ඔව්... මම කරන්නේ කොන්ත්‍රාත් එකක් තමයි...!
රෝහිණී කවිරත්න (පාර්ලිමේන්තු මන්ත්‍රී - සමගි ජනබලවේගය)
- මේ පක්ෂ දෙක එකතුවෙනවා නම් මම තරම් සතුටුවන වෙන කෙනෙක් නෑ
- පොහොට්ටුව වගේ දූෂිත පක්ෂයක් එක්ක යූ.එන්.පී. එකට යන්න බෑ
- අපිට පේන්නේ ගෑස්-තෙල් පෝලිම් නැති එක විතරයි: ඒත් ලොකු ප්‍රශ්නයක් තිබෙනවා
- යූ.එන්.පී. එකයි සජබයි එකතුවෙලා ගියොත් දොගොල්ලටම හොඳයි
Qඑජාපයත් සජබයත් කියන්නේ එකම කට්ටිය තැන් දෙකකට වැටිච්ච තැනක්. ඒත් ඔබ පහුගිය දවසක කිව්වා මේ පක්ෂ දෙක එකට එකතුවිය යුතුයි කියලා. මොන පරමාර්ථයෙන්ද එහෙම කිව්වේ?
මේ ගැන සමාජ මාධ්‍ය තුළ විවිධ කතා තිබෙනවා. අගමැතිකම, ජනාධිපතිකම බෙදාගන්න කතා කළා වගේ පටු කතා. හැබැයි මම කතා කළේ ඊට එහා ගිය චිත්‍රයක් ගැන. දැන් බලන්න අපේ රට ලොකු ප්‍රශ්න ගොඩක ඉන්නවා. රටේ ලොකු අස්ථාවරභාවයක් ඇතිවෙලා. ඇති නැති උගත් සියල්ල රට හැරලා යනවා. වෛද්‍යවරු පවා රෝහල්වල නෑ. ගුරුවරුත් නෑ. මේ සියල්ල ගම්වල ප්‍රශ්න. මේවා තියන් කොහොමද ජීවත්වෙන්නේ. අන්න ඒ ප්‍රශ්නවලට අපි උත්තරයක් හදන්න ඕන. කවුරු හරි කියනවා නම් අපේ රට හදන්න අපේ ආණ්ඩුවක් එන්න ඕන කියලා. ඒ එනකොට රට හදන්න මිනිස්සු රටේ ඉන්න ඕනනේ. මම කියන්නේ මේවා හිතන්න කියලා සියලු නායකයන්ට.
Q ඒකට රනිල් - සජිත් එකතුව හේතුවක් වෙන්නේ කොහොමද?
මෙහෙමනේ, අද පොළවේ කතාවෙන්නේ නායකයෝ දෙන්නෙක් ගැන. ඒ රනිල් සජිත් ගැන. වෙන කෙනෙක් ගැන නෙමේ. කවුද ඉස්සරහෙන් ඉන්නේ කවුද පස්සෙන් ඉන්නේ කියලා නෑ. ඉතිං මේ දෙන්නා වටේ තමා මිනිස්සු ඉන්නේ. ඒ නිසා මේ දෙන්නා සහ පක්ෂ එකතුවෙලා රට වෙනුවෙන් පොදු වැඩපිළිවෙලක් හදන්න ඕන. අපි හදන්න ඕන පොදු වැඩපිළිවෙළක්. ඊට පස්සෙයි කවුරු ජනාධිපති වෙනවද? කවුරු අගමැති වෙනවද කියලා තීරණය කරන්න ඕන. කොයි පක්ෂයද ජයග්‍රහණය කරන්න ඕන කියන එක මිනිස්සු තීන්දු කරයි. මම දන්නේ නෑ මේ විකෘති කරන අය මේවා ඒ විදිහට දකින්නේ ඇයි කියලා.
Q ඒ කියන්නේ ආණ්ඩුවේ වැඩපිළිවෙළට සජිත් ප්‍රේමදාස මහත්තයා අත ගහන්න ඕන කියලනේ කියන්නේ නේද ඔබ?
ආණ්ඩුව ගෙනියන හැම වැඩපිළිවෙළකටම සහාය දෙන්න ඕන නෑ. ආණ්ඩුවේ සමහර දේවල් ගැන අපිට විවේචන තියෙනවා. ඒක වෙනම කතාවක්. ඒත් පොදුවේ තියෙන්න ඕන අපේ රටේ අනාගතය කොහෙටද අරන් යන්නේ කියලා. දැන් ජනාධිපතිවරයා කියනවා 2048 රට දියුණුකරනවා කියලා. අනෙකුත් පක්ෂත් එක එක කාල කියනවා. එහෙනම් ඒ අයගේ වැඩපිළිවෙළ පෙන්වන්න ඕන. එහෙම නැතුව දෙපැත්ත බෙදිලා කෑගැහුව පමණින් තේරුමක් නෑ.
Q ඔබ කියන්නේ ප්‍රතිපත්තිමය එකතු වීමක්. මම අහන්නේ පක්ෂ දෙක අතර එකතුවීමකුත් බලාපොරොත්තු වෙනවද?
ඒක සම්බන්ධයෙන් මට විරෝධයක් නෑ. එදත් මම පක්ෂය බෙදනවට විරුද්ධයි. එදත් යූ.ඇන්.පී. එකෙන් ඉල්ලුවත් පාර්ලිමේන්තුවට එන හැකියාවක් මට තිබ්බා. මට බෙදන්න ඕන නෑ.
Q කාටද බෙදන්න ඕන?
දිස්ත්‍රික්ක මට්ටමින් දිනලා ඇතුළට එන්න බැරිවෙයි කියලා හිතන අය තමයි පක්ෂය බෙදනවට කැමති වුණේ. මම කියන්නේ යූඇන්පී එකට පුළුවන් නම් පොහොට්ටුවත් එක්ක එකතුවෙන්න. සජබයට පුළුවන් නම් ඩලස් අලහප්පෙරුම එක්ක එකතු වෙන්න, මොකක්ද මේ විහිලුව? ඇයි මේ දෙගොල්ලන්ට එකතු වෙන්න බැරි? ඔය පක්ෂ දෙක එකතු වෙනවානම් මම තරම් සතුටු වෙන කෙනෙක් නෑ.
Q පක්ෂ දෙක එකතු කරන්න කණ්ඩායම් දෙකක් වැඩකටයුතු කරමින් යනවා කියලා කතාවක් තිබෙනවා. ඔබත් ඒ කණ්ඩායම් අතර ඉන්නවද?
මට නම් පක්ෂය ඇතුළෙන් එහෙම ආරාධනා ලැබිලා නෑ. හැබැයි එහෙම කතා යනවා.
Q ඔවැනි ප්‍රකාශ කළාම පක්ෂයෙන් බොහෝ අයගෙන් විවේචන එනවා. ඔබටත් එහෙම විවේචන ඇවිල්ලා තියෙනවද?
ඇවිල්ලා තියෙනවා. මම දැක්කා විවිධ ප්‍රකාශ කරලා තියෙනවා. මගේ ඇස් දෙක ශරීර දෙකක කියලා මන්ත්‍රීවරයෙක් කියල තියෙනවා. මගේ ඇස් දෙක කොහෙද තියෙන්නේ කියලා මම දන්නවා. හැබැයි ඉන්න කෙනාගේ ඇස්වල වැලිගහලා අනෙක් කෙනා හම්බවෙන වැඩනම් මට නෑ. හම්බ වුණානම් හම්බවුණා කියනවා. මොකද මම කිසිම පෞද්ගලික වැඩකට ගිහින් නෑ. ජනතාවගේ වැඩවලට විතරයි මම යන්නේ. ඒ නිසා මට ඒ විවේචන වැඩක් නෑ.
Q ඔබතුමිය කොන්ත්‍රාත් එකක් කරන්නෙ කියලා විවේචන තියෙනවා?
ඔව්. සමහර මාධ්‍යවේදියෝ කියලා තියෙනවා මම දැක්කා. ඔව්... මම කරන්නේ කොන්ත්‍රාත්තුවක්. ජනතාව වෙනුවෙන් කොන්ත්‍රාතුවක්. මොකක්ද ඒකේ වරද? ජනතාවට ජීවත්වෙන්න පුළුවන් රටක් හදන කොන්ත්‍රාත්තුව තමයි ජනතාව මට දීලා තියෙන්නෙ. ඒක මම දේශපාලනයේ හිටියත් නැතත් කරනවා.
Q ජනාධිපති සහ විපක්ෂ නායකතුමාගේ ප්‍රතිචාර කොහොමද ඔබේ යෝජනාව ගැන?
මට පෞද්ගලිකව ඒ දෙන්නම කතා කරලා නෑ.
Q ඇයි රනිල් වික්‍රමසිංහ මහත්තයා ඔබලත් එක්ක එකතුවෙන්න ඕන?
එතුමාගේ වැඩපිළිවෙළ ක්‍රියාත්මක කරන්න නම් ජාත්‍යන්තර වශයෙන් පිළිගත් කණ්ඩායමක් ඕන. ඒක තියෙන්නේ යූඇන්පීයට සහ සජබයට. ඒකට පොහොට්ටුව වගේ දුෂිත පක්ෂයක් එක්ක යන්න බෑ. ඒක රහසක් නෙමෙයි. ජාතිවාදය නැති සමාකාමී ඒකීය ආණ්ඩුවක් හදන්නත්, දූෂණ වංචා නැති රටක් හදන්නත් මේ පක්ෂ දෙක එකතුවෙන්න ඕන.
Q ඔබතුමියට වර්තමාන ආණ්ඩුව ගැන යම් ප්‍රසාදයක් තියෙනවා වගේ නේද?
මෙහෙමයි. හොඳ දේ හොඳයි කියන්න ඕන නරක දේ නරකයි කියන්න ඕන. හොඳ ගැන කිව්වොත් ඒවට විවේචන එන්න පුළුවන්. දැන් අරගලය ආවේ ඇයි? ඒ අරගලයේ අභිමතාර්ථයන් ඉෂ්ට වෙලා තියෙනවද කියලා අපිට ප්‍රශ්නයක් තියෙනවා. අපිට පේන්නේ ගෑස් තෙල් පෝලිම් නැති එක විතරයි. ඒත් අපිට නොපෙනෙන ලොකු ප්‍රශ්නයක් තියෙනවා. කොහොම වුණත් අපි අපේ ඩියුටි එක කරලා තියෙන්න ඕන ජනතාව වෙනුවෙන්.
Q ඔබට මේ යුඇන්පීයෙත් සජබයෙත් අනාගතය ගැන මොකද හිතෙන්නේ?
ජනතාව බලාපොරොත්තුවෙන්නේ එකතුවෙලා යන්න ඕන කියන මතයේ. එකතුවෙලා ගියොත් දෙගොල්ලොටම හොඳයි.
I ගයාන් ගාල්ලගේ