙන් අහන්න තියෙන්නෙ එක ප්‍රශ්නයයි. ඉස්සරහට විදුලි බිල අඩු කරන්න යනවා. කීයකින් අඩු කරන්න පුළුවන්ද?

මේ අය 3% ක් කියලා කිව්වට ඇත්තටම 27% ක සහනයක් දෙන්න පුළුවන්. මොකද විදුලි පරිභෝජනය අඩුවෙලා තියෙනවා. ඉල්ලුම අඩුවෙලා තියෙනවා. තෙල්වල ගාණ අඩුවෙලා තියෙනවා. ඒ නිසා අපි හිටියත් නැතත් අපි මේ වෙනුවෙන් සටනක් කරමු.

♦ ගයාන් ගාල්ලගේ