සජබ පිරිසක් ඉදිරියේදී අපේ පැත්තට එනවා

පාලිත රංගේ බණ්ඩාර (මහලේකම් - එක්සත් ජාතික පක්ෂය)

• ජවිපෙ ඉන්නේ මේ රටේ ආර්ථිකය විනාශ කරපු පිරිසක්
• රටේම ජනාධිපති අපේක්ෂකයා රනිල්
• විවේචන තිබුණට පොහොට්ටුවේ කට්ටිය ඉවත් වෙන්නෙ නෑ
• බංකොළොත් වෙච්ච රට හැමදාම ගොඩදැම්මෙ යූ.එන්.පී. ආණ්ඩුවක්

Qඇත්තද ඔබලත් සමගි ජන බලවේගයත් නැවත එක්වෙන්න යනවා කියන්නේ? ඔබ දැනුවත්ද?

සමගි ජන බලවේගයේ බහුතරයක් පහුගිය ජනාධිපතිවරයා පත්කර ගැනීමේ ඡන්දය වෙලාවේ තමන්ගේ ඡන්දය දීලා සහයෝගය දුන්නා. ඒ නිසා සජබයේ පිරිසක් ජනාධිපතිවරයාට සහාය ලබාදෙන්න බලාපොරොත්තුවෙන් ඉන්නේ. දැනටමත් එකතුයි. ඉදිරියේදී තවත් අය ඒ පක්ෂයෙන් එකතුවෙයි.

Q මෙතනදී යම් එකඟතාවයක් තියෙනවද රනිල් වික්‍රමසිංහ මහත්තයා ජනාධිපති අපේක්ෂකයා ලෙසත්, සජිත් ප්‍රේමදාස මහත්තයා අගමැති අපේක්ෂකයා ලෙසත් තරග කරනවා කියලා?

අපිට තවම ඒ ගැන නිල වශයෙන් දැනුම් දීලා නෑ. එහෙම නිල වශයෙන් දැනුම් දීමක් ආවොත් අපිට ඒ ගැන කතා කරන්න පුළුවන්. ඊට හැකියාව තියෙනවා.

Q ජනාධිපතිවරයාගේ ලොකුම සහාය සහ ජයග්‍රහණය පිටිපස්සේ ඉන්නේ පොහොට්ටුවේ පිරිස. දැන් සජබය එක්ක යන්නේ පොහොට්ටු දීගය ඉවරද?

නෑ. දැනටමත් පොහොට්ටුවේ පිරිස ජනාධිපතිවරයා එක්ක සහයෝගයෙන් වැඩකටයුතු කරනවා. දැන් මෙතන තියෙන්නේ පොහොට්ටුවද, අලියද, දුරකථනයද, මාලිමාවද කියන එක නෙමේ. රට ගැන ප්‍රශ්නයක්. රට ගොඩනැගීමට හැමෝම එකතුවෙන එකයි ජනාධිපතිතුමාගෙත් අපේ පක්ෂයෙත් පරමා‍ර්ථය වෙලා තියෙන්නෙ. ඒක වෙනුවෙනුයි අපි වැඩ කරන්නේ.

Q පොහොට්ටුවේ පිරිසක් පහුගිය කාලයේම ජනාධිපතිවරයා විවේචනය කළා. ඒක මේ තනතුරු අවුලක් නිසා නේද? නැත්තන් ඉවත්වෙන්නද?

නෑ. මම හිතන්නේ නෑ ඉවත්වෙනවා කියලා. අනික දේශපාලනයෙදී විවේචන තියෙනවා. ඒවා මැදහත් මතිමතාන්තර. ඒ විවේචන නිසා ඉවත්වෙන්න අදහසක් කා අතරත් නෑ. ඒ ප්‍රකාශ කිරීම් වැඩිය කවුරුත් ගණන් ගන්නේ නෑ.

Q 13 බලය බෙදීම පොහොට්ටුව සහ ඔබලා අතර බෙදීමක් තියෙන්නේ. ඒක ලොකු අවුලක් නේද? ඔවුන් කියනවා ජනාධිපතිට බලය දුන්නෙ බලය බෙදන්න නෙමේ කියලා?

ඒත් හැමදෙනාම එහෙම කියන්නේ නෑනේ.

Q ඒ කියන්නෙ පොහොට්ටුවේ පිරිසක් ඉන්නවා 13ට එකඟ?

ඔව් ඉතිං ඔබට පේනවනේ 13 ක්‍රියාත්මක කළ යුතුයි මතයේ ඉන්න අයත්, ඒ වගේම ඉස්සෙල්ලා ඔබ කිව්ව මතය දරණ අයත් වෙන වෙනම ඉන්නවා කියලා. ඒක ගැටලුවක් නෑ. ඒවා විවිධ මතනේ.

Q 13 ගැන පක්ෂ විපක්ෂ අදහස් ජනාධිපතිවරයා ඉල්ලලා තිබුණා. කොහොමද ප්‍රතිචාර?

ඒක ගැන හොයලා බලන්න ඕන. මොකද අපි ඉන්නේ පක්ෂ මූලස්ථානයේ. ඕක වෙන්නේ ජනාධිපති කාර්යාලයෙන්. නොදන්න දෙයක් කියන්න බෑ.

Q ජාතික ජනබලවේගය කියන්නේ ජනාධිපතිවරයා කියන්නේ ජනවරමක් නැති කෙනෙක්. ඔහුට බෑ තීරණාත්මක තීන්දු තීරණ ගන්න කියලා?

රට කරන්න එයාලට පුළුවන් නම් 2022 දී බාරගන්න එපැයි. ඒත් බාරගත්තේ රනිල් වික්‍රමසිංහ මහත්තයා. ඒත් ඒක බාරගන්නේ නැතුව ඒක මගඇරලා වහසි බස් කියන එක තේරුමක් නෑ. අපේ ගම්වලත් ඔය වගේ අය ඉන්නවා. වැඩේ මග ඇරලා ලොකු කතා කියන අය.

Q ඔවුන් කියන්නේ ඔබලා ඔක්කොම එකයි කියලා?

ඔව්. ඔක්කොම එකයි තමයි. අපියි එයාලයි හැබැයි එක වගේ නෑ. මොකද ජවිපෙ කියන්නේ මේ රටේ ආර්ථිකය විනාශ කරපු කණ්ඩායමක්. රට ගිනිතිබ්බා, රාජ්‍ය දේපළ විනාශ කළා. අද රටේ ඉන්න අයගෙන් අහන්නේ උඹලා මොනවද කළේ කියලා. ඒ කරපු දේවල් සියල්ල විනාශ කළ අය. දේපළ විතරක් නෙමේ ජීවිත පවා විනාශ කළා එයාලා. මම නම් කියන්නේ මේ කණ්ඩායම අපත කණ්ඩායමක්. ඒ අය කියන්නේ රස්සා කරන්න එපා කියලා. ජපානයේ කියන්නේ රිටයර් වෙන එක නෙමේ ටයඩ් නම් රිටයර් වෙන එක. ඒත් මෙයාලා කියන්නේ නෑ. මෙයාලට ඕන රට බංකොලොත් කරන්න?

Q ඉස්සර කියන්නේ අලියා ආවොත් කන්න තියෙනවා කියලා. දැන්නම් කන්න තියා හුස්ම ගන්නත් බෑ නේද?

2022 අප්‍රේල් බලන්න, ඒ වගේම දැන් බලන්න. එදා තෙල් නෑ, කන්න නෑ, ලයිට් නෑ, ඉගෙන ගන්න නෑ මේ හැමදේම. ඒත් ඒ එක ප්‍රශ්නයක් දැන් නෑ. දැන් හිතලා බලන්න අලියා ආවොත් කන්න නැද්ද කියලා. මේවා විසඳුවේ කවුද රනිල් වික්‍රමසිංහ මහත්තයා. හැමදාම අලියා ආවොත් කන්න දුන්නා අපි. ඒ නිසා ඒක ගැන තර්ක නෑ. හැමදාම රට බංකලොත් වෙච්ච රට ගොඩ දැම්මේ යූ.ඇන්.පී. ආණ්ඩුව. මතක තියාගන්න යූ.ඇන්.පී.ය පැරදුණු හැම දවසකම මිනිස්සු පැරදිලා තියෙනවා.

Q දැන් ඔබේ පක්ෂයේ ජනාධිපති අපේක්ෂකයා රනිල් වික්‍රමසිංහ මහත්තයද?

අපේ  විතරක් නෙමේ. මුළු රටේම ජනාධිපති අපේක්ෂකයා රනිල්. වැටුණු රට ගොඩ නැගුවේ එතුමා. එතුමා තමයි රටේම ජනාධිපති අපේක්ෂකයා.

I ගයාන් ගාල්ලගේ