අද තියෙන්නේ රස්තියාදුකාර විපක්ෂයක්

- ජල සම්පාදන රාජ්‍ය අමාත්‍ය සනත් නිශාන්ත

►කඩෙන් ගන්න ගියොත් වතුර ලීටරේ රුපියල් 150ක්: අපි දෙන්නේ සත 6කට
►ජනාධිපතිවරයාට ජනවරමක් නෑ: අපි බලය දුන්නෙ ලොකු දේවල් කරන්න නොවේ
►හකීම් කළා වගේ මම රස්සා දීලා රටේ ජනතාවට බර පටවන්නෙ නෑ
►ජනතාව දුක් විඳීම ගැන අපිත් හදවතින්ම කනගාටුවෙනවා

විපක්ෂය පාර්ලිමේන්තුව තුළ කතා කළාම වැරදියි. බණිනවා, කෑගහනවා, තර්ජනය කරනවා. මොකද මේ විපක්ෂය බයකරලා තියාගන්නද හදන්නේ?

අනේ නෑ. එහෙම එකක් නෑ. අනික කොහොමත් ශක්තිමත් විපක්ෂයක් දැන් නෑනේ. අපිත් විපක්ෂයේ ඉඳලා තියෙනවා. වැඩකරලා තියෙනවා. එදා හරිදේ හරි කියන්නත් වැරදි දේ වැරදි කියන්නත් පුළුවන් හරි විපක්ෂයක අපි හිටියේ. අපි මහනුවර ඉඳලා කොළඹට ජනතාව එකතු කරලා දැවැන්ත රුලි කරලා තියෙනවා. ගහලා ජනාධිපති මන්දිරය අල්ලන, අරලිය ගහ මන්දිරය අල්ලන විපක්ෂයක නෙමේ අපි හිටියේ. අද ඉන්න විපක්ෂය නිකන් රස්තියාදුකාර විපක්ෂයක් තියෙන්නේ. ජනතා පරමාධිපත්‍යට ගරු කරන්නේ නැති, ජනතාවට ගෞරවයක් නැති, බලහත්කාරයෙන් බලයගන්න හදන විපක්ෂයක් අද තියෙන්නේ. හැබැයි ඒ හීන නම් සැබෑවෙන එකක් නෑ. ජනතාවයි පාලකයො තෝරාපත් කරගන්නේ. ඒ නිසා එහෙම අල්ලගන්න බෑ.

විපක්ෂ නායකතුමා ජනතා ප්‍රශ්න කතා කරද්දී මයික් ටයිසන් අරක මේක කියලා විහිළු කරනවා. තර්ජනය කරනවා. ඔහුට ජනතාව වෙනුවෙන් කතා කරන්න වෙලාවක් දෙන්න එපාද?

ඇත්තටම විපක්ෂ නායකතුමාගෙන් හරි කරදරයි. පාර්ලිමේන්තුවේ දෛනික කටයුතු තියෙනවා. ඒත් දවසම ගත්තොත් විපක්ෂ නායකතුමාගේ දේශන අහන්න වෙලා තියෙන්නේ. පාර්ලිමේන්තුවේ 225ක් ඉන්නවා. ඒ 225ටම කතා කරන්න ඉඩක්‍් තියෙන්න ඕන. දැන් අපි කතා කරන්න විනාඩි 10ක් ඉල්ලුවම අපිට ගතවන කාලය දැනුම් දෙනවා. ඉක්මනින් අපේ කාලය යනවා. ඒ නිසා මම වාඩිත් වුණා. කොහොම වුණත් පක්ෂ නායක රුස්වීමෙදී තීරණය කරනවා දවසේ කතා කරන වෙලාවල් එහෙම. ඒ සියල්ල අණපනත්, ගැටලු සම්බන්ධයෙන් කතා කරන්න තියෙන්නේ. ඒත් වෙන්නේ විපක්ෂ නායකතුමාගේ බණ අහන්න. ඇත්තටම මාර කරදරයි.

විපක්ෂය කියන්නේ එතුමා කතා කරන්නේ ජනතාවගේ ප්‍රශ්න කියලා?

ජනතාව වෙනුවෙන් කතාකළාට කමක් නෑ. ඒත් කතා කරන්නේ වෙන දේවල්නේ. මෙලෝ දෙයක් තේරෙන්නේ නෑ. අපි විපක්ෂනායකවරු දැකලා තියෙනවා. මෙහෙම කෙනෙක් දැකලා නෑ කලින් තියා ජීවිතේටවත්.

සෞඛ්‍ය ඇමැතිට විරුද්ධව ගෙනාපු විශ්වාසභංගයේදී න්‍යාය පත්‍රයට අනුව දින නියම කරලා තිබ්බේ. ඒත් ජනාධිපතිවරයා සති අන්තයේ ඉක්මනින් දාගන්න කියලා කිව්වා. ඇයි මේ ජනාධිපතිවරයා න්‍යාය පත්‍රයට බලපෑම් කරන්නේ?

ඒක ඉතිං ජනාධිපතිතුමාගෙන් තමයි අහන්න වෙන්නේ. මට එතුමා කරන දේවල් ගැන දකින්න විදිහක් නෑනේ.

එහෙම කිව්වට ඔබලනේ මේක ප්‍රෙෂර් කරන්න ඇත්තේ වැඩේ ඉක්මනින් කරන්න කියලා ජනාධිපතිවරයාට?

අනේ නෑ. අපි එහෙම කළේ නෑ. විශ්වාසභංගයක් තියෙනවා නම් ඒක ඉක්මනින් ගෙනැල්ලා වැඩේ ඉවරකරන එක හොඳයිනේ. විශ්වාසභංගයට බයද? බය නැත්තන් ඉක්මනින් ගේන්න පුළුවන්නේ.

දැන් මිනිස්සු වැඩියෙන්ම කතාවෙන්නේ ඔබ ගැන. මොකද වතුර බිල විශාල ගණනකින් වැඩි කරපු නිසා. ඇත්තටම ඇයි එහෙම වැඩි කළේ?

දැන් ඔබතුමාලා කඩේට ගිහින් වතුර ලීටරේ බෝතලයක් ගන්නවා. රුපියල් 150ක් 100ක් දීලා. හැබැයි අපි ජලසම්පාදන මණ්ඩලයෙන් ඒ ප්‍රමිතියටම වතුර ලීටරයක් ලබාදෙනවා ජනතාවට සත 6 කට. ඒක පිළිගන්නවද? ඔයාලා ඒක කියන්නේ නෑ. හැබැයි මේ සත හයට දෙන්නත් අපි සත අටක් වියදම් කරනවා. කාංචන ඇමතිතුමා ලයිට් බිල වැඩි කළාම අපිට ඒක දරන්න වෙනවා. මොකද වතුර දෙන එක අඩු කරන්න බෑනේ. අනික ඔය ගණන්වලට දුන්නේ ඩොලර් එක රුපියල් 130 තියෙන කාලේ. දැන් ඩොලර් එක 350ක්. අපි මේ වතුර පිරිසිදු කරන කෙමිකල් ගේන්නත් ඩොලර් තමයි ඕන. ඒ නිසා අපිට වතුර අඩුවෙන් දෙන්න පුළුවන්කමක් නෑ.

මිනිස්සුන්ට දරන්න බෑනේ?

අපි යථාර්ථය තේරුම් ගන්න ඕන. මිනිස්සු අපහසුතාවයට ලක්වීම ගැන අපි හදවතින්ම කනගාටු වෙනවා. ඒ ගැන ලොකු වේදනාවක් කනස්සල්ලක් තියෙන්නේ. අපි සතුටු වෙන්නේ නෑ. ඒත් කරන්න දෙයක් නෑ. මතක තියාගන්න වෝටර් බෝඩ් එකේ 12000ක සේවක සංඛ්‍යාවක් ඉන්න ඕන තැන අපි 8000 ක් තියන් වැඩ කරන්නේ. තව තියෙනවා තුන් හාරදාහක පුරප්පාඩු. මට පුළුවන් ගමේ අයට රස්සා දෙන්න රවුෆ් හකිම්ලගේ කාලේ වගේ. අපි ඒකවත් කළේ නෑ. මම රස්සාවල් දහයක් දීලා නෑ තවම. එහෙම කළේ ඒ බර ජනතාවට දරන්න නොදිය යුතු නිසා.

දැන් බොන්නවත් දෙන්න වතුර තියෙනවද ජලාශ වල?

අපෝ තියෙනවා. ඒක ප්‍රශ්නයක් නෑ. දෙයියනේ කියලා  අපිට පානීය ජල ගැටලුවක් එන එකක් නෑ.

පොහොට්ටුව තරම් බෞද්ධාගම එක්ක සම්බන්ධ වෙනත් පක්ෂයක් නෑ. ඇයි එහෙම පක්ෂය අද පන්සල්වල ලයිට් කපලා යද්දි නිහඬ?

අපි මෙහෙම කරමු. මමත් යෝජනාවක් ගේන්නම් ආගමික ස්ථානවලට නොමිලේ විදුලිය දෙන්න කියලා. ඊටපස්සේ ජනතාවට පොඩ්ඩක් බර දරන්න වෙයි.

ඒ කියන්නේ පන්සල් පල්ලිවලට සාධාරණයක් නෑ.

සාධාරණයක් කියන්නේ, කරන්න දෙයක් නෑ.

විපක්ෂනායකතුමා නම් බිල ගෙවනවා පන්සල්වල?

අපි ඉස්සෙල්ලා බලන්න ඕන විපක්ෂ නායකතුමා මෙහෙම බිල් ගෙවන්නේ කොහොමද කියලා. එතුමාගේ තාත්තට එහෙම සල්ලි තිබ්බ කෙනෙක් නෙමෙයිනේ.

මේ දවස්වල ලොකුම මාතෘකාව 13 ගැන. ඒත් පොහොට්ටුව තවම ඊට එකඟ නෑ. මොකක්ද හේතුව?

අපේ නම් කිසිම විරෝධයක් නෑ. ඒත් සමහර දේවල් තියෙනවා කතා කරන්න ඕන. අනික ජනාධිපතිතුමාව අපි ගෙනාවේ රටේ තියෙන ප්‍රශ්න විසඳන්න. අපි එකඟ වුණේ අලුත් ව්‍යවස්ථාවක් ගේන්න. ඒකට ජනවරමක් ඕන. ජනාධිපතිවරයට ජනවරමක් නෑ.අපි බලය දුන්නේ එතුමට ලොකු දෙවල් කරන්න නෙමේ.

I ගයාන් ගාල්ලගේ