පැණි කෑම
''මේ වෙලාව බලය බෙදීමක් ගැන කතා කළ යුතු වෙලාවක් නොවෙයි. රටේ ආර්ථික ගැටලුවට විසඳුමක් නොදී 13 වැනි ව්‍යවස්ථාව ක්‍රියාත්මක කරන්න යාම සුදුසු වැඩක් හැටියට අපි හිතන්නෙ නෑ. කොහොමත් උතුරට නැගෙනහිරට ඉඩම්, පොලිස් බලතල දෙනවාට පක්ෂයක් හැටියට ශ්‍රී ලංකා පොදුජන පෙරමුණ විරුද්ධයි.''
ජනාධිපති රනිල් වික්‍රමසිංහ මහතා 13 සංශෝධනය ක්‍රියාත්මක කිරීම සම්බන්ධයෙන් සෙසු පක්ෂවල අදහස් විමසා කළ දැනුම් දීමට පොහොට්ටු ලේකම් සාගර කාරියවසම් දක්වා තිබුණේ එවැනි ප්‍රතිචාරයකි. අගෝස්තු 15 වැනිදාට පෙර ඒ ගැන අදහස් ලිඛිතව තමන්ට ලබාදෙන්නැයි ජනාධිපතිවරයා සියලු දේශපාලන පක්ෂවලට දැනුම් දී තිබුණේ බලය බෙදීම ගැන පාර්ලිමේන්තුවේදී කළ විශේෂ ප්‍රකාශයට පසුවය.
ඊට පෙර මේ ගැන සාකච්ඡාවට කැඳවූ සර්වපාක්ෂික සමුළුවද අවසන් වුණේ අසාර්ථක උත්සාහයක් හැටියටය. එයට හේතු වුණේද බලය බෙදීමක් ගැන කතා කිරීමට පෙර ඡන්දයක් පවත්වා ජනතාවගේ කැමැත්ත ඊට ලබාගත යුතු බවට විපක්ෂයේ පක්ෂ සියල්ලම වගේ ඉල්ලා සිටීම නිසාය. දැනගන්නට ලැබෙන තොරතුරු අනුව ජනාධිපතිගේ ඉල්ලීමට ප්‍රතිචාර වශයෙන් දේශපාලන පක්ෂ ගණනාවක්ම දන්වා ඇතැයි කියන්නේ බලය බෙදීමක් ගැන කතා කිරීමට පෙර අඩුම තරමින් පළාත් සභා ඡන්දය හෝ පවත්වා ජනතාවගේ කැමැත්ත ලබාගත යුතු බවය.
එහෙත් පොහොට්ටුව එහෙම ඉල්ලීමක් කරන්නේ නැත. ඔවුන් මේ වෙලාවේ ඡන්ද පැවැත්වීම සම්බන්ධයෙන් දරන්නේ ජනපතිගේම මතයයි. ඡන්දයක් තැබීමට කලින් රටේ ආර්ථිකය හදා ගතයුතු බව මේ දෙපාර්ශ්වයම කියයි. ජනාධිපති රනිල් නායකත්වය දෙන යූ.එන්.පී.යේ මාධ්‍ය සාකච්ඡා දෙන සියලුදෙනාම වරින්වර ප්‍රකාශ කරන්නේ ඒ අදහසමය. වජිර අබේවර්ධන මන්ත්‍රීවරයාත් මෑතකදී ආණ්ඩුකාර ධුරයකින් පිදුම් ලද හිටපු පාර්ලිමේන්තු මන්ත්‍රී සහ අමාත්‍යවරයකු වන නවීන් දිසානායකත් ඊටත් එහාට ගිහින් කියන්නේ ඉදිරි වසර 10 තුළම මේ රටේ ජනාධිපති ධුරය දරන්නේ රනිල් වික්‍රමසිංහ මහතා බවය. ඔවුන්ගේ මතයට අනුව ආර්ථිකය ගොඩගැනීමකින් තොරව රනිල් වික්‍රමසිංහ මහතා ධුරයෙන් යන්නේ නැත. මේ දෙදෙනාම ජනාධිපතිවරණයක් ගැන කියන්නේත් නැත.
රට ඇතුළේ දේශපාලනය ඉතා සූක්ෂම ලෙස හැසිරවීමේ අති දක්ෂයකු වන රනිල් වික්‍රමසිංහ මහතා කිසි විටෙකත් ඡන්දයක් ගැන කියන්නේ නැත. වරින්වර ජනාධිපතිවරණය පැවැත්වීම ගැන මත ප්‍රකාශ කළත් ඒ ප්‍රකාශවල කිසිම ගැම්මක් නැත. එහෙත් ලබන වසරේ මේ කාලය කියන්නේ ආණ්ඩුක්‍රම ව්‍යවස්ථාවට අනුව ජනාධිපතිවරණය සඳහා නාමයෝජනා කැඳවීමට ආසන්නම කාලසීමාවය. නිසි කාලයට ජනාධිපතිවරණය පවත්වන්නේ නම් ලබන අවුරුද්දේ ඔක්තෝබර් 19 වැනිදාට පෙර එය පවත්වා අවසන් කළ යුතුය. ඒ සඳහා සූදානම ඊට මාස කිහිපයකට කලින්ම ආරම්භ වන නිසා රනිල් වික්‍රමසිංහ මහතාට තම ජනාධිපති ධුරයේ සක්‍රියව කටයුතු කළ හැකි කාලසීමාව ඉදිරියට ඇත්තේ මේ වසරේ අවසන් මාස හතරක කාලයක් සහ ලබන අවුරුද්දේ මුල් මාස හතරක කාලයක් පමණි. ඊට කලින් ජනාධිපතිවරයා කරන දෙයක් කළ යුතුය. ජනාධිපතිගේ බලය රැඳී තිබෙන පොහොට්ටුවේ ආණ්ඩු පක්ෂය නියෝජනය කරන මන්ත්‍රී කණ්ඩායමක් මේ යථාර්ථයටම ඉදිරි මාස කිහිපය තුළදී මුහුණදීමට නියමිතය. ගන්නා හැම දේශපාලන තීන්දුවක්ම තමන්ගේ අනාගත ඉරණම විසඳීමට තීරණාත්මක වන බැවිනි.
මේ තිබෙන ඉදිරි කාලය තුළදී රටේ 13 වැනි ව්‍යවස්ථාව ක්‍රියාත්මක කිරීම හෝ වෙනත් බලය බෙදීමක් හෝ ගැන ඕනෑම තීන්දුවක් ජනාධිපතිවරයාට ගත හැකිය. එහෙත් ඒවා ක්‍රියාත්මක කිරීමට හැකිවන්නේ නැත. ඡන්දයක් පැවැත්වීමකින් තොරව බලය බෙදීමක් ගැන කතා කිරීමට විපක්ෂයේ දේශපාලන පක්ෂ එකඟ නොවන බැවිනි. උතුර සහ නැගෙනහිර දේශපාලන පක්ෂ වුවද බලය බෙදීමේ ක්‍රියාවලියේදී උපරිම කේවල් කිරීමකට යන බැවින් ඔවුන්ද ඡන්දයක් පැවැත්වීමෙන් පසුව ඒ ගැන සාකච්ඡාවකට යොමුවනු හැර මේ වෙලාවේ වෙනත් තීන්දුවක් ගනු ඇතැයි සිතිය නොහැකිය.
ඉදිරි මාස කිහිපය තුළදී ජනාධිපතිවරයා මුහුණ දෙන තවත් ප්‍රධානම ගැටලු කිහිපයක්ද තිබේ. එයින් පළමුවැන්න අයි.එම්.එෆ්. ඊළඟ ණය වාරිකයට අනුමැතිය ලබාගැනීමය. මුදල් රාජ්‍ය ඇමැති ෂෙහාන් සේමසිංහ පසුගියදා කියා තිබුණේ අයි.එම්.එෆ්. එක එම වාරිකය ලබාදීමට ක්‍රියාකරනු ඇති බවය. ජනාධිපති රනිල්ට එක එල්ලේම සහාය දක්වන ඒ වගේම ඊළඟ ජනාධිපතිවරණයේදී රනිල් තමන්ගේ ජනාධිපති අපේක්ෂකයා විය හැකි බවට අනාවැකි පළකරන ෂෙහාන් සේමසිංහ රාජ්‍ය අමාත්‍යවරයා මෙහෙම අනාවැකි කියන්නේ කොහොමදැයි දන්නේ නැත. එය ඔහුගේ අදහසද නැත්නම් ජනාධිපතිගේ අදහස ප්‍රකාශ කිරීමක්ද කියාත් කියන්න අමාරුය.
ෂෙහාන් සේමසිංහ මේ අනාවැකියට හේතු වශයෙන් කියන්නේ අයි.එම්.එෆ්. එකේ අවශ්‍යතා අතුරින් ප්‍රධානම ඒවා ඉටු කිරීමට ආණ්ඩුව පියවර ගත් නිසා ඊළඟ වාරිකය ලැබෙන බවය. දූෂණ මර්දනය, මූල්‍ය විනය පවත්වාගෙන යාම, විනිවිදභාවය ඇති කිරීම සහ රටේ ආර්ථිකය නිසි මාවතට අවතීර්ණ වීම එහි පියවර ඔහු උදාහරණ වශයෙන් දක්වයි. මේ නිසා අයි.එම්.එෆ්. වාරිකය ලැබීම ගැන ප්‍රශ්නයක් ඇති නොවන බව ඔහුගේ මතය විය.
එහෙත් පසුගිය දිනක ''වෙරිටේ රිසර්ච්'' ආයතනය ප්‍රකාශ කර තිබුණේ අයි.එම්.එෆ්. කොන්දේසි වලින් මේ වනවිට ඉටුකර ඇත්තේ සීමිත ප්‍රමාණයක් පමණක් බවය. දේශීය ණය ප්‍රතිව්‍යුහගත කිරීම වැනි සංකීර්ණ ක්‍රියාවලියක අවසානය ඉක්මණින් දැක ගැනීමට නොහැකි වීමද මෙහිදී ආණ්ඩුව මුහුණ දෙන ගැටලුවකි. නමුත් ආණ්ඩුවේ මාධ්‍ය නිරතුරුව ප්‍රකාශ කරන්නේ විදේශීය ණය ප්‍රතිව්‍යුහගත කිරීමට සියලු රටවලින් සහාය ලැබෙමින් පවතින බවය. පසුගිය දිනවල චීනයේ සංචාරයක යෙදුණ අග්‍රාමාත්‍ය දිනේෂ් ගුණවර්ධන මහතා ඇතැම් දූත පිරිස ගැන පළවූ වාර්තාවලින්ද දැක්වුණේ ශ්‍රී ලංකාවට ණය අර්බුදයෙන් ගොඩඒමට චීනය සහාය දක්වන බවට පොරොන්දු ලැබුණු බවයි. එය එසේ නම් ඉන්දියාවේත් චීනයේත් සහාය ශ්‍රී ලංකාවට ලැබෙන බව කිවහැකිය.
එහෙත් ජපානය සම්බන්ධයෙන්ද කළ එවැනිම ප්‍රකාශයක් ජපානය රාජ්‍ය තාන්ත්‍රික මට්ටමින් ප්‍රතික්ෂේප කරනු ලැබීම ආණ්ඩුවට ප්‍රශ්නයක් විය. ජපානය ලංකාවේ යෝජිත ආයෝජනයක් වූ සැහැල්ලු දුම්රිය ව්‍යාපෘතිය සඳහා ඉදිරිපත් වීමට කැමැත්ත පළකර ඇතැයි ශ්‍රී ලංකාව කළ ප්‍රකාශයට ප්‍රතිචාර දැක්වූ ජපානය කියා තිබුණේ ශ්‍රී ලංකාව ණය අර්බුදයෙන් ගොඩඑනතුරු ජපානය ශ්‍රී ලංකාවේ ආයෝජන සම්බන්ධයෙන් කිසිම තීන්දුවක් නොගන්නා බවය. ශ්‍රී ලංකාව සම්බන්ධයෙන් ජපානයේ තිබූ හොඳ හිත පළුදු වීමට බලපෑ සාධක තවමත් එසේම තිබීම ජපානය මෙවැනි ආකල්පයක් දැරීමට ප්‍රධානම හේතුව බව තේරුම් ගැනීම දුෂ්කර නැත.
ඊළඟට රට ඇතුළේ ගැටලුද එකින් එක ගොඩගැසෙමින් තිබේ. නියඟයට අදාළ ගැටලු විසඳීම සම්බන්ධයෙන් ආණ්ඩුව දැක්වූ උදාසීන ආකල්පය රටේ ගොවි ජනතාව මහත් කලකිරීමට පත්කර තිබේ. ගෝඨාගේ පාලනය අවසන් කිරීමේ මුල්ම ඇණය වැදුණේ ගොවීන්ට පොහොර නොලැබී යාමය. ගොවිතැනට ඊළඟට අවශ්‍ය වන්නේ වතුරය. වතුර නොලැබීම තරමක් දුරකට ඉවසීමට ගොවිජනතාව හැමදාමත් පුරුදු වී සිටියත් ප්‍රශ්නය අර්බුදයක් බවට පත්වෙන තුරු ආණ්ඩුව තීන්දුවක් ගැනීම ප්‍රමාද කිරීම ගොවීන්ගේ කනස්සල්ලට හේතු වී තිබේ. මෙවැනි සිදුවීම් ඡන්දයක් නොපැවැත්වෙන තුරු ගැටලුවක් නොවේ. එහෙත් ඡන්දයකදී රටේ ගොවි ජනතාවගේ ඡන්දය නොලැබෙන්නේ නම් එතැන ජයග්‍රහණයක් ගැන හිතන්නත් අමාරුය. ජනාධිපතිවරයාට මේ ගැන උපදෙස් දීමට කිසිවකු නොසිටියේද යන්න මෙහිදී මතුවන ගැටලුවයි.
ඊළඟට නොවැම්බරයේදී අයවැය ඉදිරිපත් කළ යුතුය. ඉදිරිපත් කළාට මදිය. එය සම්මත කර ගැනීමටත් අවශ්‍යය. ආණ්ඩුව ඇතුළේත් මතභේද තිබියදී එය තරමක අභියෝගයකි. අනෙක් අතට ලබන වසරේදී පැවැත්වීමට නියමිත ජනාධිපතිවරණය සඳහා අවශ්‍ය ප්‍රතිපාදන වෙන් කිරීමත් එම ප්‍රතිපාදන බාධාවකින් තොරව භාවිතයට ගැනීමටත් හැකිවන පරිදි විධිවිධාන අයවැයට ඇතුළත් විය යුතුය. පළාත් පාලන මැතිවරණයට සිදුවූ බාධා හිරිහැර ගැන දන්නා විපක්ෂය මෙහිදී ඒ ගැන දැඩි ලෙස සිය අවධානය යොමුකරනු ඇත.
එසේම විශේෂඥ වෛද්‍යවරුන් රට යාමද ආණ්ඩුව ඉදිරියේ පවතින තවත් බරපතළ ගැටලුවකි. මුලින් රටේ බෙහෙත් හිඟ විය. ඊළඟට වෛද්‍ය උපකරණ සහ වෙනත් සේවා අඩාල විය. දැන් විශේෂඥ වෛද්‍යවරු රට හැර යති. මේ ගැටලුවලට ''බයිලා'' පිළිතුරු ලබාදීමෙන් පළක් නැත. පිටරටින් වෛද්‍යවරුන් ගෙන ඒම, විශේෂඥ වෛද්‍යවරුන්ට රට යාම තහනම් කිරීම වැනි බාල බොළඳ පිළිතුරු ලබාදීමෙන් මේ ගැටලුව විසඳෙන්නේ නැත. එපමණක් නොව වෙනත් බුද්ධිමතුන් රට හැරයාමද අර්බුදයකි. මේ ගැටලුව මේ වෙලාවේ ආණ්ඩුව විසඳුවේ නැත්නම් ලබන වසර මුල වනවිට මේ ගැටලුව තවත් උග්‍රවීම වළක්වා ගත නොහැකිය.
අයි.එම්.එෆ්. දෙවැනි වාරිකය ලැබීමෙන් පමණක් මේ ගැටලු විසඳෙන්නේ නැත. ඒ සඳහා සැලසුම්සහගත වැඩපිළිවෙළක් තිබීම අවශ්‍යය. එහෙම එකක් දැනට නම් පෙනෙන්නට නැත. මේ ගැටලු දිගටම තිබුණොත් ජනාධිපතිවරයාටත් පොහොට්ටුවටත් ජනාධිපතිවරණයට යාමට සිදුවන්නේ මරණ තුනක් ඇති මිනිහෙක් පැණි කන ගානටය.
I ශශීන්ද්‍ර