බෙදිලා - වෙන්වෙලා රණ්ඩුවෙලා මේ රට ගොඩනඟන්න බෑ
- තරුණ කටයුතු හා ක්‍රීඩා රාජ්‍ය අමාත්‍ය රෝහණ දිසානායක
►රනිල් මහත්තයා සුදුසුයි කියලා කියන්නේ අපි නොවේ ජනතාවයි
►වත්මන් ක්‍රිකට් බෝඩ් එක වගකීම්වලින් ඈත්වෙලාද කියලා ප්‍රශ්නයක් තිබෙනවා
►ක්‍රීඩා සභාව පිහිටෙව්වේ ක්‍රීඩාවට දේශපාලන ඇඟිලි ගැසීම් නවත්වන්න
►රටේ දේශපාලන සංස්කෘතිය මේ ජනාධිපතිතුමා යටතේ වෙනස් වුණා
මොකද මේ ක්‍රීඩාව දෝෂදර්ශනයට ලක්වෙන තැනකට පත්වෙලා තියෙන්නේ. හැමෝම විවේචනය කරනවා?
ක්‍රීඩාව කියන්නේ අප්ඩේට් වෙන්න ඕන එකක්. ඒක වෙනවද කියන ප්‍රශ්නය පළවෙනියට එනවා. කොහොම වුණත් අනෙක් දේවල් වගේම, ජයග්‍රහණයේදී මල්මාලා දානවා වගේම පරාජයේදී ගල් ගහන ක්‍රමය ක්‍රීඩාවෙත් තියෙනවා. කොහොම වුණත් අපෙත් වගකීමක් තියෙනවා මේ දේවල් ආරක්ෂා කරන්න වගකීම් ගන්න. ඒ ඒ ක්‍රීඩාවල නියැලුණු අයගෙත් වගකීමක් තියෙනවා තමන්ගේ ක්‍රීඩාවේ උන්නතිය වෙනුවෙන් වැඩ කරන්න.
ඔබ සමස්ත ක්‍රීඩාව ගැන කතා කරන්නේ. මම කෙළින්ම අහන්නම්. ක්‍රිකට් ක්‍රීඩාව මිනිසුන්ට දැන් කලකිරීමක් ගෙන එන තැනට පත්වෙලා. ඒ අස්සෙන් ක්‍රිකට් ආයතනය සම්බන්ධයෙන් දූෂණ චෝදනා එල්ල වෙනවා. මොකක්ද මේ වැඩේ?
ක්‍රිකට් ආයතනය විතරක් නෙමේ, ක්‍රීඩාව සම්බන්ධයෙන් භාර ඕනෑම ආයතනයකට වගකීමක් තියෙනවා තමන්ගේ ක්‍රීඩාව දියුණු කරන්න. එදා ඒ සභාපතිවරු කරපු කැපවීම් නිසා තමයි 1996 අර්ජුන රණතුංගට පවා ලෝක කුසලානය ගන්න හැකිවුණේ. ඒ නිසා මේ ආයතන බද්ධවෙලා යන්න ඕන. ඒත් අද මට ප්‍රශ්නයක් තියෙනවා ඒ වගකීමෙන් ක්‍රිකට් බෝඩ් එක ඈත්වෙලාද කියලා.
මේ සිදුවීම් හරහා උත්සාහ කරනවද අතුරු පාලක මණ්ඩලයක් ක්‍රිකට්වලට දාන්න?
මම කියන්නේ කිසියම් පාලක මණ්ඩලයක් වගකීමක් නැතුව වැඩ කරනවා නම් ඊට මැදිහත්වීම ක්‍රීඩා අමාත්‍යංශයේ වගකීමක්. ඒත් මම කියන්නේ පුළුවන් තරම් සුහදශීලීව මේක විසඳගන්න ඕන. මම හිතන්නෙම ඒක තමයි හොඳම දේ. ඒකෙන් පස්සේ බලමු.
අමාත්‍යංශය මේ සම්බන්ධයෙන් සාකච්ඡා සිදු කළාද?
අපි බලාපොරොත්තු වෙනවා ඉදිරි සතියෙදී ඒ අය එක්ක සාකච්ඡා කරන්න. ඔවුන් එක්ක කතා කරලා මේ ගැටුම්වලට විසඳුමක් ගන්න බලාපොරොත්තු වෙනවා.
පාලක මණ්ඩලය හරියට බලාපොරොත්තු වෙන දේවල් කරනවා කියලා හිතනවද?
නෑ. ඇත්තටම අද වෙලා තියෙන්නේ පාලක මණ්ඩල සටනක්. කට්ටියට ඕන අද පාලක මණ්ඩලය තුළට යාගන්න වැඩ කරන්න. ඒ අය කල්පනා කරන්නේ ඒ තුළින් ඍජු හා ලාභ ප්‍රයෝජන ලබාගන්න.
ඔබලා මේ ක්‍රීඩාව නංවන්න විවිධ අය එකතුවෙන් ක්‍රීඩා සභාවක් පිහිටෙව්වා. හැබැයි ඒ සභාව පත්වුණායින් පස්සේ රග්බි, ෆුට්බෝල් වගේ ක්‍රීඩා ජාත්‍යන්තර මට්ටමින් තහනම් වුණා. ක්‍රිකට් කිසිම ප්‍රගතියක් නෑ. මොකක්ද ඔය සභාවෙන් ඇති වැඩේ?
පහුගිය කාලයේ චෝදනා එල්ල වුණා ක්‍රීඩාවට දේශපාලන ඇඟිලි ගැසීම් වැඩියි කියලා. අන්න ඒවට උත්‍තරයක් හැටියට තමයි ක්‍රීඩා සභාව පිහිටෙව්වේ. අපිට ඕන වුණේ ක්‍රීඩාව වර්ධනය කර ගන්න. ඒ සඳහා සුදුසුකම් තියෙන අය බඳවාගත්තෙ. මේ නිසා ක්‍රීඩාවට සැබෑ සුදුසුකම්ලත් අය පත්වුණා ක්‍රීඩා කරන්නත්. දැන් ඒ දේශපාලන මැදිහත්වීම් නෑ. කොහොම වුණත් ක්‍රීඩා සංගම් දැන් දැන් මේ ක්‍රීඩා සභාවට විරුද්ධයි වගේ පේන්නේ.
දැන් රටේ පවතින දේශපාලනය පැත්තට හැරුණම ඇත්තද ඔබලා අලුත් සන්ධානයක් හදනවා කියන්නේ?
මෙහෙමයි. අපේ රටේ දේශපාලනයට පුරුදු දෙපැත්ත බෙදිලා මරාගන්න. ඒත් ඒ සංස්කෘතිය මේ ජනාධිපතිතුමා යටතේ වෙනස් වුණා. ඒක හොඳ දෙයක්. ඒත් ජනතාව කැමැති නෑ වගේ අපිත් එකතු වෙනවට. ජනතාවත් කැමැති තනි බලයක් ලබාගන්න එකට. ඒත් මේ රට හදන්න එකතු වෙන්න ඕන කියන එක කවුරුත් හිතන්නේ නෑ. ඒත් අරගලය තුළින් කිව්වෙත් ඒකයි. ඒ නිසා මේ එකතුවෙන් එක දේශපාලන බලවේගයක් නිර්මාණය කිරීමේ වගකීම තියෙනවා. ඒක මේ වෙලාවේ විය යුතුයි. මොකද බෙදිලා වෙන්වෙලා, රණ්ඩුවෙලා මේක හදන්න බෑ.
මේ රට හදන්න රනිල් වික්‍රමසිංහ මහත්තයා විතරයි ඉන්නේ කියලද හිතන්නේ?
දැන් බලන්න ගෝඨාභය රාජපක්ෂ මහත්තයා සියල්ල අත්ඇරලා යනකොට මේ ආණ්ඩුව භාරගන්න කියලා සජිත් ප්‍රේමදාසට, අනුර කුමාර මහත්තයට අඬ ගැහුවා. ඒත් ආවේ නෑ. ඒ අභියෝගය බාරගත්තේ රනිල් වික්‍රමසිංහ මහත්තයා. අනෙක් අය බාරනොගත්තේ ඒ අභියෝගය ඔවුන්ට බැරි නිසා. එහෙනම් රනිල් වික්‍රමසිංහ මහත්තයා සුදුසුයි කියන එක අපිට වඩා කියන්නේ රටේ මිනිස්සු. ඒක අපි නෙමේ කියන්නේ මිනිස්සු. ජනතාවට දැනෙන දේ ඒ. පහුගිය කාලයේ තිබුණු ලොකුම ප්‍රශ්න නැතිවුණා. දැන් ක්‍රමයෙන් රට හරි පාරේ යනවා. අන්න ඒ නිසයි ජනතා ප්‍රසාදය ඇතිවෙලා තියෙන්නේ. ඒ නිසා අපි තීරණය කරමු.
ඒ කියන්නේ කට්ටිය එකතුවෙලා එකට ඉල්ලන්න යන්නේ නේද?
මෙහෙමයි. ජනතාව එහෙම එකතු විය යුතුයි කියලා හිතනවා නම් මේ රට ගොඩනගන්න ඕන ඔයාලා කියලා. ජනතාව අපේක්ෂා කරනවා නම් එවැනි තීරණයකට යන්න වෙනවා. ඒක ඉතින් රටේ ජනතාවගේ තීරණය.
ඒ කියන්නේ ආයේ පොහොට්ටුවට දේශපාලනයක් නෑ?
නෑ. එහෙම දෙයක් නෑ. අපි ශක්තිමත් පක්ෂයක්. ඒත් මම හිතනවා ඉස්සරහට පක්ෂ දේශපාලනයට වඩා ප්‍රතිපත්ති දේශපාලනයයි ජනතාව බලාපොරොත්තු වෙන්නේ. ඒ නිසා ප්‍රතිපත්ති දේශපාලනය සහිත ගමනක් හැම පක්ෂයක්ම කරන්න ඕන.
I ගයාන් ගාල්ලගේ
