විපක්ෂයේ පිරිසක් මාත් එක්ක ආණ්ඩුවට යන්න සූදානමින් හිටියා

- පාර්ලිමේන්තු මන්ත්‍රී කුමාර වෙල්ගම

• ප්‍රශ්න විසඳුණාට පස්සෙ අලුත් කැබිනට්ටුවක් ඒවි
• රනිල් මහත්තයා අමාරුම මොහොතේ වැඩ පෙන්වන පරිණත නායකයෙක්
• සජිත් අවංක නායකයෙක්: ඒත් තනතුරු දෙනකොට පස්ස ගැහැව්වා
• හොරකම් ගැන පොහොට්ටු නායකයන් වැඩිපුර වගකියන්න වෙනවා
• අනුර කුමාරට රට පාලනය කරන්න අත්දැකීම් නෑ
• මේ රට වැටෙන්න කොමිස් ගැහිල්ලත් හේතුවුණා
• රාජපක්ෂවරුන්ට දැන්ම නම් බලයට එන්න බෑ
• ගුටිකාපු අපි පාරෙ යන්නෙ රනිල් නිසා

• ඔබතුමා ක්‍රියාකාරී දේශපාලනඥයෙක්. නමුත් පසුගිය කාලයේ වැඩිය සද්දයක් බද්දයක් නෑ. මොකද දේශපාලනය ගැන කලකිරිලද?

මම මැයි 9 වැනිදා ගුටිකෑවනෙ. ඒ සිද්ධියෙන් පස්සෙ පොඩි අවුල් කිහිපයක් තියෙනවා ශරීරයේ. මම බෙහෙත් එහෙම කරගත්තා. මොනවා කරන්නත් ශරීර සෞඛ්‍යය හොඳින් තියෙන්න එපායැ. පහුගිය ටිකේ ඒකට මහන්සි වුණා. දැන් හොඳින් ඉන්නවා. 

• අපි ඔබතුමාට ඉක්මන් සුවය ප්‍රාර්ථනා කරනවා. කොහොමද ඔබතුමා මේ දවස්වල දේශපාලනය ගැන දකින්නේ?

මේ රටේ දේශපාලනය අනුව මේ රට ගොඩදාන්න පුළුවන් නායකයෙක් පේන්නම නෑ. එහෙම පේන්න හරි ඉන්නේ එක්කෙනයි. අනෙක් කිසිම කෙනෙක් අපිට පේන්නෙ නෑ. මම මෙහෙම කියන්නේ පළපුරුදු දේශපාලනඥයෙක් හැටියට. ඒ වගේම ගෝඨාභය රාජපක්ෂ මහත්තයා මේ රටට සුදුසු නෑ කියලා කියපු පළමුවැනි පුද්ගලයා හැටියට.

• අපි දන්නවා වෙන්ඩ නායකයෝ ඉන්නවා ගොඩක්. අනුර කුමාර, සජිත් ප්‍රේමදාස වගේ අය ඉන්නවා. ඔබ කියන්නේ ඒවගේ අය සුදුසු නැහැ කියලද?

මේ රට තියෙන තත්ත්වය අපි දන්නවා. රට ඉතාම පල්ලෙහාට වැටිලා තියෙන්නේ. ඒකට දේශපාලනඥයෝ ඇතුළු රටේ සියලු නිලධාරීන් වග කියන්න ඕන. මේ රටේ දූෂණය වැඩියි. මම දන්නවා ඒ කාලෙත් කොමිස් ගැනීම සිදු වුණා. ඒ ගත්තේ සියයට 3ක් වගේ. දැන් සියයට 15 ඉඳලා 50% දක්වා වෙලා. හිතන්නකෝ විශාල ණය ප්‍රමාණයක් අරගෙන ඔහොම කොමිස් ගැහුවාම කිසි දෙයක් ඉතිරි වෙනවාද?

• ඔබ කියන්නේ නායකයෝ නෙමෙයි පරිවර්තනය වෙලා තියෙන්නේ. අල්ලස් ගැනීමයි පරිවර්තනය වෙලා තියෙන්නේ?

පැහැදිලිවම ඔව්. 

• හරි මට කියන්නකෝ අර උඩ කිව්ව නායකයන්ට රට ගොඩදාන්න බැරිද? 

අපි අනුර කුමාර බලමු. ඔයා හිතනවද එයාට මේ රටේ ප්‍රශ්නවලට මුහුණ දෙන්න පුළුවන් වෙයි කියලා. අපි හෘද සාක්ෂියට අනුව කතා කරමුකෝ. කිසිසේත්ම එයාට කරන්න බෑ. ඔහුට එහෙම කරන්න පුළුවන් වටපිටාවක් නැහැ. ජාත්‍යන්තර සබඳතා නෑ. ඒ අත්දැකීම් නැහැ. ඒ නිසා මම හිතන්නේ නැහැ රටක් කරන්න පුළුවන් හයියක් එයාට තියෙනවා කියලා. 

• දැන් ඔබ ළඟින්ම ඇසුරු කරන නායකයානේ සජිත් ප්‍රේමදාස. අපි දැකලා තියෙනවා ඔහු කියන කතා එහෙම. ඔහුටත් බැරිද මේ රට හදන්න? 

සජිත් කියන්නේ අවංක නායකයෙක්. නමුත් වෙලා තියෙන්නේ එතුමාට අත්දැකීම් මදි. පාර්ලිමේන්තුවේ විපක්ෂනායකයා හැටියට හිටියට ඒ ගැම්ම ඔහුට නැහැ. තනතුරු දෙනකොට වුණත් පස්ස ගැහුවනේ මට බෑ කියලා. 

• ඔබ කියන්නේ ඔහුට පසුගිය කාලේ අගමැති පුටුවට ආපු අවස්ථාව මගහරවා ගැනීම ගැන නේද?

ඔව්. එයා භාරගන්න අකමැති වුණා නෙමෙයි, එයාට හැකියාවක් නැහැ. මොකද එයා දන්නවා එයාට පළපුරුද්දක් නැහැයි කියලා.

• එහෙම පළපුරුද්දක් නැත්තම් නොගත්ත එක හොඳයි නේද?

ඔව් ඒක සාධාරණයි. එහෙම නොගත්ත එක ඇත්තටම හොඳයි. 

• හරි, ඔබ හිතන රට හදන්න පුළුවන් නායකයා කවුද?

1977 ඉඳලා ජේ.ආර්. ජයවර්ධන මහත්තයාත් එක්ක එකට ඉඳලා එතුමාගේ ඥාතියෙක් වෙච්ච කෙනෙක් තමයි රනිල් වික්‍රමසිංහ මහත්තයා කියන්නේ. එතුමා තනතුරු දරලා තිබෙනවා. නමුත් එතුමා මොන තනතුරු දැරුවත් හිටියේ කාගේ හරි කෙනෙක් යටතේ. ඒ නිසා එතුමාට තමන්ගේ දේවල් කරන්න හැකියාවක් තිබුණේ නැහැ. නමුත් එතුමා පහුගිය අරගලයෙන් පස්සේ පාර්ලිමේන්තු මන්ත්‍රීන් 134ක ඡන්දයෙන් ජනාධිපති වුණා. මම හිතනවා රට යම්කිසි තැනකට අරන් යන්න පුළුවන් එකම කෙනා රනිල් වික්‍රමසිංහ මහත්තයා විතරයි. 

• දැන් එතුමා ගෙනෙන යෝජනාව තමයි මේ රට හදන්න සර්ව පාක්ෂික ආණ්ඩුවක් සැකසිය යුතුයි කියන අදහස. ඔබත් එයට එකඟද?

මම ඒකට එකඟයි. මම කියන්නේ විපක්ෂයට අපි සියලුදෙනා එකතු වුණොත් විතරයි මේ රට හදන්න පුළුවන් වෙන්නේ කියලයි. ලෝකයේ හැම රටක්ම කඩා වැටුණාම පක්ෂ විපක්ෂ සියලුදෙනාම එකතුවෙලා එකතැනකට ආවා. එහෙම අපි එකතු වුණොත් රනිල් වික්‍රමසිංහ මහත්තයාට 2048 වෙනකම් ඉන්න ඕන නැහැ. 2030 වෙද්දි ඉවර කරන්න පුළුවන්. කකුලෙන් අදින්න ගියොත් මේක කවදාවත් ගොඩදාන්න වෙන්නේ නැහැ.

• විපක්ෂනායකතුමා කියන්නේ නම් පොහොට්ටුවේ අයත් එක්ක එකතුවෙලා ආණ්ඩු කරන්න බැහැ. ඒ අය දූෂිතයි. ජනතාව දූෂිතයන් ප්‍රතික්ෂේප කරලා තියෙන්නේ කියලා?

පොහොට්ටුව දූෂිතයි දූෂිතයි කියලා රට හදන එක මඟහරින්න පුළුවන්ද? අපි ඔක්කොම දූෂිතයිනෙ. ඔයා මට කියන්න ඔය පාර්ලිමේන්තුවේ සියයට 0.001ක කෙනෙක් හැර අනෙක් සියලුදෙනාම දූෂිත නැද්ද? පොහොට්ටුව දූෂිතයි කියන්න බැහැ. අපේ පැත්තටත් ඇඟිල්ල දික් වෙනවා.

• අපිත් දූෂිතයි කියලා කියන්නේ ඔබතුමාට තියෙනවාද ඔබතුමා ගැන ස්වයං විවේචනයක්?

ස්වයං විවේචනයක් කියන්නේ අපි ඔක්කෝටම මේකට වගකියන්න ඕන. පොහොට්ටුවේ අය විතරයි කියලා කියන්න බැහැ. හැබැයි පොහොට්ටුවේ නායකයන්ට ටිකක් වැඩිපුර වග කියන්න වෙනවා. අනෙක් අය අඩුවෙන් ටිකක් හොරකම් කරන්න ඇති. හැබැයි දහය හොරකම් කළත් ලක්ෂය හොරකම් කළත් හොරා හොරාමයි. ඒ නිසා රට හදන වැඩේ ඒක පිටින් දාලා ඇඟ බේරගන්න හොඳ නැහැ. මෙතැන තියෙන්නේ තමන්ගේ වාසිය. තමන් කොහොමද බලයට එන්නේ කියලා හිතන්නේ. 

• මොකද්ද සජිත් ප්‍රේමදාසට තියෙන වාසිය?

නෑ. එතුමා හිතනවා ඇති හර්ෂ ද සිල්වා හරි එරාන් වික්‍රමරත්නගෙන් හරි කර උඩින් ගිහිල්ලා මේක විසඳගන්න පුළුවන් වෙයි කියලා. එහෙම බෑ. කාගේවත් කරපිටින් ගිහිල්ලා නායකත්වය ගන්න බැහැ. රනිල් වික්‍රමසිංහ මහත්තයාට එහෙම නෙවෙයි හොඳ අත්දැකීම් තියෙනවා. රට රටවල් ගැන. ඒවා හැදෙන හැටි ගැන. හැමදේම දන්නවා. ඉතින් එතුමා රුජිනට ඔටුනු පළන්දනකොට අවුරුදු 5දී ඒ උත්සවයට සහභාගි වුණ කෙනෙක්නේ. දැන් මේ පාර චාල්ස් කුමාරයා ඔටුනු පළඳිනකොටත් ගියා. බලන්න අරගලය පවා එතුමා පාලනය කළානේ. ගුටිකාපු අපි පවා පාරේ යන්නේ එතුමා නිසානේ. එතුමා මේ පාර ජපන් ගිහිල්ලා පවා රටට සල්ලි ගෙනාවේ එතුමාට තිබෙන දැනුම සහ අවබෝධය නිසා. හැබැයි එක දෙයක් කියන්න ඕන. එතුමා යන ගමන නම් ඉතාම දුෂ්කරයි. 

• ඔබතුමාට අලුත් ආණ්ඩුවට කතා කළේ නැද්ද?

මම එතුමා වෙනුවෙන් හැමතිස්සේම කතා කරනවා. ඒ වගේම වැරුද්දේදී විවේචනත් කරනවා. මට ඉතින් ඔය ඇමැතිකම් තිබ්බත් එකයි නැතත් එකයි. මට ලොකු රට. මට ඔය ඇමැතිකම් වැඩක් නැහැ. දැන් අපේ වයසත් එක්ක බලන්න ඕන ඇමැතිකම් නෙමෙයි රට ගැන. අපි බලන්න ඕන අපේ දරු මුණුපුරෝ ගැන. අපි කිසිදෙයක් බලාපොරොත්තු නොවී සහාය දෙන්න ඕන. 

• පසුගිය දවස්වල කතාවක් ගියා ඔබතුමා ඇතුළු කණ්ඩායමක් ආණ්ඩුවට එකතු වෙනවා කියලා. ඒ කතාව ඇත්තද?

ඒකේ ඇත්තක් තිබුණා. බොරු කියන්න ඕන නැහැනේ. මගේ එහෙම අදහසක් තිබුණා. මගෙන් ඇවිල්ලා කට්ටියක් ඇහුවා ආණ්ඩුවට එකතුවෙමුද කියලා.

• කවුද ඒ කට්ටිය?

මම නම කියන්න කැමැති නැහැ. හැබැයි විපක්ෂයේ බොහෝ දෙනෙක් ලෑස්ති වෙලා හිටියා. මම ඒ වෙලාවේ කිව්වා මම එතැනට යන්න කැමැතියි කියලා. හැබැයි මම කිව්වා වරප්‍රසාද මට ඕන නැහැ කියලා. 

• ඇයි ඒ යන්න ගිය ගමන නැවතුණේ?

ඒක නතර වුණේ නැහැ. තවමත් ඒ අදහස තියෙනවා කට්ටියගේ. වෙලා තියෙන්නේ පොහොට්ටුවේ සමහර ඉහළ අය දමන යෝජනාවලට ජනාධිපතිතුමා කැමැති නැහැ. ඒ යම් යම් පත්වීම් සම්බන්ධව. ජාතික ආණ්ඩු වැඩේටත් යන්න බැරිවෙලා තියෙන්නේ ඒ අයගේ ඔය වැඩ නිසා. හැබැයි ඔය ප්‍රශ්න ටිකත් ඉක්මණින් විසඳෙයි. 

• එහෙනම් අලුත් කැබිනට් මණ්ඩලයක් එනවා ළඟදීම?

ප්‍රශ්න ටික විසඳුනාට පස්සේ එයි. 

• ඔබ ආයේ ඡන්දයක් ඉල්ලුවොත් සජිත් එක්කද නැත්නම් වෙන කණ්ඩායමක් එක්කද ඉල්ලන්නේ?

ඇත්තටම මට එතුමා උදව් කළා. මම අවුරුදු 30ක් පාර්ලිමේන්තුවේ හිටිය කෙනෙක්. මේ ගමන එන්නේ එතුමා නිසා. කොහොම වුණත් අපිට දැන් පක්ෂයක් තිබෙනවා. ඉදිරියේදී කා එක්ක සන්ධාන ගත වේවිද දන්නේ නැහැ.

• මේ දවස්වල කතාවක් යනවා ඊළඟ ජනාධිපතිවරණය ගැන. ගොඩක් අය කියන්නේ රනිල් වික්‍රමසිංහ මහත්තයා තමයි සුදුසු කියලා. ඔබත් ඒ මතයේද ඉන්නේ?

මම කිව්වනේ එතුමා ඉතාම පරිණත නායකයෙක්. එතුමාගේ දක්ෂතාවය මේ අමාරු මොහොතේ පෙන්වලා තියෙන්නේ. ඒක කාටවත් කරන්න බැරිවුණ දෙයක්. අද රට 10%ක් හරි වර්ධනය වෙලා තියෙන්නේ එතුමා නිසා. මම කියන්නේ ඉතිරි ටිකත් ඉටු කරන්න එතුමාට බලය දෙන්න ඕන. හැබැයි එතුමා ඉදිරිපත් වුණොත් විතරයි අපි සහාය දෙන්නේ. 

• ගොඩක් අය කියනවා නැවත රාජපක්ෂවරුන්ට බලයට එන්න පුළුවන් කියලා?

දැන්ම බැහැ. තව අවුරුදු පහළොවක් විස්සක් යයි. අපි දන්නෙ නෑ තව අවුරුදු 15කින් 20කින් නාමල් බලයට එන්න පුළුවන්. එහෙම ලෝකයේ වෙලා තියෙනවා. 

• අවසාන වශයෙන් ඔබෙන් අහන්නේ ඔබ අරගලයෙන් බැටකාපු පුද්ගලයෙක්. ඔබ ඇත්තටම අරගලය ගැන මේ වෙනකොට හිතන්නේ මොනවාද?

සැබෑ අරගලයට අපි ගෞරව කරනවා. දැන් බලන්න එදා නුවර ඉඳන් කෝච්චියේ එන්න ඔක්කොටම ටිකට් ගත්ත කාන්තාවක් ඉන්නවා. මම කියන්නේ ඇය සැබෑ අරගලකාරියක්. ඇය හදවතින් එය කළේ. ඒ ගිය අයත් සැබෑ අරගලකරුවන්. වැඩේ කරලා ඒ කෝච්චියේම ගෙදර ගියා. හැබෑ අරගලයෙන් පස්සේ සංවිධානාත්මක පිරිසක් හිටියා. ඒ අය තමයි මේවා කළේ. ඔය ගෙවල් ගිනි තිබ්බේ එහෙම සැබෑ අරගලකරුවන් නෙමෙයි. ඔය මව් ජනතා විමුක්ති පෙරමුණේ ඉඳලා කඩාගෙන ගිය කට්ටිය ඉන්නවානේ. ඒ අයගෙන් මේ මෑතක කැඩිලා ගිය පිරිසක් මේකට ඉන්නවා. ඒ අය තමයි මේ විනාශය කරන්න මුල. ඒ අය හිතන්නෙම බලය ගන්න ආයුධ අතට ගන්න ඕන කියලා.

♦ ගයාන් ගාල්ලගේ