සර්ව පාක්ෂික සමුළුව ජනාධිපතිවරණයට කරන රඟපෑමක්
- සමගි ජන බලවේගය පාර්ලිමේන්තු මන්ත්‍රී චමින්ද විජේසිරි
►ජනාධිපති පත්වෙලා ඉන්නෙ රාජපක්ෂලා රකින්නයි
►ආණ්ඩුවේ ප්‍රධාන අරමුණ සමගි ජන බලවේගය බිඳින එක
►අපිට පුළුවන් ජනතාවත් එක්ක ආණ්ඩුව එළවන්න
►අරගලේ කාලේ හැංගිලා හිටපු අය දැන් වීරයො වෙලා
මේ මෑතක ඉඳලා එකපාරම සජබය ක්‍රිකට් පාලක මණ්ඩලය සම්බන්ධයෙන් විශේෂ හෙවිල්ලක් කරන්න ගත්තා. ඒක හරිම පුදුම සහගතයි වගේ. මට කියන්න මොකක්ද මේ අනාවරණය කියලා?
මේ රටේ වගකිවයුතු විපක්ෂයක් හැටියට අපි මේ රටේ සියලුම ආයතනවල දූෂණ වංචා හොයනවා. ක්‍රිකට් බෝඩ් එක කියලා විශේෂයක් නෑ. බෝඩ් එකේ දේවල් විගණන වාර්තාව සමඟ තමයි එළියට ආවේ. පහුගිය කාලේ මේවා එළියට ආවේ නෑ දේශපාලන හිතවත්කම් නිසා. බෝඩ් එකේ මහා ධනස්කන්දයක් පෞද්ගලික සුඛ විහරණය සඳහා යොදවලා තියෙනවා. ක්‍රිකට් ක්‍රීඩාවේ අභිමානයත්, රටේ අභිමානයත් විනාශ කරලා තියෙන්නේ. ඒවා රටට හෙළි කරන්න, අනාවරණය කරන්න අපි වගකිවයුතු මැදිහත් වීමක් සිද්ධ කළා.
සභාපතිවරයා කිව්වේ ක්‍රිකට් ආයතනය කියන්නේ ස්වාධීන ආයතනයක්, පෞද්ගලික ආයතනයක්. කාටවත් අත දාන්න බෑ කියලා?
සභාපතිවරයා හිතනවා ඇති එයා මේ ගෙදරින් ගෙනාපුවා කියලා. ක්‍රිකට් කියන්නේ අපේ ජාතික ක්‍රීඩාව වගේ දෙයක්. පාර්ලිමේන්තුවටත්, විගණකාධිපති දෙපාර්තමේන්තුවටත් බලයක් තියෙනවා විගණනය කරන්න. එහෙම බලයක් තියෙන්නේ රාජ්‍ය යාන්ත්‍රණය යටතට ඒ ආයතනයත් වැටෙන නිසා. ඒ නිසා එහෙම කියලා ඇඟ බේරගන්න බෑ.
ඔබ හිතනවද ක්‍රිකට් පාලක මණ්ඩලයට අතුරු පාලක මණ්ඩලයක් අවශ්‍යයි කියලා?
ඔව් පැහැදිලිවම. මම කියන්නේ රනිල් වික්‍රමසිංහ ආණ්ඩුව හොරකමට දූෂණයට නැත්නම්, රාජපක්ෂලට බැඳිලා නැත්නම් මේ ගැන විමර්ශනයක් කරන්න ඕනෙ. මම කියන්නේ සභාපතිවරයාගේ කටයුතු අහෝසි කරන්න ඕනෙ. මොකද වෙලා තියෙන දේ පැහැදිලියි. එහෙම තත්ත්වයක් උඩ සභාපතිවරයා සිටීමම පුදුම සහගතයි. ඇත්තටම ජනාධිපතිවරයා පත්වෙලා ඉන්නේ රාජපක්ෂලා ආරක්ෂා කරන්නත්, ඔවුන්ව නැවත උඩට ගේන්නත්. ඒ නිසා ඔවුන්ව ආරක්ෂා වෙනවා ඇරෙන්න මේ රටේ වෙන වංචා දූෂණ ගාණක් නෑ.
සර්ව පාක්ෂික සමුළුවක් කැඳෙව්වා බලය බෙදීම ගැන. ඔබලගේ පැහැදිලි ස්ථාවරය මොකක්ද බලය බෙදීම ගැන?
අපේ අරමුණ මේ රටේ බලය බෙදීම, ඒකීයභාවය රකින, ජාතිවාදය සිද්ධවෙන්නේ නැති, හැමෝටම එකම විදිහට සලකන ක්‍රමවේදයක්. ඒක එක්තරා පිරිසකගේ දේශපාලන උවමනාවක් කර ගන්න නරකයි. මේ රටේ සමගිය, සමාදානය ඇති කරන්න පුළුවන් පිරිසක් විසින් ඒ වෙනස කරන්න ඕනෙ. ඒ බලය බෙදීම අපේ මූලික පියවරක්. ඒත් අපි හැමදාම ජාත්‍යන්තර පිරිසගේ උවමනාවට මැදිහත්කාරයෝ වුණා. උතුරු නැගෙනහිර ප්‍රශ්නය ඒ රාජ්‍යයන්ට ඕන විදිහට හැසිරුණේ. අපි ඒ රාජ්‍යයන්වලට කියන්නේ මේ රටේ සිංහල දෙමළ මුස්ලිම් සැබෑ ප්‍රශ්නය විසඳන්න සහාය දෙන්න කියලා. එහෙම නැතුව දේශපාලන වාසි තකා මේ රටේ සමගිය බිඳින්න එපා කියල කියනවා.
ඒ කියන්නේ මේ බලය බෙදීම ව්‍යාජද?
රනිල් වික්‍රමසිංහ මහත්තයගේ ඊළඟ ජනාධිපතිවරණය සඳහා සිදු කරන රඟපෑමක් මේක. මේ වැඩේ ඡන්දය ඉල්ලලා කරන වැඩක්. ඒක නිසා අපි ඒකට අහුවෙන්නේ නෑ.
ඔබලා බලය බෙදීම වෙනුවෙන් සහභාගි වුණා. ඒත් පළාත් සභා ඡන්දයත් පළාත් පාලන ඡන්දයත් තවම නෑ. ඡන්ද සටන අත්ඇරලද?
මේ රටේ නීත්‍යානුකූල ස්වභාවය මත අපි අපේ වැඩ කටයුතු කරලා තියෙන්නේ. ඔබ දකින්න ඇති මැතිවරණය තියන්න බෑ කිව්වම අපි අධිකරණයට ගියා. අධිකරණයෙන් ලැබුණු සහනදායී නියෝගය ක්‍රියාත්මක වුණේ නෑ මුදල් නෑ කියලා. ඒක කළේ මුදල් ඇමැතිවරයා හැටියට මුදල් අමාත්‍යංශය. ඇමැතිවරයා ජනාධිපතිවරයා. ජනාධිපතිවරයගේ බලය යොදවලා අධිකරණයේ සාධාරණත්වය පවා මගඇරලා තියෙන්නේ. ඔබ කිව්වා ඇත්ත. මේ රටේ පළාත් පාලන, පළාත් සභා මැතිවරණය තියන්නේ නැතුව මේ ජනවාර්ගික ප්‍රශ්නයක් ඉස්මතු කරන්න හදනවා බලය බෙදීම පෙන්නලා. ඒ නිසා අපි කියන්නේ ඉක්මනින් මැතිවරණය තියන්න කියලා.
ආණ්ඩුවෙන් කියනවා ඔබලගේ පක්ෂයේ රැසක් ආණ්ඩුවට එක්වෙන්න ඉන්න බව. ඒ කවුද ආණ්ඩුවට යන්න ඉන්නෙ?
ජනාධිපතිවරයා පත්වුණේ ජනවරමකින් නෙවේ. ඒ නැති නිසා ඔහු හැමවෙලේම ගේම් එකකින් බලය රුකගන්න හදනවා. විවිධ කතා කියනවා. ප්‍රධාන අරමුණ සමගි ජන බලවේගය බිඳින එක. ඒකට තමයි ඔය වගේ කතා කියන්නේ. ඒ නිසා ඒවා දවල් හීන. ඒ දවල් හීන දකිද්දි අද එජාප පාක්ෂිකයා දවසින් දවස පක්ෂයෙන් ඈත්වෙනවා. අපේ පක්ෂය කැඩෙන්නේ නෑ. කඩන්නත් බෑ. අපි ඉන්නේ. කඩන්න උත්සාහ ගන්න විවිධ බෝල දාලා බලනවා. ඒත් වැඩක් නෑ. එජාපයට බලයක් ගන්න බෑ.
පොහොට්ටුව සහ අලියා එකතුවෙලා ඊළඟ ජනාධිපති අපේක්ෂකයා හොයන්න යනවා. ඒකෙන් අවාසිය සහ අභියෝගය එන්නේ සජබයට නේද?
කිසිසේත්ම නෑ. කිසිම අභියෝගයක් නෑ. රටේ සමස්ත ජනතාව දන්නවා මේ රට බංකොලොත් කරපු, බෙහෙත් ටික ගන්න බැරිවුණු, තෙල් ටික නැති කළ පොදුජන පක්ෂය එක්ක එජාපය එකට ඉල්ලනවා කියන එක මාර දුකයි. එහෙම ඉල්ලනවා නම් ජනතාවට පේනවා මේ මොකක්ද වෙන්නේ කියලා. අපිටත් ලේසියි ජනතාව එක්ක එකට එකතුවෙලා මේ පක්ෂ දෙකම පරාජය කරන්න. ඒ නිසා අපි සූදානම්. ඒත් අභියෝගයක් නෑ. ඒ සියල්ල මවන්නේ ඒ අය. ඒත් පහුගිය අරගල කාලේ හැංගිලා හිටියේ එළියට බහින්න බැරුව. එහෙම අය එක්කද මේ බලය අල්ලන්න හදන්නේ.
I ගයාන් ගාල්ලගේ