පොහොට්ටුව එක්ක මොන ආණ්ඩුද?
- ස.ජ.බ. පාර්ලිමේන්තු මන්ත්‍රී කබීර් හෂීම්
- ජවිපෙ මහින්දලා එක්ක ආණ්ඩුව කරද්දී එක දූෂණ විරෝධී පනතක් ගෙනාවද?
- චෝදනා එල්ල වූ මැති ඇමැතිලා තාම ආණ්ඩුවේ ඉන්නවා
- එජාපය එක්ක එකතුවෙනවද කියලා දැනට කියන්න බෑ
- ආණ්ඩුවේ හොඳ තීන්දුවලට අපි අත උස්සනවා
ආණ්ඩුව මේ වෙනකොට ආර්ථික සටනක නියැලෙමින් ඉන්නේ. ආණ්ඩුව කියන දෙයක් තමයි මේ වෙලාවේ හැමෝම ආණ්ඩුවට සහාය දක්වන්න ඕනෑය කියලා. ඒත් විපක්ෂය කකුලෙන් අදිනවා කියලා චෝදනා කරනවා ආණ්ඩුවෙන්. මොකක්ද ඒ ගැන අදහස?
ඕක ඉතින් ආණ්ඩුව තමන්ගෙන්ම අහගන්න ඕන ප්‍රශ්නයක්. මීට අවුරුදු 20කට කලින් රටේ ආර්ථික ප්‍රතිසංස්කරණ ඇතිවෙනකොට අද ඔය ආණ්ඩුවේ ඉන්න අය එදා විපක්ෂයේ ඉඳිමින් ආණ්ඩුවේ වැඩවලදී කකුලෙන් ඇද්දා. හොඳම උදාහරණය 2001 එක්සත් ජාතික පක්ෂ ආණ්ඩුව සමහර දේවල් කරද්දී ඒ අය කරපු දේවල් තමයි අද මේ විඳින්නේ. හැබැයි පළවෙනි වතාවට අද විපක්ෂය වෙනස්. අපි සමහර ජනප්‍රිය නොවන තීන්දු අරන් තිබෙනවා. රට වෙනුවෙන් සමහර අණ පනත්වලට අපි අත උස්සලා තියෙනවා.
එතකොට අයි.එම්.එෆ්. එක සම්බන්ධයෙන් ආපු යෝජනාවලියට ඡන්දෙ නොදී මඟහැරියේ?
නෑ. එතැනදී වුණේ අපි විරුද්ධව ඡන්ද දුන්නේ නෑ. නමුත් ඡන්දෙ නොදී මඟහැරියේ අපි කරපු සමහර යෝජනා එම යෝජනාවලියට ඇතුළත් කර නොතිබුණ නිසා. හැබැයි දැන් වුණත් ජනප්‍රිය නොවන අමාරු සමහර තීන්දුවලට සහාය දක්වනවා. හැබැයි හැම එකකටම අත උස්සන්නත් සූදානම් නැහැ. මොකද ආණ්ඩුවේ තවම වගවීම සහ විනිවිදභාවය සම්බන්ධයෙන් ලොකු ගැටලුවක් තිබෙනවා.
මේ වෙද්දි ආණ්ඩුව දිගින් දිගටම යෝජනා කරනවා විපක්ෂයට ආණ්ඩුව සමඟ එකතුවෙලා රට හදමු කියලා. ඇයි විපක්ෂය නොයන්නේ?
අපි හිතනවා විපක්ෂයේ ඉඳලා ආණ්ඩුවට ගිහිල්ලා ඇමැතිකම් අරගෙන කරන්න කියලා ලොකු විශේෂයක් නැහැ. උදාහරණයක් හැටියට ගත්තහම අපේ හර්ෂ ද සිල්වා මැතිතුමා පාර්ලිමේන්තුවේ මුදල් කාරක සභාවේ සභාපති පුටුවේ වාඩිවෙලා විශාල වැඩකොටසක් කරනවා. ඒ විතරක් නෙවෙයි තව මන්ත්‍රීවරුත් කාරක සභාවල තනතුරු අරගෙන වගකීමකින් යුතුව වැඩ කරනවා. එදා බ්‍රිතාන්‍ය යුද්ධ කාලයේදී ආණ්ඩුවයි විපක්ෂයයි එකතුවෙලා වැඩකළා වගේ අපිත් මේ ආණ්ඩුවත් එක්ක රටට වැදගත් තීන්දු තීරණවලදී එකතුවෙලා වැඩකරනවා. හැබැයි ආණ්ඩුව වැරුදි තීන්දු ගත්තහම ඒවලටත් විරුද්ධ වෙනවා. ඒ වගේම සමහර දේවල් නිවැරදි කරන්නත් අපි කටයුතු කළා.
පසුගිය කාලේ ඔබ ඇතුළු ඔබේ පක්ෂයේ කණ්ඩායමක් ආණ්ඩුවට යන්න ඉන්නවා කියලා කතා ගියා. මොකද යන වැඩේට වුණේ?
ඕව ඉතින් මාධ්‍යයේ ගොසිප් නේ. එක එක්කෙනාගේ කටකතා, බොරු තමයි ඔය ප්‍රචාරය වෙලා ගියේ. ඒ කිව්වට කවුරුත් ගියේ නැහැනේ. ඒක පේන්නේ සමගි ජන බලවේගය පක්ෂයක් හැටියට හරිම ශක්තිමත් කියලා. පැහැදිලිව පේන්නේ පක්ෂයේ දර්ශනයත් එක්ක අපි එකට ඉන්නවා කියලා.
ඔබලා එක තැනකදී කියනවා ජනාධිපතිතුමාට කැමති වුණාට පොහොට්ටුවත් එක්ක වැඩ කරන්න බැරි නිසයි නොයන්නේ කියලා. ඒ කියන්නේ ජනාධිපතිත් එක්ක අවුලක් නැහැ?
අපේ ප්‍රශ්නය තියෙන්නේ පොහොට්ටුවත් එක්ක අපිට වැඩ කරන්න බැහැ. මොකද මේ රට මේ තැනට වැටෙන්න ප්‍රධාන හේතුව පොහොට්ටුව. මම දැක්කා ගිය සතියේ වෙබ් අඩවියක මහ බැංකු අධිපතිතුමා කියලා තිබුණා මේ රටේ ආර්ථිකය කඩා වැටීමට ඉස්සෙල්ලා ආණ්ඩුව වගකිවයුතුයි කියලා. ඉතින් එහෙම තත්ත්වයක් උඩ අපි කොහොමද එහෙම කණ්ඩායමක් එක්ක වැඩ කරන්නේ. මොකද රට නිවැරදි කරන තැන්වල එයාලා ඉන්නවා නම් අපිට එතැන ගිහිල්ලා වැඩ කරන්න බැහැ. මොකද සදාචාරයක් නැහැ එතැන. තවමත් ඒ චෝදනාවට ලක්වෙච්ච මැති ඇමැතිවරු ඉන්නවා. රටම විරුද්ධ වෙලා ඉන්නේ ඒ අයට. ඒ අයට ජනවරමකුත් නැහැ.
ඡන්දෙකින් ජනවරම ආයේ ඒ අයටම ආවොත්?
ඒ අයට නෙමෙයි ඕන කෙනෙකුට ආවොත් ඒ ලැබෙන ජනවරම පිළිගන්න අපි ලැහැස්තියි.
ඔබලයි එක්සත් ජාතික පක්ෂයයි කියන්නේ ගහට පොත්ත වගේ. දෙගොල්ලො එකතුවෙන පාටක් නැද්ද?
අපි දැකලා තියෙනවානේ එක එක අවස්ථාවල අමුතු අමුතු සන්ධාන හැදිලා තියෙනවා. දේශපාලනයේදී සදාකාලික මිතුරොත් නෑ. සතුරොත් නෑ. අපි අනාගතයේ රට වෙනුවෙන් යහපත් තීන්දු තීරණ ගන්නවා. දැනට අපිට කිසි දෙයක් කියන්න බැහැ. ඉස්සරහට ඇතිවන දේශපාලන භූමිකාව සහ පරිසරය අනුව තමයි ඉදිරි තීරණ ගැනෙන්නේ.
ජවිපෙය චෝදනා කරනවා ඔබලත් ආණ්ඩුවත් එක වල්ලෙ පොල්ය කියලා?
ඒක පිස්සු කතාවක්. ජනතා විමුක්ති පෙරමුණ තමයි මේ රටට වරදින්න මූලිකත්වය ගත්ත ප්‍රධානම වැරුදිකාරයා. 2004 විශාල දේශපාලන ප්‍රතිසංස්කරණයක් වෙන්න ගියේ. නමුත් ජනතා විමුක්ති පෙරමුණ මැදිහත්වෙලා තමයි ඒක වෙනස් කරලා මහින්ද රාජපක්ෂට බලය අරන් දුන්නේ. දැන් ඒ ගොල්ලෝ ආණ්ඩු කළේ නැහැයි කියන එක පට්ට බොරුවක්. ඇමැතිකම් හතරක් අරගෙන පාර්ලිමේන්තු මන්ත්‍රී ධුර 39ක් අරගෙන එකට ආණ්ඩු කළේ. අඩුම තරමේ එහෙම ඉඳගෙන දූෂණ විරෝධී පනතක්වත් ගෙනාවේ නැහැනේ. මහ බැංකුව දේශපාලනීකරණයට ලක්වුණේ, ඒ වගේම රට විශාල ණය කන්දකට තල්ලු වුණේ, සුදු අලි ව්‍යාපෘති බිහිවෙන්න ගත්තේ අන්න ඒ ජනතා විමුක්ති පෙරමුණ නිසා. හැබැයි අපි එක්සත් ජාතික පක්ෂයේ හිටපු කාලයේ ඉඳන්ම රට නිවැරදි මාවතට ගන්න හරි දේ වෙනුවෙන් වැඩ කරන්න ඒ කාලයේ ඉඳන්ම කටයුතු සිදුකළා.
I ගයාන් ගාල්ලගේ