පවිත්‍රාගේ ’’ඩබල් ටෝක්’’
මෑතකදී නවසීලන්තයේ සංචාරයක යෙදුණු පාර්ලිමේන්තු මන්ත්‍රීවරියන් කණ්ඩායම සඳහා වියදම් දැරුවේ කවුද යන්න සමහරු ප්‍රශ්න කළහ. ''අධ්‍යයන චාරිකාවක්'' වශයෙන් සඳහන් කෙරුණු මෙම චාරිකාව පිළිබඳ එම ප්‍රශ්නයට පසුව පාර්ලිමේන්තු මහලේකම්වරිය ප්‍රකාශයක් කරමින් කරුණු පැහැදිලි කර තිබිණි. එහිදී කියා තිබුණේ එකී චාරිකාව සඳහා රජයේ අරමුදල් වැය කිරීමක් සිදු නොවූ බවය.
පාර්ලිමේන්තු මහලේකම්වරියද මේ සංචාරයේ එක් සාමාජිකාවකි. ඇය තම ප්‍රකාශයෙන් මෙසේ හෙළි කර තිබුණි. ''එකී අධ්‍යයන චාරිකාව සංවිධානය කෙරුණේ රජයේ අරමුදල් වැය කිරීමකින් තොරව සංවර්ධන පාර්ශ්වකරුවන්ගේ සහායෙන්'' බව එහි සඳහන් විය.
පාර්ලිමේන්තුවෙන් නිකුත් කර තිබූ එම නිවේදනයට අනුව මෙම අධ්‍යයන චාරිකාව සඳහා සම්පූර්ණයෙන් අනුග්‍රහය දක්වා තිබුණේ ජාත්‍යන්තර සංවර්ධනය සඳහා වන අමෙරිකානු ඒජන්සිය (යූඑස්ඒඩ්) මගිනි. චාරිකා සංවිධානය ජාතික ප්‍රජාතන්ත්‍රවාදී ආයතනයෙනි. චාරිකාවේ අරමුණ වශයෙන් දැක්වුණේ ශ්‍රී ලංකාවේ දේශපාලනය තුළ කාන්තා නායකත්වය සවිබල ගැන්වීම වශයෙනි. පාර්ලිමේන්තු මන්ත්‍රීවරියන්ගේ සංසදය මගින් ශ්‍රී ලංකාවේ කාන්තාවන්ගේ අභිවෘද්ධිය සඳහා ගනු ලබන පියවර ශක්තිමත් කිරීමද එහි අරමුණු අතර විය.
සුදර්ශනී ප්‍රනාන්දුපුල්ලේ, සීතා අරඹේපොල, රෝහිණී කුමාරි කවිරත්න, පවිත්‍රාදේවි වන්නිආරච්චි, ගීතා සමන්මලී කුමාරසිංහ, තලතා අතුකෝරළ, රාජිකා වික්‍රමසිංහ, මංජුලා දිසානායක, හරිණි අමරසූරිය සහ පාර්ලිමේන්තු මහලේකම් කුෂාණි රෝහණධීර, පාලන සහකාර අධ්‍යක්ෂ ඉන්දිරා දිසානායක ද පාර්ලිමේන්තු මාධ්‍ය කළමනාකාරිණී නිම්මි හාතිඇල්දෙණිය ද මේ සංචාරයට සහභාගි වී සිටියහ.
මේ අවස්ථාවේ මෙසේ අමෙරිකානු ආධාර හොඳ වුණත් අමෙරිකාවෙන් ශ්‍රී ලංකාවට මිලේනියම් චැලේන්ජ් කෝපරේෂන් (එම්.සී.සී.) ආධාරය පිරිනැමීමට සූදානම් වූ අවස්ථාවේදී මේ ඇතැම් මන්ත්‍රීවරියන් සිදු කළ විවේචනය මහ විහිළුවක් වශයෙන් පෙනී යයි. මෙවර සංචාරයටද ආධාර සපයා ඇත්තේ අමෙරිකාවය. එම ආධාරයෙන් නවසීලන්තයට ගිය මේ කණ්ඩායමේ ඇතැම් මන්ත්‍රීවරියෝ එම්.සී.සී. ආධාරය වශයෙන් අමෙරිකානු ඩොලර් මිලියන 480ක් එදා පිරිනැමීමට සූදානම් වූ අවස්ථාවේ එය දැඩි ලෙස විවේචනය කළහ. එයින් එක් අයකු වූයේ පවිත්‍රා වන්නිආරච්චිය.
එදා අමාත්‍යවරියක වූ පවිත්‍රා 2019 අගෝස්තු 19 වැනිදා මාධ්‍ය සාකච්ඡාවක් කැඳවා යහපාලන ආණ්ඩුව එම්.සී.සී. ප්‍රදානය ලබාගැනීමට දැරූ උත්සාහය දැඩිව විවේචනය කරමින් ප්‍රකාශ කර තිබුණේ එම ගිවිසුම අත්සන් කළොත් අමෙරිකානු හමුදාවලට මේ රට ඇතුළේ පූර්ණ මුක්තියක් හිමිවනු ඇති බවය.
I සන්ඩේ ටයිම්ස්
