අගමැති අතට ගිය ඉම්තියාස්ගේ පොත
මෙරට ජ්‍යෙෂ්ඨ දේශපාලනඥයකු වන සමගි ජනබලවේගයේ මන්ත්‍රී ඉම්තියාස් බාකීර් මාකර් මහතා විසින් සම්පාදනය කෙරුණු ''සිතමු'' ග්‍රන්ථය ජනගත කිරීම පසුගිය බ්‍රහස්පතින්දා (10) පස්වරුවේ ශ්‍රී ලංකා පදනම් ආයතනයේදී සිදු විය. එම අවස්ථාවට අග්‍රාමාත්‍ය දිනේෂ් ගුණවර්ධන සහ විපක්ෂ නායක සජිත් ප්‍රේමදාස මහත්වරුද සම්භාවනීය අමුත්තන් රැසක් ඇතුළු විශාල පිරිසක්ද සහභාගි වී සිටියහ. ඉම්තියාස් මහතා විසින් රචිත තීරු ලිපිවල එකතුවක් වශයෙන් එම ග්‍රන්ථය ප්‍රකාශයට පත්කර තිබේ. එහිදී අග්‍රාමාත්‍ය දිනේෂ් ගුණවර්ධන මහතාට ඉම්තියාස් බාකීර් මාකර් මහතා විසින් ''සිතමු'' පොතේ පිටපතක් පිරිනැමූ අවස්ථාවයි මේ.
(ඡායාරූපය - නිසල් බදුගේ)
චීන යුද නැවක් යළිත් ශ්‍රී ලංකාවේ
ශ්‍රී ලංකාවේ මුහුදු තීරයට චීනයේ යුද නැවක් පැමිණීම ඉන්දියාවේ හදගැස්ම වැඩිකරන සිද්ධියකි. කාලෙකට ඉහතදී හම්බන්තොට වරායට පැමිණි අධි තාක්ෂණික උපකරණ රැගත් නැවක් හේතුවෙන් ඉන්දියාව සහ ශ්‍රී ලංකාව අතර කිසියම් මතභේදාත්මක තත්ත්වයක්ද හට ගැනිණි.
මෙවැනිම චීන යුද නැවක සම්ප්‍රාප්තියක් පසුගියදා (10) කොළඹ වරායේදී සිදුවිය. මේ නැව කොළඹ වරායට පැමිණීමට අවසරය ලබාදීම සම්බන්ධයෙන් ඉන්දියාව මුලදී ඍණාත්මක ප්‍රතිචාරයක් දැක්වූ බවද සඳහන් වෙයි. මීටර් 129ක් දිග නාවිකයන් 138 දෙනකු රැගත් චීන මහජන විමුක්ති හමුදාවට අයත් යුද නැවක් වන මෙහි අණදෙන නිලධාරි වශයෙන් ජින් ෂින් කටයුතු කරයි. නැව කොළඹ රැඳී සිටින්නේ පැය 48ක කාලයකට පමණක් බවද සඳහන්ය.
මේ නැව කොළඹට පැමිණීම සඳහා චීන බලධාරීන් විසින් කරන ලද ඉල්ලීමට අනුමැතිය ලබාදීම ප්‍රමාද වූයේ ඒ සම්බන්ධ ඉන්දියාවේ විරෝධය පළවීම හේතුවෙනි. ඉන්දීය සාගර කලාපයේ භූ දේශපාලනය හේතුවෙන් ඉන්දියාවත් චීනයත් අතර නිතර මතගැටුම් මතු වෙයි. කොළඹ වරාය පිහිටා ඇත්තේ ඒ දෙරටටම උපාය මාර්ගික වශයෙන් වැදගත් ස්ථානයක බැවින් එහි කටයුතු දෙරටම සංවේදී වෙයි. කෙසේ වුවද චීන යුද නැව ශ්‍රී ලංකාවේ කොළඹ වරායට පැමිණීමේ ගැටලුවක් නැතැයි පසුව ඉන්දියාව සඳහන් කළ බවද ආරංචි මාර්ග හෙළි කරයි.
I ඩේලි මිරර්