අපි බලය ගන්නේ මහ මැතිවරණයකින් පමණයි
හේෂා විතානගේ (පාර්ලිමේන්තු මන්ත්‍රී - සමගි ජන බලවේගය)
- ජනතාවගේ ප්‍රශ්න විපක්ෂයේ වාසියට යොදාගැනීම සුදුසු නෑ
- එජාපයට මොකද වෙන්නෙ කියලා ඡන්දෙකට පස්සේ බලාගන්න පුළුවන්
- රට වැනසූ රාජපක්ෂලා එක්ක ආණ්ඩු කරන්න තරම් සජබට මඤ්ඤං නෑ
- ආණ්ඩුව හරියට වැඩ කරනවා නම් විපක්ෂයේ ඉඳන් සහාය දෙන්න පුළුවන්
- හිතෙන හිතෙන වෙලාවට රනිල් මහත්තයා විහිළු කරනවා
- කට්ටියක් එකතුවෙලා ගිවිසුම් ගැහැව්වට රට හදන්න බෑ
- අපේ රට දැන් අයි.එම්.එෆ්. එකේ ඉත්තෙක් වෙලා
හේෂා විතානගේ කියන්නෙ පාර්ලිමේන්තුව ඇතුළෙ නිතර කතා කළ කෙනෙක්. ගොඩක් සටන්කාමී කෙනෙක්. ඔබ එකපාරටම නිශ්ශබ්ද වුණා. මොකක්ද ඒකට හේතුව?
එහි විශේෂයක් නෑ. මම පහුගිය කාලෙ නීති විද්‍යාලයේ අවසන් විභාගයට පෙනී සිටිමින් උන්නෙ. ඒ අධ්‍යාපන කටයුතු හින්දා මම දේශපාලනයෙන් ටිකක් දුරස් වෙලා හිටියෙ. නමුත් දැන් මේ වෙද්දි මම නැවතත් සුපුරුදු දේශපාලනයට පිවිසිලා වැඩ කටයුතු කරමින් ඉන්නෙ.
බොහෝ වෙලාවට ආණ්ඩුවට අභියෝගයක් දෙන්න විපක්ෂය විවිධ වැඩ කරනවා. උද්ඝෝෂණ කරනවා. පාරේ සටන් කරනවා. විරෝධතා දක්වනවා. හැබැයි අපිට වර්තමානයේ විපක්ෂය මන්දගාමී වගෙයි පේන්නෙ. ඔබට එහෙම හිතෙන්නෙ නැද්ද?
මෙහෙමයි. ජනතාවට තියෙන ප්‍රශ්න විපක්ෂයේ වාසියක් කරගෙන, පාරට බැහැලා විරෝධතා දක්වන එක එච්චර සුදුසු නෑ. විපක්ෂයේ මූලික අරමුණ වෙන්නෙ දේශපාලන බලය අල්ලා ගැනීම. හැබැයි විපක්ෂය හැටියට අපි ඒක ඕනවටත් වඩා සිදු කරලා තියෙනවා. ආණ්ඩුව එළවීම සඳහා විපක්ෂය ඉතාම සංවිධානාත්මක ලෙස වැඩ කටයුතු කරමින් යනවා. ඒක උපරිමයෙන්ම කරනවා. අනෙත් විපක්ෂයේ අය වගේ පාරට බැහැලා කෑ ගහනවට වඩා අපට තියෙන අරමුණ ජනතාව තවදුරටත් වෙහෙස කරන්නෙ නැතුව බලය අල්ලා ගැනීමේ අරමුණක්. අපි ඒ වෙනුවෙන් ඕනවටත් වඩා කැප කිරීම් කරනවා.
ඒ වෙනුවෙන් විපක්ෂයේ අනෙක් කණ්ඩායම් ඔබලට වඩා වැඩ කරනවනෙ?
එහෙම බොරු රඟපෑම් අපේ නෑ. අපි නියමිත පරිදි දේශපාලන බලය අල්ලා ගැනීම සඳහා වැඩපිළිවෙළ සකසා තියෙනවා. මොකද මැතිවරණයකින් බලය අල්ලා ගැනීම තමයි අපේ අරමුණ.
පහුගිය දවස්වල පවා රනිල් වික්‍රමසිංහ මහත්තයා කිව්වා ආණ්ඩුවට එකතුවෙලා රට හදන්න සහාය වෙන්න කියලා. දැන් ජනතාව බලනවා ඇති විපක්ෂය මේ ආකාරයෙන් මඟඅරින්නෙ විපක්ෂයට රට හදන්න උවමනාවක් නැතිකමට කියලා?
ඇත්තටම ජනතාව දන්නවා රනිල් වික්‍රමසිංහ මහත්තයා කියන්නෙ නිතර විහිළු කරන හිතුණු හිතුණු වෙලාවට විවිධ අදහස් කියන කෙනෙක් කියලා. එතුමාට විපක්ෂයත් එක්ක වැඩ කරන්න උවමනාවක් තිබුණා නම් මුදල් කාරක සභාවේ සභාපතිකම හර්ෂ ද සිල්වා මහත්තයට කලින් දෙන්න තිබුණා. අන්තිමට බැරිම තැන තමයි දුන්නෙ. මේ රට හදන්න පුළුවන් හැකියාවක් ඔහුට නෑ. ඒ වගේම හැඟීමකුත් නෑ. මොකද හැකියාවක් නෑ කියලා කියන්නෙ ඔහු රාජපක්ෂ ආණ්ඩුවේ ප්‍රාණ ඇපකාරයෙක් වෙලා ඉවරයි. ඒගොල්ලො කියන දේ තමයි රනිල් වික්‍රමසිංහ මහත්තයට කරන්න වෙලා තියෙන්නෙ.
හරි ඔබලට රනිල් වික්‍රමසිංහ මහත්තයත් එක්ක එකතු වෙනවා නම් මොනවද ඒ වෙනුවෙන් කරන්න ඕනෙ?
එතුමට විපක්ෂයත් එක්ක වැඩ කරන්න ආසාවක් තියෙනවා නම් හොඳම දේ තමයි මහ මැතිවරණයක් කැඳවන එක. ඒක ජනතාවගේ කැමැත්ත. ඊටපස්සෙ එතුමට පුළුවන් ඕන නම් ආණ්ඩුවත් එක්ක වැඩ කරන්න. මොකද ආණ්ඩුවෙ ඉන්නෙ අපිනෙ. එතුමා දැන් කියන දේවල් එක්ක විහිළු සැපයීමක් විතරයි වෙන්නෙ. එතුමා රටටවත් විපක්ෂයටවත් ආදරේ නෑ.
එක්සත් ජාතික පක්ෂයේ මහලේකම්වරයා පසුගිය දවසක කියනවා රටම බලාගෙන ඉන්නෙ රනිල් වික්‍රමසිංහ මහත්තයා නැවත ජනාධිපති කරන්න කියලා. ඔබලත් ලෑස්තිද? එජාපය දැන් ඔබලට අභියෝගයක් වෙලා නේද තියෙන්නෙ?
ඇත්තටම එක්සත් ජාතික පක්ෂය සමගි ජන බලවේගයට නම් අභියෝගයක් වෙන්නෙත් නෑ. වෙලත් නෑ. එක්සත් ජාතික පක්ෂයට මොකද වෙන්නෙ කියලා බලාගන්න පුළුවන් ඡන්දයක් තිබ්බට පස්සෙ. පාලිත රංගේ බණ්ඩාර මහත්තයට හිතෙනවා ඇති එයාගෙ නායකයා ආයේ දිනයි කියලා. හැබැයි එතුමට අමතක වෙලා තියෙනවා රනිල් වික්‍රමසිංහ මහත්තයා ජනාධිපති වුණේ ඡන්දයෙන් නෙමෙයි, පොහොට්ටුවෙ අයගේ ඡන්දයෙන් කියලා. මට කියන්නකො ජනතාව පක්ෂය වටා එකතු වුණා කියලා කියන්නෙ කොහොමද? මතක තියාගන්න එතුමට මේ රට විනාශ කරපු රාජපක්ෂලත් එක්ක හිටගන්නවා මිසක වෙන කඳවුරක් නෑ දේශපාලනය කරන්න. ජනතාව එහෙම අවස්ථාවක ඡන්දෙ දෙයිද? අපි පාලිත රංගේ බණ්ඩාර මහත්තයට කියනවා ගමට ගිහිල්ලා පොඩ්ඩක් බලන්න කියලා ජනතාවගේ කැමැත්ත කොහොමද කියලා.
දැන් එජාපයේ අය විතරක් නෙවෙයි, ආණ්ඩුවට සම්බන්ධ ගොඩක් අය කියනවා රට වැටිච්ච තැනින් ගොඩ ගත්තෙ රනිල් වික්‍රමසිංහ මහත්තයා කියලා. ඒ නිසා යුතුකමක් හැටියට එතුමව පත් කරගත යුතුයි කියලා. එහෙම හොඳ නැද්ද?
මේ රටේ පෝලිම් ඇති කරලා, මිනිස්සු මහ මඟ මැරෙන තැනට පත් කරලා, රටම අවුල් ජාලාවක් කරපු අයට බලය දෙන්න කියන එක සාධාරණයිද? අපි දන්නවා ගෝඨාභය රාජපක්ෂ මහත්තයාට වැරදි තීන්දු තීරණ ගන්න වුණේ වැරදි අය ළං කරගෙන උපදෙස් ගත්ත නිසා. අන්තිමේ ගෙදරත් යන්න වුණා. දැන් රනිල් වික්‍රමසිංහ මහත්තයටත් වෙලා තියෙන්නෙ අන්න ඒ ටික. දුප්පත් මිනිස්සුන්ව පලිහක් හැටියට අරගෙන ජාත්‍යන්තර මූල්‍ය අරමුදල සනසන්න කරන දේවල් නිසා එතුමටත් ඒ ටික තමයි වෙන්නෙ.
ජාත්‍යන්තර මූල්‍ය අරමුදලේ තීන්දු තීරණ ක්‍රියාත්මක කරන්න වෙලා තියෙන්නෙ රටේ පවතින තත්ත්වයත් එක්ක?
මෙහෙමයි. ගෝඨාභය මහත්තයට යන්න වුණේ පොහොර ප්‍රශ්නෙ නිසා. රනිල් වික්‍රමසිංහ මහත්තයට යන්න වෙන්නෙ අස්වැසුම නිසා. මූල්‍ය අරමුදල කියලා ජනතාවට හිරිහැර කරන එක තමයි ඔවුන්ගේ අරමුණ. ඒ නිසා ගෝඨාභයට රාජපක්ෂ මහත්තයට වඩා දරුණු තත්ත්වයකට මුහුණ දෙන්න රනිල් වික්‍රමසිංහ මහත්තයට සිද්ධ වෙනවා.
දැන් මේ රට ගොඩනගන්න ජාත්‍යන්තර මූල්‍ය අරමුදලේ සහාය ගත්ත එක වැරදියි කියලා ඔබලා කියනවා නම් ඔබලා බලය ගත්තොත් කොහොමද රට දියුණු කරන්නෙ?
මෙහෙමයි. රට අමාරුවෙ වැටිලා තියෙනකොට ඒක ගොඩගන්න කළ යුතු උපරිම දේ කරන්න ඕනෙ. හැබැයි මොන දේ කළත් ජනතාවට ඇත්ත කියන්න ඕනෙ. එහෙම නැතුව කවුරු හරි කණ්ඩායමක් එකතු වෙලා රට හදන්න ගිවිසුම් ගහලා බෑ. මේ රට හදන්න පුළුවන් මානසික මට්ටමක් තියෙන්නෙ සජබට විතරයි කියලා ජනතාව දන්නවා. මොකද ජාත්‍යන්තර වශයෙන් සබඳතා දැන් රනිල් වික්‍රමසිංහ මහත්තයට නෑ. ඒ නිසා ජාත්‍යන්තර අරමුදලෙන් විතරක් රට දියුණු කරන්න පුළුවන් කියලා හිතන එක වැරදියි. දැන් අපි අයි.එම්.එෆ්. එකේ ඉත්තො වෙලා තියෙන්නෙ. අයි.එම්.එෆ් එකට වඩා වෙන දේවල් තියෙනවා මේ රටේ කරන්න. විශේෂයෙන් ආයෝජකයෝ ගෙන්වන්න ඕනෙ.
දැන් අරගලයට අවුරුද්දක් ගතවෙලා. හැබැයි මේ වෙද්දි අරගලය දේශපාලනඥයන්ගේ විවේචනයට ලක්වෙලා තියෙන්නෙ. ඔබට තියෙන්නෙ ඒ අරගලය ගැන මොන වගේ අදහසක්ද?
මෙහෙමයි. මේ රටේ අරගලයක් බිහිවීම මම නම් කියන්නෙ කාලෝචිත දෙයක්. සමහර අරගලයේ දේවල් මම අනුමත කරන්නෙ නෑ. හැබැයි ඒ නැගිටීම අනිවාර්යයෙන් සිදුවිය යුතු දෙයක්. ඒ හරහා ශ්‍රේෂ්ඨ පණිවිඩයක් රටට දුන්නා. අරගලයට ඇත්තටම ඕන වුණේ මේ රට කෙළින් නැගිටවන්න. ඇත්තටම අරගලයෙන් ආව පණිවිඩය තමයි ජනතා නායකයෙක් රට භාරගෙන ජනතා නායකයන්ගේ එකතුවෙන් මේ රට ගොඩනැගිය යුතුයි කියන එක. හැබැයි රනිල් වික්‍රමසිංහ මහත්තයා මැද්දෙන් පැනලා ඒක භාරගත්තා. හැබැයි මේ අරගලය ජයග්‍රහණය කරන්න ඕනෙ ජනතාව පිළිගත්ත නායකයෙක් බලයට පත්වෙලා. ඒක නොවුණොත් ජනතාව නැවතත් රුවටෙනවා.
අපි දන්නවා අරගලය හරහා දුන්නා පණිවිඩයක් මේ දේශපාලන සංස්කෘතිය වෙනස් කළ යුතුයි කියලා. ඔබ හිතනවද 225 ම ඒ පණිවිඩය තේරුම් ගත්තා කියලා?
මේ රටේ දේශපාලනඥයො සම්බන්ධව ජනතාව සම්පූර්ණයෙන්ම වැරදි කියනවා. හේතුව තමයි දේශපාලනඥයන් විසින් මේ රටේ ඇති කරපු සංස්කෘතිය. මොකද හේතුව දේශපාලනඥයො ඉතා උසස් ප්‍රභූ පැළැන්තියක් හැටියට තමයි හැසිරුණේ. එහෙම සංස්කෘතියක් හැදුණෙ දේශපාලනඥයා උගත්, ජනතාව හිතවාදී පුද්ගලයෙක් වීම නිසා. හැබැයි අද වෙනකොට ඒ සංස්කෘතිය නැතිවෙලා. මම කියන්නෙ ඒ තත්ත්වය තවදුරටත් නැත්තටම නැතිවෙලා යන්න ඕනෙ. මොකද හේතුව වර්තමානය වෙද්දි ඒක ඉතාම කැත විදිහට ඇවිල්ලා තියෙනවා. වාහන පහක් හයක් දාගෙන පාරවල් වහගෙන යන විදිහට. හැබැයි අරගලයෙන් පස්සෙ ඒක ටිකක් අඩු වුණා. මම කියන්නෙ ඒ ටිකත් වෙනස්වෙලා අනාගතය වෙද්දි දේශපාලනඥයා හා ජනතාව අතර පරතරය නැතිවෙයි. ඒ නිසා මම කියන්නෙ ඒක අරගලය විසින් ඇති කරපු හොඳ සංස්කෘතියක්.
අපි දැක්කා පහුගිය කාලෙ ඔබලගෙ නම් තිබුණා ආණ්ඩුවට යන්න. ඇත්තටම යන්නද හිටියෙ?
පුද්ගලික ආරාධනා තිබුණා. හැබැයි ඉතින් අපි යන්න හිටියෙ නම් නෑ. අනික එතුමා හරියට වැඩේ කරනවා නම් විපක්ෂය හැටියට ආණ්ඩුවට යන්න ඕනෙ නෑ. විපක්ෂයේ ඉඳලම සහාය දෙන්න පුළුවන්. අනික අපි එතුමට බලපෑම් කරන්නෙ නෑනෙ. ඇත්තම කතාව මේකයි. රනිල් වික්‍රමසිංහ මහත්තයා තැනින් තැනින් එකතු කරලා තමයි ආණ්ඩුව හදන්නෙ. මොකක් හරි ගේම් එකක් ගහලා තමයි රට පාලනය කරන්නෙ. හැබැයි එහෙම මිනිස්සු අරගෙන රට පාලනය කරන්න බෑ. ඒ වගේම කියන්න ඕනෙ අපේ කිසිම මන්ත්‍රීවරයෙක් ආණ්ඩුවට යන්නෙ නෑ. සජබෙ වෙනුවෙන් කවුරු හරි ගියා නම් ගියේ පුද්ගලික අරමුණක් වෙනුවෙන් විතරයි. මේ ආණ්ඩුවෙ ප්‍රතිපත්ති එක්ක එකතු වෙන්න කිසිම උවමනාවක් සජබෙට නෑ. මේ වෙලාවෙ සජබෙ එකම අරමුණ වෙන්නෙ මැතිවරණයක් ගන්න එක.
එජාපයයි සජබයයි අයෙම එකතුවෙලා ගමනක් ඇත්තෙම නැද්ද?
නෑ. එකතු වෙන්න පුළුවන්. හැබැයි එතුමා රට විනාශ කරපු රාජපක්ෂලගෙන් අයින්වෙලා ස්වාධීන ජනාධිපතිවරයෙක් හැටියට වැඩ කරන්න පුළුවන් නම්, ජනතාවට ඇත්ත කියන්න පුළුවන් නම් කිසි ප්‍රශ්නයක් නෑ අපිට. හැබැයි රාජපක්ෂලත් එක්ක ඉඳගෙන අපිට ආරාධනා කරනවා නම් අපි ගියොත් අපිට ආදරය කරන ජනතාව අපිව පිළිගන්න එකක් නැතිවෙනවා. රට විනාශ කරපු රාජපක්ෂලත් එක්ක එකතුවෙලා රට හදන්න පුළුවන් කියලා ආණ්ඩුවට එකතු වෙන්න තරම් සජබෙ ඔළුව මඤ්ඤං වෙලා නෑ.
ඔබලා දැන් මැතිවරණයක් හැමතිස්සෙම ඉල්ලනවා. මැතිවරණයක් ගෙනල්ලා එක පැත්තකින් නවත්තලත් තියෙනවා. ඔබලා හිතන්නෙ මේ වෙලාවෙ තිබිය යුතු හොඳම මැතිවරණය මොකක්ද?
පාර්ලිමේන්තුවේ ජනතා මතයත් විකෘති වෙලා තියෙද්දි, පළාත් සභා සහ පළාත් සභා ආයතන ටිකත් අක්‍රිය වෙලා තියෙද්දි ජනතා මතය කොහෙවත් පිළිබිඹු වෙන්නෙ නෑ. මම කියන්නෙ මේ මොහොතේ ඕනෑම මැතිවරණයක් තියෙන එක තමයි හොඳම දේ. එතකොට ආණ්ඩුව පුළුවන් ආණ්ඩුවට තියෙන ජනතා කැමැත්ත මොකක්ද කියලා බලාගන්න. එහෙම නැතුව ආණ්ඩුව මොන දේ කිව්වත් වැඩක් නෑ.
I ගයාන් ගාල්ලගේ