ආණ්ඩුවේ දුර පැනිල්ල
එහෙම තියෙන අතරේ ජනාධිපතිවරයා හදිසියේම ලබන සති අන්තයේ විශේෂ වැඩකට අතගැසීමට සූදානමින් සිටින බවත් පසුගිය සතියේදී පැහැදිලිව පෙනී ගියේය. ඔහු එංගලන්තයේ සහ ප්‍රංශයේ චාරිකාවට සහභාගි වීමට කලින්ම ලබන සති අන්තයේ තීරණාත්මක රැස්වීමක් පැවැත්වෙන බවට ලොකු සිග්නල් එකක් දුන්නේය. ආණ්ඩු පක්ෂයේ සියලුම මැති ඇමැතින්ලා ඒ සඳහා සහභාගි විය යුතු බවට දැනුම් දීමක්ද කළේය. කොටින්ම කිසිදු මන්ත්‍රීවරයකු විදෙස් ගමනක් යොදා නොගත යුතු බවට නියෝගයක්ද පැනවීය.
එහෙම වෙන්නේ මේ දෙපාර්ශ්වයම තවම ඡන්දයකට මුහුණදීමට සූදානම් නැති නිසා බව දේශපාලනයේ අයන්න ආයන්න කියවූ සියලුදෙනා දැන සිටිති. එළියේ කොයිතරම් ඡන්දයකට සූදානම් යැයි අභියෝග කළත් ඇතුළේ කතාව ඕකය. පොහොට්ටු මන්ත්‍රීලා වැටී සිටි තැනින් යම් පමණකට මේ වනවිට ගොඩ ඇවිත් තිබුණත් ඡන්දයක් ප්‍රකාශ කළ වහාම මේ තත්ත්වය හැරෙන දිශාව තවමත් ඔවුන්ට පැහැදිලි නැත. එහෙම වුණත් තැන තැන තබන පොහොට්ටු බලමණ්ඩල රැස්වීම්වලදී ඇතැම් පොහොට්ටු නායකයන් කතා කරන්නේ දැන් සියල්ල හරි කියන මට්ටමේ සිටිමින් බවද පෙනීයයි. ඒ කතා කොයිතරම් දුරකට රටේ ජනතාව පිළිගන්නේද කියන එක බලාගන්න මැතිවරණයක් පැමිණිය යුතුය.
මේ කියන කාල රාමුව තුළ ණය ප්‍රතිව්‍යුහගත කිරීම අවසන් කළ හැකිද? එය තරමක් අමාරු ඉලක්කයක් බව බැලූ බැල්මට පෙනී යයි. විදෙස් ණය ප්‍රතිව්‍යුහගත කිරීම රටේ ජනතාවට අදාළ නැත. නමුත් දැනට ලංකාව විදෙස් ණය ගෙවීම අත්හිටුවා ඇති බවත් එය ණය ප්‍රතිව්‍යුහගත කිරීමේ එක් අදියරක් පමණක් බවත් ඔවුහු දැන සිටිති. එසේම විදෙස් ණය නැවත ගෙවීමට කාලය උදා වූ විට රටේ ආර්ථිකය යළි මොන පැත්තට පැතිරෙයිද යන්න ගැන ඔවුන්ට ඇත්තේ බලවත් සැකයකි. මේ සම්බන්ධයෙන් රටේ ප්‍රධාන පෙළේ ව්‍යාපාරික ප්‍රජාව තුළද ඇත්තේ දැඩි අවිනිශ්චිත බවකි.
පවතින මේ තත්ත්වය යටතේ දැඩි නියෝග පනවමින් මේ සති අන්තයේ රුස්වීමක් කැඳවා ජනාධිපතිවරයා සූදානම් වන්නේ අයි.එම්.එෆ්. ගිවිසුමට ඇතුළත් වඩාත්ම ගැටලු සහගත සහ ජනතාවගේ වඩාත්ම ප්‍රශ්න කිරීම්වලට ලක්වන දේශීය ණය ප්‍රතිව්‍යුහගත කිරීමේ ක්‍රියාවලිය ආරම්භ කිරීම බව පැහැදිලි ය. දේශීය ණය ප්‍රතිව්‍යුහගත කිරීමකින් තොරව විදෙස් ණය ප්‍රතිව්‍යුහගත කිරිම නොකෙරෙන වැඩක් බවට ශ්‍රී ලංකාව ණය ලබාගෙන ඇති රටවලින් ලබා දී ඇත්තේ පැහැදිලි සංඥාවකි. මේ දෙක අතර සබඳතාව ඇත්කර තැබීමට ජනාධිපතිවරයා කොතරම් උත්සාහ ගත්තත් එම රටවල් ඒ සඳහා එකඟත්වයක් පළකිරීම කල් යැවීම හේතුවෙන් ආණ්ඩුව දැන් අයි.එම්. එෆ්. ගිවිසුම් අනුව කටයුතු කළයුතු වෙයි. කොතරම් දේශපාලන වශයෙන් ප්‍රතිවිපාක ඇති කළත් ආණ්ඩුව එය කෙසේ හෝ ඉටුකළ යුතු තැනට පත්වී සිටියි.
''ජනාධිපති රනිල් වික්‍රමසිංහ මහත්තයා අයි.එම්.එෆ්. එකට ලියපු ලියුමක් තිබෙනවා. මම එය සභාගත කරනවා. එය හැන්සාඩ් ගත කරන්නැයි මා ඉල්ලීමක් කරනවා. මේ ලියුම ආණ්ඩුව අත්සන් කරලා තිබෙන්නේ පහුගිය මාර්තු 06 වැනිදායි. අයි.එම්.එෆ්. එක කියලා නෑ දේශීය ණය ප්‍රතිව්‍යුහගත කරන්න කියලා. හැබැයි ආණ්ඩුව පිළිඅරගෙන තිබෙනවා, බාර අරගෙන තිබෙනවා දේශීය ණය ප්‍රතිව්‍යුහගත කිරීමට.
මේ ගණං හිලව්වල සත්‍ය අසත්‍ය බව කොහොම වුණත් රට ඉදිරියේදී මුහුණ දෙන ආර්ථික අභියෝගයේ තරම විශාල බව හඳුනා ගැනීම අපහසු නැත. ඒ එක්කම එම අභියෝගය ජයගැනීමට අයි.එම්.එෆ්. එක සමග කළ සාකච්ඡාවලදී ඔවුන්ගේ යෝජනා ගෙඩි පිටින්ම බාරගැනීමේ ප්‍රතිවිපාක ද රටට විඳින්නට සිදුවී තිබෙන බව පැහැදිලිය. තමන් බලයට පත්වූ පසුව අයි.එම්.එෆ්. එක සමඟ යළිත් සාකච්ඡා කරන බවට සජබ ප්‍රකාශ කරන්නේ මේ කොන්දේසි ඉටු කිරීමට යාමේදී මුහුණදීමට සිදුවන බරපතළ ගැටලු හේතුවෙනි. එසේම රජය ගෙන ඒමට සූදානම් වන දේශීය ණය ප්‍රතිව්‍යුහගත කිරීම පිළිබඳ යෝජනාවට තමන් විරෝධය දක්වන බවත් පාර්ලිමේන්තුවේදී ඒ පිළිබඳ ඡන්දය විමසීමේදී තමන් එයට එරෙහිව ඡන්දය භාවිත කරන බවත් සජබ දැන් සිටම ප්‍රකාශ කරන්නේත් මේ ගැන අවබෝධයකිනි.
මෙතැනදී පොහොට්ටුවට ගත හැක්කේ තීන්දු 02ක් පමණි. එකක් රටේ බලවත් ආන්දෝලනයකට හේතු විය හැකි දේශීය ණය ප්‍රතිව්‍යුහගත කිරීමේ ජනාධිපතිවරයාගේ යෝජනාවට සහාය දැක්වීම ය. අනෙක් තීන්දුව ජනාධිපතිවරයාගේ යෝජනාවට විරෝධය දැක්වීම ය. එහෙම විරෝධයක් ආවොත් ජනාධිපතිවරයාට එම යෝජනාව ඉදිරිපත් කිරීමෙන් වැළකී සිටීම හැර වෙනත් විකල්පයක් නැත. එසේ නොවීමට නම් සජබ මන්ත්‍රීන් පිරිසක් සහ පොහොට්ටුවෙන් කැඩීගිය මන්ත්‍රීන් පිරිසක් එකතු කරගෙන ජනාධිපතිවරයා එම යෝජනාව ගොඩදා ගත යුතුය. එහෙත් එහෙම තත්ත්වයකට ඇත්තේ ඉතා සීමිත ඉඩකි.
හැබැයි පොහොට්ටුව මේ යෝජනාවට විරෝධය පළ කළොත් එහි එක් ප්‍රතිඵලයක් විය හැක්කේ පාර්ලිමේන්තුව විසුරුවා හැර මහ ඡන්දයකට යාමට ජනාධිපතිවරයා තීන්දු කිරීමය. මේ වෙලාවේ එහෙම ඡන්දයකට පොහොට්ටුව සූදානම් නැත. සජබ විපක්ෂයේ සෙසු පක්ෂත් සමඟ සමගි සන්ධානයකට එළඹ සිටින මේ වෙලාවේ ඡන්දයකට යාම පොහොට්ටුවට ඉල්ලන් කෑමක් වනු ඇත. ඒ තත්ත්වය පෙන්වා දී දේශීය ණය ප්‍රතිව්‍යුහගත කිරීමට පොහොට්ටුව කැමැති කරවා ගැනීමට ජනාධිපතිවරයාට හැකිවනු ඇතිද? එහෙම බලනකොට කැබිනට් ඇමැතිකම් නුදුන්නත් ජනාධිපතිට සහාය දැක්වීමට එකඟ වූ, පොහොට්ටුවේ ජ්‍යෙෂ්ඨයන් මේ වෙලාවේ ගත යුත්තේ ''මියෙම්වා හෝ රුකෙම්වා'' ගණයේ තීන්දුවක් බව පෙනී යයි. ලබන සතියේ දේශපාලන කරළිය ඇත්ළේ ''කටගැසුම්'' ඉතා සැර වන ලකුණු පහළ වෙමින් තිබෙන බව නම් පැහැදිලිය.
