වාහන කටු අරන් ප්‍රශ්න විසඳගන්න අපි සූදානම් නෑ
එස්.බී. දිසානායක - පාර්ලිමේන්තු මන්ත්‍රී - ශ්‍රී ලංකා පොදුජන පෙරමුණ
- සමෘද්ධියේ නුසුදුස්සො ඉන්නවා: ඒකට වගකියන්න ඕන සමහර දේශපාලන පක්ෂ
- පොහොට්ටු ප්‍රධානීන්ට තනතුරු නොදීම තමුන්ගේ විනාශය ළං කර ගැනීමක්
- බංකොළොත් තත්ත්වයට රට ඇදල දැම්මේ යහපාලන ආණ්ඩුවයි
- ජනාධිපතිතුමාට තව වාරයක් දිය යුතුයි කියා බහුතරයක් හිතනවා
- රටේ තිබුණු 26% දුප්පත්කම 6% ට අඩු කළේ සමෘද්ධියයි
- අසාධාරණයට ලක්වූ අය අද මාව හොයාගෙන එනවා
- අමාත්‍යාංශවල විශාල හොරකම් සිදුවෙනවා
- අස්වැසුම දැන් කණවැන්දුමක් වෙල
අපේ රටේ සමෘද්ධියේ නිර්මාතෘ ඔබ. සමෘද්ධිය හා එස්.බී. කියන්නෙ කාලයක් එකට ගිය දෙයක්. ඒත් අද වෙද්දි සමෘද්ධිය ඉතාම බරපතළ ප්‍රශ්නකාරී තැනකට ඇවිල්ල තියෙන්නෙ. ඔබ මොකද හිතන්නෙ ඒ ගැන?
දුප්පතුන් දුප්පත්කමින් මුදවන්න පුළුවන් විදිහට සියලුම ආයතන අපි සමෘද්ධිය නමින් හැදුවා. ඒක මොන තරම් විද්‍යාත්මකද සහ ප්‍රායෝගිකද යන්න පැහැදිලි වෙන්නෙ 2019 නොබෙල් ත්‍යාගය ලබපු ආර්ථික විද්‍යාඥයො දෙන්නගෙන්. ඒ දෙන්නා ලියලා තිබුණෙ අප්‍රිකාව සහ ආසියාව දුගී බවින් මුදවා ගැනීම සම්බන්ධයෙන් නිබන්ධනයක්. ඒ අය පළවෙනියට ලියලා තිබුණෙ දුප්පතුන් දුගී බවින් මුදවා ගන්න ඔවුන්ට අවශ්‍ය මූල්‍ය ධනය සපයන ශක්තිමත් ආයතනයක් අවශ්‍යයි කියලා. එහෙම බලද්දි අපි සමෘද්ධි බැංකු එක්දහස් අනූවක් රට පුරා හදලා තියෙනවා. මේ බැංකු ටික කොවිඩ් කාලෙ ආණ්ඩුවට බිලියන හැටක් දුන්නා. තවමත් බැංකුවල බිලියන එකසිය හැත්තෑ දෙකක් විතර මුදල් තියෙනවා. ඒ විතරක් නෙවෙයි, හැම මාසෙම රුපියල් විසිපන් දාහත්, ලක්ෂ විස්සත් අතර ණය දෙනවා පවුල් විසිපන් දාහකට විතර.
ගොඩක් අය කියනවා සමෘද්ධියෙන් මොකක්ද වුණේ, දුප්පත්කම අඩු වුණාද? සමෘද්ධිලාභියො වැඩිවුණු එක තමයි වුණේ කියලා?
ඔව් මමත් දැක්කා සමහර අය එහෙම කියනවා. ඒත් මතක තියාගන්න, මේක පැහැදිලිව ලියන්න සමෘද්ධිය මම ආරම්භ කරනකොට මේ රටේ දුප්පත්කම 26% යි. ඊටපස්සෙ 2015 අපි යහපාලනයට බාරදෙනකොට දුප්පත්කම 6% ක තිබුණෙ. ඒක ඉතාමත් වැදගත් කාරණයක්. මේ සියල්ල ජන හා සංඛ්‍යාලේඛන දෙපාර්තමේන්තුවේ වාර්තා අනුව සඳහන් වෙන දේවල්.
සමහර අය චෝදනා කරනවා සහනාධාරලාභීන් නුසුදුස්සන් කියලා?
මම ඒක පිළිගන්නවා. නුසුදුස්සන් ඉන්න පුළුවන්. නුසුදුස්සන් සිටීමට වගකියන්න ඕනෙ සමහර දේශපාලන පක්ෂ.
මොකක්ද පක්ෂය?
මම නම කියන්න කැමැති නෑ. නමුත් ගොඩක් අය දන්නවා. ජනාධිපතිතුමත් දන්නවා. සමහර දේශපාලන පක්ෂවලින් හාරලක්ෂ තිස්තුන් දාහක ලේඛන ඇරියා සහනාධාර දෙන්න. අන්න ඒ ඇත්තො ඒ ගොඩේ ඉන්නවා. ඒ නිසා ඒක හදන්න ඕනෙ අනිවාර්යෙන්. මම අර ඉස්සෙල්ලා කිව්ව මහාචාර්යවරු දෙන්නා කියලා තියෙනවා දුප්පතාව රුකගන්න සමාජ ආරක්ෂණ දැලක් අවශ්‍යයි කියලා. ඒකට සමෘද්ධිය තියෙනවා. ඉපදුණාම මරණෙකදි විවාහයෙදි අධ්‍යාපනයෙදි පවා මුලින්ම ඉස්සර වෙන්නෙ සමෘද්ධිය. ඒ වගේම ඒ මහාචාර්යවරු කියනවා දුප්පත්කමින් මුදවන්න ඉන්න පරිසරය වෙනස් කරන්න ඕනෙ කියලා. අපි සමෘද්ධියෙන් මාසෙට නිවාස තුන්සිය පනහක් හදනවා. ඒ නිසා මේ සමෘද්ධියට වෛර කරන එක නෙවෙයි කරන්න ඕනෙ දේ.
අස්වැසුම ගැන මොකද හිතෙන්නෙ?
ඇත්තටම අස්වැසුම මේ වෙද්දි කණවැන්දුමක් වෙලා තියෙන්නෙ. ඒ නිසා ආණ්ඩුවට එරෙහිව මහා සුනාමියක් එන්න කලින් ඒක නිවැරදි කරන්න ඕනෙ.
ගොඩක් අය පාර්ලිමේන්තුවෙදි මේ සම්බන්ධයෙන් විවේචනය කළ බව අපි දැක්කා?
ඔව් මම දැක්කා සමහර අය නැට්ට පාගගෙන කතා කරනවා. ආණ්ඩුවයි විපක්ෂයයි සියලු දෙනාම වලිගෙ පාගගෙන හිටියෙ. ඔය සුළු මධ්‍ය පරිමාණ ව්‍යවසායකයො ලොකු බැංකුවලට යන්නෙ නෑ. මේ මිනිස්සු සමෘද්ධි බැංකුවට යන සණස බැංකුවට යන අය.
මේක ආණ්ඩුව විසින් කරන බලහත්කාරකමක් වගෙයි නේද?
නෑ නෑ ආණ්ඩුව කිසිම විටක බලපෑමක් කළේ නෑ. ආණ්ඩුව මේක කළේ ඉතා පවිත්‍ර චේතනාවෙන්. ආණ්ඩුවට ඕන වුණේ නුසුදුස්සො ඉවත් කරලා සුදුස්සො ඇතුළත් කර ගන්න. මම පිළිගන්නවා සමෘද්ධියෙ නුසුදුස්සො ඉන්න එක. හැබැයි ඒ වගේම පිළිගන්න ඕනෙ මේ රටේ දුප්පත්කම අඩුවීමටත් සමෘද්ධිය බලපෑව එක. ඒක කවුරු හරි පිළිගන්නෙ නැත්නම් ඒ අයට අං, කුර තියෙනවද කියලත් බලන්න වෙනවා.
දැන් ඔබගේ සංකල්පයක්නෙ සමෘද්ධිය. මේ ගැන ජනාධිපතිවරයත් එක්ක කතා කළේ නැද්ද?
මම ගිහිල්ලා කෙළින්ම ජනාධිපතිතුමාට කිව්වා. මම සියලු විස්තර ටික එතුමට කිව්වා. ජනාධිපතිතුමා මට කිව්වා කිසිම හානියක් සිදු කරන්නෙ නෑ කියලා. එතුමා මේ ගැන සොයලා බලනවා කිව්වා. එතුමට උවමනාවක් තියෙනවා මේක රුකගන්න. ජනාධිපතිතුමා මේ ගැන හොයන්න ස්වාධීන කණ්ඩායමකට පැවරුවා. අන්න ඒ අයගෙ තේරීම වැරදියි. ඒක සුළු වරදක් නෙවෙයි, අති විශාල වරදක්.
ඒ කියන්නෙ මේ ව්‍යාපෘතිය ගැන තොරතුරු දුන්න කණ්ඩායම ජනාධිපතිවරයා නොමග යවන්න තොරතුරු දුන්නා කියලද?
නෑ නොමග යවන නෙවෙයි. මේකට වගකියන්න ඕනෙ සමෘද්ධි නිලධාරිනුයි කෘෂි නිලධාරිනුයි සංවර්ධන නිලධාරිනුයි ග්‍රාම නිලධාරිනුයි. ඒ අය තමයි වගකියන්න ඕනෙ. ඒ අය බෑ කිව්වා මේක කරන්න. මොකද ඒ අයට තිබුණා වෙනම වෘත්තීය ප්‍රශ්නයක්. ඒ පනතෙ තිබුණා ඒ අය වැරදි තොරතුරු දීලා අහුවුණොත් නීතිය ක්‍රියාත්මක කරන්න. ඒකට විරුද්ධ වෙලා ඒ කට්ටිය අයින් වුණා. ඊටපස්සෙ චූටි චූටි අය දාගෙන වැඩේ කරගෙන ගියා.
අස්වැසුම සහ සමෘද්ධිය කියන්නෙ නම් දෙකක්. ඔබ කැමැති මොන නමටද?
අනේ ඕනෙ නමක් දාගන්න පුළුවන්. නම නෙවෙයි වැදගත් වෙන්නෙ වැඩෙයි. දැන් බැසිල් රාජපක්ෂ මහත්තයා දිවි නැගුම කියලා දැම්මට මම ආපුවාම ආයෙම සමෘද්ධිය බවට පත් කළා. ඒ නිසා මම මේක හැදුවෙ නිකම් නෙවෙයි. මම ආයෙ ආයෙ කියනවා මේ රටේ 26% තිබුණු දුප්පත්කම 6% ට ගෙනාවෙ මේ සමෘද්ධිය. වෙන මොකෙක්වත් නෙවෙයි. ඒකට සමෘද්ධි නිලධාරින්ටත් කළමනාකරුවන්ටත් ප්‍රාදේශීය ලේකම්වරුන්ටත් ඒ ගෞරවය යන්න ඕනෙ.
අසාධාරණයට ලක්වෙච්ච ගමේ මිනිස්සු ඔබව හොයාගෙන එනවා ඇතිනෙ?
හරියට එනවා මාව හොයාගෙන. ගෙවල් දොරවල් නැති, ස්වාමියා නැති මිනිස්සු ගොඩක් මාව හොයාගෙන එනවා. ඒ ඔක්කොම අසාධාරණයට ලක්වෙච්ච අය..
ඉස්සරහට ඡන්දයක් කරගන්න ගමට යන්න හම්බවෙන්නෙ නෑ?
නෑ නෑ ඒක වෙනස් කරයි ආණ්ඩුව. ජනාධිපතිතුමා උපදෙස් දීලා තිබුණා මේක සම්පූර්ණයෙන්ම හදන්න ඕනෙ කියලා. මොකද ඔතන බරපතළ වරදක් වෙලා තියෙනවා. ඒක නිවැරදි කරන්න ගත්ත උත්සාහය ගැන ජනාධිපතිතුමාට ස්තූතිවන්ත වෙනවා.
ලංකාවේ දේශීය ණය ප්‍රතිව්‍යුහගත කරන්න මේ වෙනකොට ආණ්ඩුව සූදානම් වෙමින් ඉන්නෙ. මේක හරහා තැන්පත්කරුවන්ට විශාල අසාධාරණයක් වෙනවා කියලා බොහෝ අය කියනවා. ඒක එහෙමද?
මතක තියාගන්න අපේ රට බංකොලොත් තත්ත්වයට ආව එක ගැන මම අදටත් කනගාටු වෙනවා. මම ඒකට කොහෙත්ම කැමැති නෑ. පී.බී.ලා කබ්රාල්ලා උත්සාහ කළේ අවුරුද්දක් ඇදගෙන ගිහිල්ලා මේ තත්ත්වයෙන් රට පන්නගන්න. හැබැයි රට මේ තත්ත්වයට ඇදලා දැම්මෙ යහපාලන රජය. 7.1% ක ආර්ථික වර්ධනයක් එක්ක භාරදුන්න රට යහපාලන රජය නැවත අත්හරිනකොට 2.4% ට තිබුණෙ. එවැනි බංකොලොත් තත්ත්වයකට වැටුණට පස්සෙ මේ රට නැවත ගොඩනගන්න ණය ප්‍රතිව්‍යුහගත කරන්න ඕනෙ. ජාත්‍යන්තරය මේ වෙනකොට ඒකට එකඟ වෙලත් ඉවරයි. දැන් ලංකාවෙ ණය ප්‍රතිව්‍යුහගත කරන්න ඕනෙ ක්‍රම තුනයි. එක්කො ණය චුට්ටක් කපා හරින්න ඕනෙ. නැත්නම් ණය ගෙවීමේ කාලය දීර්ඝ කරන්න ඕනෙ. නැත්නම් පොලිය අඩු කරන්න ඕනෙ. හැබැයි මට පේන හොඳම දේ තමයි පොලිය යම්කිසි මට්ටමකට අඩු කරන එක. එහෙම වුණාට පස්සෙ කිසිම කෙනෙක්ට ප්‍රශ්නයක් වෙන්නෙ නෑ.
ඔබලා සහ වර්තමාන ජනාධිපතිතුමා අතර තිබුණා එකඟතාවයක් අමාත්‍ය ධූර සම්බන්ධයෙන්. ඒ වැඩේ දැන් ටික ටික ඇදිලා යනවා නේද? ඒක වෙන්නෙ නැද්ද?
ඒක ඉතින් ජනාධිපතිතුමාගෙන් තමයි අහන්න ඕනෙ. හැබැයි කවුරු හරි හිතනවා නම් පොදුජන පෙරමුණේ ප්‍රධානීන්ට තනතුරු නොදී ඉන්න, එහෙම කරන ගමන් දුර්වල කරන්න, මට කියන්න තියෙන්නෙ ඒක තමුන්ගේම විනාශය ළං කර ගැනීම සඳහාම හේතුවක් වෙයි කියලා හිතනවා. ඇමැතිකම් නොදී අපේ දේශපාලන ගමන මර්දනය කරන්න බෑ.
මේකට බාධා කරන්නෙ ඔබලගෙ කණ්ඩායම?
නෑ නෑ මම හිතන්නෙ නෑ අපේ කණ්ඩායම බාධා කරනවා කියලා. ජනාධිපතිතුමත් තේරුම් ගන්න ඕනෙ එතුමා මොකක්ද කරන්නෙ කියලා. සමහර බුද්ධිමත්තු කියනවා ඒ අයට කියන දේවල් සමහර අයට තේරෙන්නෙ නෑ කියලා. ඒ වගේම අමාත්‍යංශවල විශාල වශයෙන් හොරකම් සිද්ධ වෙනවා.
මේ සම්බන්ධව ඔබලගෙ පක්ෂයේ ජාතික සංවිධායක බැසිල් රාජපක්ෂ මහත්මයා කතා කරලා නැද්ද?
නෑ නෑ එතුමා කතා කරලා තියෙනවා හැම වෙලාවෙම. මොකද අපේ ප්‍රාදේශීය නායකයන්ට, දිස්ත්‍රික් නායකයන්ට ඉන්නෙ ජ්‍යෙෂ්ඨයන්. අමාත්‍යංශ නොදෙන එක අපිට ලොකු ප්‍රශ්නයක්. අපිට වාහන කටු දීලා මොකක් හරි තනතුරක් දීලා එකපාරක් ආවා ප්‍රශ්නෙ විසඳන්න. අපි එහෙම ලෑස්ති නෑ. අපි කවුරුත් බාරගත්තෙ නෑ.
එජාපෙ අය කියනවා ඊළඟ දේශපාලන ගමන යන්නෙ ඒකාබද්ධ වෙලා කියලා ඔබලත් එක්ක. දැන් ඇමැතිකම් නොදුන්නොත් ඒකත් හරියන පාටක් නෑ නේද?
ඇත්තටම ජනාධිපති රනිල් වික්‍රමසිංහ මහත්තයා මේ රටේ නැවත ජනාධිපති වෙනවා නම් හොඳයි. හැබැයි එතුමා ඒ තැනට යන්න පරිසරය හදාගන්න එකේ වගකීම තියෙන්නෙත් එතුමට. බහුතරයක හිතේ තියෙනවා තව වතාවත් එතුමාට අවස්ථාවක් දෙන්න ඕනෙ කියලා.
I ගයාන් ගාල්ලගේ