මෙහෙම ගියොත් විදුලිය - ජලය නැති ගෙවල් වැඩිවේවි
- සමගි ජන බලවේගය පාර්ලිමේන්තු මන්ත්‍රී හර්ෂණ රාජකරුණා
♦ පෝලිම් නැති කළේ මිල නග්ගලා: ඉතින් ප්‍රශ්නෙ විසඳුණාද?
♦ ජනතාව වෙනුවෙන් කතා කරන එක කඩාකප්පල් වැඩක් වෙන්නෙ කොහොමද?
♦ ජවිපෙට තියෙන්නේ මුළු ලෝකෙන්ම ෆේල් ක්‍රමවේදයක්
♦ සජිත් මහත්තයාට වැඩ කරන්න පුළුවන් දක්ෂ කණ්ඩායමක් ඉන්නවා
ආණ්ඩුව මේ වෙනකොට ක්‍රමක්‍රමයෙන් බදු බර, බිල්පත් බර ජනතාවට පටවමින් යන්නෙ. මේ සම්බන්ධයෙන් ජනතාවට තියෙන එකම සහනය විපක්ෂය. ඔබලා මොන වගේ දෙයක්ද මේ වෙනුවෙන් කරන්න බලාපොරොත්තු වෙන්නෙ?
ඇත්තටම මේ රටේ ජනතාවට ජීවත් වෙන්න බැරි තරමට ජීවන බර වැඩිවෙලා තියෙන්නෙ. දැන් බලන්න පෙට්‍රල් ඩීසල් වැඩිවෙලා. ඒ වගේම විදුලි ගාස්තු සීයට තුන්සීයකින් වැඩිවෙලා තියෙනවා. ජල ගාස්තුව සීයට පනහකින් විතර වැඩිවෙලා. අද වැඩිපුරම තියෙන්නෙ විදුලිය නැති ජලය නැති ගෙවල්. මොකද මිනිස්සු ඒවා බාගෙට අතහැරලා දාලා. වෙලා තියෙන්නෙ වැඩිම බර පටවලා තියෙන්නෙ දුප්පත් ජනතාවට. ඒ නිසා ජනතාව තමන්ගේ ව්‍යාපාර කර ගන්න බැරි තැනට පත්වෙලා තියෙන්නෙ. ඒ නිසා අපි ආණ්ඩුවට බලපෑම් කරනවා ජනතාවගෙන් මේ වගේ අසාධාරණ විදිහට අයකර ගැනීම් සිදු කරන්න එපා කියලා.
රට තිබුණු හැටියට මේ තත්ත්වය සමහර අය අර්ථ ගන්වන්නේ හොඳයි කියලා. මේ යන්නේ ඒ අසීරු කාලයේ අන්තිම ටික කියලා සමහර අය හිතනවා. විපක්ෂයේ මන්ත්‍රීවරයෙක් හැටියට ඔබ හිතන්නෙ මොකක්ද මේ වෙන්නෙ?
උදාහරණයක් හැටියට ගත්තොත් තෙල් පෝලිම් යුගය ගනිමුකො. දැන් ඒගොල්ලො තෙල් පෝලිම් නැති කරන්න මොකද කළේ. ඉස්සෙල්ලාම කෝටා එකක් ගෙනාවා. ඊටපස්සේ තෙල් මිල තුන් ගුණයකින් වැඩි කළා. ඒ වගේම තෙල් ආනයනය සඳහා අවසර දුන්නා. හැබැයි ප්‍රශ්නය විසඳුණාද? නෑ. දැන් වෙලා තියෙන්නෙ ආර්ථික ප්‍රශ්නය උග්‍රවෙලා මිසක් අඩුවක් නෙවෙයි. විසඳුමක් තාම නෑ.
ආණ්ඩුවෙන් කියන දෙයක් තමයි ආණ්ඩුවේ වැඩපිළිවෙළ කඩාකප්පල් කරන්නෙ විපක්ෂයයි කියලා. ඇයි විපක්ෂය එහෙම දෙයක් කරන්නෙ?
අපි කිසිම වෙලාවක සාම්ප්‍රදායික විපක්ෂයේ භූමිකාව නිරෑපණය කරන්නේ නෑ. ආණ්ඩුව හරි දෙයක් කළොත් අපි ඒකට උපරිම සහයෝගය ලබා දෙනවා. හැබැයි වැරදි දෙයක් කළොත් අපි ඒකට සහයෝගය ලබාදෙන්නෙ නෑ. අපි හැමදේකටම කකුලෙන් ඇදලා හරි දේත් කඩාකප්පල් කරන සමහර පක්ෂ වගේ නෙවෙයි. අපි සාම්ප්‍රදායික විපක්ෂයක් නෙවෙයි. අපි ජනතාව වෙනුවෙන් කතා කරන එක කඩාකප්පල් වැඩක් වෙන්නෙ කොහොමද? ජනතාව වෙනුවෙන් අපි කතා කරන්නෙ නැතුව කවුද කතා කරන්නෙ.
දැන් ඔබලා කියනවා මේ වැඩි කිරීම්, මේ ජනතාවගේ ජීවන බර ඉතාම අසාධාරණයි කියලා. ඔබලා බලයට ආවොත් මේ දේවල් අඩු කරලා මිනිස්සුන්ට සහනයක් දෙනවද?
මේ රටේ සහන හෝ යම් වරප්‍රසාදයක් ලබා දිය යුතු ජන කණ්ඩායම කවුද කියලා හඳුනාගෙන අපි ඒ අනුව වැඩ කටයුතු කරනවා. හැබැයි මේ ආණ්ඩුව තවම එහෙමවත් ජනතාව හඳුනාගෙන නෑ. පේනවනෙ අස්වැසුමට දැන් වෙලා තියෙන දේ. අපි හරියටම අවශ්‍ය ජනතා කණ්ඩායම හඳුනාගෙන ඒ ජනතා කණ්ඩායමට අවශ්‍ය සහන, සහාය අපි නිවැරදිව ලබා දෙනවා.
අයි.එම්.එෆ් සහ අනෙකුත් ගිවිසුම් සම්බන්ධයෙන් මේ ආණ්ඩුව ගත්ත තීන්දු තීරණ ඔබලගේ ආණ්ඩුවකදි වෙනස් කරනවා කියලා කියනවා. එහෙම කරන්න පුළුවන්ද?
අයි.එම්.එෆ් එකත් එක්ක ඉදිරියට යන්න කියලා අපි කිව්වේ 2019 ඉඳලා. හැබැයි එදා කට්ටියක් අයි.එම්.එෆ් යන එකට විරුද්ධ වුණා. හැබැයි ඒ විරුද්ධ වුණු කට්ටිය අද ආණ්ඩුවත් එක්ක එකතුවෙලා අයි.එම්.එෆ් එකත් එක්ක වැඩ කටයුතු කළා. කිව්වෙ නම් අයි.එම්.එෆ් එකේ කුමන්ත්‍රණයක් කියලා. හැබැයි ඒ කියපු වෙලාවේ අයි.එම්.එෆ් එකත් එක්ක ගිවිසුම්ගත වෙලා සහාය ගත්තා නම් අද රට මේ වගේ තත්ත්වයකට පත්වෙන්නෙ නෑ. විශේෂයෙන් ඒ වෙලාවේ අයි.එම්.එෆ් එකත් එක්ක කතා කළා නම් අද මෙවැනි තත්ත්වයකට රට මුහුණපාන්නෙ නෑ.
ජාතික ජන බලවේගය කියනවා ඔබලත් ආණ්ඩුවත් එකම කණ්ඩායමක්. ඔබලත් ආණ්ඩුවත් එකට පරද්දන්න ඕන කියලා. ඇත්තද? ඔබලා එක කණ්ඩායමක්ද?
අපි නෙවෙයි ඒගොල්ලො මහින්ද රාජපක්ෂත් එක්ක ආණ්ඩු කරපු කට්ටිය. ඒ විතරක් නම් කමක් නෑ. මහින්ද රාජපක්ෂ මහත්තයා ජනාධිපති කරන්න දරදිය ඇද්ද අය. ශ්‍රී ලංකා එකටත් වඩා එතුමට කඩේ ගියේ ජනතා විමුක්ති පෙරමුණ. ජනතා විමුක්ති පෙරමුණේ ප්‍රතිපත්ති, ආර්ථික ක්‍රමවේද කියුබානු ක්‍රමවේදයට සමානයි. ඇත්තටම ඒ ක්‍රමවේදය මේ මුළු ලෝකයේම ෆේල්. දැන් ඔය කියන ඒ අයගේ දරුවෝ කියුබාවේ ඉගෙන ගන්න යවනවද? නෑ. හැබැයි කියන්නෙ කියුබාව ගැන කතා. ඒ නිසා මම කියනවා ගෝඨාභය රාජපක්ෂ මහත්තයට අහුවුණා වගේ මේ කණ්ඩායම්වලට අහුවෙන්න එපා කියලා.
සජිත් ප්‍රේමදාස මහත්තයව ජනතාව පිළිගත යුත්තේ ඇයි?
සජිත් ප්‍රේමදාස මහත්තයා කියන්නෙ අවංක, ජනතාවට වැඩ කරන නායකයෙක්. ඒ වගේම ප්‍රතිපත්තිගරුක නායකයෙක්. පාවාදීම් නෑ. ඒ හා සමානව එතුමට වැඩ කරන්න පුළුවන් ශක්තිමත් දක්ෂ කණ්ඩායමකුත් ඉන්නවා. අන්න ඒ වගේ කණ්ඩායමකට තමා මේ රට බාරදිය යුත්තේ.
I ගයාන් ගාල්ලගේ